Sel Taem el Omelatk me a Bltikerreng a Lmuut el Mo er Ngii

A RUUNGALEK me a resensei me a rebebil el blechoel el obengterir a rengalek a medengei el kmo ngdiak a ngii di el chad el sebechel el ngodechii a blekeradel er tia el beluulechad. Ngar er ngii a meklou el tekoi er a chelsel tia el beluulechad el di ua tsunami, el diak a chad el sebechel el torebengii. Me nguaisei, engdi ngngar er ngii a tekoi el sebeched el remuul el mo ngosuterir a rengeasek me ngmo er ngii a deurreng er tir e mesisiich a bedengir e ungil a klengar er tir.

A dolasem el olekebai a mekngit el omeruul a lmuut el ungil er a dosiik a semecheklel, misei a uchul e a ruungalek a kirir el mo ungil el melebedebek er a rolel a klengar er tir me a ike el meklou a ultutelel el tekoi er a klengar er tir, el ngii a sebechel el mo omekrael a uldesuir me a blekerdelir a rengelekir. Me a lsekum e ngngar er ngii a bltikerreng me a ulekerreu er a delengcheklir e tiang a sebechel el ngosuterir a rengalek el omekeroul a ungil el blekerdelir. A ta er a kot el klou a ultutelel el tekoi el lousbech er ngii a rengalek a sorir a debesterir a techall el mengedecheduch. A lsekum a ruungalek a diak el orrenges er a rengelekir e te mo osiik er a rengodech el chad el sebechir el orrenges er tir.

Me tiang ngera belkul el kirir a ruungalek er a chelechang? Ngkirir el ocheuekl a taem el obengterir a rengelekir sel ledirk mekekerei el sal lousbech er tir. E tiang a diak el beot el tekoi, e le ruungalek a meringel el oureor el mesiou er a telungalek er tir. Me nguaisei, engdi tirke el blak a rengrir el mengoit a temir el omekrael er a rengelekir a mlo sebechir el mesterir el ungilbesul a klengar er tir. Ngdirrek el sebechir a ruungalek el melasem el meruul aike el sebechir el omekrael er a rengelekir engdi lebebil er a taem e ngsebechel duubech a mondai el mo er a rengelekir.

A Remeklou el Chad me a Resechelid a Sebechir el Olengeseu

A mekemad me a mekngit el omeruul el mo er a rengalek el uldimukl er a oterebek a uchul me a ruungalek a kmal kirir el mo kerekikl el omekerreu er a rengelekir. A rengalek el mla chuarm a chouaika el mekngit el omeruul a kmal kired el oba kllourreng el olengeseu er tir. Me tia a belkul a kmo kede ousbech er a klou el taem el mengedecheduch er tir. E a osisiu el taem e ngdiak el kired el oltuub me a lechub e kede mengemikr er tir el ua lak a ultutelir el chad. Ngbai kmal kired el olecholt er a dmolech el bltikerreng me a delemedemek el reng el bedul tir.

Me a ruungalek me a resechelirir me a rechederir a kmal kirir el mo kerekikl a lomes a kora ngodech el teletael el dubechang er a blekerdelir a rengeasek. Me a lsekum a ngelekem a uaisei, e mereched el mo ngosuir el oeak sel mobengkel el chadecheduch. E moutekangel el orrenges er ngii a longedecheduch e molasem el oker er a uldesuel me bo el sebechel el ouchais a tekoi el ngar er a rengul. Me tirke el doumerang er tir el chedad me a resechelid a sebecherir el olengeseu er a ruungalek el chad engdi ngkirir el mo kerekikl me ngdiak lenguu sel deruchellel a chedam me a chedil. A rengeasek el melasem el di tir el melai a klengar er tir a olecholt el kmo te kmal ousbech a ngeso er a rechad er a blirir.

A ta er a kot el ungil el sengk el sebechel a chad el mesterir a rengeasek a sel ulterekokl el omelatk el kirel a klengar el ngar er a deurreng er a ngarmedad el klebesei. A rebetok el ngeasek a mla otuil a omeltkir er a telbiil el ngar er a Biblia el kirel a beches el blekeradel er a beluulechad el di kmedung el mo er ngii.

Mlosobel er a Uchei er a Lenguu a Klengar er Ngii

A ta el kekerei el redil er a beluu er a Siabal el mle blechoel el melatk el melai er a klengar er ngii a dilu el kmo: “Ak mle blechoel el melatk er tia el tekoi. E le sera kngalek e a chad el kuluumerang er ngii a mirruul er a mekngit el rolel a deleboes el me er ngak. . . . Me a ngar er a mong, e a  kmilluches a diak el mochur a ildisel el babier el melekoi a tekingek el kmo ‘Ngsoak el mo mad.’ Me a chelechang e ak mla mo ta er a Resioning er a Jehovah e mesiou el mui el taem, engdi a lebebil er a taem e tia el uldasu a mei er a uldesuek. . . . Me nguaisei, engdi a Jehovah a kongei er ngak mak melemolem el di ngar, e Ngii a ua longeluch er ngak el kmo, ‘Molemolem el di ngar.’”

A 15 a rekil el ekebil er a beluu er a Rosia a mesaod el kmo: “Sera le 8 a rekik e ak mlo omdasu el kmo ngdiak a chad el kmo ngak. A demak me a delak a dimlak a temir el mengedecheduch er ngak me ngdi mle ngak el mesmechokl a mondai er ngak. Me ngkmal mlo chuarm a renguk mak di mle blechoel el outoketok er a rechedak. Me ngmlo er ngii a taem el mle soak el melai er a klengar er ngak. Engdi ngkmal mlo ungil a renguk er a bo kudengelterir a Resioning er a Jehovah!”

A Cathy el 30 me a derengel a rekil er a beluu er a Australia a melekoi el kmo ngkmal dimlak a omeltkel el kirel a klengar, engdi a tekoi el dilubech a milsang a ungil el omelatk er a ledu el kmo: “Ak mle blechoel el melatk a kakerous el rolel e ak knguu a klengar er ngak e sola e mlo melasem er a ta er ngii el tekoi. Ngmle soak el mo cheroid er tia el beluulechad el di mui er a ringel me a ngasechereng me a diak a ultutelel el tekoi. A ringelel a uldesuek a uchul e ngmlo meringel er ngak el mesmechokl a mondai er ngak me ak ulemdasu el kmo ngbai ungil ak kedebengii a klengar er ngak.

“Sera krenges el kmo tia el chutem a mo obult el mo paradis me a rokui el chad a mo oldeu a rengrir er a budech, e ak kmal uluureng er ngii. Engdi ak dirrek el ulemdasu el kmo tiang a di berrous el tekoi. Me nguaisei, engdi ak mlo medengelii a osengel a Jehovah el kirel a klengar me a kerresel a klengar er a derta me a derta er kid. Me ngmlo ulterekokl a omeltkek el kirel a ngar medad el taem, me ngmlo sebechek el mesmechokl er a mondai er ngak. E tiang a dimlak el beot el tekoi e le a lebebil er a taem e a ringelel a uldesuek a meskak a rraurreng. Engdi ak milecherei a Jehovah me ngomekrael er ngak el mo kmeed er ngii me ak mo selebechakl. Ak kmal mereng a sulel a Jehovah el kirel a rokui el tekoi el bla el rruul el kirek.”

Ngdikea Rengeasek el Melai a Klengar er Tir

Ngoeak a omesubel a Biblia, e a rengeasek a mo medengei el kmo ngar er ngii a ungil el tekoi el sebechir el melatk el kirel, el ngii a “meral klengar” el ua longelechel a apostol el Paulus el mo er a Timoteus el kmo: “Mongelechel rar merau er tial belulechad, . . . ma ka lulsirs chomeltkir ra diak lulterekokl kerruul, e bai lolsirs chomeltkir ra Dios, el ngii a kudmokl a bek el tekoi el kired el olsibes el oldeu a rengud. Mdu er tir me loruul a ungil, e bo le merau ra ungil lurreor, . . . me lsmecheklii a ungil lomekedecheraol el kirir el kudmeklii a ngar medad, me bo lsebechir el nguu a klengar, el meral klengar.”​—1 Timoteus 6:17-19.

A belkul a uleklatk er a Paulus a kmo ngkired el mo ngosuterir a rebebil el mo oba sel omelatk el kirel a ngar er medad el taem. El ngii a sel omelatk er a “meral klengar” el bla el tibir a Jehovah el mo er ngii er a chelsel a “beches el eanged ma beches el chutem.”​—2 Petrus 3:13.

A rebetok el ngeasek el uluusbech a mekngit el kar e ngar er a deleboes el omeruul a mlo medengei el kmo aikang a sebechel el mo uchul a kodellir, el ua di el tir el melai a klengar er tir. Te dirrek el mlo melechesuar el kmo tia el beluulechad el mui er a klaumekemad me a kltui me a mekngit el omeruul, el diak a bltikerreng er ngii, a di kmedu el mo nguemed. Te dirrek el mla suubii el kmo ngdiak a sebechel el sumecheklii tia el blekeradel er a beluulechad el ngar er ngii er a chelechang. Me nguaisei, engdi a rokui el bekongesenges el chad el uldimukl er a rengeasek a mla oterekokl a rengrir el kmo ngdi ta el Rengedel a Dios a meskid a mera el omelatk el kirel a beches el beluulechad el bo dekiei er ngii el mo cherechar, misei e ngdikea a kodall.​—Chocholt 21:1-4.