A Tekoi el Mo Obeketakl er a Sils er a Jehovah

“Ngdi sils ra [Jehovah] a mei el ua tal merechorech, . . . ma chutem ma ikel ulebeob er ngii a meseseb el nguemed.”​​—2 PETRUS 3:10.

1, 2. (a) Ngmo uangerang a ulebongel er tia el mekngit el blekeradel er a beluulechad er a chelechang? (b) E ngera el ker a bo dosaod?

 TIA el mekngit el beluulechad er a chelechang a meketeklii sel blulak el tekoi el kmo, a chad a sebechel el mengedereder er a beluulechad el ileakl er a Jehovah. (Psalm 2:2, 3) Ngsebechel a blulak el tekoi el melemolem el ngar er ngii? Ngkmal diak! Me nguaisei, tia el ulebongel er a beluulechad er a Satan a diak el sebechel el di ngii el mo nguemed. Ngbai mo nguemed el oltirakl er sel telutk el temel a Dios el ngar sel rolel er ngii. A tekoi el bo loruul er ngii a Dios el kirel tia el mekngit el beluulechad a mo meketeklii a llemeltel me a bltkil a rengul.​—Psalm 92:7; Osisechakl 2:21, 22.

² A apostol el Petrus a milluches el kmo: “Ngdi sils ra [Jehovah] a mei el ua tal merechorech, isei e a eanged a morngii a kloul derremkel e nguemed, ma cheldellel a eanged a meseseb el meterakl lobriid, ma chutem ma ikel ulebeob er ngii a meseseb el nguemed.” (2 Petrus 3:10) Ngera el “eanged” me a “chutem” a losaod er tiang? E ngera el “cheldellel a eanged” a mo meseseb el nguemed? E ngera mle belkul a tekingel a Petrus el kmo: “Ma chutem ma ikel ulebeob er ngii a meseseb el nguemed”? Me a bo dodengei a nger er aika el ker e ngngosukid el mo kltmokl el kirel tia el kdekudel el sils el di kmedu el mo er ngii.

A Eanged me a Chutem el Mo Nguemed

3. Ngera belkul a “eanged” el losaod er ngii a 2 Petrus 3:10, e mekera tia el “eanged” e mo nguemed?

³ Ngar er a Biblia e a tekoi el “eanged” a blechoel el melutk el kirir tirke el mengedereder el tir a kuk ngarbab er tirke el chederedall. (Isaia 14:13, 14; Chocholt 21:1, 2) Me tia el “eanged [el ngii a mo] nguemed” a ometechei aika el kabelment el ngii a mengedereder er tia el diak el loudios el beluulechad er a chelechang. A ngemedel aika el kabelment er a rechad a mo “klou [a] derremkel” el belkul a kmo a telemellel a kmal di mereched.

4. Ngerang a “chutem,” e ngmekerang e mo nguemed?

⁴ A “chutem” a omtechei er a klechad el cheroid er a Dios. A klechad er sel taem er a Noah a ngilemed er a Ieleb el uleltirakl er a meirei er a Jehovah. “Ngdi eanged ma belulechad er chelechang a ulekedelad er ngiil osisiul omelekingel a Dios, el di uaisei lulekedelad el mo lmuut er sel sils el le mukerrekeriil tirikel diak loluu ra Dios e le ngemed, e ngii a medul ra ngau.” (2 Petrus 3:7) Me nguaisei, a Ieleb a di mle ta el taem e ngolekngemed er a remechebirukel, e a telemellel tia el mekngit el blekeradel er a beluulechad er a chelechang a mei el okiu a “kloul ringel.” (Chocholt 7:14) Sel lomuchel a klou el ringel, e a Dios a rulleterir a remengeteklel a balatiks er tia el beluulechad me te mo okngemedii a “Kloul Babilon,” el olechotel a ngesechel a rengul el kirel ngika el tingaol dil. (Chocholt 17:5, 16; 18:8) E ngar er a ulebengelel a klou el ringel e a Jehovah a mo okngemedii tia el beluulechad er a Satan el okiu sel mekemedil el Armageddon.​—Chocholt 16:14, 16; 19:19-21.

“Cheldellel a Eanged . . . a Meseseb el Nguemed”

5. Nguldimukl er a ngerang a okesiu el cheldellel a eanged?

⁵ Ngerang a “cheldellel a eanged” el mo “meseseb el nguemed”? A dictionary er a Biblia a mesaod er a belkul a “cheldellel a eanged” el ua “kot el llach” me a lechub e “nguchetemel a tekoi.” Me tia el tekoi a belkul a kmo, “ngmle usbechall a ABC el ua uchetemel a tekingir a  rechad.” Me a “cheldellel a eanged” el lulsaod er ngii a Petrus a melutk el kirel a tekoi me a omeruul me a blekeradel me a moktek el lolisiich tia el mekngit el blekeradel er a beluulechad. Me a “cheldellel a eanged” a uldimukl er a “reng ra belulechad” el ngii a “oureor er chelechang ra chelsir ar ngalek er chorrengesmengoit.” (1 Korinth 2:12; monguiu er a Efesus 2:​1-3.) Tiaikid el reng me a lechub e ng “klisiich ra milidiul” a melisiich er a beluulechad er a Satan. Ngmeruul er a rechad el mo omdasu, e melib a tekoi, e mengedecheduch, e dirrek el meruul a tekoi el oltirakl er a uldesuel a Satan, el ngii a kedidai a rengul e soal el omtok e “merreder loba klisiich ra milidiul.”

6. Ngmekerang e mocholt a reng er tia el beluulechad?

⁶ Me nguaisei, a lodengei me a lak, me tirke el chad el chiltikaik er a reng er tia el beluulechad a mecherei a Satan me ngmengesuseu a uldesuir me a rengrir me te mo omdasu, e dirrek el meruul a tekoi el oltirakl er ngii. Misei e te mo meruul aike el di sorir el diak el oltirakl a soal a Dios. Ngkldidiul a rengrir ma rechorecherreng er tir a rulleterir el mo meruul a tekoi el omtok a dereder el mo uchul me te mechetikaik er a “ngibes ra tech, ma ngibes ra mad.”​​—Monguiu er a 1 Johanes 2:​15-17.

7. Ngera uchul me ngkired el mo ‘kerekikl er a uldesued’?

⁷ Ngkmal klou a ultutelel el bo de ‘kerekikl er a uldesued’ el oeak sel doltaut a llechul a Dios, e dungil el melilt er a resechelid me a babier el donguiu me a tekoi er a ongelaod el domes e ousbech, me a dirrek el usbechel a Web site el ngar er a Internet! (Osisechakl 4:23) A apostol Paulus a milluches el kmo: “Bo le blak a rengmiu me lak mudechem ra bechachau lomengeblad el llomeserreng el mengetiit ra belulechad, e tia diak loltirakl ra Kristus, e ngbai di oltirakl a uldedelid el cheldecheduch rar chad el oltirakl a ikel reng ra belulechad.” (Kolose 2:8) Tia el uleklatk a mla lmuut el kmal mo orechudel er a chelecha el lolekedang a sils er a Jehovah, me tia el kleldelel a sils a mo okngemed aika el “cheldellel a eanged” er tia el blekeradel er a Satan, el ochotii el kmo ngdiak el sebechir el dechor el mtekengelii a klisichel a ngesechel a rengul a Jehovah. Me tiang a omeklatk er kid er a tekoi el medung er a Malakai 4:1 el kmo: “Mesang, sel sils a mermang el tirkel rokui el mekedidai a rengrir ma re dengerenger el chad a mo meseseb el di mo diak a mo medechel er tir.”

“Chutem ma ikel Ulebeob er Ngii a Meseseb el Nguemed”

8. Ngmekerang a beluulechad er a Satan me a urerel a “meseseb el nguemed”?

⁸ Ngera mle belkul a tekingel a Petrus er a loluches el kmo a “chutem ma ikel ulebeob er ngii a meseseb el nguemed”? A tekoi el “meseseb el nguemed” a sebechel el belkul a kmo “meseseb el di mo diak a mo medechel er tir.” Me a belkul a tekingel a Petrus a kmo ngar sel taem er a klou el ringel e a Jehovah a mo okngemedii a beluulechad er a Satan, e dirrek el meketeklii el kmo ngii el Satan a omtok er a Dios me a Rengedel, me ngredemelel a mo obals. Me a ulochel a Isaiah 26:21 el kirel sel taem a kmo: “A [Jehovah] a ngar a blil er a eanged el me omals er a re chad er a beluulchad el kirel a kngterir. A ikel mle berrotel el okodellir a re chad er a beluulchad a mo chemolt, ma chutem me ng mo diak lomart er tirkel mlad.”

9. (a) Ngera el tekoi a kired el oltngakl, e ngera uchul? (b) Ngera el tekoi a kired el meleketek, e ngera uchul?

⁹ Sel sils er a Jehovah e tirke el kiei el oltirakl er tia el mekngit el reng er a beluulechad a obeketakl a mera el blekerdelir e le te mo kaumekemad er a delongelir. Me nguaisei, aika el betok el tekoi er a ongelaod el melisiich a koadelchad er a chelechang a mla chouid a rengrir a rebetok me ngmo “diak lodenge loruul e mo medakt me te di tir el mo kakoad.” (Sekaria 14:13) Me ngkmal klou a ultutelel el bo dekerekikl a tekoi el domes, me a babier el donguiu, me a klekool er a video, me a lmuut el bebil, el ngii a sebechel melisiich a tekoi el louketui a Dios, el ua kldidairreng, me a kdekudel el omeruul! (2 Samuel 22:28; Psalm 11:5) Bai doleketek a rodech er a reng er a Dios, e le choua ikaikid el blekeradel a mo sebechel el ngosukid el mo suobel er sel sils er a kerrekerilel a Jehovah.​—Galatia 5:22, 23.

 A “Beches el Eanged ma Beches el Chutem”

10, 11. Ngerang a “beches el eanged ma beches el chutem”?

¹⁰ Monguiu er a 2 Petrus 3:13. A “beches el eanged” a Rengedel a Dios el ngar er a eanged, el mildalem er a rak er a 1914 er sel taem er a “bo le mecherrungel a taem rar Chisentail.” (Lukas 21:24) Tia el ileakl el kabelment a longedereder er ngii a Kristus Jesus me tirke el 144,000 el mo mengedereder el obengkel, el oumesingd er tir a mla nguu a okedong el mo er a eanged. Ngar er a babier er a Chocholt e ngmesaod er tirka el ngellitel el kmo: “E milsa chedaol mats, el beches el Jerusalem el tilobed ra Dios e metengel ra eanged, el mle ua blsiochel hanayome el kldmokl el kirel a bechil.” (Chocholt 21:1, 2, 22-24) Me ngdi ua Jerusalem er tia el chutem el ngii a mle kabelment er a Israel er a irechar, me a Beches el Jerusalem me a Hanamuko er ngii a toketekii a kabelment er a beches el blekeradel. Tia el mats a me “metengel ra eanged” el mo mengedereder er tia el chutem.

¹¹ Tia el “beches el belulechad” a melutk el kirel a beches el klechad el ngii a mla kongei el mo chederedall er a Rengedel a Dios. Me a paradis er a klereng el rechedal a Dios a oldeu a rengrir er ngii er a chelechang a di kmedung el mo meteketek er a chelsel tia el merael el mei el klebokel el “belulechad.” (Hebru 2:5) Ngmekerang e mo sebeched el mo chedal tia el beches el blekeradel?

Mketmeklau el Kirel a Klou el Sils er a Jehovah

12. Ngera uchul me a sils er a Jehovah a mo okibeteklii a beluulechad sel lemei?

¹² A Paulus me a Petrus a di dul ulemlaoch el kmo a sils er a Jehovah a mei el “ua merechorech” el diak dolechesuar. (Monguiu er a 1 Thesalonika 5:​1, 2.) Ngmo lmuut er a remera el Kristiano el tir a mengiil er tia el sils me te dirrek el mo kibetiekl er sel taem el lemei. (Matteus 24:44) Me a beluulechad a dirrek el mo melechesuar a klou el omelodech el mo er ngii. A Paulus a milluches el kmo: “Sel lolekoi ar chad el kmo, ‘Ngbudech, ngdiak de mekesakl,’ ma tellemall a mor tir el ua rngelel a cheroll a le bora dioll, e kmal diak a sebechel chemiis er ngii.”​—1 Thesalonika 5:3.

13. Kede mekerang e diak de becherei a tekoi el kmo: “Ngbudech, ngdiak de mekesakl!” me longeblad er kid?

¹³ Sel klou el tekoi el kmo: “Ngbudech, ngdiak de mekesakl!” a ta er a blulekngir a remekngit el reng engdi ngdiak el sebechel el mengeblad er a remesiungel a Jehovah. A Paulus a milluches el kmo: “Ngdi, rudam, kemiu a dikea mngara chelsel a ilkolk, me sel sils a diak le mei lomdechem er kemiu el ua le me merechorech. Ele kemiu el rokui a ngalek ra llomes e ngalek ra cheldecheos.” (1 Thesalonika 5:4, 5) Misei e dolemolem el merael er a chelsel a llomes el cheroid er a ilkolk er a beluulechad er a Satan. A Petrus a milluches el kmo: “Kemiu el betik ra renguk, chelechal diba bocha modengelii itiang, e mongkar er kemiu me lako mechetikaik ra cheludul a diak a llechul, [el tirke el klsuul el sensei el ngar er a chelsel a ongdibel er a Rekristiano] me lak moridii a ulterekokl reng er kemiu.”​—2 Petrus 3:17.

14, 15. (a) Ngmekerang a Jehovah a lomekrael er kid? (b) Ngera el mlukreng el tekoi a kired el omtab?

¹⁴ Molatk el kmo a Jehovah a diak di ldu er kid el kmo: “mongkar er kemiu” el merekong. Ngbai omekrael er kid sel lebeskid a ‘klemedengei’ el  oeak a mekekerei el olechotel aike el tekoi el mo duubech er a ngar er a medad el taem.

¹⁵ Ngklengiterreng e le a rebebil a mla mo diak el kerekikl me a lechub e te oumededenger er a uleklatk el kmo ngkired el melemolem el mengkar. Te locha mo melekoi el kmo ‘aika di osisiu el uleklatk er a irechar el mei.’ Me tirke el uaisei el chad el oba tia el uldasu a di ua lak loumerang er a Jehovah ma Ngelekel, el uldimukl er a ngike el blak a rengul el mesiou. A Jehovah a kmo: “Di mongiil er ngii.” (Habakuk 2:3) Me a Jesus a dirrek el dilu el kmo: “Misei e mongkar, e ngdiak modengei el kmo a Rubak er kemiu ngmei er choingeral sils.” (Matteus 24:42) A Petrus a dirrek el milluches el kmo: “Ngkol uangera chedaol blekeradel ma chomeluu ra Dios el kiriu lobang, el mengiil a le me klsel a Dios.” (2 Petrus 3:11, 12) A blak a rengul el mesiou me a Chelechad er a Ruungerachel a diak a ta el taem el bo lebeot a osengir el kirel aika el meklou a ultutelel el tekoi!

16. Ngkired el kerekikl el mengeroid er kid er a ngera el uldasu, e ngera uchul?

¹⁶ Ngbleketakl el kmo ngike el “mekngit el mesiou” a melekoi el kmo a Mastang a omekmeoud er ngii. (Matteus 24:48) A mekngit el mesiou a chedal sel cheldebechel el losaod er ngii a 2 Petrus 3:3, 4 el kmo: “Ar melenguul a me duum ra ikel uriul sils el melenguul” er tirke el kerekikl el melatk er a sils er a Jehovah. Chouai tirika el chad a diak lolatk er a Jehovah me a Rengedel e bai di melatk aike el sorir me aike el mo uchul a klungiolir. Me bo dekerekikl me lak debechei aika el kdekudel el uldasu me bo longitikaik a uldesued! E bai ‘domdasu ra kllourreng ra Rubak er kid el kmo ngkirel chosobeled’ el oeak sel dolemolem el omerk er a klumech er a Renged e doruul er a remo disaiplo, e lak dongesang a uldesued el kirel aike tekoi el mo duubech el ngii a ngerechelel a Jehovah el Dios.​—2 Petrus 3:15; monguiu er a Rellir 1:​6, 7.

Moumerang er Ngike el Dios er a Osobel

17. Te milekerang a reblak a rengrir el Kristiano e otireklii a uleklatk er a Jesus er a lechiis er a Jerusalem, e ngera uchul?

¹⁷ Sel taem el resoldau er a Rom a siliseb er a beluu er a Judea er a 66 el rak er a taem er kid, e tirke el blak a rengrir el Kristiano a ultireklii a uleklatk er a Jesus er a lechiis er a mats er a Jerusalem er sel kot el mereched el taem. (Lukas 21:20-23) Ngera uchul me te di mle mereched el chemiis? Kede medengei el kmo te mle kerekikl el oltirakl er a uleklatk er a Jesus. Te dirrek el mle medengei el kmo a tekoi el bo loruul a sebechel el mo uchul a ringel el mo er tir el ua lullekoi a Kristus. Me nguaisei engdi te mle medengei el kmo a Jehovah a diak bo lecheroid er a reblak a rengrir el mesiungel.​—Psalm 55:22.

18. Ngmekerang a tekingel a Jesus el ngar er a Lukas 21:25-28 e smisichau el kirel tia el merael el mei el klou el ringel?

¹⁸ Kid me ngdirrek el kired el mo mui el oumerang er a Jehovah e le ngdi Ngii el tang a sebechel  el osebelid er tia el merael el mei el klou el ringel, el dirkak a ta el lebo er ngii er a chelsel a reksi er a klechad. Uchei er a lomuchel a klou el ringel, engdi nguchei er a bo loukerrekeriil er a beluulechad el rokir a Jehovah, e a rechad a mo “diak lolechesuterir er a dakd sel bo lolebedebek a ikel mochu er ngii ra belulechad.” Me sel taem el omritel er a dakt a recherrouel a Jehovah el Dios e a reblak a rengrir el mesiungel a diak a dektir. Te oldeu a rengrir e le te medengei el kmo a ngubet er tir a kmedang.​—Monguiu er a Lukas 21:25-28.

19. Ngera kede mo mesaod er a ongingil el suobel?

¹⁹ Nguaisei, ngkmal klou el ileakl el techall a ngar er ngii el kirir tirke el mengeroid er tir er a beluulechad me a “cheldellel a eanged”! A ongingil el suobel a mo smodii el kmo, a lsekum e ngsoad el mo nguu a klengar e ngkired el meruul a lmuut el betok er a di dongeroid er kid er a mekngit. Ngkired el omekeroul aike el blekeradel el lodeuir a rengul a Jehovah e meruul aike el tekoi el Ngii a kongei.​—2 Petrus 3:11.

Ngsebechem el Mesaod?

• Ngera el tekoi a omtechei a . . .

‘eanged ma chutem’ er a chelechang?

“cheldellel a eanged”?

“beches el eanged ma beches el chutem”?

• Ngera uchul me kede mui el oumerang er a Dios?

[Aike el Ker er a Suobel]

[Siasing el ngar er a 13 el llel]

Ke mekerang e mo “kerekikl er a uldesuem” e melemolem el mengeroid er kau er a beluulechad?

[Siasing el ngar er a 14 el llel]

Kede mekerang e ochotii el kmo kede ‘omdasu ra kllourreng ra Rubak er kid el kmo ngkirel chosobeled’?