Bo Leblak a Rengmiu el Meruul er a Remo Disaiplo

“Mo blak a rengmiu ra urerel a Rubak.”​—1 KORINTH 15:58.

1. Ngera el okedong a ledillii a Jesus el mo er a redisaiplo er ngii?

 NGAR er a omerolel el mo er a beluu er a Samaria er a ulebengelel a 30 el rak er a taem er kid, e a Jesus a mlo olengull er a bita er a chido er a beluu er a Sihar. Ngar isei e ngdilu er a redisaiplo er ngii el kmo: “Mokiis a medemiu el mesa sers el medechang el mengiil er chomeridm.” (Johanes 4:35) A belkul a tekingel a Jesus a dimlak lolekoi el kirel a mera el omeridm er a sers, e ngbai millekoi el kirel a ureor el meruul er a remo disaiplo er ngii. A tekingel a mle okedong el mo er a redisaiplo er ngii el mo teloi er tia el ureor. Ngkmal klou a ureor el ketmekill e di kedeb a taem el meruul er ngii!

2, 3. (a) Ngera ochotii el kmo kede kiei er a taem er a omeridm? (b) Ngerang mo mesaod tia el suobel?

² A tekingel a Jesus el kirel a omeridm a ngar er ngii a ileakl el belkul el kired. Kede kiei er a taem el klechad a ua “sers el medechang el mengiil er chomeridm.” Bek el rak e a rebetok el miliol el chad a nguu a okedong el mo mesuub er a klemerang el kirel a klengar, me te betok el telael a mo metecholb el mo disaiplo. Me nguaisei, kede oba a ileakl el techall el mo teloi er tia el ureor el ngar cheungel a ulekrael er a Mastang er a omeridm el Jehovah el Dios. Me kau, ng ‘blak a rengum’ el meruul er tia el ureor?​—1 Korinth 15:58.

³ Ngar er a chelsel sel edei el rak me a tedobech el omesiungel a Jesus er tia el chutem, e ngmlo ungil el osisecheklterir a redisaiplo er ngii el mo meruul er a remo disaiplo. Tia el suobel a mo mesaod a edei er aike meklou a ultutelel el suobel el Jesus a ulisechakl er a redisaiplo er ngii. A derta er aika el suobel a mesaod a tekoi el meketeklii el mei er kid sel klungel a ultutelel a debo er aike el sebeched el mo teloi er a ureor el meruul er a remo disaiplo er a chelecha el taem. Me bo dosaod a derta er aika el tekoi.

A Klengariourreng a Klou a Ultutelel

4. A Jesus ngmilekerang er a losaod er a klungel a ultutelel a klengariourreng?

⁴ Ka di molatk er tiang: A redisaiplo a kaititekangel er a delongelir el kmo, ngtecha er tir a kot el ngarbab. Ngsebeched el melechesuar el kmo te mla mo kaiuengasechereng. Me a Jesus a ulekerir a ngalek el me dechor er a delongelir e dilu el kmo: “Ngikel ua ngikal kekerel ngalek el meruul er ngii el ngariou, a kot el ngarbab ra rengedel a eanged.” (Monguiu er a Matteus 18:​1-4.) A redisaiplo a kirir el mo medengei el kmo a klisichir a diak el ultuil er a klisiich me a ilteet me a ngarbab el deruchall el ua uldesuel tia el beluulechad, ngbai kirir el mo ngariou a rengrir el ua ‘kekerei el ngalek.’ Me a Jehovah a mo omekngeltengat e dirrek el ousbech er tir a lsekum te olecholt er a klengariourreng.

5, 6. Ngera uchul me ngkired el mo ngariou a rengud me bo el sebeched el teloi er a ureor er a omeridm? Momekesiu.

⁵ El me lmuut er chelechang e a ruumesingd el chad a tonget a klengar er tir el osiik a chetengakl me a ilteet me a ngarbab el deruchall. Me tiang a mo uchul e ngmla mo kedeb a temir a rechad el mesuub a tekingel a Dios e mesiou er ngii. (Matteus 13:22) Me nguaisei, engdi a rechedal a Jehovah a dmeu a rengrir el olecholt er a klengariourreng el mo er a rebebil me bo el sebechir el ngmai a klengeltengat me a kengei er ngike el Mastang er a omeridm.​—Matteus 6:24; 2 Korinth 11:7; Filipi 3:8.

⁶ Ka molatk er a kerebil a Francisco el ngii a mesiou el ta er a remechuodel er a ongdibel er a beluu er a South America. Ngchilitii a ngarbab el skuul me bo el sebechel el mo mesiou el mui el taem. Ngmelekoi el kmo: “Ngmle sebechek el metik er a ngarbab el ureor el sebechel mesiou er ngak me a bechik. Engdi aki tilbir el terung el mo  omekbeot a klengar er kemam me bo el sebecham el melemolem el ngar er a mui el taem el omesiou. Ngtelkib el mlo meringel er a uriul er a lebocha er ngii a rengalek. Engdi a Jehovah a ngilsukemam el outekangel e lomelemii a telbilam el mo er ngii.” Ngliluut el dochelii el kmo: “Chelechang e ngdmeu a renguk el mla mo 30 el rak el kusiou el diak di kta er a remechuodel e ngdirrek el ngar er ngii a lmuut el bebil er a ngerechelek. Ngkmal diak ki mouuchel a rengmam el kirel tia el beot el rolel a klengar er kemam.”

7. Kau, ke mla melasem el oltaut er sel uleklatk el ngar er a Rom 12:16?

⁷ A lsekum e ngmo diak “le ngarbab a uldesuiu” el kirel tia el beluulechad e “bai bo mobenterir ar ngariou” a rengrir, e ngmo dmeu a rengmiu e ngmai a betok el klengeltengat me a ileakl el techall el meruul er tia el ureor er a omesiou.​—Rom 12:16; Matteus 4:19, 20; Lukas 18:28-30.

A Blakerreng a Mo Uchul a Betok el Klungiaol

8, 9. (a) Mosaod er sel okesiu er a Jesus el kirir a retedei el mesiou. (b) Me tia el okesiu ngkmal ileakl el melisiich er a rua techang?

⁸ A ta er a blekeradel el kired el ousbech er ngii el meruul er tia el ureor er a omesiou, a blakerreng. A Jesus a ulemeketakl er tia el tekoi er a lousbech er a okesiu el kirir a retedei el mesiou. * Tia el okesiu a kirel a chad el mochu er a omerael me ngmai a daisang er ngii el mesterir a retedei el mesiungel. Ngmilsa ngikel kot el mesiungel a kleim el udoud, e ngike el ongerung a lebilsa teblo el udoud, e a ongedei a lebilsa chimong. A uriul er a lorael a mastang, e tirke el teru el mesiou a di mle mereched el “mo mengereker.” Engdi ngike el ongedei a mle “mesaik el mesiou!” Me ngngiluu a udoud el mo doklii. Me a luuturiul er ngika el mastang e ngmillilt er tirke el terung el mesiou el mo “mengedereder a betok.” E sola e ngiluu a udoud er ngike el ongedei el mesiou e uldikii er a delengcheklel.​—Matteus 25:14-30.

⁹ Ngulterekokl el kid el rokui a soad el mo oukerebai er tirke el blak a rengrir el mesiou e mo teloi er tia el ureor el meruul er a remo disaiplo. Engdi ngkuk mekerang a lsekum a blekerdelel a klengar er kau a mo uchul e ngdiak el sebechem el meruul er tia el ureor? Me a lechub e ngmekngit el keizai a uchul me ngmo kirem el oureor el betok el sikang me bo el sebechem el mesiou er a telungalek er kau. Me a lechub e ngcheluodel me a secher a uchul me ngdikea el sebechem el meruul er tia el ureor. Me a leuaisei, e a tekoi el ngar er tia el okesiu er a retedei el mesiou a kmal sebechel el melisiich er kau.

10. Ngmilekerang er a lolecholt er a tabesul el uldasu a mastang er tirke el tedei el mesiou, e ngera uchul me tiang a sebechel el melisiich er kau?

¹⁰ Ngsebeched el mesang el kmo a mastang a mle medengei el kmo a remesiungel a kakerous aike el sebechir el remuul. Ngmlocholt er sel taem er a lorous a ududir el “redemelel a klisichir.” (Matteus 25:15) Me nguaisei, ngike el kot el mesiou a mle sebechel el koreker a betok er  ngike el ongeru el mesiou. Me a mastang a mle sebechel el mesang a blakerreng er tir el terung me a uchul me ngulemekedong er tir el kmo, ‘blak a rengrir el mesiou’ me ngulemekngeltengat er tir. (Matteus 25:21, 23) Me ngdi osisiu, a Mastang er a omeridm el Jehovah el Dios, a medengei a blekerdelel a klengar er kid me aike el sebeched el remuul el kirel a omesiunged el mo er ngii. Ngkmal diak el obes er a blakerreng er kau el mesiou er ngii, me ngmo omekngeltengat er kau.​—Markus 14:3-9; monguiu er a Lukas 21:​1-4.

11. Ka msodii el kmo ngmekerang a blakerreng er a chelsel a meringel el blekeradel e sebechel el mo uchul a betok el klengeltengat.

¹¹ A kerebil a Selmira el odos er kid el kiei er a beluu er a Brazil, a ochotii el kmo, a blakerreng er kid er a omesiunged el mo er a Dios a diak di el ultuil er a ungil el rolel a klengar. A bechil a Selmira a uleboes el mad er a 20 el rak er a mla me mong, me ngdi mlo ngii el tang el omekeroul er a retedei el ngelekir. Nguluureor el mengetmokl a blai el betok el sikang e ngar er a bus el merael er a kemanget el omerael er a bek el sils. Ngar er a chelsel tia el meringel el blekerdelel a klengar er ngii e ngmle sebechel el mesiou el mui el taem. A reterung er a rengelekel a mlo obengkel el mesiou el mui el taem er a uriul. Ngmelekoi el kmo: “Ngar er aika el mereko el betok el rak e te betok er a 20 el chad a milsuub a Biblia el obengkek el mla mo chedal a ‘telungalek’ er ngak. Me lmuut er chelecha el sils e ak melechesuar a bltkil a rengrir me a ungil el klausechelei er tir. E tiang a klengeltengat el diak el sebechel a udoud el mecherar.’ ” Me a Mastang er a omeridm a kmal ulemekngeltengat er a Selmira el blakerreng er ngii a uchul!

12. Kede mekerang e ochotii a blakerreng er kid el kirel a ureor er a berkel a klumech?

¹² A lsekum a blekerdelel a klengar er kau a mo uchul e ngdiak el sebechem el mengoit er a klou el taem er a omesiungem, e ngsebechem el mo ungil el ousbech a temem el meruul er tia el ureor. Sel bo mkerekikl el loltaut aike el ulekrael el meketmokl el okiu a Omesuub el kirel a Omesiunged el Mo er a Dios, e ngmo sebechem el toketekii a duch er kau el olisechakl e dirrek el melasem a betok el rolel a omongedecheduch er a rechad. (2 Timoteus 2:15) Ngdirrek el sebechem el mengoit aike el betok el tekoi el mo uchul e ng mengesang a temem me bo el sebechem el mo teloi a bek el omengetmeklel a odingel.​—Kolose 4:5.

13. Ngera sel kot el klou a ultutelel el tekoi el dousbech er ngii el meleketek er a blakerreng er kid?

¹³ Lak mobes el kmo a blakerreng er kau a mo er ngii el bltkil a rengum me a omereng el saul er kau el mo er a Dios a uchul. (Psalm 40:8) Ngike el ongedei el mesiou el ngar er a okesiu er a Jesus a mle medakt er a mastang er ngii, e ulemes er ngii el ua lsal meringel a tekingel el chad. Me tiang a mlo uchul e ngngiluu a udoud el mo doklii e bai dimlak el ousbech er ngii el mengereker. Me ngdiak el soad el mo oba osisiu el uldesuel ngike el mesiou, ngbai kired el meleketek er a mekreos el deleuill er kid el obengkel a mastang er a omeridm el ngii a Jehovah. Ngkired el oterekeklii a taem el mesuub e melebedebek aike el ungil el blekerdelel a Jehovah, el bltikerreng me a kllourreng me a klechubechub. A obo muaisei, e ngsebechel el mo uchul e ngdmeu a rengum el mo er a tkurrebab el sebechem el mesiou er a Jehovah.​—Lukas 6:45; Filipi 1:9-11.

‘Ngkiriu el Mo Chedaol’

14. Ngerang a klou a ultutelel el tekoi el kirir a rechad er a omeridm el meruul er ngii?

¹⁴ A apostol el Petrus er a losaod er a bades el ngar er a Chuodel el Testament el kirel a uldesuel a Dios el kirir a remesiungel el ngar tia el chutem e ngdilu el kmo: “E bai moukerebai er ngikel Chedaol el milekedongemiu, mo bo mchedaol ra ikel bek lomerelliu. ‘Ngak a chedaol, me kemiu me ngdirrek el kiriu el mo chedaol.’ ” (1 Petrus 1:15, 16; Levitikus 19:2; Duteronomi 18:13) Tia el tekoi a meketeklii el kmo a rechad er a omeridm a kirir el mo klikiid a rengrir me a omerellir. Ngsebeched el mo oltaut er tia el tekoi a lsekum e kede mo mengikiid a omerelled. E kede mekerang e sebeched el meruul er ngii? El okiu a ngelsuil a klemerang el tekingel a Dios.

15. A klemerang el tekingel a Dios, ngngar er ngii a klisichel el remuul a ngerang el kired?

¹⁵ A klemerang el tekingel a Dios a sebeched el omekesiu er ngii er a ralm el dousbech el mengikiid. El ua tiang, a apostol el Paulus a milluches el kmo a ongdibel er a rengellitel el Kristiano a klikiid er a osengel a Dios, el di ua klikiid el redil  el kirel a Kristus, el ngii a milengikiid er ngii el “loba chomelecholb ra ralm el ngara tikingel . . . , e bo le chedaol el diak a telemellel.” (Efesus 5:25-27) Uchei, e a Jesus a dirrek el millekoi el kirel a klisichel a tekingel a Dios a longikiid. Me ngdilu er a redisaiplo er ngii el kmo: “Kemiu a mla mo klikiid el tekoi el kullekoi er kemiu a uchul.” (Johanes 15:3) Me nguaisei, a klemerang er a tekingel a Dios a ngar er ngii a klisichel el mengikiid a rengud me a omerelled. Ngmo sebechel a Dios el kongei er a omengull er kid a lsekum e kede mecherei a klemerang el tekingel me ngmengikiid er kid.

16. Kede mekerang e sebeched el melemolem el klikiid a rengud me a bedenged?

¹⁶ A lsekum e ngsoad el mo ungil el chad er a omeridm el kirel a Dios, e ngkired el omuchel el mengikiid er kid er a ngii di el tekoi el sebechel mengidokel a bedenged me a rengud. Nguaisei, a lsekum me ngsoad el melemolem el rredemelel a meruul er tia el ureor er a omeridm, e ngkired el mo er a tkurrebab el sebeched el oltaut aike el ngarbab el llechul a Jehovah el mengikiid a bedenged me a rengud. (Monguiu er a 1 Petrus 1:​14-16.) Ngkired el mechei a klemerang el tekingel a Dios me ngmengikiid er kid er a bek el taem, el di ua omengetmeklel a bedenged el kired el meruul er ngii er a bek el taem. Me tiang a uldimukl er a deblechoel el menguiu a Biblia er kid, e de teloi aike el miting er a Rekristiano. Ngdirrek el belkul a kmo ngkired el oltaut a uleklatk er a Dios er a chelsel a klengar er kid. A doruul el uaisei, e ngsebeched el mengikiid er kid er aike el mekngit el omeruul e dirrek el oltngakl aike el mekikiongel el tekoi er tia el beluulechad. (Psalm 119:9; Jakobus 1:21-25) Me ngkmal uchul a ongelaod sel dodengei el kmo ngoeak a ngelsuil a klemerang el tekingel a Dios e ngsebeched el “mengatech” el mo klikiid er a oberaod el klengit!​—1 Korinth 6:9-11.

17. Ngera el uleklatk er a Biblia a kired el oltirakl me bo el sebeched el melemolem el klikiid?

¹⁷ Kau, ke kongei el mecherei a klemerang el tekingel a Dios me ngmengikiid er a klengar er kau? El ua tiang, ke mo mekerang a lsekum e ke muklatk el kirel aike el kdekudel e mekikiongel el tekoi er a rolel a ongelaod er tia el beluulechad? (Psalm 101:3) Kau, ke kerekikl el diak momak a klausechelei er kau el obengterir a rechad er a ureor me a skuul el tir a diak lobengkem el ngar er a ta el klaumerang? (1 Korinth 15:33) Kau, ke kongei el melodech aike el chelitechetum el ngii a sebechel el rullau el mo mekngit er a osengel a Jehovah? (Kolose 3:5) Kau, ke mengeroid er kau er a ngii di el tekoi er a balatiks er tia el beluulechad me a ngii di el tekoi er a beluu el melisiich a klaiuengader er a klekool?​—Jakobus 4:4.

18. Ngmekerang e a klikiid el omerelled me a rengud a sebechel el ngosukid el mo bekerredechel er a omesiunged?

¹⁸ A blakerreng er kau el oltirakl aika el tekoi a mo uchul a klungiolem. A Jesus a ulemekesiu er a rengellitel el disaiplo er ngii el ua rechelel a dellomel el bilong er a ledu el kmo: “Ma bek el rachel el ngar ngak el diak lourodech [a Demak a melai] el mengeroid, e a ikel ourodech a longimd, me ngmengal mo bekerredechel.” (Johanes 15:2) Sel molemolem el melai er tia el ralm er a omengikiid el ngii a klemerang er a Biblia, e a omesiungem a mo bekerredechel.

A Klengeltengat er a Chelechang me a Ngar er a Medad

19. Te mlekerang a redisaiplo er a Jesus e mlukngeltengat el kirel a omesiungir?

¹⁹ Tirke el blak a rengrir el disaiplo el uleltirakl a ulekrael er a Jesus a ngiluu a klisiich el mla er a Dios er a Pentekost er a rak er a 33, e mlo omerk er a klumech “el mo lmuut ra bek lullebongel ra belulechad.” (Rellir 1:8) Te mlo mesiou el chedal a Chelechad er a Ruungerachel me a remisionari me a remechuodel el merael el oldingel a  ongdibel, el meruul er a klou a ultutelel el ureor er a berkel a klumech “el kirel a ikel rokuil dingar el bleob el ngar cheungel a eanged.” (Kolose 1:23) Ngkmal betok el klengeltengat a lengilai, e dirrek el mlo uchul a deurreng el mo er a rebebil!

20. (a) Ngera el klengeltengat a obla mngai e le kau el teloi er a ureor er a omeridm? (b) Kau, ke kltmokl el mo meruul a ngerang?

²⁰ Me nguaisei, a dolemolem el olecholt er a klengariourreng me a blakerreng e doltaut a ngarbab el Tekingel a Dios, e ngmo sebeched el dmeu a rengud el meruul er tia el ureor er a berkel a klumech. Me alta e a rebetok a chuarm er a tekoi er tia el beluulechad me a skel a deurreng, engdi kid a melechesuar a deurreng me a ungilbesul el klengar er kid. (Psalm 126:6) E sel kot el klou a ultutelel er ngii el rokui a ‘diak bo lak a belkul a ringelel a urered.’ (1 Korinth 15:58) Ngike el Mastang er a omeridm el Jehovah el Dios, a mo omekngeltengat er kid el diak a ulebengelel el kirel a urered “el ochotii sel bltikerreng el kirel a ngklel a Dios.”​—Hebru 6:10-12.

[Footnote]

Ke Dirk Melatk?

Sel bo el blak a rengud el meruul er a ureor er a omeridm . . .

• e ngera uchul me ngklou a ultutelel a dolecholt er a klengariourreng?

• e kede mekerang e sebeched el lomelemii a blakerreng er kid?

• e ngera uchul me ngklou a ultutelel el dolemolem el klikiid a rengud me a omerelled?

[Aike el Ker er a Suobel]

[Siasing el ngar er a 21 el llel]

A klengariourreng a ngosukid el mo omekbeot a klengar er kid, e nguu a tekoi er a Renged el mo kot