Ngmla Remiid a Mera el Belkul a Klengit?

TELKIB el taem er a uchei, e a rechad el ulemais el mo er a ikelesia a mle blechoel el orrenges er tirke el mengeteklel a klechelid er tir el klou a ngerir el olisechakl el kmo, ngkired el mengeroid er kid er aike el “euid el oberaod el klengit,” el ngelbesel a reng me a nglemokel me a rechorecherreng me a saikerreng me a ngasecherreng me a chelechei me a kldidairreng. Ngbetok el taem, e a remengeteklel a klechelid a mesaod a telemellel a doruul aika el klengit, e mengelechel er tirke el orrenges el mo obult er a kngterir. A ta el chad el meluches a babier a melekoi el kmo: “Chelechang e a oumesingd el osisecheklir a remengeteklel a klechelid a diak el losaod aike el tekoi el lodengei el kmo ngchetirir a rechad el orrenges, e te bai mesaod aike el tekoi el meruul er tir me ngungil a rengrir.”

A rebebil el meluches a simbung e oltobed a chais er a beluu a omes er a osisiu el blekeradel el dubechang. Aika el bldukl er iou, a di bebil er a tekoi el motobed el okiu a simbung me a chais er a beluu:

▪ “A klengit me a beltel a rengul a chad me a osobelel a mla mo diak a belkul el tekoi, e aike el tekoi el sebechel el smisichii a chad el mo ungil a uldesuel el di kirel, e mo betik a rengul er a di ngii, a kmal meklou a ultutelel.”​​—Star Beacon, Ashtabula, Ohio.

▪ “A rechad a mla mo diak el sebek a rengrir el kmo, te ruebet er a klengit, e le te mla oridii a mera el belkul a klengit.”​​—Newsweek.

▪ “Ngdikea doker el kmo, ‘Ngera soal a Dios a doruul, e bai oker el kmo, ‘Ngera sebechel a Dios el remuul el kirek?’ ”​​—Chicago Sun-Times.

Ngar er a chelsel tia el beluulechad el ngar er ngii a betok el cheldebechelir a rechad el kakerous a osengir me a uldesuir er a tekoi er a klechelid me a balatiks, e ngmo meringel er a rechad el melilt a melemalt el tekoi. Kede dirrek el muklatk el kmo, ngdiak el kired el oukerrekeriil aike el loumerang a rechad el kmo ngmelemalt me a diak. A kot el klou el klengit a sel lsekum e kede oukerrekeriil er a omerellel a ta er a chad. Sei a uchul me ngngar er ngii a uldasu el kmo : ‘Aike el moumerang alta ngungil el kirem, engdi ngdiak el kirem el orrimel er a rechad el mo oltirakl er a uldesuem. Chelecha el taem, e a rechad a melasem el meruul a tekoi er a klengar er tir el mo oltirakl a kakerous el llach. Ngdiak di lekau el tang a medengei a melemalt el tekoi. A uldesuir a rebebil me nglmuut el melemalt e ungil el di ua uldesuem.’

Tiaikid el uldasu a mla ngmodech a omelekingir a rechad. A tekoi el “klengit” a mla mo diak el sal oberaod a belkul. Ngmla mo ua lengellakel el tekoi el kirir a rebetok. Te melekoi el kmo a rechad a dikea el “kiei el urrebet er a klengit” te di “dmak el kiei.” Ngdikea lengar er a “laokerreng” e te bai di “kausechelei.” Ngdirrek el dikea el chad el “menguchet a raod” e ngkuk “di ta er a rolel a klengar.”

Me ngkmal bleketakl el kmo aike el tekoi el lekengei a rechad el kmo “ngungil e melemalt” me a lechub e te ouketui e le te kmo “ngklengit” a mla mengodech. Engdi, ngngera uchul me a uldesuir a rechad a mla mengodech? Ngngera mla duubech el mo er a klengit? Ngngar ngii a ultutelel a uldesuem el kirel?