A Diak el Mekimd el Bltikerreng a Omtebechel a Cheldechedechad

“Ng medemedemek a longedecheduch a tekoi er a llomeserreng.”​—OSISECHAKL 31:26.

1, 2. (a) Ngera el blekeradel a kirir a remeluu er a Jehovah el mo meleketek? (b) Ngera kede mo mesaod er tia el suobel?

 A KLOU a belkul el tekoi el delal a King el Lemuel a dillii el mo er a ngii a mle uldimukl er a blekeradel el kirel a ungil el bechiil el redil. “A ika meang el tekoi el le dilu delal a King Lemuel el mor ngii el kmo: Ng meral meringel a de betik er a ungil bechiil el redil! Ng kuk mekreos er a ngisel a chesiuch. Ng medemedemek a longedecheduch a tekoi er a llomeserreng.” (Osisechakl 31:1, 10, 26) A diak el mekimd el bltikerreng a loltaut er ngii a remellomes a rengrir el redil me tirke el chad el sorir el oldeu er a rengul a Jehovah el Dios. (Monguiu er a Osisechakl 19:22.) Tia el bltikerreng a bleketakl el mocholt er sel rolel a longedecheduch tirke el mera el meluu er a Dios.

² Ngerang a diak el mekimd el bltikerreng? E tiang ngkirel el mocholt el mo er a rua techang? Ngera rullid el mo ‘olecholt er a diak el mekimd el bltikerreng’? E tia el omeruul ngerang mo rullii er a rolel a cheldecheduch er a delongeled kid me a telungalek er kid me a rekldemed el Kristiano?

A Blekokeuii el Meteketek el Oeak a Bltikerreng

3, 4. (a) Ngerang a diak el mekimd el bltikerreng? (b) Ngerang a klekakerous er a diak el mekimd el bltikerreng me a ungil el omeruul el mocholt el mo er a rechad?

³ A diak el mekimd el bltikerreng a meteketek el okiu a bltikerreng me a ungil el omeruul. Me tia el omeruul a uldimukl er a blekeradel el chad a olecholt a klemeriarreng er ngii el bedul a rebebil el oeak sel lolengeseu er tir, e lungil el mengedecheduch er tir. A bltikerreng a uchetemel a diak el mekimd el bltikerreng el belkul a kmo sel dolengeseu er a rebebil e ngolechotel a bltkil a rengud el mo er tir. Me nguaisei, a mera el belkul a tekoi el diak el mekimd el bltikerreng a diak di loeak a ungil el omeruul e ngdirrek el oeak a mera el bltikerreng. A diak el mekimd el bltikerreng a ungil el omerellel a chad el kongei, e dirrek el blak a rengul el lolengeseu er a chad el mo lmuut er sel leketmeklii a tekoi el lullatk el meruul er ngii.

⁴ A diak el mekimd el bltikerreng a dirrek el ngar er ngii a ta er a belkul. A ungil el omeruul el lolecholt er ngii a rechad a sebechel el mocholt el mo er a rechad el diak lodengelterir. A apostol el Paulus me tirke el 275 el chad el mla er a diall el miltemall a mlo melechesuar tiaikid el bltikerreng er a rechad er a iungs er a Malta​ el tir a dimlak el lodengelterir el chad. (Rellir 27:37–28:2) E sel kuk ta er a rolel a diak el mekimd el bltikerreng a mocholt er a delongelir a rechad el tir a kmal kaodengei. * Tiaikid el omeruul a lulechotii a rechad er a klebliil er a Kain el mo er a “re chad er a Israel er ser a le mei el ngar a Ekipten.”​—1 Samuel 15:6.

A Omelebedebek me a Nglunguuch a Meklou a Ultutelel

5. Ngera sebechel el ngosukid el mo mtebechel er a churad?

⁵ Ngsebechel el mo meringel el domtebechel a tekinged. A Jakobus er a losaod el kirel a churad e ngmilluches el kmo: Ngdiak “a chad el sebechel choderderii, ele ngdiak bo le chelellakl, el mekngit, el mui ra de mad er ngii lomekodall.” (Jakobus 3:8) Ngera sebechel el ngosukid el mo mtebechel er tia el churad el ngii a kmal meringel el domtebechel er ngii? A tekingel a Jesus el mo er  a remengeteklel a klechelid a meketeklii tiang er a ledu el kmo: “Ele ikel mo olsibes ra reng a mo mechedecheduch ra ngor.” (Matteus 12:34) A lsekum e ngsoad el olecholt er a diak el mekimd el bltikerreng, e ngkired el omuchel el mekurulii er a chelsel rengud. Ka me bo desang el kmo ngmekerang a omelebedebek me a nglunguuch e sebechel el ngosukid el kirel tia el tekoi.

6. Ngera uchul me ngkired el melebedebek er a diak el mekimd el bltkil a rengul a Jehovah?

⁶ A Biblia a kmo a Jehovah el Dios a “olecholt er a blechoel bltikerreng.” (Exodus 34:6) A ta er a milluches er a Psalm a kmo: “RUBAK, a diak a ulebengelel bltkil a rengum a mekelekelii a beluulchad.” (Psalm 119:64) Ngbetok a bades el mesaod er sel rolel a Jehovah a lolecholt er a diak el mekimd el bltkil a rengul el bedul a remengull er ngii. Me a dongoit a taem el melebedebek a ‘urerel a Jehovah’ e ngsebeched el omekeroul er tia el ungil el blekeradel.​—Monguiu er a Psalm 77:12.

7, 8. (a) Ngera el rolel a diak el mekimd el bltkil a rengul a Jehovah a lerirellii el mo er a Lot me a telungalek er ngii? (b) Ngmlo ua ngerang a rengul a David er a lemocholt a diak el mekimd el bltkil a rengul a Dios el mo er ngii?

⁷ El ua tiang, ka molatk er a Jehovah er a lolsobel er a ochellel a Abraham er a Lot me a telungalek er ngii er a telemellel sel beluu er a Sodom el lekiliei er ngii. Me a lolekedang a telemellel tia el beluu e a rechanghel a ulerrimel er a Lot me lenguu a telungalek er ngii e lemereched el tuobed er a mats. A Biblia a kmo: “Ma Lot a dirk mirrus er a rengul, e ngdi RUBAK a mlo chubur me [a rechanghel] a siluchar a chimal ngii ma bechil ma re terul ngelekel e ngilititerir el mor a ikrel a beluu e milechititerir.” Ngulterekokl el kmal mo mechelaod a rengud sel dolebedebek aika el olechotel a diak el mekimd el bltkil a rengul a Dios er a lolsobel er a rechedal.​—Genesis 19:16, 19.

⁸ Ka di moltak er a kerebil a King el David er a irechar er a longitakl el kmo: A Jehovah a “ousubes a rokui el kngtik e omekungil er ngak er a rokui el rektek.” Me a David a ulterekokl el kmal uleba omereng el saul er a Jehovah er a lousubes er ngii er a klengit el lerirellii el obengkel a Bathseba! Ngkmal uleldanges er a Jehovah er a ledu el kmo: “Ng ua kldidiul a melidiul er bebul a chutem, me ng ua isei el klou a bltikerreng er ngii el kirir tirkel meluu er ngii.” (Psalm 103:3, 11) Me sel dolebedebek aika el bades e ngmengelaod a rengud, me kede mo mereng a sulel a Jehovah el kirel a diak el mekimd el bltkil a rengul, e dirrek el rullid el mo soad el oldanges er ngii. Me sel domekeroul er a omereng el saul er kid el mo er a Jehovah, e nglmuut el mo soad el oukerebai a blekerdelel ngika el mera el Dios.​—Efesus 5:1.

9. Ngera el klou a ultutelel el tekoi el kirel a bltikerreng a kirir a rechedal a Jehovah el olecholt er ngii er a bek el taem?

⁹ A betok el kerebai el ngar er a Bades a ochotii el kmo a Jehovah a olecholt er a diak el mekimd el bltkil a rengul el mo er a rechedal. E te kuk mekerang tirke el diak a ungil el deleuill er tir me a Dios? A Jehovah, ngmekngit a blekerdelel el mo er tir? Ngkmal diak! Ngar er a Lukas 6:35 e ngkmo: A Dios a “dirrek el chubteterir ar diak lodengei saul mar ngara klengit.” Ngdirrek el “chongesechii a sils er bebrir ar mekngit mar ungil, e oleiit ra chull el morar melemalt mar diak le melemalt.” (Matteus 5:45) Me tiang a belkul a kmo, a uchei er a bo dodengelii a klemerang e bo doltirakl er ngii, e kede mle teloi er klechad el millai a klungiolir er a blekokeuii er a Dios. Me chelechang el bla bo de chedal a Dios, e kede oldeu a rengud er tia el diak el mekimd el bltkil a rengul. (Monguiu er a Isaia 54:10.) Kede ulterekokl el kmal mereng a saul el  kirel tia el bltkil a rengul a Dios! Me ngklou a ultutelel el kirel a omerelled el mo olecholt er a diak el mekimd el bltikerreng er a bek el taem el mo lmuut er a rolel a dongedecheduch!

10. Ngera uchul me a nglunguuch a sebechel el ngosukid el mekurulii a diak el mekimd el bltikerreng?

¹⁰ A nglunguuch a kmal sebechel el ngosukid el mo omekeroul er a diak el mekimd el bltikerreng. E le tia el bltikerreng a ta er aike el ngarbab el blekerdelel a Jehovah. (Galatia 5:22) Ngsebeched el mekurulii a diak el mekimd el bltkil a rengud a lsekum e kede kongei el mo oltirakl a ulekrael er a Dios. A kot el ungil el rolel e kede ngmai a ulekrael er a Dios a oeak a nglunguuch. (Lukas 11:13) Me ngkmal klou a ultutelel el deblechoel el meluluuch el olengit a ngeso er a Dios, e kongei el oltirakl a ulekrael er ngii. Nguaisei, me ngkired el melebedebek e meluluuch me bo lsebeched el olecholt er a diak el mekimd el bltikerreng.

A Rolel a Cheldecheduch er a Delongelir a Rubekel

11. (a) Kede mekerang e mo medengei el kmo a Jehovah a soal a rebechiil el sechal a lolecholt er a diak el mekimd el btlkil a rengrir el mo er a rebecherir? (b) Ngoeak a ngera el rolel e a diak el mekimd el bltikerreng a rullii a bechiil el sechal me ngdiak lolekoi a mekngit el mo er a bechil?

¹¹ A apostol el Paulus a mengelechel er a rebechiil el sechal el kmo: “Bo le betik a rengmiu rar bechemiu, el ua Kristus el mlo betik a rengul ra eklesia, me ngdi mle ngii lodersii el kirel.” (Efesus 5:25) Ngdirrek el ulemeklatk er tir er a tekingel a Jehovah el mo er a Adam me a Eba el kmo: “Ma chad a mo cheroid ra demal ma delal e mo bereked ra bechil, me te mo tal chelechad el terung.” (Efesus 5:31) Me ngbleketakl el kmo a Jehovah a soal a bechiil el sechal a lolemolem el bechil a bechil, e lolecholt er a diak el mekimd el bltikerreng el mo er ngii. A bechiil el sechal el betik a rengul er a bechil a diak el losaod a mekngit el blekerdelel a bechil el mo er a rechad me a lechub e ngmekngit a tekingel el mo er ngii. Ngbai kirel el blechoel el chemat er ngii er a ungil el omerellel. (Osisechakl 31:28) A lsekum e ngmo er ngii a chetituokel er a delongelir, e a bltkil a rengul a bechiil el sechal a kirel el rullii me ngdiak lolekoi a mekngit el mo er a bechil.

12. Ngmekerang e sebechel a cheldechedechal a bechiil el redil el olecholt er a diak el mekimd el bltikerreng?

¹² A llechul a diak el mekimd el bltikerreng a dirrek el kirel a bechiil el redil el mo oltirakl er ngii. A delecherul a cheldechedechal a diak el kirel el mo ua teletelel a cheldechedecherir a rechad er tia el beluulechad. Ngkirel el ungil el mengedecheduch e ‘mengull’ er a bechil el sechal er a delongelir a rechad me bo lsebechir a rechad el omes a ungil el blekerdelel e dirrek el bo longull er a bechil. (Efesus 5:33) Ngkirel el mo kerekikl me lak longaititekangel er a bechil me a lechub e loruul a tekoi el mo uchul me a rengalek a oridii a omengull er tir el mo er a demerir. Ngbai mo mesmechokl a tekoi sel bo el di tir el terung. A Biblia a melekoi el kmo: “A re mellomes a rengrir el redil a remuul a delengchokl.” (Osisechakl 14:1) Me a blil a ungil el basio el uchul a deurreng er a telungalek er ngii.

13. Ngsebeched el suubii a diak el mekimd el bltikerreng er ker, el oeak a ngera el rolel?

¹³ Me ngngar er a chelsel a delengcheklir e ngkirir a rebechiil el chad el mo blechoel el olecholt er a omengull er a delongelir el okiu a rolel a lechadecheduch. A Paulus a milluches el kmo: “Kom chemoit iaikal rokui: el ngasechereng, ma klsiberreng, ma mekngit luldasu el bedul a chad, ma chomelaes, ma de merur er ngii el tekoi el tuobed ra ngeriu.” Ngdirrek el milluches el kmo: “Mo moubail ra reng ra klechubechub, ma blekokuii,  ma klengariou, ma delemedemek, ma kllourreng. . . . E modekiar a bltikerreng er bebul a ikal rokui, e a bltikerreng chochull el mengerrungel.” (Kolose 3:8, 12-14) Me ngngar er a blirir, e a rengalek a sebechir el suubii a diak el mekimd el bltikerreng, e mo oltirakl er ngii el oeak sel lorrenges er a redemerir me a rederrir el ungil el chadecheduch er a delongelir.

14. Ngoeak a ngera el rolel e a bdelul a telungalek a sebechel el mengelaod er a rechad er a telungalek er ngii?

¹⁴ A milluches er a Psalm el kirel a Jehovah a kmo: “A diak a ulebengelel el bltkil a rengum bo le chelodek.” (Psalm 119:76) A ta er a rolel e a Jehovah a mengelaod er a rechedal a oeak sel lomekrael e longelechel er tir. (Psalm 119:105) Ngmekerang e sebechel a bdelul a telungalek el ngmai a klungiolel er a kerebil a Demad el ngar er a eanged e lousbech er ngii el mo ungil el mengedecheduch er a rechad er a telungalek er ngii? Ngsebechir el meruul er tiang sel lomesterir a ulekrael me a omelisiich el lousbech. Me tia el Omengull el Telungalek a kmal ungil el techall el mla mo sebeched el meleketek a klemedengei er kid er a Tekingel a Dios!​—Osisechakl 24:4.

Olecholt er a Bltikerreng el Mo er a Rudam

15. Te mekerang a remechuodel el Kristiano me a remeklou el chad er a ongdibel a lomekerreu er a rudam el ngar er a ongdibel?

¹⁵ A King  el David a milluluuch el kmo: “A diak le mengodech el bltkil a rengum ma ultebecherreng er kau a di blechoel el mesebechakl er ngak.” (Psalm 40:11) Te mekerang a remechuodel el Kristiano me a remeklou el chad er a ongdibel e mo oukerebai er a Jehovah el kirel tiang? A doltirakl er a tekingel a King el David el ngar er a Osisechakl 17:17 e ngmera el olechotel a diak el mekimd el bltikerreng.

16, 17. Ngera bebil el rolel e ngsebeched el ochotii el kmo kede olecholt er a diak el mekimd el bltikerreng el mo er a rudam?

¹⁶ Kede mo mekerang a lsekum e kede omes er a odam er kid el mocha meruul a tekoi el omtok a omellach er a Biblia? Ngulterekokl a diak el mekimd el bltikerreng er kid el rullid el mo soad el olengeseu er ngii. (Psalm 141:5) A lsekum e kede mo medengei el kmo a odam er kid a mla ruebet er a oberaod el klengit, e a diak el mekimd el bltkil a rengud a rullid el mo mengelechel er ngii me “loleker rar mechuodel ra [ongdibel], me bo loluluuch el kirel, e loba ngklel a [Jehovah] el choiltii ra cheluch.” (Jakobus 5:14) A lsekum a chad el rirebet er a klengit a diak el ouchais er a remechuodel, me kid me ngdiak douchais er tir er tia el tekoi, e ngkmal diak el olechotel a diak el mekimd el bltikerreng. A rebebil er a delongeled a sebechir el mo mechitechut a rengrir e sabisi, e chuarm a uldesuir e dirrek el mla mo checherd a rengrir er a klengar. Me a kot el ungil el rolel e kede olecholt er a diak el mekimd el bltikerreng a oeak sel dolisiich “rar mechitechut a rengrir.”​—1 Thesalonika 5:14.

¹⁷ Kede mo mekerang a lsekum a recherroel a Dios a melekoi a cheleuid el kirel a odam er kid? Ngungil a lak doukerrekeriil er a blakerreng er a odam er kid e lak dorrenges a ultelechakl el kirel. Engdi a lsekum a chad el oltelechakl er a odam er kid a ngar er ngii a ungil el omesodel el kirel a tekoi el mileketmokl e ngkirel el smodii. Engdi a lsekum a recherrouir a rechedal a Dios a sorir el mo medengelterir a rudam er kid el tir a omart er tir me bo luchul e lolemall er tir, e tia el diak el mekimd el btlkil a rengud el mo er a rudam er kid a mo uchul e ngdiak douchais el kmo te ngar er ker.​—Osisechakl 18:24.

A Chad el “Oltoir er a Llemalt ma Blekokuii a Mo Metik er a Klengar”

18, 19. Ngera uchul me ngkired el olecholt er a diak el mekimd el bltikerreng el mo er a rudam er kid?

¹⁸ A diak el mekimd el bltikerreng a kirel el mocholt er a delongelir a remesiungel a Jehovah. El mo lmuut er a chelsel a meringel el taem, e tia el  diak el mekimd el bltikerreng a kirel melemolem el ngar er a delongeled. Sel taem el diak el mekimd el bltikerreng er a rechad er a Israel a mlo “ua nguches el nguemed er a dirk tutau,” e ngmlo uchul a kngtil a rengul a Jehovah. (Hosea 6:4, 6) Me nguaisei, engdi a Jehovah a kmal dmeu a rengul sel deblechoel el olecholt er tia el diak el mekimd el bltikerreng. Ngsebeched el mes a klengeltengat el lengilai tirke el uleltirakl er tia el tekoi.

¹⁹ A Osisechakl 21:21 a kmo: “Ngikel oltoir er a llemalt ma blekokuii a mo metik er a klengar ma chetengakl.” A ta er a klengeltengat el bo lenguu a chad a klengar el diak el di tedeb, e ngbai klengar el diak a ulebengelel. Me a Jehovah a mo ngosuir el mo “nguu a klengar, el meral klengar.” (1 Timoteus 6:12, 19) Mada kid el rokui bo dolecholt er a “blekokuii ma klechubechub el mor a ta ma tang.”​—Sekaria 7:9.

[Footnote]

Ngsebechem el Mesaod?

• Ke mekerang a omosaod er a diak el mekimd el bltikerreng?

• Ngerang a ngosukid el mo olecholt er a diak el mekimd el bltikerreng?

• Te mekerang a rubekel e olecholt er a diak el mekimd el bltikerreng er a delongelir?

• Ngera ochotii el kmo kede olecholt er a diak el mekimd el bltikerreng el mo er a rudam er kid?

[Aike el Ker er a Suobel]

[Siasing el ngar er a 25 el llel]

A David a uluuchais er a diak el mekimd el bltikerreng er a Jehovah

[Siasing el ngar er a 26 el llel]

Ngngar ngii a ulterekokl el temel a Omengull el Telungalek er kau?