A Rolel a Olubet el Tenget a Lolsobel er Kid

“Me ngikel oumera ra Ngalek a mo oba diak a ullebengelel klengar; e ngikel diak lolengesenges ra Ngalek a diak bo lesa klengar, ngbai cheldechuderreng ra Dios a mo kiei er ngii.”​—JOHANES 3:​36.

1, 2. Ngerang a ta er a uchul me ngulemuchel a otebedel a Zion’s Watch Tower?

 SEL ONGEUANG el otebedel a Zion’s Watch Tower er a October 1879 a melekoi el kmo: “A lsekum a chad a mo blak a rengul el mesuub er a Biblia e ngmo sebechel el mesang a klungel a ultutelel a kodellel a Kristus.” Ngmelemolem el melekoi el kmo: “Ngkmal kired el loltngakl a ngii di el tekoi el mesaod el kmo a kodellel a Kristus a dimlak el longetmokl er a olubet el tenget el kirel a klengit.”​—Monguiu er a 1 Johanes 2:​1, 2.

² A ta er a uchul e ngmilluches e mlotobed a Zion’s Watch Tower er sera July 1879 a mlo mesebechakl er a osisecheklel a Biblia el kirel a olubet el tenget. A tekoi el mle llechukl er a chelsel a meskid a uleketmokl el kall el “mechii a blsechel,” e le ngngar a ulebengelel aike el rak er a 1800, e a klou el ildois er a rechad el leko te Kristiano a ulemuchel el oumededenger er tia el tekoi el kmo, a Jesus a mlad el mo melubet a kngtid. (Matteus 24:45) Ngar er seikid el taem e a rebetok el chad a ulemuchel el mo oumerang er sel osisechakl el kmo kede mla er a mongkii el mei, el ngii el uldasu a mo kakebosech ngii me a klemerang el tekoi el kmo a chad a rirebet er a klengit. Tirke el chad el olisechakl el kmo kede mla er a mongkii el mei a melisiich er a uldasu el kmo a rechad a di merael el mo ungil e diak lousbech er a olubet el tenget. Me nguaisei, ngkmal klou a ultutelel a tekingel a apostol el Paulus el mo er a Timoteus el kmo: “Mongkar a ikel tekoi el mloterekokl er kau. E momekiai a delebeseaol el diak a blkul cheldecheduch ma klaititekangel el lomngakl el kmo klemedengei, e alechub e ngklsuul, ar bebil rar chad chobekella er ngiil leko ngklemedengei, me tieta ra kloumerang.”​—1 Timoteus 6:​20, 21.

3. Kede mo mesaod a ngera el ker?

³ Ke ulterekokl el mla tibir er a rengum el mo  melisiich er a klaumerang er kau. Ngmo sebechem el meruul er tiang a di le kau el oker aika el ker el kmo: Ngera uchul me ngkirek el ousbech er a olubet el tenget? Me tia el olubet el tenget ngera ngrirellii er a rengul a Jehovah me a Ngelekel? Ak mekerang e ngmai a klungiolek er tia el mekreos el techall, el ngii a sebechel el mo omekerreu er ngak er sel cheldechuderreng er a Dios?

Ngsebeched el Mo Mukerreu er Sel Cheldechuderreng er a Dios

4, 5. Ngera ochotii el kmo a cheldechuderreng er a Dios a dirk oukerrekeriil er tia el beluulechad er a Satan?

⁴ A Biblia me a reksi er a klechad a ochotii el kmo sera lerebet er a klengit a Adam el mei er a chelechang, e ngmlo uchul a ‘cheldechuderreng er a Dios’ el kirel a klechad. (Johanes 3:36) Me tiang a belkul a kmo a rokui el chad a mo mad. A omengederederel a Satan a mla obeketakl el kmo ngdiak el sebechel el omekerreu er a klechad er a chelebuul, e dirrek a rokui el kabelment el longedereder a rechad a dirkak a ta el bo el sebechel el mesterir aike el rokui el lousbech a rechad. (1 Johanes 5:​19) Me a klechad a melemolem el chuarm er a telemellel a mekemad me a delengerenger me a chelebuul.

⁵ Me ngbleketakl el kmo a klengeltengat er a Jehovah a diak el ngar er a chelsel tia el mekngit el blekeradel er a beluulechad er a chelechang. A Paulus a dilu el kmo: “E a cheldechuderreng ra Dios a ngara eanged el me chemolt el bedul a rokui blekeradel rar chad el diak loluu ra Dios.” (Rom 1:​18-​20) Me a leuaisei, e tirke el kiei el meruul a tekoi el omtok er a Jehovah a diak el sebechir el chemiis er a cheldechuderreng er Ngii. Chelecha el taem e tia el cheldechuderreng er a Dios a obeketakl el okiu a klemechel el oukerrekeriil er tia el mekngit el beluulechad er a Satan el okiu a uleketmokl el babier el mengai a uchetemel er a Biblia.​—Chocholt 16:1.

6, 7. A rengellitel el Kristiano, te oba medal omerael el meruul er a ngera el ureor, e ngera el techall a dirk ngar er ngii el kirir a rechad el chedal tia el beluulechad er a Satan?

⁶ Me tia ngbelkul a kmo ngmla mo diak a techellir a rechad el mengubet er a omengederedel a Satan, e nguu a kengei er a Dios? Ngdiak, ngkmal dirk ngar er ngii a techall. A rengellitel el Kristiano el tir a “odruchel ra Kristus” a oba medal a omerael er a ureor er a berkel a klumech, el mengemedaol er a rokui el chad el mo “nguu chomesumech el deleuill ra Dios.”​—2 Korinth 5:​20, 21.

⁷ A apostol el Paulus a dilu el kmo: A “Jesus el ngara eanged el mei el osobelid ra cheldechuderreng el kirel mei.” (1 Thesalonika 1:10) Tia el ulebongel el ngesechel a rengul a Jehovah a mo okngemedeterir tirke el rokui el diak el obult er a mekngit el omerellir. (2 Thesalonika 1:​6-9) Te rua techang a sebechir el chemiis? A Biblia a kmo: “Me ngikel oumera ra Ngalek a mo oba diak a ullebengelel klengar; e ngikel diak lolengesenges ra Ngalek a diak bo lesa klengar, ngbai cheldechuderreng ra Dios a mo kiei er ngii.” (Johanes 3:​36) Nguaisei, tirke el rokui el dirk kiei e oumerang er a Jesus me a olubet el tenget a mo sebechir el chemiis er a telemellel tia beluulechad er a Satan el okiu a cheldechuderreng er a Jehovah.

Sel Rolel a Loureor a Olubet el Tenget

8. (a) Ngera el ungil tekoi a lengiluu a Dios el msang a Adam me a Eba? (b) Ngmilekerang a Jehovah e ochotii el kmo Ngii a Dios er a cherrungel el llemalt?

⁸ A Adam me a Eba a ulebeob el mle cherrungel el chad. Oleko te millemolem el olengesenges er a Dios, e tia el beluulechad er a chelechang a mui er a rechad el dmeu a rengrir e kiei er a Paradis. Engdi ngklengiterreng e le tirke el kot el demad me a delad a mle durengrir el tomellii a llechul a Dios. Me ngoeak itiang e te ulebals el mo mad el diak a techellir el mo mekiis er a kodall, e dirrek el mlodik er a sers er a Eden. Me sera bocha loungalek a Adam me a Eba, e a rengelekir a mla mo oudiukes er a klengit, me tir el terung a ulemuchel el mocha chuodel e mad. Me tiang a olechotel a kmo a Jehovah a otaut a tekoi el ledung. E Ngii a dirrek el Dios er a cherrungel el llemalt. Me ngii el Jehovah a ulemeklatk er a Adam el kmo a bo longang er a blul el rodech e ngmo uchul a kodellel​—me ngmera el mlo uaisei.

9, 10. (a) Ngera uchul me a ruldidellel rsechel a Adam a mo mad? (b) E kede mekerang e mengubet er a belsel a kodall el diak a techellel a okiis er ngii?

⁹ Me kid el uldidellel a rsechel a Adam a uchul me ngdiak demecherrungel e uldiukes er a klengit me kede mo mad. Me tiang a belkul a kmo a uchei er a demechell e a demad el Adam a rirebet er a  klengit, me kede uldimukl er sel belsel a klengit el ngii a kodall. Me a lsekum a Jehovah a okngemedii a belsel a klengit el kodall el diak el ousbech er a olubet el tenget, e ngbelkul a kmo ngdiak loltaut a tekingel. Me ngua le dilung a Paulus el kired el rokui el kmo: “Kid a medengei el kmo, a llach a klereng; ngdi ngak a tech, el moterau el mor cheungel a klengit. Ak meral chebuul el chad! Ngkol techa ngikel mo osobelak er tial chelechad ra kodall?”​—Rom 7:​14, 24.

¹⁰ Me ngdi ta el Jehovah el Dios a sebechel el ousubes a kngtid, e dirrek el ngubetid er a belsel a kodall el diak a techellel a okiis er ngii. Ngmlo sebechel rullii tiang er sera lodureklii a betik er a rengul el Ngelekel er a eanged, el mei er a beluulechad el me mechell el cherrungel el chad, me bo el sebechel el tongetengii a klengar er ngii el melubet a kngtid. Me a Jesus a millemolem el cherrungel el dimlak el ua Adam el rirebet er a klengit. Ngbai “dimlak le bora klengit.” (1 Petrus 2:​22) A Jesus a mle sebechel el mo demerir a remecherrungel el chad. Me nguaisei, engdi ngii a milechititerir a recherrouel a Dios me te milekodir me bo el sebechel el ngubeteterir a ruldidellel a rsechel a Adam er a klengit, e le besterir a techellir tirke el oumerang er ngii el mo kiei el diak a ulebengelel. A Bades a mesaod er ngii el kmo: “E di tang ngiil Dios, me ngikel deleuill ra Dios mar chad me ngdi tang, el ingii a chad el Kristus Jesus, el di mle ngii lodersii el mo olbatel ra rokuil chad.”​—1 Timoteus 2:​5, 6.

11. (a) Ngmekerang a domekesiu a klungiolel a olubet el tenget? (b) E ngera el klungiaol a mo er ngii el okiu a olubet el tenget?

¹¹ Sel rolel a domekesiu er a olubet el tenget a di ua blekerdelir a rechad el mlo betok a belsir er a lemechesimer a bank me loriid a ududir. Me tirke el ouklalo er a bank a mo mukerrekeriil e mo mekelebus el betok el rak. Engdi te kuk mekerang tirke el chad el urriid a ududir? Tir el dikea a ududir me te kmal chebulang a blekerdelel a klengar er tir, me a di ta el rolel e ngmo sebechel el mo ungil a klengar er tir, a lsekum a ta el merau el chad a mecherar tia el bank e oluut a ududir me ngmo diak a belsir. Me ngdi osisiu, a Jehovah el Dios me a betik er a rengul el Ngelekel a ulemechar er a ruldidellel a rsechel a Adam, e ngilebetii a blals el kirel a klengit el okiu a mloitel el rsechel a Jesus. Misei a uchul me a tekingel a Johanes el Techolb el kirel a Jesus a kmo: “Mesa Ngelekel a sib ra Dios, el melai a kngtil a belulechad el mengeroid!” (Johanes 1:​29) Me a klechad el mo mengubet er a klengit a diak el di tirke el chad el kiei er a chelechang, e ngdirrek el uldimukl er a rulekoad.

A Tekoi el Mileketmokl el Kirel a Olubet el Tenget

12, 13. Ngera sebeched el suubii er a blekerdelel a Abraham el kilengei el mo tongetengii a Isak?

¹² Ngmeringel er kid el mo melechesuar sel ringel el blo lechelebangel er ngii a Demad el ngar er a eanged me a betik er a rengul el Ngelekel. Engdi a Biblia a ouchais er kid er a tekoi el dilubech el sebeched el omekesiu er ngii er tia el blekeradel. Ka di molatk er a rengul a Abraham er a lorael el edei el klebesei el mo er a beluu er a Moria e le nguleltirakl er a meirei er a Dios el kmo: “Mnguu a ngelekem, ngii el di tal ngelekem el Isak, el betik a rengum er ngii, e morael el mor a beluu er a Moria. Ke mor sei e tongetengii el delaol tenget el ngar sel rois el bo kuchotii er kau.”​—Genesis 22:​2-4.

¹³ Me a Abraham a merma er tia el basio el letiletkii a Jehovah. Ka di molatk er a kngtil a rengul er a bocha lolechet a chimal me a ochil a ngelekel er a Isak e lomechiuaiu er ngii er a bebul a olengetongel el bla lerellii. Ngulterekokl el kmal mle  meringel er a Abraham el oba oles el mo omekoad er a ngelekel! Me sel rengul a Isak el kuk mechiuaiu er a bebul a olengetongel el mengiil er a kodellel. Engdi a anghel er a Jehovah a di mle mereched el torebengii a Abraham me lak lokodir. A omerellel a Abraham me a Isak a sebechel el ngosukid el mo melechesuar a ringel el blo lechermii a Jehovah er a lebechititerir a rechedal a Satan me lokodir a Ngelekel. A blekongesenges er a Isak el mo er a demal er a Abraham a ungil el okesiul a rengul a Jesus el kilengei el mo chuarm e mad el kired.​—Hebru 11:17-​19.

14. Ngera el blekeradel el dilubech el mo er a Jakob a sebechel el ngosukid el mo medengelii a belkul a tekoi el mileketmokl el kirel a olubet el tenget?

¹⁴ A tekoi el mileketmokl el kirel a olubet el tenget a sebeched el omekesiu er ngii er a blekeradel el dilubech el mo er a Jakob. Ngmle betok a rengelekel engdi ngii a kmal mle betik a rengul er a Josef. Misei a uchul me a rubekul a Josef a mle mechechei e uluuketui er ngii. Me nguaisei, engdi a Josef a kilengei er a loldurech er ngii a demal el mo oldingel er a rubekul. Sel taem e te milengkar a chermel a demerir el ngar er a basio el bekord 60 el mael a cherridel er a mo bedul a diluches er a blirir el ngar er a beluu er a Hebron. Ka di molatk er a rengul a Jakob er a lemei a rengelekel el oba ikrel a bilel a Josef el di rasech! Ngkmal uleldiu el kmo: “Choi, ng bilel. A tebelik el charm a mla mekodir. A Josef a locha di melsusuud!” Ngulterekokl el mlo uchul a klou el kngtil a rengul a Jakob, me ngmilengeiung er a Josef el betok el sils. (Genesis 37:33, 34) A Jehovah a diak lomelechesiu a tekoi el ua blekerdelir a rediak el mecherrungel el chad. Engdi a lsekum kede melebedebek a tekoi el dilubech el mo er a Jakob e ngsebechel el ngosukid el mo melechesuar sel kngtil a rengul a Dios er a lomes er a Ngelekel el mukringel, e lemad er a meringel el kodall.

A Klungiaol el Dengai el Okiu a Olubet el Tenget

15, 16. (a) A Jehovah ngmilekerang e ochotii el kmo ngkongei er a olubet el tenget? (b) E ngmlo uchul a ngera el klungiolem tia el olubet el tenget?

¹⁵ A Jehovah el Dios a ulekisii a blak a rengul el Ngelekel er a kodall el mo nguu sel di mla klengar er ngii er a eanged. (1 Petrus 3:​18) Ngar er a chelsel aike el 40 el sils e a mla mekiis er a kodall el Jesus a mlo duum er a redisaiplo er ngii e millisiich a  klaumerang er tir e mengetmokl er tir el kirel a klou el ureor er a berkel a klumech. E ngii a liluut el mo er a eanged. E ngar er isei e nguldersii el mo er a Dios sel kerresel a mloitel el rsechel el kirir tirke el loltirakl er ngii, el tir a oumerang er a kerresel tia el olubet el tenget. A Jehovah el Dios a ulechotii el kmo ngkongei er a olubet el tengetengel a Kristus er a ltetkii a Jesus el mo mesterir a klisiich tirke el disaiplo er ngii el tir a mle kldibel er Jerusalem er a Pentekost er a rak er a 33.​—Rellir 2:​33.

¹⁶ Tirka el disaiplo er a Kristus a di mle mereched el mo mengelechel er a rechad me lechiis er a cheldechuderreng er a Dios e bo le metecholb el oba ngklel a Jesus Kristus el melubet a kngterir. (Monguiu er a Rellir 2:​38-​40.) Me seikid el taem el me lmuut er a chelechang, e a rebetok el miliol el chad er a kakerous el renged a mla mo er ngii a deleuill er tir me a Dios, el uchetemel a klaumerang er tir a olubet el tengetengel a Jesus. (Johanes 6:​44) Me chelechang e kede mo mesaod a eru el ker el kmo: Kid el rokui, kede nguu a omelatk er a diak a ulebengelel el klengar e le ngungil el urered a uchul? Me sel ta el bla denguu tia el ungil el omelatk, e ngbelkul a kmo ngdikea el sebeched el oridii?

17. Ngkirel mo ua ngerang a osengem el bedul tia el techall el kau a sebechem el mo sechelil a Dios?

¹⁷ Kid a diak de rredemelel tia el mileketmokl el olubet el tenget. Ngdi ngoeak a klaumerang er a rebetok el miliol el chad el kirel tia el olubet el tenget, e te mla mo sechelil a Dios e dirrek el oba omelatk er a diak a ulebengelel el klengar er a paradis el chutem. A bo de sechelil a Dios a diak el belkul a kmo kede mla mekur a dikea el metemall el deleuill er kid el obengkel, e le lsekum e ngsoad el mo chemiis er sel cheldechuderreng er a Dios, e ngkmal kired el olecholt a omereng el saul er kid el mo er a “ngubet el ngara Kristus Jesus.”​—Rom 3:24; monguiu er a Filipi 2:​12.

Molemolem er a Klaumerang er Kau er a Olubet el Tenget

18. Nguldimukl er a ngerang a dolemolem er a klaumerang er kid er a olubet el tenget?

¹⁸ A dai er tia el suobel a mengai er a Johanes 3:​36, el olecholt el kmo a dolemolem er a klaumerang el kirel a Rubak el Jesus Kristus, e ngbelkul a kmo ngkired el olengesenges e oltirakl er ngii. Me a omereng el saul er kid el kirel a olubet el tenget a rullid el mo kiei el oltirakl a osisecheklel a Jesus el uldimukl er aike el osisecheklel el kirel a tekoi er a kldung. (Markus 7:​21-​23) A “cheldechuderreng ra Dios” a meremang el oukerrekeriil er tirke el diak el obult er a mekikiongel el tekoi el ua deleboes el omeruul me a beluachel me a “bek el mengelengalek ma ngibes” el uldimukl er a osengel a mekngit el siasing er a remeau.​—Efesus 5:​3-6.

19. Ngoeak a ngera el ungil rolel e kede olecholt er a klaumerang er kid er a olubet el tenget?

¹⁹ A omereng el saul er kid el kirel a olubet el tenget a kirel rullid el mo mechesang el meruul a tekoi el kirel a “chomeluu ra Dios.” (2 Petrus 3:​11) Me ngkired el mo oterekokl a taem el blechoel el meluluuch, e mesuub a Biblia el di kid el tang, e mo er a bek el miting er a ongdibel, e meruul er a omengull el telungalek er kid, e dirrek el blak a rengud el teloi er a ureor er a berkel a klumech er a Renged. Misei “e lako mobes chomeruul lungil ma blekerurau, e a Dios a dmeu a rengul er chouaisel tenget.”​—Hebru 13:15, 16.

20. Ngera el klengeltengat er a ngar er a medad a lobang tirke el rokui el oba klaumerang el kirel a olubet el tenget?

²⁰ Sel letaut a cheldechuderreng er a Jehovah el kirel tia el mekngit el blekeradel, e tirke el uleba klaumerang el kirel tia el olubet el tenget a ulterekokl el kmal mo dmeu a rengrir, e dirrek el oba omereng a saul el kirel tia el tenget! E ngar er a chelsel sel telbiil el beches el beluulechad er a Dios, e kede mo oba omereng el saul el kirel tia olubet el tenget el ngii a ulsebelid er a cheldechuderreng er a Dios.​—Monguiu er a Johanes 3:​16; Chocholt 7:​9, 10, 13, 14.

Ngmekerang a Omonger?

• Ngera uchul me kede ousbech er a olubet el tenget?

• Ngmle ua ngerang a klungel a tekoi el mileketmokl el kirel a olubet el tenget?

• Ngera el klungiaol a mo er ngii el okiu a olubet el tenget?

• Kede mekerang e ochotii a klaumerang er kid el kirel a olubet el tengetengel a Jesus?

[Aike el Ker er a Suobel]

[Siasing el ngar er a 15 el llel]

Ngdirk ngar er ngii a techellir a rechad el mo meruul a deleuill er tir me a Jehovah

[Siasing el ngar er a 16 el llel]

Sel dolebedebek a tekoi el dilubech el mo er a Abraham me a Isak me a Jakob e kede mo melechesuar a berredel tia el olubet el tenget