A Kltarreng a Olengchelel a Mera el Omengull

“Ak mo oldak er kemiu el ua sib el ngar a chesimer.”​—MIKA 2:12.

1. Ngmekerang a blebelel a Dios e meketeklii a llemesel a rengul?

 ATA er a milluches er a Psalm a kmo: “[Jehovah,] ke mla remuul a kmal betok el tekoi! Ke meral mlo ungil remuul el rokui el oba llemesel a rengum. A beluulchad a mui er a blebelem.” (Psalm 104:24) A llemesel a rengul a Dios a bleketakl el mocholt er sel rolel a ledak el oureor a betok el miliol el kakerous el bedengel a dellomel me a bek el bedengel a meklou me a mekekerei el charm me ngsebechel el melemolem el ngar. Ngdirrek el chelsel a bedenged e ngngar er ngii a betok el telael el kakerous el klekedall el meklou el mo lmuut er a mekekerei el ngii a dmak el oureor el rullii a chad me ngcherrungel e mesisiich a bedengel.

2. Ngar sel siasing el ngar er a 16 el llel e ngera uchul me ngkmal mengasireng a kltarreng er a delongelir a Rekristiano?

² A Jehovah a ulemeob er a rechad el kirir el dmak el oureor e kaingeseu er a delongelir. A rechad a ngar ngii a kakerous el teletelir me a blekerdelir me a duch er tir. Me a Dios a ulemeob er tirke el kot el obekel el okesiul, e dirrek el rirelleterir el mo sebechir el kaingeseu er a delongelir. (Genesis 1:27; 2:18) Me nguaisei, a klechad er chelechang el ngii a ileakl er a Dios a dirkak el ta el bo el sebechel el mo oba kltarreng. (1 Johanes 5:19) Me nguaisei, ngkmal mengasireng sel dolatk er a ongdibel er a Rekristiano er a kot el dart el rak, el mle uldimukl er a resibai er a Efesus me a remeteet el redil er a Grik me a rengarbab a skulir el chad er a Judea me a remilengull a bleob el kmal uleba kltarreng er a delongelir.​—Rellir 13:1; 17:4; 1 Thesalonika 1:9; 1 Timoteus 6:1.

3. Ngmekerang a Biblia a losaod er a kltarreng er a Rekristiano, e ngera kede mo mesaod er tia el suobel?

³ A mera el omengull a rulleterir a rechad el mo kongei el kaingeseu el di ua rolel a loureor a kakerous el klekedall er a bedenged. (Monguiu er a 1 Korinth 12:​12, 13.) Kede mo mesaod a bebil el tekoi er a chelsel tia el suobel el kmo: Ngmekerang a mera el omengull e oldak er a rechad? Ngera uchul me ngdi ta el Jehovah a sebechel el oldak er a rebetok el miliol el chad er a bek el renged? A Jehovah ngolengeseu er kid er a ngera el tekoi el mo uchul a kltarreng? Sel dosaod er a kltarreng, e ngerang a klekakerous er a mera el Klekristiano me a Klsuul el Klekristiano?

Ngmekerang a Mera el Omengull e Oldak er a Rechad?

4. Ngmekerang a mera el omengull e oldak er a rechad?

⁴ A rechad el mengull er a Jehovah a medengei el kmo Ngii a ulemeob a rokui el tekoi me ngkmal rredemelel a Mengederedel er a eanged me a chutem. (Chocholt 4:11) Me alta e a remera el Kristiano a kiei er a kakerous el beluu el kakerous a blekerdelel a klengar er tir, engdi te olengesenges a osisiu el llechul a Dios, e kiei el oltirakl a osisiu el omellach er a Biblia. Me a rokui el mengull er a Jehovah a omekedong er ngii el “Demmam.” (Isaia 64:8; Matteus 6:9) Me te rokui el odam e dirrek el dmeu a rengrir el oba kltarreng el lolekoi er ngii a ta er a milluches er a Psalm el kmo: “Ng meral ungil, e deurreng sel le dak el kiei a rudam el ta rengrir!”​—Psalm 133:1.

5. Ngera el blekeradel a melisiich er a kltarreng er a delongelir a remengull er a Jehovah?

⁵ Alta e a remera el Kristiano a diak el mecherrungel, engdi te mengull er a Jehovah el oba kltarreng, e le tir el mla mesuub el mo kaubltikerreng er a delongelir. Me a Jehovah a olisechakl er tir el mo meduch el oubltikerreng el uai Ngii. (Monguiu er a 1 Johanes 4:​7, 8.) A Tekingel a kmo: “Mo moubail ra reng ra klechubechub, ma blekokuii, ma klengariou, ma delemedemek, ma kllourreng,  bo mkaberekakl a chetimiu rar chad, ma le ngarngii a klaotutakl ra delongeliu e mkausubes; e ngmla ousubes a telemelliu a [Jehovah,] misei e bo muaisei e mkausubes a telemelliu. E modekiar a bltikerreng er bebul a ikal rokui, e a bltikerreng chochull el mengerrungel.” (Kolose 3:12-​14) Me tia el cherrungel el bltikerreng a blekeradel el olengchelir a remera el Kristiano. Me kau, ke kongei el kmo tia el kltarreng a olechotel a mera el omengull?​—Johanes 13:35.

6. Ngmekerang a omelatk el kirel a Rengedel a Dios e ngosukid el mo oba kltarreng?

⁶ A remera el mengull er a Dios a oba kltarreng e le tir el omes er a Rengedel a Dios el kmo ngdi ta el omelatk el kirel a klechad. Te medengei el kmo ngdi telkib kung e tia el Rengedel a Dios a mo okngemed a rokui el kabelment e omekngeltengat er a rebekongesenges el chad el mesterir a diak a ulebengelel el budech. (Isaia 11:4-9; Daniel 2:44) Me tir el Kristiano a oltirakl er a tekingel a Jesus el mo er a rulebengkel el kmo: “Te diak le klalo ra belulechad, el ua ngak el diak kklalo ra belulechad.” (Johanes 17:16) Te dirrek el diak loba bitang me a ka lebitang er a ngii di el klautok er a beluulechad; me te dmeu a rengrir el oba kltarreng er a delongelir alta e a rechad el iliuekl er tir a kaumekemad.

A Tekingel a Dios a Omeskid a Ulekrael

7, 8. Ngoeak a ngera el rolel e a ulekrael er a Biblia a oureor el melisiich er a kltarreng?

⁷ A Rekristiano er a kot el dart el rak a uleba kltarreng, e le tir el millai a omelisiich el okiu a tekingel a Dios. Te mle medengei el kmo a Jesus a ngike el olisechakl e omekrael er a ongdibel el okiu a chelechad er a ruungerachel, el tir a rechapostol me a remechuodel er a Jerusalem. Tirka el blak a rengrir el chad a millib a tekoi el ultuil er a Tekingel a Dios, e dirrek el uleldurokl er a ruldingel a ongdibel el mo omekrael a ongdibel er a kakerous el beluu. A Biblia a melekoi el kirir a ruldingel a ongdibel el kmo: “Me tuleltebetab a mats el ulelterekokl rar chad ngiil tekoi el le tilib ar apostel mar mechuodel el ngara Jerusalem, el leko bo lolab.”​—Rellir 15:6, 19-​22; 16:4.

⁸ Me ngdi osisiu er a chelecha el taem, a Chelechad er a Ruungerachel a meteketek el okiu a rengellitel el Kristiano el oureor el melisiich er a kltarreng er a bek el ongdibel er a beluulechad el rokir. Me tia el Chelechad er a Ruungerachel a oltobed a suobel el ngar er a betok el kakerous el omelekoi. Me aika el suobel a mengai a uchetemel er a Tekingel a Dios, me a osisecheklel a diak el ngar er a rechad el mei, e ngbai ngar er a Jehovah el mei.​—Isaia 54:13.

9. Ngmekerang e tia el ureor el bla lebeskid a Dios a mo uchul a kltarreng er kid?

⁹ A Rekristiano el mechuodel a dirrek el melisiich er a kltarreng el oeak sel lomekrael er a ureor er a berkel a klumech. A ungil el klausechelei el ngii a oldak er a remesiungel a Dios a lmuut el mesisiich er a ngii di el rolel a omilil el omak a deleuill er a beluulechad. A ongdibel er a Rekristiano a diak el cheldebechel er a omilil, e ngbai cheldellir a rechad el mengebkall er a Jehovah, e dirrek el mo churrengelii a ureor er a berkel a ungil chais, e meruul er a remo disaiplo, e dirrek el meleketek er a kltarreng er a chelsel a ongdibel er tir. (Rom 1:11, 12; 1 Thesalonika 5:11; Hebru 10:24, 25) Me a apostol el Paulus a mle sebechel el melekoi el kirir a Rekristiano el kmo: “Di multerekokl el ngara tal  reng e bo lta uldesuiu lodekdak a klisichiu loumekemad el kirel a kloumera ra evangkelio.”​—Filipi 1:27.

10. Ngera bebil er a tekoi el olecholt el kmo kede oba kltarreng el chedal a Dios?

¹⁰ Me kid el chedal a Jehovah a oba kltarreng e le kede kongei er a omengederederel a Jehovah, e betik a rengud er a klodam er kid, e oba omelatk el kirel a Rengedel a Dios, e mengull er tirke el ngar er a delongeled el lousbech er tir a Jehovah el omekrael er kid. A Jehovah a dirrek el ngosukid el mo mesisiich er aike el chelitechetud el ngii a sebechel el tomellii a kltarreng er a delongeled.​—Rom 12:2.

Mo Mesisiich er a Kldidairreng Me a Chelechei

11. Ngera uchul me a kldidairreng a meleakl er a rechad, e mekerang a Jehovah a lengesukid el mo mesisiich er ngii?

¹¹ A kldidairreng a meleakl er a rechad. A chad el kedidai a rengul a blechoel el di mesaod a ungil el chisel e le ngomdasu el kmo ngkuk ngarbab er a rebebil. Engdi tia el blekeradel a sebechel el tomellii a kltarreng er a rechad, me tirke el orrenges er ngii a mo mechechei er ngii. Me a disaiplo el Jakobus a bleketakl el melekoi el kmo: “A ikal rokuil uaisel chetengakl a mekngit.” (Jakobus 4:16) Ngkmal diak el rolel a bltikerreng a lsekum ngmetengel a osenged er a rebebil. Ngkmal ungil a kerebil a Jehovah el kirel a klengariourreng el sebechel el kongei er a rediak el mecherrungel el chad. A David a milluches el kmo: “[Dios] ke mla ngosukak e ongesecheklak.” (2 Samuel 22:36) A Tekingel a Jehovah a ngosukid el mo mesisiich er a kldidairreng el oeak sel losisecheklid el mo ungil el omdasu a tekoi. A Paulus a uleker el kmo: “Ngkol techa ngikel omekmeteet er kau? Ma ikel ngarngii er kau ngngera er ngii a dimlak mnguu? Cho mngilai, e ngera me komkuuk el ua le mlak mngai?”​— 1 Korinth 4:7.

12, 13. (a) Ngera uchul me ngbeot el bo demechechei? (b) Ngera mo duubech a lsekum me kede oba osengel a Jehovah el kirir a rebebil?

¹² A chelechei a dirrek el ta er a telemellel a kltarreng. E le kid el diak demecherrungel a uchul me ngar er ngii a techelled el mo “mechechei” el mo lmuut er a remeketeketang el Kristiano me te dirrek el mo mechechei a lebebil er a taem el kirel a blekeradel me a klalo me a techall me a lechub e ngduch er a rebebil. (Jakobus 4:5) El ua itiang, a ta el odam el ngar ngii a telungalek er ngii a locha mo mechechei er a odam el ngar ngii a techellel el mesiou el mui el taem, e diak el lolechesuar el kmo ngika odam el mesiou el mui el taem a dirrek el mo mechechei er a odam el ngar er ngii a telungalek er ngii. Kede mekerang e sebeched el oibngid er tia blekeradel er a chelechei me lak letemellii a kltarreng er a delongeled?

¹³ Sel dolebedebek er a rolel a Biblia a lomekesiu er a rengellitel el Kristiano el mo er a kakerous el klekedellel a bedenged, e ngngosukid el mo oibngid er a blekeradel er a chelechei. (Monguiu er a 1 Korinth 12:​14-18.) Alta e ngsebeched el mesa medad e diak el sebeched el mesa rengud, engdi aika el eru el klekedall a dul el meklou a ultutelel. Me ngdi osisiu, a rokui el chedal a ongdibel a mekreos er a osengel a Jehovah, alta e a rebebil a kuk ngarbab a deruchellir er a rebebil. Me ngkired el mo oba osengel a Jehovah el kirir a rudam er kid. Ngdiak el kired el mechechei er tir e bai mo olecholt a klemeriarreng el mo er tir. Me sel dolatk a klungiolir a rudam er kid e ngmeketeklii a klekakerous er a delongelir a remera el Kristiano me tirke el chedal a Klsuul el Klekristiano.

A Klsuul el Klekristiano ​a Medangch el Okiu a Klekakeakl

14, 15. Ngmilekerang e a Klsuul Klekristiano a ulebii el mo betok el cheldebechel?

¹⁴ A kltarreng er a remera el Kristiano a mocholt el kuk ngodech er aike el klautok er a delongelir a rechedal a Klsuul Klekristiano. Ngar er a ongedei el dart el rak er a taem er kid, e tirke el omtok er a mera el Klekristiano a kmal mlo betok a ildisir, el mlo uchul me ngike el diak loudios el  merredel er a Rom a mlo mengederedel e ulemekdubech a Klsuul Klekristiano. Me tiang a mlo uchul a klekakeakl er a delongelir, me a betok el cheldebechel a mlo chetirir el chederedall er a omengederederel a Rom, e bai mlo melibech a ikelesia er tir er a rekebelurir.

¹⁵ A betok er aike el renged a mla kaumekemad er a delongelir el mla mo betok el dart el rak. Ngar er a 16 el mo lmuut er a 17 el dart rak er a taem er kid, e a rechad er a Britain me a Furans me a beluu er a Merikel a millisiich a belurir el mlo uchul a uldasu el kmo a belurir a kuk ungil er a bebil er a beluu, e tiang a mlo ua klechelid er tir. E a bekord el ngar er a 18 el mo er a 19 el dart el rak er a taem er kid, e tia el uldasu el kirel a omengull el mo er a Beluu a kmal mlo mesisiich er a uldesuir a rechad. Me ngoeak tia el omeruul e a Klsuul Klekristiano a uleberk el mo kakerous el bedengel a klechelid el oumesingd er ngii a melisiich er a uldasu el kmo a belurir a kuk ungil er a bebil er a beluu. Me a rechedal aika el klechelid a mo er a mekemad el omekoad er a rekldemir er a klaumerang el chad er a bebil er a beluu. Me chelecha el taem e a Klsuul Klekristiano a obii e le ng klekakerous el klaumerang er tir a uchul me a dirrek el uldasu kmo a belurir a kuk ngarbab er a bebil el beluu.

16. Ngera el tekoi a uchul a klekakeakl er a delongelel aika el cheldebechel er a Klsuul Klekristiano?

¹⁶ Ngar er a 19 el dart el rak er a taem er kid, e a rebebil el chedal a Klsuul Klekristiano a mlo omuchel el oldak a kakerous el cheldebechel el millasem el melisiich er a kltarreng er a delongelir. Ngdi chelsel aika el betok el rak el longetmokl er tia el ureor e ngdi mekesai el ikelesia a mla mo oltirakl er a ta el uldasu, e a ruumesingd er tir a dirk kautok el kirel a kakerous el tekoi, el ua sel uldasu el kmo a rechad a mla er a mongkii el mei, me a omelecheb er a retolechoi, me a remengolchotaor, me a dirrek el omengedaol er a redil el mo mengeteklel a klechelid. A remengeteklel a bebil er aika klechelid a melasem el meruul a kltarreng el oldak er a rechad, el oeak sel lebechititerir me di le tir el meruul a tekoi el sorir. Me nguaisei, tia el omeruul a di remuul a klaumerang er a rechad el mo meched el diak a ta el bo el sebechel el rullii a kltarreng er a delongelel aika el cheldebechel er a Klsuul Klekristiano.

A Mera el Omengull a Mla Meteketek

17. Ngmilekerang er a lomlaoch el kmo a mera el omengull a mo uchul a kltarreng er a rechad er a “ngar medad el sils”?

¹⁷ Me alta e a klechad er chelechang a kmal klou a klekakeakl er a delongelir, engdi a kltarreng a melemolem el olengchelir a remera el mengull er a Dios. A profet er a Dios el Mika a ulemlaoch el kmo: “Ak mo oldak er kemiu el ua sib el ngar a chesimer.” (Mika 2:12) Ngulemlaoch el kmo a mera el omengull a meteketek el mo kedidai er a rokui el omengull, el luldimukl er aike el klsuul el chelid me a lechub e ngomengull el kirel a Beluu. Ngdirrek el milluches el kmo: “A ikel ngar medad el sils e a rois el le dechor er ngii a Templo a mo kot el kedidai er a rois el rokui. Ng betok el beluu a mei el mo ketitech er ngii. A derta er a ikel beluu a mengull el meluluuch e olengesenges er a di chedul, ngdi kid a mo mengull el meluluuch e olengesenges er a [Jehovah] el Dios er kid el mo cherechar el diak a ulebengelel.”​—Mika 4:1, 5.

18. A mera el omengull ngmla ngosukid el melodech a ngera el blekeradel?

¹⁸ A Mika a dirrek el milsaod er a rolel a mera el omengull a bo loldak er a re kaucheraro el chad el  kmo: “Mei me bo dengasech er a bukl er a [Jehovah,] el mor a Templo er a Dios er a Israel. Kede mo medengelii sel soal a doruul er ngii; e mo merael er a ikel rael el bla lengilt. . . . Te mo toiot a saider er tir el mo osib, ma biskelengir a le teot el mo oles er omengemkimd el dellomel. A re beluu a kmal diak lluut el mor a mekemad, ma lechub e lluut el mengedmokl el kirel a mekemad.” (Mika 4:2, 3) Tirke el mengoit a omengull el lolibech a rechad me omengull el kirel a belurir e mo mengull er a Jehovah, a oldeu a rengrir er sel kltarreng er a delongelir el meues er a beluulechad el rokir. A Dios a olisechakl er tir el loeak a rolel a bltikerreng.

19. Tia el kltarreng er a delongelir a rebetok el miliol el chedal a mera el omengull, ngolechotel a ngerang?

¹⁹ Tia el kltarreng er a remera el Kristiano er a chelechang a kmal ileakl e meketeklii el kmo, a Jehovah a melemolem el omekrael er a rechedal el okiu a klisichel. A rebetok el kakerous el chad er a kakerous el renged a mocha dmak el ngar er a kltarreng el ngii el tekoi el dirkak a ta el lemeketmokl er a chelsel a reksi er a klechad. Tia el tekoi a otutii sel ulaoch el medung er a Chocholt 7:9, 14, e dirrek el ochotii el kmo a rechanghel er a Dios a di kmedung e te mo ousbech er a “eolt” el mo okngemedii tia el mekngit el blekeradel er a beluulechad. (Monguiu er a Chocholt 7:​1-4, 9, 10, 14.) Ngkmal ileakl el techall el sebeched el mo teloi er tia el klodam el meliuekl er a beluulechad. Ngmekerang e mo sebechel a derta er kid el melisiich er tia el kltarreng? Kede mo mesaod er tiang er a ongingil el suobel.

Ke Mekerang a Omonger?

• Ngmekerang a mera el omengull a loldak er a rechad?

• Kede mekerang e diak debecherei a chelechei el reng me letemellii a kltarreng er a delongeled?

• Ngera uchul me a omengull el kirel a Beluu a diak el sebechel el tomellii a kltarreng er a remera el mengull er a Jehovah?

[Aike el Ker er a Suobel]

[Siasing el ngar er a 16 el llel]

Tirke Kristiano er a kot el dart el rak a mle kakerous a blekerdelel a klengar er tir er a uchei

[Siasing el ngar er a 18 el llel]

Ngmekerang a ngelsuim el kirel a okedecherul a Blil a Ongdibel e melisiich er a kltarreng?