A Mesisiich el Mengetekled er a Chelechang

“Me ngtilobed el mla mo kats e lmuut el mo kats.”​—CHOCHOLT 6:⁠2.

1, 2. (a) A Biblia ngmekerang a losaod er a kleking er a Kristus er sera lomuchel er a 1914 el mei er a chelechang? (b) E ngera ngriruul a Kristus er sera lenguu a deruchellel el king el mei er a chelechang?

 A KRISTUS a mildalem el King er a Rengedel a Jehovah er a rak er a 1914. Ngmo uangerang a uldesuem sel molatk er tia el tekoi? Ngua omomes er ngii el dengchokl er a kingellel e omes el bedul a beluulechad me bo el sebechel el medengei el kmo uangerang a ongdibel er ngii? A lsekum e ke omdasu el uaisei e ngkirem el ngodechii a uldesuem. A babier er a Psalm me a Chocholt a mesaod er ngii el kmo ngua mesisiich el king el dengchokl er a chermel el uos, e tilobed “el mla mo kats e lmuut el mo kats,” e melemolem el dimerekmo bo le “mesisiich.”​—Chocholt 6:2; Psalm 2:​6-9; 45:​1-4.

² Sel kot el tekoi el rirellii a Kristus er a uriul er a bo leking a mlo kats er a “dragon mar anghel er ngii.” Me ngii el Mihael el mengederedel er a rechanghel er ngii, a uldikii a Satan me a remekngit el anghel er ngii er a eanged e ulemidokl er tir el mei er a chutem. (Chocholt 12:​7-9) Me ngoeak tia el deruchellel el “oderchelel” a Jehovah e a Jesus a mlo obengkel a Demal el omes el kmo ngera meketmeklang er a chelsel a templo er ngii. (Malakai 3:⁠1) Nguluukerrekeriil er a Klsuul el Klekristiano el ngii a kot el mekngit el omeruul er a chelsel a “Kloul Babilon” e le ngchelsechusem er a rsechir a rechad e ngar er a deleboes el lomeruul el obengkel a chelechad er a balatiks er tia el beluulechad.​—Chocholt 18:​2, 3, 24.

Mengikiid er a Remesiungel el Ngar Tia el Chutem

3, 4. (a) Ngera el ureor a lechirrengelii a Kristus el ngii a “oderchelel” a Jehovah? (b) Ngulechotii a ngerang a omerritel er a templo, me a Jesus el Bdelul a ongdibel ngulelterekokl a ngera el ureor?

³ A omerritel el lurruul er ngii a Jehovah me ngike el “oderchelel” a ulechotii el kmo ngmo lmuut er aike el mekesekesel a templo e ngmla er  ngii a cheldebechel er a remera el Kristiano el tir a kmal dimlak el chelsechusem er aike el klechelid er a Klsuul el Klekristiano. Me nguaisei me tirke el ngellitel el Kristiano me a lechub e te telungalek er a “Levi” me ngmle kirir el mo klikiid. El ua lulemlaoch a profet el Malakai el kmo: “Ng mei el mo oukerrekeriil el ua ngikel omiich e mengikiid a silber. Me ng mo mengikiid er a re prist el di ua silber ma kolt el lomiich. Iseikid e te mo oldars a meral tenget el oltirakl er a ungil el omelenget el mor a RUBAK.” (Malakai 3:⁠3) Me a Jehovah a uluusbech er ngike el ‘oderchelel’ el Jesus Kristus el mo mengikiid er tirke el ileakl el chedal el Israel er a Dios.

⁴ Me nguaisei a Kristus a miltik er tirka el blak a rengrir el ngellitel el Kristiano el oltobed a ulekrael er a Dios er a bek el blsechel el kirir a rechedal. Me ngulemuchel er a rak er a 1879 el me lmuut er a chelechang, e te mengetmokl e oltobed a klemerang el tekoi er a Biblia el kirel a Rengedel a Dios el ngar er a makesin. A Jesus a ulemlaoch el kmo sel “bo lrei” el mo merriter er a remesiungel er a “ullebongel ra taem ra belulechad,” e ngmetik er a mesiou el mengetmokl a kall “el mechii a blsechel.” Misei e ngomekedong er ngike el mesiou el kmo ngdmeu a rengul e “mo dolemii el mo mengedereder a daisang er ngii el rokui.” (Matteus 24:​3, 45-47) Me ngii el Bdelul a ongdibel er a Klekristiano a uchul, me a Kristus a ousbech er a “blak a rengul e mellomes a rengul mesiou” el omtebechel a daisang er a Rengedel el ngar tia el chutem. Ngdirrek el lomesterir a rengellitel el “mesiungel” me a resechelirir el “ngodech el sib” a ulekrael el okiu a Chelechad er a Ruungerachel.​—Johanes 10:⁠16.

A Blsechel a Omeridm er Tia el Chutem

5. A Johanes ngmilsang a ngera el tekoi el kirel el bo loruul er ngii a King el Messias?

⁵ A apostol el Johanes a milsang a ues el kirel a tekoi el bo loruul er ngii a King el Messias er a “klsel a Rubak,” er a uriul er a lenguu a deruchellel el King er a rak er a 1914. Ngmilluches el kmo: “E a kumes, e mesang, ngmlarngii a becheleleul eabed, e mlarngii choua ngelekel a chad el dengchokl er ngiil eabed, e telechull ra krone el kolt, e a chimal choba kedorm el kamang.” (Chocholt 1:10; 14:​14) A Johanes a rirengesii a anghel er a Jehovah el melekoi er ngike el Chad er a omeridm me lenguu a kamelengel, e le “ngmereka sim ra belulechad, me ngmocha blsechel chomeridm.”​—Chocholt 14:​15, 16.

6. Ngera el tekoi a lulsaod er ngii a Jesus el kmo ngmo mutaut er a omerolel a taem el mei?

⁶ A “sim ra belulechad” a mekltkid er sel okesiu er a Jesus el kirel a mungi me a omekodall el mungi. A Jesus a ulemekesiu er ngii el ua chad el mlo omriid a tane er a mungi er a sersel, el millatk el kmo ngmo meridm a ungil el mungi el ngii a omtechei “ar ngalek ra rengedel a Dios;” el tir a rengellitel el Kristiano el mo obengkel el ngar er a Rengedel. Engdi a bocha el klebesei e a cheraro el “diabelong” a mlei el mriid a tane er a omekodall el mungi el tir “ar ngalek er ngikel mekngit.” Me ngika el chad er a sers a dula er a ruureor el kmo bechei a ungil mungi me a omekodall el mungi me ledak el mo meklou er a blsechel a omeridm el ngii a “ullebongel ra belulechad.” Seikid el taem e ngmo oderecheterir er a rechanghel er ngii el mo meleakl a ungil el mungi er a omekodall el mungi.​—Matteus 13:​24-30, 36-41.

7. Ngmekerang a Kristus a lomekrael er a “sim ra belulechad”?

 ⁷ A otutel a ues el lilsang a Johanes a meketeklii el kmo a Jesus a dirk omekrael er a ureor er a omeridm er tia el beluulechad. A “sim ra belulechad” a ulemuchel el mengudel er tirke el medechel el 144,000 el “ngalek ra rengedel a Dios,” el tir a “mungi” el ngar er a okesiu er a Jesus. Me a uriul er a Kot el Mekemedil a Beluulechad e ngkmal mla obeketakl a klekakerous er a delongelir a remera el Kristiano me a reklsuul, el uchul me ngsebeched el mo medengelii a belkul sel ongeru el temel a “sim ra belulechad,” el ngii a omengudel er tirke el ngodech el sib. Tirkang a diak el “ngalek ra rengedel a Dios” e te bai okedongall el “kloul seked,” el tir a kongei el mo chederedall er a Renged. Tirkang a mengai er a delongelir a “re chad er a bek el beluu, ma re bek el bedengir a re chad, ma kakerous el omelekoi.” Te kongei el mo chederedall er a Rengedel a Messias, el ngii a meteketek el okiu a Kristus me tirke el 144,000 el “chedal,” el tir a mo obengkel el mengederedel el ngar er a eanged.​—Chocholt 7:​9, 10; Daniel 7:​13, 14, 18.

A Mengeteklel a Ongdibel

8, 9. (a) Ngera ochotii el kmo a Kristus a medengei a blekeradel er a bek el ongdibel er ngii, e dirrek el medengei a omerellir a rebek el chedal aika el ongdibel? (b) Ngar er a 29 el llel tia el babier e ngngera aike el “dmolech ra Satan” el kired el kerekikl el mengeroid er kid er ngii?

⁸ Kede milsa sel rolel a Kristus a lorritel a blekeradel er a derta er aike el ongdibel er a kot el dart el rak er tia el mlo merek el suobel. Me chelecha el taem e ngika el King el olab “a rokuil klisichel chomerreder ra eanged ma chutem,” a Kristus el ngii a Mengetekled el bdelul a ongdibel er ngii el meliuekl er a beluulechad me a remechuodel. (Matteus 28:18; Kolose 1:​18) A Jehovah a mla rullii el mo “Bedul el ngar bebul a rokuil tekoi el milsa eklesia,” el tir a rengellitel. (Efesus 1:​22) Ngii el Kristus a sebechel mes a rokui el tekoi el meketmokl er a chelsel a betok er a 100,000 el ongdibel er a Resioning er a Jehovah.

⁹ A Jesus a milluches a klemechel el mo er a Thiatira el kmo: “Ngikei el medal choua kerdel a ngau, . . . el Ngelekel a Dios a melekoi choua ika el kmo, ‘Ak medenge urerem.’ ” (Chocholt 2:​18, 19) Nguluungeroel er a rechad er sel ongdibel el kirel a blekerdelir el mirruul a deleboes, e nguibes a rengrir el kmo: “Ngak ngikel merriter el mo lmuut ra chelsel a rengul a chad, e mo mesterir ar derta er kemiu a kirel a ureriu.” (Chocholt 2:​23) Sel tekingel a Kristus a ochotii el kmo ngdimlak di lomes a blekeradel er a chelsel a derta el ongdibel e ngdirrek el mle medengei a blekerdelir tirke el rokui el chedal aika el ongdibel. A Jesus a chilat er a Rekristiano er a Thiatira el tir a dimlak lodengei a “ikel leko ngdmolech ra Satan.” (Chocholt 2:​24) Chelecha el taem e ngdirrek el chemat er a rengeasek me a remeklou el chad, el tir a kerekikl el mengeroid er tir er aike el “dmolech ra Satan” el ngar ngii er a Internet me a ngii di el kdekudel el klekool er a video me a lechub e nguldesuir a rechad el melisiich a mekngit el omeruul. Ngkmal dmeu a rengul sel lomes er a rebetok el Kristiano er a chelechang el blak a rengrir el oltirakl a ulekrael er ngii el kirel a bek el blekerdelel a klengar er tir!

10. Ngmekerang e obeketakl el kmo a Kristus a omekrael er a remechuodel er a ongdibel er ngii, e ngera el blechebechel a tekoi a kirir el mo medengei?

¹⁰ A Kristus a oba bltikerreng el omekrael a bek el ongdibel er ngii er a beluulechad el okiu tirke el bla lolutk er tir el mechuodel. (Efesus 4:​8, 11, 12) Ngar er a kot el dart el rak e tirke el rokui el mechuodel a lullilt er tir a Dios. A babier er a Chocholt a mesaod er tir el kmo te bduch el ngar er a kidekmel a chimal a Kristus. (Chocholt 1:​16, 20) Chelecha el taem e a ruumesingd er a remechuodel er a ongdibel a mengai er a delongelir tirke el ngodech el sib. Tirkang a mengilt er a uriul er a omeluluuch me a dirrek el ulekrael er a Jehovah me bo el sebechir el meruul a tekoi el oltirakl er a ulekrael er a Kristus. (Rellir 20:​28) Te medengei el kmo a Kristus a ousbech er a rengellitel el sechal el Kristiano el tir a Chelechad er a Ruungerachel el omtebechel e omekrael er a redisaiplo er ngii er tia el chutem.​—Monguiu er a Rellir 15:​6, 28-30.

“Rubak el Jesus, Mei!”

11. Ngera uchul me kede kmal oureng me lemereched el mei ngika el Mengetekled?

¹¹ Ngar er a ues el lilsang a apostol el Johanes, e a Jesus a melekoi el kmo ngdi mereched el mei. (Chocholt 2:16; 3:11; 22:​7, 20) Me ngbleketakl el  kmo ngmilsaod er a merekung el kerrekeriil el kirel a Klou el Babilon me tia el mekngit el beluulechad er a Satan. (2 Thesalonika 1:​7, 8) Sel klemeriarreng er a apostol el Johanes el kirel a otutel aika el rokui el meklou el tekoi a uchul me ngdilu el kmo: “Amen. Rubak el Jesus, mei!” Me kid el kiei er a taem er a ulebengelel tia el mekngit el beluulechad er a Satan a kmal oureng el mo mesang ngika el Mengetekled e King er kid el mei el oba klisiich el mo mengedaol er a ngklel a Demal, e dirrek el mo sobecheklii a Omengederederel.

12. Ngera el tekoi a kirel a Kristus el kutmeklii er a uchei er a telemellel tia el mekngit el beluulechad er a Satan?

¹² A uchei er a lemei a Jesus el mo okngemedii a meues el cheldebechelel a Satan, e tirke el chedal a 144,000 el ngellitel el dirk ngar er a chutem a kirir el mla nguu a olangch el meketeklii a blakerreng er tir. A Biblia a bleketakl el melekoi el kmo a telemellel tia el beluulechad er a Satan a diak el bo er ngii el dimerekmo le nguu a olangch tirke el ngellitel el dirk ngar er a chutem.​—Chocholt 7:​1-4.

13. Ngmekerang a Jesus a bo lomeketakl er a demiel el ngar sel uchelel a “kloul ringel”?

¹³ Sel “demiel” a Kristus er sera rak er a 1914 a diak lodengelii a ruumesingd el chad. (2 Petrus 3:​3, 4) Engdi ngdi kmedung a Kristus e mo meketeklii a demiel el mo otutii a kerrekerilel a Jehovah el mo okngemed aika el mekngit el blekeradel er a beluulechad er a Satan. Me a telemellel a “chad el diak lolab a llach” el tir a remengeteklel a klechelid er a Klsuul Klekristiano a mo obeketakl er a taem er a “demiel.” (Monguiu er a 2 Thesalonika 2:​3, 8.) Ngmo ochotii el kmo a Kristus a mla omuchel el oureor el Chad er a kerrekeriil el meltutk er a Jehovah. (Monguiu er a 2 Timoteus 4:⁠1.) Me a okngemedel sel kot el mekngit el blekerdelel a Klou el Babilon el ngii a renged er a Klsuul Klekristiano a mo uchelel a telemellel tia el mekngit el renged er a klsuul el klechelid er tia el beluulechad er a Satan. A Jehovah a mo rulleterir a remengeteklel a balatiks el mo okngemedii ngika el tingaol dil. (Chocholt 17:​15-18) Tiaikid a mo uchelel a “kloul ringel.”​—Matteus 24:⁠21.

14. (a) Ngera uchul me a uchelel a klou el ringel a di mo kedeb? (b) Ngera belkul a “cholangch ra Ngelekel a chad” el kirir a rechedal a Jehovah?

¹⁴ A Jesus a milsaod el kmo aike el sils er a klou el ringel a mo “mekedeb el kirir ar ngellitel” el tirke el ngellitel el dirk ngar er a chutem. (Matteus 24:​22) A Jehovah a diak el becherei a odecheleklel a klsuul el klechelid me lokngemedeterir a rengellitel el Kristiano me tirke el sechelirir el ngodech el sib. A Jesus a dirrek el dilechelii el kmo “ngdi uriul era ikel ringel el mo duubech er isel taem” e ngmo er ngii a olangch  el ngar er a sils me a buil me a bduch, “isei e cholangch ra Ngelekel a chad a duum ra eanged.” Me tiang a mo remuul a renged el ngar tia el chutem el mo “mengebechub.” Engdi a rengellitel el oba omelatk el mo er a eanged me tirke el sechelirir el ngodech el sib el oba omelatk el mo kiei er tia el chutem a kmal diak bo le medakt. Te bai kmider a bderrir e le ‘ngubet er tir a kmedang.’​—Matteus 24:​29, 30; Lukas 21:​25-28.

15. Ngera el ureor a bo loruul er ngii a Jesus sel lemei?

¹⁵ Me a uchei er a le rekir a urerel, e ngika el Ngelekel a chad a mei el oeak a kuk ta er a rolel. Ngulemlaoch el kmo: “Sel le me Ngelekel a chad el obeterir ar anghel el ngara klebkellel e ngmo dengchokl ra kingall er ngiil klebkall. E ar chad ra bek el renged a mo mechudel er medal, me ngmo omii er tir el ua klekerengel a sib a lomii a sib ma kaming, el melecha sib ra kidekmel, e a kaming a lolecha ra katur.” (Matteus 25:​31-33) Tiang a melutk el mo er a demiel a Kristus el mei el ua Chad er a kerrekeriil el mo omii er a rechad er a “bek el renged” el mo eru el bliongel, me a “sib,” el tirke el ullengeseu er a rudam er ngii el tir a (rengellitel el Kristiano el dirk ngar er a beluulechad) me tirke el “kaming” el tir a dimlak “lolengesenges ra evangkelio ra Rubak er kid el Jesus.” (2 Thesalonika 1:​7, 8) Me tirke el ua sib el tir “ar melemalt” a mo nguu a “diak a ullebengelel klengar,” engdi tirke el ua kaming a “mo soiseb ra diak a ullebengelel blals” me a lechub e te mo nguemed el mo cherechar.​—Matteus 25:​34, 40, 41, 45, 46.

A Jesus a Mla Mo Kats e Lmuut el Mo Kats

16. Ngmekerang ngika el Kristus el ngii a Mengetekled e mo kats el lmuut el mo kats?

¹⁶ Me sel lebo el mecherrungel a ildisir tirke el king e prist er a Jesus e le medangch tirke el sib er ngii, e bo ledechor er a kidekmel el kirel a osobel, isei e a Kristus a mocha “kats e lmuut el mo kats.” (Chocholt 5:​9, 10; 6:⁠2) Me ngii el mengeteklel a urrurt er a remesisiich el anghel, me tirke el mla mekiis er a kodall el odam er ngii a mo okngemedii a beluulechad er a Satan el cheldebechel er a balatiks me a cheldebechel er a klsoldau er aika el renged, me a dirrek el tekoi er a siobai. (Chocholt 2:​26, 27; 19:​11-21) Me a Kristus a mo kats sel lokngemedii tia el mekngit el blekeradel er a beluulechad er a Satan. E sola e mo kulebsengii a Satan me a remekngit el anghel er ngii er a diak a btil el deliobech el ta el telael el rak.​—Chocholt 20:​1-3.

17. Me a Kristus ngomekrael er tirke el ngodech el sib el mo er ker er a chelsel a Omengederederel el Ta el Telael el Rak, me kid ngngera kired el meruul er ngii?

¹⁷ A apostol el Johanes a milsaod er a “kloul seked” er a ngodech el sib el tir a mo suobel er a klou el ringel el kmo: “Ele ngikel Ngelekel a sib el ngara blngel a kingall chomekeroul er tir, el omekrael er tir el mora madedok el ralm ra klengar.” (Chocholt 7:​9, 17) Me nguaisei, ngar er a chelsel a Ta el Telael el Rak er a Omengederederel, e a Kristus a omekrael er tirke el orrenges er a ngerel el ngodech el sib, el mo er a diak a ulebengelel el klengar. (Monguiu er a Johanes 10:​16, 26-​28.) Misei e bo le blak a rengud el oltirakl er ngika el king el Mengetekled er chelechang el mo lmuut er sel beches el beluulechad el bla letibir a Jehovah el kired!

A Rolel a Domelekl a Suobel

• Ngerang mlo meruul a Jesus er sera bo le king?

• A Kristus ngousbech er a rua techang el omtebechel a ongdibel er ngii er tia el chutem?

• Ngoeak a ngera el rolel e a Kristus el Mengetekled a lmuut el mei?

• Ngmekerang a Kristus a bo lomekrael er kid er a chelsel a beches el beluulechad?

[Aike el Ker er a Suobel]

[Siasing el ngar er a 31 el llel]

A okngemedel a mekngit el beluulechad er a Satan a mo meketeklii a demiel a Kristus