Eua el Ker el Kirel a Ulebongel a Monger

A JESUS KRISTUS a ulemlaoch el kmo a ngar er a medad el klebesei, e a ‘ulebongel a mei.’ Sera losaod el kirel sel taem, e ngdilu el kmo: “Le isei e ngduubech a kloul ringel, el direkak le borngii ra uchelel a belulechad el me lmuut er chelechang, ma ka le borngii er chelechal mong.”​—Matteus 24:​14, 21.

A tekingel a Jesus el kirel a ulebongel, el obengkel a kuk bebil er a bades er a Biblia el mesaod er tia el tekoi, a mekdubech a betok el meklou a ultutelel el ker. Ka moutekangel el mo misii a Biblia er kau e monguiu aike el tekoi el onger er aika el ker.

1 Ngerang a Mo Nguemed?

A Biblia a diak lolisechakl el kmo tia el chutem a mo nguemed. A milluches er a psalm a dilu el kmo: “Ke mla toketekii a beluulchad el mesisiich el ngar omekedecheraol er ngii, ng kmal diak bo le mengukl.” (Psalm 104:⁠5) Me a ka lolisechakl el kmo a rokui el klengar a mo medul er a ngau el nguemed. (Isaia 45:​18) A Jesus a ullecholt el kmo te mo er ngii a rebebil el mo suobel er a ulebongel. (Matteus 24:​21, 22) Me a leuaisei, ngerang melekoi a Biblia el kirel a ulebongel?

A kabelment er a klechad a mo nguemed. A Dios a ulemekrael er a profet el Daniel el mo meluches el kmo: “Me sel taem el lorreder tirkel king, e a Dios el ngar a eanged a mo toketekii a rengedel el mo diak a ulebengelel. Misel renged a diak a sebechel el mo mesisiich er ngii, e ng bai mo okngemed a ikel bebil er a renged el rokui e sola e ngii a mo medechel el mo cherechar.”​—Daniel 2:⁠44.

Mekemad me a klikingelel a beluu a mo diak. A Psalm 46:9 a mesaod aike el bo loruul a Dios el kmo: “Ng merrob a mekemad er a beluulchad el rokir; ng mengam a balech e melemall a biskang, e melul omekreakl er a ngau!” A Biblia a dirrek el olisechakl el kmo a Dios a mo “okngemedeterir tirikel olekngemed ra belulechad.”​—Chocholt 11:⁠18.

Delengerenger me a chelebirukel a mo diak. A Tekingel a Dios a iaksok el kmo: “A re melemalt e diak a telemellir el chad a mo kiei er a beluu el diak bo le cheroid er ngii. Ngdi Dios a mo melai er a re dengerenger el oltobed er tir er a beluu, e mengurs er a re mekngit el chad el  oltobed er tir er ngii el ua lomadel a dellomel er a chutem.”​​—Osisechakl 2:​21, 22.

2 Ngoingerang e Ngmei a Ulebongel?

A Jehovah el Dios a mla tutkii a “blsechel” el bo lolekngemed a mekngit e mo rullii a Rengedel el ngii a kabelment er ngii el mo mengedereder er a beluulechad el rokir. (Markus 13:​33) Engdi a Biblia a bleketakl el olecholt el kmo ngdiak el sebeched el mo medengelii a ulterekokl el sils el kirel a ulebongel. A Jesus a dilu el kmo: “Ngdiak a medengelii sel sils malechub e ngsikang, el ka le anghel ra eanged, ma ka le ngiil Ngalek, ngdi Chedam a medengelii.” (Matteus 24:​36) Engdi a Jesus me a redisaiplo er ngii a ulemlaoch el kirel aike el blekeradel el mo er ngii er a beluulechad er a uchei er a lemei a ulebongel. Ngkmal kmedang a ulebongel a lsekum aika el rokui el tekoi el beldukl er iou a duubech er a osisiu el taem el meliuekl er a beluulechad el rokir.

Tekoi er a balatiks me a eltel me a debel me a tekoi er a beluu el ngar er ngii a letemellii er a rechad a dubechang el ngii a dirkak a ta el lemeketmokl er a chelsel a reksi er a klechad. Me a Jesus er a longer er a ker el uleker er ngii a redisaiplo el kirel a ulebongel, e ngdilu el kmo: “Ele ngmo kautok ar beluu mar beluu, ma renged ma renged; e morngii a desiu er ker me ker, e morngii a bosech; a ikai a uchelel a ringel ra cheroll.” (Markus 13:⁠8) A apostol el Paulus a milluches el kmo: “A ikel uriul sils ra belulechad a morngii er ngii a blsechel a ringel. Isei e ar chad a mo betik a rengrir ra di tir, e nguibes a udoud, e chemat ra di tir, e kididai a rengrir, e oltuub, e omtok rar demerir mar derrir, e diak lodenge saul, e diak le chedaol, e diak le chubechub, e diak le mesumech a rengrir, e melaes, e diak le delodau, e teleberechel, e chetirir a ungil, e keikr, e di olab a rengrir, e blkuuk, e betik a rengrir ra tametereng el kuk ngaruchei ra le betik a rengrir ra Dios.”​—2 Timoteus 3:​1-5.

A ureor er a berkel a klumech el meliuekl er a beluulechad el okiu a kakerous el omelekoi a meketmeklang. A Jesus a dilu el kmo: “Me tial evangkelio ra rengedel a Dios a mo oberk ra belulechad el rokir, el kirel locholt el bedul a bek el renged; e sola e ngmochu ullebongel.”​—Matteus 24:⁠14.

3 Ngera Mo Duubech er a Uriul er a Ulebongel?

A Biblia a diak lolisechakl el kmo a rokui el ungil el chad a mo mengai er tia el beluulechad el mo kiei er a eanged el mo cherechar. A Jesus a bai ullisechakl el kmo sel dimla moktek er a Dios el kirel a klechad a mo mutaut. Ngdilu el kmo: “Te ngeltengat ar medemedemek, le te mo oudiukes ra belulechad.” (Matteus 5:5; 6:​9, 10) A Biblia a dirrek el mesaod el kirel a okiis er a ngar er a medad el kirir tirke el mad er a uchei er a lemei a ulebongel. (Job 14:​14, 15; Johanes 5:​28, 29) Ngera mo duubech er a uriul er a ulebongel?

Ngar er a eanged, e a Jesus a mo mengedereder el King er a Rengedel a Dios. A profet el Daniel a milluches el kmo: “Ngikel kilsa er a ues er a klebesei a ua ngelekel a chad [ngike el mla mokiis el Jesus]. Ng mirrael el me kmeed, el mle iliuekl er a eabed, e mlor ngikel mle ngar er a irechar el mei [Jehovah el Dios] e mlocholt er ngii. Me ngmlar isei e ngiluu a klisiich, ma omengull, ma klisichel omerreder, el kirel me losiou er ngii [Jesus] a re chad er a bek el beluu, ma re bek el bedengir a re chad, ma kakerous el omelekoi. E a klisichel a medechel el mo cherechar, e a rengedel me ng diak a ulebengelel.”​—Daniel 7:​13, 14; Lukas 1:​31, 32; Johanes 3:​13-16.

Tirke el chederedall er a cheungel a Rengedel a Dios a mo oldeu a rengrir er a cherrungel el klisichel a bedengir, me a diak a ulebengelel el ulekerreu, me a diak a ulebengelel el klengar. A profet el Isaia a milluches el kmo: “A re chad a mo toketek a blai e mo kiei er ngii; el diak le ngodech el chad a mo ousbech. Te mo dualem a sers er a bilong, e mo dmeu a rengrir er a bilong; ng diak le kuk ngodech el chad a mo melim.” (Isaia 65:​21-23) A apostol el Johanes a  milluches el kirel sel taem el kmo: “Mesang, a blil a Dios chobenterir ar chad. Me ngii me ngmo obenterir el kiei, me te mo chad er ngii, ma Dios a di ngii el mo obenterir; e mo mesuld a bek el iuosech ra mederir, e mo diak a kodall, ma klengiterreng ma langel ma ringel me ngmo diak, ele ngmla nguemed a ikel dimla ngarngii.”​—Chocholt 21:​3, 4.

4 Ngkirem el Mekerang Me Bo el Sebechem el Mo Suobel er a Ulebongel?

A apostol el Petrus a ulechotii el kmo a rebebil er tirke el kiei er a taem er a ulebongel a mo oltngakl er a uldasu el kmo a Dios a ngar er ngii a bo loruul el kirel a klechad e mo olekngemed a chelebirukel er tia el beluulechad. (2 Petrus 3:​3, 4) Me alta nguaisei, engdi ngmengelechel er tirke el kiei er a taem er kid el mo meruul aika el tekoi el beldukl er iou.

Mngai a klubelem er aike el tekoi el dilubech er a ngar er a mong. A Petrus a milluches el kmo a Dios a “dimlak le ngebetii sel dimla belulechad, e bai lilia eeleb er ngiil diak loluu ra Dios el belulechad, e di mle ngikel omerk ra llemalt el Noah mar teuid el chad lobengkel a lulsobelterir.” (2 Petrus 2:⁠5) Ngdirrek el millekoi el kirir tirke el oltngakl el kmo: “Chetirir lomtab er tial tekoi el kmo, a irechar e ngmlarngii a eanged, ma ralm a mlo uchelel a belulechad loeak a chomelekingel a Dios, me ngdilubech ra ralm, e a belulechad er isel taem a mleeleb ra ralm el nguemed.  Ngdi eanged ma belulechad * er chelechang a ulekedelad er ngiil osisiul omelekingel a Dios, el di uaisei lulekedelad el mo lmuut er sel sils el le mukerrekeriil tirikel diak loluu ra Dios e le ngemed, e ngii a medul ra ngau.”​—2 Petrus 3:​5-7.

Mkiei el oltirakl a omellach er a Dios el kirel a tekoi er a kldung. A Petrus a milluches el kmo tirke el sorir el mo suobel er a ulebongel a kirir el mo olecholt a “chedaol blekeradel ma chomeluu ra Dios.” (2 Petrus 3:​11) Mutebengii el kmo ngmillisiich er a “chedaol blekeradel” me a “chomeluu ra Dios.” Me a leuaisei, ngbetok a usbechall er a di dolekoi el kmo ngar er ngii a klaumerang er kid me a lechub e dolasem el omak a klausechelei er kid el obengkel a Dios me bo el sebeched el mo suobel a lemei a ulebongel.

Ngera el ulterekokl el omeruul me a blekeradel a lekengei a Dios? Ngbai ungil a momekesiu aike el modengei el obengkel aike el lolisechakl a Biblia el kirel tia el tekoi. A Resioning er a Jehovah a mo dmeu a rengrir el olengeseu er kau. Molengit er tir me lochotii er a chelsel a Biblia er kau a uchetemel a nger er tir. A omoruul el uaisei e ngsebechel el ngosukau el mo chelebangel a tekoi er a ngar er a medam el oba ulterekokl el reng me a blekeu, alta ngbetok a uchul a dakt el iliuekl er kid er a chelechang.

[Footnote]

[Blurb el ngar er a 7 el llel]

A beluulechad a diak el bo el ngemed, engdi tirke el melemall er ngii a mo nguemed