Ngera Te Medakt er Ngii a Rebetok el Chad?

“Cho mchedal a klechelid me a lak me kau a sebechem el oumerang el kmo kede merael el bedul a tellemall.”​—STEPHEN O’LEARY, EL ASSOCIATE PROFESSOR, ER A UNIVERSITY ER A SOUTHERN CALIFORNIA. *

KAU ke oumerang er tia el tekoi? Aika el suobel a mo mesaod a bebil er a uchul me a rechad a medakt er a ngar mederir el klebesei. Engdi ngdirrek el mo olecholt el kmo ngera uchul me ngsebechem el mo ulterekokl a rengum el kmo a klengar el ngar tia el beluulechad a diak el bo el ngemed. Ngar er ngii a ungil el uchul a omelatk, alta aike el tekoi el bo monguiu a mekngit el chais.

A techellel a mekemad el ousbech a dub a kmal dirk klou. Sera 2007, e a Bulletin of the Atomic Scientists a ulemeklatk el kmo: “A beluulechad er chelechang a chelebangel a chetituokel el tekoi el di uai sel taem er a lousbech a dub el tomellii a Hiroshima me a Nagasaki.” Ngera uchul tia el sebekreng? Tia el babier a ouchais el kmo ngar er a rak er a 2007 e ngmla er ngii a kmeed el 27,000 el kenzibakudang el dirk medechel e a 2,000 er ngii a “kltmokl el obuu er a chelsel a di sesei el bung.” Me a lsekum a di kekerei el basent er aika el klekedall er a mekemad a obuu, e ngkmal mo klou el tellemall a mo er ngii!

A techellel a mekemad el ousbech a dub ngmla olengeasek er sel taem el mei er chelechang? A SIPRI Yearbook er a 2009 * * a melekoi el kmo aike el kleim el beluu el betok a klekedellir er a mekemad el ousbech a kenzibakudang el Sina, France, Rosia, United Kingdom, me a Merikel a rokui el “mla remuul aike el beches el mesil el oltobed a dub me a lechub e te mla ouchais el kmo ngsorir el meruul aikang.” Engdi tia el babier a melekoi el kmo ngdiak el di el ikaikid el beluu a ngar er ngii a kenzibakudang er tir. A rechad el merriter a tekoi a oumerang el kmo a India, Pakistan, me a Israel a ngar er ngii a 60 el mo bedul a 80 el kenzibakudang er tir. Te dirrek el melekoi el kmo ngmeliuekl er a beluulechad el rokir e ngngar er ngii a 8,392 el kenzibakudang el mla meruul e mengiil er sel taem el bo lomuu!

A ngeldechel a teletelel a eanged a sebechel el mo uchul a tellemall. A Bulletin of the Atomic  Scientists a melekoi el kmo “a tellemall el mo er ngii el oeak a ngeldechel a teletelel a eanged a mo kmeed el osisiu a telemellel el uai aike el mo er ngii el okiu a kenzibakudang.” A remerael a chisir el hakase, el uai a Stephen Hawking, el mle brobesong er a University er a Cambridge me a Sir Martin Rees, el Mastang er a Trinity College er a University er a Cambridge a kongei aika el osisiu el bleketakl el uleklatk. Te omdasu el kmo a mekngit el usbechellel aike el klekedall el omekbeot a klengar er kid me a omelodech el loruul a rechad el mo er a eltel me a debel me a chetemel a beluu a sebechel ngodechii a klengar el ngar tia el chutem el diak a ulebengelel me a lechub e ngokngemedii a klechad.

A Ulaoch el Kirel a Tellemall a Omeksebek a Rengrir a Rebetok el Miliol. Sel mlechesii a tekoi el “ulebongel er a beluulechad” me a rak el “2012” el mo er a kmal merael a chisel el basio el ngar er a internet, e ke mo metik a betok dart el llel a suobel el mesaod a uldasu el kirel a ulebongel el mei er seikid el rak. E ngera uchul? A kmal chuodel el kalender er a Maya el lomekedong er ngii el kmo “sel Kemanget el Ulecherangel,” a bla lomekbuk er ngii el mo merek er a rak er a 2012. A rebetok a medakt el kmo tia locha olechotel a ulebongel er a klechad.

A rebetok el chad er a klechelid a oumerang el kmo a Biblia a olisechakl el kirel a beluulechad el kmo ngmo metemall. Te omdasu el kmo a rokui el blak a rengrir el oumerang a mo er a eanged, e tirke el medechel a mo chuarm el ngar er a chelimeluk el beluulechad me a lechub e te obidokl el mo er a beluu er a ngau.

A Biblia ngmera el mesaod el kmo a beluulechad el rokir a mo metemall? A apostol el Johanes a ulemeklatk el kmo: “Lak moumera bek el reng, e morriter el kmo ngiil reng ng mlara Dios el mei ngdiak.” (1 Johanes 4:⁠1) Nglocha ungil a bekengii a Biblia er kau e di lekau el mesa el kmo ngerang melekoi el kirel a ulebengelel a beluulechad er a bai di mkengei aike el lolekoi a rebebil. Aike el lolekoi a sebechel chosir a rengum.

[Footnote]

[Credit Line]

Mushroom cloud: U.S. National Archives photo; hurricane photos: WHO/League of Red Cross and U.S. National Archives photo