Molengeseu er a Rengalek el Mo Medengelii a Cheldebechelel a Jehovah

A RENGALEK a sorir el mesuub a tekoi. Ka di molatk er a rengalek er a Israel er sel kesus er a lekot el mo er ngii a Baskua er a beluu er a Ekipten. Te locha uleker el kmo: ‘Ngera uchul me te omekoad er a ngelekel a sib?’ ‘Ngera uchul me a Demak a meliim a rasech er a medal a tuangel?’ ‘Kid kede mo er ker?’ Ngbleketakl el kmo a Jehovah a kilengei aika el ker el okiu a tekingel el mo er a redemerir a rengalek er a Israel. Ngmilsaod er a mo rolel a longetmokl er a Baskua el kmo: “Me sel loker er kemiu a re ngelekiu el kmo, ‘Ngera belkul tial omengull er a Baskua?’ e kom onger el kmo, ‘Ng sel omelenget er a Baskua el mor a RUBAK, ele ng di iliu er a blirir a re chad er a Israel el ngar a Ekipten er ser a lomekoad er a re chad er a Ekipten e di le bilechei a blid.’ ” (Exodus 12:​24-27) E a uriul e a Jehovah a ulemeklatk er a ruungalek el chad er a Israel el kirel a klungel a ultutelel a longer a kerrir a rengelekir el kirel a “llach el rokui” el bla longelechel er tir el kirel.​​—Duteronomi 6:​20-​25.

Ngkmal bleketakl el kmo a Jehovah a soal a rengalek a bo lodengei a nger er a kerrir el kirel a mera el omengull, el ngii el nger a mo rulleterir el  mo betik a rengrir er a Jehovah el Ngii a Osobelir e Dios er tir. A Jehovah a dirrek el oba osisiu el uldasu el kirir a rengalek er a chelecha el taem. A ta er a rolel e a ruungalek el chad a mo sebechir el ngosuterir a rengelekir el mekurulii a bltikerreng el mo er a Dios me a rechedal, a oeak sel losisecheklterir el mo medengelii a cheldebechelel a Jehovah me aike el klungiaol el longetmokl el kired. Me bo dosaod a bebil el rolel e ngsebechir a rengalek el mo medengei a lmuut el betok el kirel a cheldebechelel a Dios.

Ongdibel er Kid

A rengeasek a kirir el mo medengelii a ongdibel er a belurir. Ngsebechir el mo medengelii a ongdibel a lsekum a ruungalek er tir a obetiterir el mo er a bek el miting er a Rekristiano. Me ngoeak itiang, e kede oltirakl er a ulekrael el Jehovah a milsterir a rechad er a Israel er a ledu el kmo: “Kom omekedong er a rokui el sechal, ma redil, ma re ngalek . . . , bo le rengesii e losuub el mo meluu er a [Jehovah] el Dios er kemiu e le blak a rengrir el olengesenges osisecheklel. Tiakid a rolel e tirkel uldidellel a rsechiu el kmal dirkak le rengesii a llechul a [Jehovah] el Dios er kemiu a mo rongesii. Isei e te mo mesuub el meluu” er a Jehovah el Dios er kemiu.​—Duteronomi 31:​12, 13.

A kekerei el ngalek a sebechel el omuchel el mesuub a Tekingel a Jehovah. A apostol el Paulus a milsaod el kirel a Timoteus el kmo: “Ke medenge chedaol Llechukl er cho mkekerei el mei.” (2 Timoteus 3:​15) Ngar er aike el miting er a Kingdom Hall, e ngsebechir a remekekerei el ngalek el mo medengei a omesodel a tekoi e dirrek el mo meduch el mengitakl a chelitakl el kirel a Renged. Te dirrek el mesuub el mo meduch el ousbech er a Biblia me aike el babier el mengai a uchetemel er a Biblia. Me a lmuut el tang, te mo medengei el kmo tia el blekeradel er a bltikerreng a olengchelir a remera el oltirakl er a Kristus. A Jesus a dilu el kmo: “A beches el llach a kbeskemiu el kmo, bo mkaubltikerreng; el kaubltikerreng el ua ngak el betik a renguk  er kemiu. Cho bo mkaubltikerreng, e te mo medengelkemiu a rokuil chad el kmo kom Obengkek.” (Johanes 13:​34, 35) Me tia el bltikerreng me a ulekerreu a bleketakl el mocholt er a chelsel a Kingdom Hall el omeksemeriar er a rengalek el mo sorir el mei er a bek el temel a miting er a ongdibel er a Rekristiano.

Sel deblechoel el mereched el mei er a Kingdom Hall e dekiei er a uriul er a miting e ngmo er ngii a techellir a rengeleked el mo medengelterir a rechad. Me ngungil a lak de bechititerir me di lobengterir a rengalek, kede bai melisiich er tir el mo medengelterir a remeklou el chad el rudam me a rudos er kid. Me ngoeak itiang, e ngsebechir a rengalek el mo medengei a betok el tekoi el dilubech er a klengar er a remeklou el chad me a dirrek el llomeserreng er tir. El di ua Sekaria er a irechar, “el ngikel ulelsisechakl” a omeluu er a Dios el mo er a kekerei el chad el king er a Juda el Usia. Me chelecha el taem e te ngar ngii a remeklou el chad el tir a mla blak a rengrir el mesiou er a Jehovah el betok el rak el ungil el kerebai el kirir a remekekerei el chad. (2 Kronika 26:​1, 4, 5) Ngdirrek el ngar er a chelsel a Kingdom Hall e ngsebeched el mesaod a usbechellel a blil a babier me a blil a subed me a lmuut el bebil.

 Cheldebechel el Meliuekl er a Beluulechad

A rengalek a kirir el mo medengei el kmo a ongdibel er a belurir a ta er a rechelel aike el betok er a 100,000 el ongdibel el ngar er a cheungel a cheldebechelel a Jehovah el meliuekl er a beluulechad. Mouchais er tir el kirel tia el cheldebechel e mekerang a longetmokl a tekoi el kired, e ngera el tekoi a sebechir a rengalek el meruul el lolengeseu. Mochotii er tir sel uchul me kede semeriar el omes el beduluchei el kirel a meklou el ongdibel me a odngelel ngike el oldingel ongdibel.​​—Momes er a baks el  “A Tekoi el Bo Dosaod er a Temel a Omengull el Telungalek,” er a 31 el llel.

Sel lebo er ngii a techall e mongemedaol er tirke el oldingel a ongdibel me a remissionari me a rebebil el ngar er a Bethel, me a remesiou el mui el taem el me obengkemiu el omengur. Lak momdasu el kmo te kmal mechesang me ngdiak a temir el kirir a rengalek. Tirka el mesiou el mui el taem a melasem el oukerebai er a Jesus, el ngii a mle blechoel el semeriar el mengedecheduch er a rengalek. (Markus 10:​13-​16) Sel lorrenges er tirka el mesiungel a Jehovah el ouchais a tekoi el dilubech el mo er tir e dirrek el bo lolechesuar a deurreng er tir el kirel a omesiungir, e a rengelekiu a ulterekokl el mo semeriar el meruul a turrekong er tir el kirel a omesiungir.

Ngera el tekoi a dirrek el sebechiu el remuul el ngosuterir a rengelekiu el mo ungil el medengelii a cheldebechelel a Jehovah? Aikaikid a bebil er a ungil el ulekrael: Bo mdak el telungalek el mesuub er a babier el Jehovah’s Witnesses​​—Proclaimers of God’s Kingdom. Molisiich er a klungel a ultutelel a omeluu er a Dios me a klengariourreng me a blakerreng el bla locholt a remesiungel a Jehovah. Mochotii sel rolel er a Jehovah a lousbech er tir el omerk er a ungil el chais er a beluulechad el rokir. Mousbech aike el video el mlotobed er a cheldebechelel a Jehovah el olisechakl a meklou a ultutelel el suobel er a ngar er a mong me chelechang. A lsekum e ngsebechiu e bo moldingel aike el obis er a branch me a blai er a Bethel el ngar er a belumiu me a lechub a bebil er a beluu. Chouaika el tekoi a sebechel el dochel a klemedengei er a rengelekiu el kirel a cheldebechelel a Jehovah el ngar tia el chutem el ngar cheungel a ulekrael er a blak a rengul el mesiou el ngii a mengetmokl a suobel el kirel a klemedengei er a Dios, e dirrek el omekrael er a rudam er a beluulechad el rokir, el di ua omeruul el mileketmokl er a kot el dart el rak.​​—Matteus 24:​45-​47; Rellir 15:​22-​31.

Molisechakl er a Derta el Ngalek

Sel dolisechakl er a rengeleked, e dolebedebek er sel rolel er a Jesus a lolisechakl er a rechapostol er ngii. Ngmle ta el ledu er tir el kmo: “Ngdirke lmuut el betok el tekoi a kirek el melekoi er kemiu, e ngdi dikea mtekau er chelechang.” (Johanes 16:​12) A Jesus a dimlak lomekeek er tir er a kmal betok el tekoi. Ngbai milekekokil el olisechakl a meklou a ultutelel el klemerang me bo el sebechir el mo ungil el medengei. Me ngdi osisiu, ngungil a lak domekeek er a rengeleked er a kmal betok el tekoi er a ta el taem. Kede bai mekekokid el olisechakl er tir a dertelkib el tekoi el kirel a cheldebechelel a Jehovah me bo el sebeched el omeksemeriar er tir el mo mesuub a lmuut el betok el kirel a ongdibel er a Rekristiano. Me sel le mekurula el mo meklou, e ngsebechem el menglou er a klemedengei er tir el omeklatk er tir er aike el tekoi el bla lesuub.

Ngoeak a ongdibel er a Rekristiano e ngdirrek el sebechel el olisechakl er kid el mo melisiich a ungil el deleuill er kid el obengkel a Dios, me a rengalek el tir a blak a rengrir el meruul er a omesiungir a mo sebechir el dechor el omtok a ongetikaik er tia el beluulechad er a Satan. (Rom 12:⁠2) Ngkmal ulterekokl a rengmam el medengei el kmo ngmo uchul a deurreng er kemiu sel mngesuterir a rengelekiu el mo ungil el medengelii a cheldebechelel a Jehovah. Me ngoeak a klengeltengat er a Jehovah e bo el sebechir a rengelekiu el melemolem el blak a rengrir el mesiou el ngar er a chelsel a cheldebechelel ngika el betik a rengul el Dios.

[Baks/​Siasing el ngar er a 31 el llel]

 A Tekoi el Bo Dosaod er a Temel a Omengull el Telungalek

Aikakid a bebil er a tekoi el kirel a cheldebechelel a Jehovah el sebeched el mo mesaod er a temel a Omengull el Telungalek.

▪ Ngungil a domes a reksi el kirel a ongdibel er kid. Ngoingerang e milekerang e ngulemuchel? Te uluusbech a ngera el basio el bo el kldibel er ngii e oumiting? Ngar tiaikid el omesaod e ngungil a omolengit er a ta er a meketeketang el chedal ongdibel el mei er a blimiu me bo el sebechel el onger a kerrir a rengelekiu.

▪ Mosaod a moktek er a kakerous el miting er a ongdibel me aike el meklou el ongdibel e mekerang e sebechir a rengelekiu el ngmai a klungiolir er ngii.

▪ Mosaod a moktek er aike el kakerous el skuul el longetmokl a cheldebechelel a Jehovah. Mouchais a ungil tekoi el dilubech el mo er tirke el tilobed er aika el skuul.

▪ Mngesuterir a rengalek el mo melechesuar a klungel a ultutelel a bo el teloi er a ureor er a berkel a ungil chais. Mochotii a rolel e ngsebechir el mo uldimukl er a ildisir tirke el tuobed a ocherengir er a chais el ngar er aike el Yearbook of Jehovah’s Witnesses el tuobed er a bek el rak.

▪ Mosaod aike el kakerous el techall er a mui el taem el omesiou el mo er a remekekerei el chad el ngar cheldebechelel a Jehovah. A 10 el bliongel er a babier el Organized to Do Jehovah’s Will a kmal ungil el meskid a ungil el omesodel.

▪ Mngesuterir a rengalek el mo medengelii sel uchul me ngkired el oltirakl a mla meketmokl el ulekrael er a ongdibel. Msodii a uchul me ngdiak el kired el di oba rengud el meruul a soad e diak doltirakl a meklou me a mekekerei el ulekrael er a cheldebechelel a Jehovah. E mochotii a rolel e ngsebechir el meruul a ungil el tekoi er a chelsel a ongdibel el oltirakl a ulekrael er a remechuodel.

[Siasing]

Me ngdi ua sel taem er a Israel er a irechar, a ruungalek er a chelechang a kmal kirir el mo ungil el onger a kerrir a rengelekir el kirel a cheldebechelel a Jehovah

[Siasing el ngar er a 31 el llel]

Ngmo uchul a klungiolir a rengelekiu sel bo lodengelterir tirke el meketeketang el mesiou el mui el taem