Telungalek el Dmak e Kasisiich er a Omesiungir

SEL dedak kid me a telungalek er kid el oureor e kede kasisiich e dirrek el olengeriakl el kirel a omesiunged el mo er a Dios. A Jehovah er sera lomeob er tirke el kot el obekel e ngmillisiich er tir el mo kaingeseu er a delongelir. Me a Eba a mle kirel el oureor el “olengeseu” er a Adam. (Genesis 2:​18) A rebechiil el chad a kirir el dmak el oureor el kaingeseu. (Olisechakl 4:​9-​12) Me ngngerechelir a ruungalek me a rengalek el otutii sel ngerachel el lebilsterir a Jehovah el mo kaingeseu.

Omengull el Telungalek

A Barry me a Heidi a ngar ngii a reteim el ngelekir. Te mla metik er ngii el kmo sel ledak el mesuub a Biblia e ngngosuterir el mo olengeriakl er a omesiungir. A Barry a melekoi el kmo: “Ngar er a omesubam e ak mesterir a rengelekam a suobel el bo loruul. A lebebil e ak kulengit er tir el mo meruul a nger er tir el ousbech a suobel el mengai er a Awake! Aki dirrek el mengetmokl er kemam er a tekoi el ki bo molekoi sel ki moldingel a obliil.” A Heidi a dirrek el dochelii el kmo: “Aki rokui el mla kutmokl a turrekong el somam el mo meruul, e melasem el mesaod er a temel a omesubam el telungalek me bo el sebecham el medengei el kmo aki kirel ker.” Tirka el obekel a mla metik er ngii el kmo a loterekokl a temel a osengel a tv e ngmesterir a techellir a rebek el chad el mo menguiu e mesuub.

Aike el Miting er a Ongdibel

A Mike me a Denise a mla mekuruleterir a reteua el ngalek. Ngmilekerang e mlo uchul a klungiolir el telungalek sel le kaingeseu el oureor? A Mike a melekoi el kmo: “A lebebil er a taem e aki meruul a tekoi me bo el sebecham el mechir a temel a miting e ngdi ngmo diak el sebechel, engdi aki miltik er ngii el kmo sel ki mkaingeseu el rokui e ngmo sebecham el mechir a temel a miting.” A Denise a mesaod el kmo: “Aki ulelterekokl a ngerechelir a rengelekam el kirir el meruul er a lengalek. A ngelekam el redil el Kim a ullengeseu el meruul a kall e mengetmokl er a tebel.” A ngelekir el sechal el Michael a melekoi el kmo: “Bek el Ongeru el Ureor e ngmla er ngii a miting er a ongdibel er a blimam. Me aki mengetmokl er a blimam e meriik er a ulaol e omechobech a kingall.” A Matthew el ta er a ngelekir el sechal a kmo: “A demak a mle blechoel el mereched el mei er a blai er sel temel a miting me bo el sebechel el olengeseu el mengetmokl el kirel a miting.” Me ngngera mlo rsel?

Ngmlo Uchul a Klungiaol

A Mike a melekoi el kmo: “Sera rak er a 1987, e ngak me a Denise a ulemuchel el mesiou el mui el taem. Sel taem e a retedei el ngelekam a dirk kiliei el obengkemam. A reteru er tir a mlo soiseb er a mui el taem el omesiou e tirke el bebil a mlo soiseb er a ureor er a okedecherul a blai er a Bethel. E a lmuut el klou el deurreng er kemam a mlo sebecham el ngosuterir a 40 el chad el mo tuib a klengar er tir el mo er a Jehovah e mlo metecholb. Ngdirrek el mlo er ngii a techellam el telungalek el mo teloi a ureor er a okedecherul a blai er a bebil er a beluu.”

Ngmera el tekoi, a klaingeseu er a delongelir a rechedal a telungalek a mo uchul a klungiaol. Kemiu, ngsebechiu el metik a lmuut el bebil er a rolel e kom dmak el telungalek el kaingeseu? Ngsebechel el mo ulterekokl a rengmiu el kmo a klaingeseu er a delongeliu el telungalek a mo uchul e kom olengeriakl er a omesiungiu el mo er a Jehovah.

[Siasing el ngar er a 10 el llel]

A omengetmokl el kirel a tekoi el bo dosaod er a temel a odingel a obliil a sebechel el ngosukid el olengeriakl er a omesiunged