Nglunguuch

1 Ngera Uchul Me Kede Ousbech er a Nglunguuch?

NGLUNGUUCH. Ngar ngii a bebil el omesodel a Biblia el olecholt er a klou el klemeriarreng el kirel a nglunguuch el tekoi. Ngsebeched el mo mesaod a eim el ker el kirel a nglunguuch e mo merriter a nger er ngii el ngar er a chelsel a Biblia. Aika el suobel a mileketmokl el mo ngosukau el mo meduch el meluluuch e dirrek el mo sebechem el mo ungil el meluluuch.

MELIUEKL er a beluulechad el okiu a betok el kakerous el siukang me a klechelid e a rechad a meluluuch. Te meluluuch el di tir el tang me a lechub e te teloi er a rechad me a cheldellir a rechad. Te dirrek el meluluuch er a chelsel a ikelesia me a templo, me a blil a ongdibel me a dirrek el ngar a bita er aike el meklou el bleob el chaus el rruul el kirel a omengull me a omeluluuch. Te meluluuch el ousbech a ulech me a rosario, me a klekedall el melitai el ousbech el meluluuch me a dirrek el babier er a nglunguuch me a lechub e te ousbech a nglunguuch el llechukl er a kerrekar el telecherakl er a kboub el loluluuch el mo er ngii.

A nglunguuch a omeruul el rulleterir a rechad el kuk mo ngodech er a ngii di el klengar el ngar tia el chutem. Ngklemerang el kid a di ua charm el ousbech a kall me a eolt me a dirrek el ralm. Kede dirrek el mechell el kiei e dirrek el mo mad. (Olisechakl 3:19) Engdi te di chad a sebechir el meluluuch. E ngera uchul?

A beot el omesodel a kmo, ngkired el meluluuch. A ruumesingd el chad a omes er a nglunguuch el ua lerolel e ngmo sebechir el mengedecheduch er a chederir me a lechub e ngmo er a tekoi el chedaol me a lechub e ngmekreos e dirrek el diak a ulebengelel. A Biblia a meketeklii el kmo kid a ulebeob el ngar ngii a urunguled el soad aika el tekoi. (Olisechakl 3:11) A Jesus a dilu el kmo: “Te ngeltengat a re medengei el kmo te chebuul a lak lousbech er a Dios.”​—Matteus 5:3.

A rechad a mla remuul aika el betok el meklou el ikelesia me a betok el klekedall er a omeluluuch e le te oumerang el kmo ngrolel e ngsebechir el meluluuch el mo er a Dios. Me nguaisei, engdi a rebebil er a rechad a ultuil er a rebebil el kirel a ongelaod. Kau ke melechesuar el kmo a rechad a diak a klisichir el cherrungel el olengeseu? Kid a kmal mechitechut e dirrek el kmal di kedeb a klengar er kid, e kedeb a osenged er a tekoi. Me ngdi ta el chad el kmal el mellomes a rengul e mesisiich e dirrek el sebechel el kiei el diak a ulebengelel, a sebechel el meskid aike el dousbech. Me aikaikid a di bebil er a tekoi el meskid a ungil el luchul me ngkired el meluluuch el olengit a ngelsuil a Jehovah. Me ngngera ike el tekoi el rullid el mo meluluuch?

Ka di molebedebek: Ngmla ta el moureng el kirel a mellomes el ulekrael me a lechub e ngnger el mo onger er a kerim el kau a omdasu el kmo ngdiak a chad el sebechel el mo medengelii? Ke mla ta el moureng a ongelaod el kirel a betik er a rengum el dibusei, me a lechub e ngulekrael e le ke mlo chelebangel er a meringel el tekoi me a lechub e ngklausubes el kirel a oberaod el klengit?

A doltirakl er a Biblia e aika el tekoi a sebeched el meluluuch el mo er a Dios el kirel. A Biblia a kot el ungil el babier el mesaod a tekoi el kirel a nglunguuch, e ngar ngii er a chelsel a nglunguchir a rebetok el blak a rengrir el sechal me a redil. Te milluluuch el olengit a ongelaod me a ulekrael me a klausubes e dirrek el ullengit a nger el kirel a meringel el ker el blo lechelebangel.​—Psalm 23:3; 71:21; Daniel 9:4, 5, 19; Habakuk 1:3.

Chouaika el nglunguuch alta e ngmle kakerous engdi ngngar ngii a tekoi el ble losisiu el kirel. A derta er tirke el milluluuch a mle medengelii sel ileakl el rolel e ngmonger a nglunguchir. Te mle medengei el kmo ngtecha ngike el kired el meluluuch el mo er ngii. Engdi tia el omeruul a blechoel el diak lomtab er ngii a rechad er a chelecha el taem me a lechub e ngdiak lodengelii.