Nglunguuch

2 Kede Meluluuch el Mo er Techang?

A  KER a kmo, a rokui el nglunguuch el mo er a rekakerous el chad, ngmo er a di ta el basio? Chelecha el taem, e a ruumesingd el chad a omdasu el kmo nguaisei. Tia el uldasu a lekengei er ngii a rebetok el chedal a klechelid el tir a melasem el oldak a kakerous el klechelid el di mo tang, alta e ngkmal kakerous a rolel a osisecheklir. Misei e a ker a kmo, tia el uldasu ngcheleuid?

A Biblia a olisechakl el kmo a betok el nglunguuch a mo er a ngodech el chad me a lechub e ngdios. Sel taem er a omelechesel a Biblia, e a rechad a milluluuch el mo er a bleob el chaus. Engdi a Dios a mle betok el taem el lomeklatk er a rechad el kmo tia el omeruul a mekngit. El ua tiang, a Psalm 115:4-6 a melekoi el kirel aike el bleob el chaus el kmo: “Ng ngar ngii a dingal, e ngdi diak el sebechel el orrenges.” Me a leuaisei, ngera uchul me kede meluluuch el mo er a dios el ngii a diak el rengesid?

A cheldecheduch el ngar er a Biblia a mesaod er a blekeradel el dilubech el omeketakl er tia el tekoi. A profet el Elias a milsemai er a reprofet er a Baal me loluluuch el mo er a dios er tir, e a uriul e ngii el Elias a mlo meluluuch el mo er a dios er ngii. A Elias a dilu el kmo ngike el mera el Dios a mo onger a nglunguuch, e ngike el klsuul el dios a mo diak el sebechel el onger. A reprofet er a Baal a kilengei er a omelsemai me te mle kemanget el meluluuch e dirrek el lmangel e dimlak a ngera el duubech! A cheldecheduch er a Biblia a kmo: “E di dimlak a nger el mei, el dimlak a ngeral morenges.” (1 King 18:29) E kuk ngera dilubech er a uriul er a loluluuch a Elias?

A uriul er a loluluuch a Elias, e a Dios er ngii a di mle mereched el onger er a nglunguchel el ultengelii a ngau el mla er a eanged el durur sel tengetengel. Me ngngera sel mle kakerous er aika el eru el nglunguuch? Ngmla er ngii a klou a ultutelel el tekoi el mla er a chelsel a nglunguchel a Elias, el ngar er a 1 King 18:36, 37. Tia el nglunguchel a kmal mle kedeb, el di mle bekord el 30 el tekoi el ousbech a tekoi er a Hebru er a irechar. Ngar a chelsel sel kekedeb el nglunguchel e ngmle edei el taem el lulemekedong er a ngklel a Jehovah.

A ngklel a chelid er a rechad er a Kanaan a Baal el belkul a kmo “ngike el merreder” me a lechub e ng “mastang,” e mla er ngii a betok el kakerous el teletelel. Me nguaisei, e tia el ngakl el Jehovah a kmal ileakl el ngakl el di kirel Ngike el merreder er a eanged me a chutem el rokir. Ngkaikid el Dios a dilu er a rechedal el kmo: “Ngak, el di ngak el tang, a [Jehovah] el Dios er kau. Ng diak a kuk tar a chelid el kim omii er a klebkellek.”​—Isaia 42:8.

Me a ker a kmo, a nglunguchel a Elias me tirke el profet er a Baal, ngmlo er a osisiu el basio? Tirke el milengull er a Baal a millisiich a deleboes el omeruul me a dirrek el omelenget er a rechad. Engdi a Jehovah a kuk mle ngodech e le ngmilengelechel er a rechedal el mo mengeroid er tir er a chouaike el mekikiongel el omeruul. Ka di molatk er tiang: Oleko ke meluches a babilengem el mo er a kmal kmeed el sechelim, e nglocha diak el soam el mecherei a babilengem me le bo er a chimal a chad el ngii a diak el ngike el sechelim, me a lechub e ngmo  er a chimorir tirke el mekikiongel a omerellir el chad. Ngulterekokl el kmal diak mkengei er tia el omeruul!

A lsekum e ke meluluuch el mo er a Jehovah e kau a meluluuch el mo er ngike el Ulemeob, e Demal a klechad. * Ngar a nglunguchel a profet el Isaia e ngdilu el kmo, “kau e [Jehovah] a Demmam.” (Isaia 63:16) Me ngkaikid a ngike el Dios el Jesus Kristus a millekoi el kirel el mo er a rulebengkel el kmo: “Ak mo ngmasech el mora Demak el ngikel Demmiu, el Dios er ngak e dirrek el Dios er kemiu.” (Johanes 20:17) A Jehovah a Demal a Jesus. Ngii a ngike el Dios el Jesus a ullisechakl er a rulebengkel el mo meluluuch el mo er ngii.​—Matteus 6:9.

A Biblia ngmengelechel er kid el mo meluluuch el mo er a Jesus me a Maria me a resanto me a lechub a rechanghel? Ngdiak, a nglunguuch a di mo er a Jehovah. Ka molatk aika el eru el uchul. A kot, e a nglunguuch a ta er a rolel a omengull, e dirrek a Biblia a melekoi el kmo a nglunguuch a kmal di ileakl el kirel el mo er a Jehovah. (Exodus 20:5) E a ongerung, a Biblia a ochotii el kmo Ngii el Jehovah a dirrek el ngar ngii a dial el okedongall el kmo: “Konger a nglunguuch.” (Psalm 65:2) Me alta e a Jehovah a merous a betok el ngerachel el mo er a rebebil, engdi tiaikid el rolel a omengull a dimlak lomsang a ngii di el chad. Ngii a Dios el tibir el kmo ngmo orrenges a nglunguchir a derta el chad.

Me a lsekum e ngsoam a Dios a lorrenges er a nglunguchem, e lak mobes er tia el uleklatk el kmo: “Ngikel mo omekedong ra ngklel a [Jehovah] a mo sobel.” (Rellir 2:21) Engdi a Jehovah, ngorrenges a rokui el nglunguuch? Me a lechub e ngngar ngii a lmuut el bebil er a tekoi el kired el mo medengei a lsekum e ngsoad a Jehovah a lorrenges a nglunguched?

[Footnote]

[Siasing el ngar er a 5 el llel]

A omelsemai er a delongelel a Elias me tirke el milengull er a Baal a mileketeklii el kmo a rokui el nglunguuch a kmal diak el bo er a di chimo el basio