Nglunguuch

5 A Dios Ngorrenges e Onger a Nglunguuch?

TIA el ker el llechukl er bab a klou a klemeriarreng er a rechad el kirel, el sorir el mo medengelii a nger er ngii. A Biblia a ochotii el kmo a Jehovah a kmal lorrenges a nglunguuch er a chelecha el taem. Ngmo kongei el orrenges a nglunguched me a lechub e ngdiak el di mo ultuil er a nglunguched el mo er ngii.

A Jesus a mle bleketakl el oungeroel er tirke el mengeteklel a klechelid er a taem er ngii el milluluuch el di mirruul a ues. Ngdilu el kmo choua itirka el chad a “mla nguu chomeksulir” el belkul a kmo te ngmla nguu sel mle sorir el tekoi, el ngii a chetengakl er a rechad, engdi ngdimlak lenguu sel tekoi el kmal luluusbech er ngii, el mo sebechel a Dios el orrenges er tir. (Matteus 6:5) Me ngdi osisiu er chelecha el taem, a rebetok el chad a meluluuch el mo er a Dios el oltirakl a di sorir el diak el soal a Dios. Me tir el mlengemikr er aike el omellach er a Biblia el bla desaod a uchul e ngkmal diak el sebechel a Dios el orrenges a nglunguchir.

E kau a kuk mekerang? A Dios ngorrenges e dirrek el onger a nglunguchem? A nger er aika el ker a diak bo lultuil er a kmo kau ke techang, e chad er ker el beluu, me a lechub e ngua ngerang a deruchellem er a buai. A Biblia a oterekokl a rengud el kmo: “A Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.” (Rellir 10:34, 35) Me kau, ke uldimukl er tirka el chad? A lsekum e ke meluu er a Dios e ngbelkul a kmo ke mengebkall er ngii, e dirrek el kerekikl me ngdiak bo moruul a tekoi el mo uchul a kngtil a rengul. Me a lsekum e ngsoam el meruul a llemalt e ngbelkul a kmo ke kongei el mo meruul aike el lolekoi a Dios el kmo ngmelemalt, er a bai di moruul aike el soam el tekoi me a lechub e ke oltirakl er a rechad. Me a ker a kmo, kau ngsoam a Dios a lorrenges a nglunguchem? A Biblia a ochotii a rolel a omoluluuch e ngsebechel a Dios el orrenges a nglunguchem. *

Ngklemerang el tekoi, a rebetok el chad a sorir a Dios a longer a nglunguchir el okiu a ongasireng el omeruul. Ngdirrek el ngar sel taem er a omelechesel a Biblia, e a Dios a di mle kesai el taem el loruul a mengasireng el ureor. A ongasireng el meketmokl a dimlak el blechoel el tekoi, e le ngsebechel el mo chuib a betok el rak e a Dios a kutmeklii a mengasireng el ureor. Me a lmuut el tang, a Biblia a meketeklii el kmo a uriul er a lemad tirke el ulebongel el apostol e ngmlo diak a mengasireng el omeruul. (1 Korinth 13:8-10) Me tiang ngbelkul a kmo a Dios a diak lorrenges a nglunguuch er chelecha el taem? Ngkmal diak leuaisei! Ka molatk a bebil el nglunguuch el bla longer.

A Dios a uchul a llomeserreng. A Jehovah a ngike el Uchul a mera el llomeserreng. Ngkmal semeriar el merous er tia el diak locheraol el llomeserreng el mo er tirke el sorir el oltirakl a ulekrael er ngii e dirrek el kiei el oltaut er a klengar er tir.—Jakobus 1:5.

A Dios a omesterir a rechad sel oureor el klisichel me aike el rokui el mo uchul a klungiaol. A chedaol el reng a sel oureor el klisichel a Dios, el diak a ngii di el klisiich el mesisiich er ngii. Ngkmal sebechel el ngosukid el mo outekangel a ngii di el omelsemai. Ngdirrek el meskid a budech er a rengud er sel taem el dechelebangel a meringel el uldesued. Ngsebechel el ngosukid el omekeroul a ungil el blekerdeled. (Galatia 5:22, 23) A Jesus a tilbir el mo er a rulebengkel el kmo a Dios a mo mesterir tia el oureor el klisichel.​—Lukas 11:13.

A Dios a omesterir a llomeserreng tirke el osiik er ngii. (Rellir 17:26, 27) Meliuekl er a beluulechad e te ngar ngii a rechad el blak a rengrir el osiik er a klemerang. Ngsorir el mo medengelii a Dios, e dirrek el mo medengelii a ngklel, me a ngerang a moktek er ngii el kirel tia el beluulechad me a klechad, e mekerang e mo sebechir a rechad el mo kmeed er ngii. (Jakobus 4:8) A Resioning er a Jehovah a blechoel el metik er a choua itirka el chad e dirrek el kmal dmeu a rengrir el mo ngosuterir el mo medengei a nger er aike el ker.

Me tiang nguchul e ke mla nguu tia el babier? Kau, ke osiik er a Dios? Tiaikid a locha rolel e ngonger er a nglunguchem.

[Footnote]