A Jehovah a Kmal Ngarbab el Dios er Kid!

“Ak metik er osebechakl el ngar a [Jehovah] el Dios.”​—PSALM 73:28.

1. A tekingel a Paulus el ngar a 1 Korinth 7:31, ngmelutk el kirel a ngerang?

 A TEKINGEL a apostol Paulus a kmo: A “teletael er tial belulechad a mo nguemed.” (1 Korinth 7:31) Ngar er a tekingel e ngulemekesiu er tia el beluulechad el ua chad el ousekool a mubi el ungil el chad me a lechub e ngmekngit el chad, e a uriul e ngkuk mengodech a blekeradel el loruul er a mubi.

2, 3. (a) Ngsebeched el omekesiu er tia el omelsemai el kirel a omengederederel a Jehovah el mo er a ngerang? (b) Ngera el ker a bo dosaod?

² Chelecha el taem e a kot el klou a ultutelel el blekeradel a meketmeklang, e kau me ke dirrek el chelsechusem er ngii! E tia el tekoi a ngar ngii a lerellii el kirel a omengebkellel a omengederederel a Jehovah el Dios. Tia el blekeradel a sebeched el omekesiu er ngii er a omeruul el meketmokl er a ta el beluu, el bita el beluu er a chelsel a chederedall er a kabelment er sel beluu, e a bita er ngii a kuk ngar cheungel a omengedereder er a remekngit el chad, el melisiich a uldikel me a blulak me a koadelchad. Me tia el mekngit el cheldebechel a omtok er a omengederederel a kabelment, e dirrek el mo uchul a omelsemai el mo er tirke el melemalt el chad er sel beluu.

³ A osisiu el blekeradel el kirel a omengedereder er a eanged me a chutem a dirrek el meketmokl er chelecha el taem. Ngngar ngii a uleketmokl el kabelment er a “Rubak [el Jehovah el Dios.]” (Psalm 71:5) Engdi a klechad er chelecha el taem a chelebangel a odechelakl el ngii a ngar er a cheldebechel el longedereder er ngii “ngike el mekngit.” (1 Johanes 5:19) Ngmelasem el omtok er a uleketmokl el kabelment er a Dios e dirrek el uchul a omelsemai me a ringel el mo er tirke el blak a rengrir el chedal sel kabelment er a Dios. Ngmilekerang e mo uaisei a blekeradel? Ngera uchul me a Jehovah a kongei er tia el omeruul? Me a derta er kid, ngngera sebeched el rullii el kirel tia el blekeradel?

A Tekoi el Kirel Soadel

4. Ngera el eru el tekoi a uldimukl er a meketmeklang el omeruul er a eanged me a chutem?

⁴ Tia el omeruul el meketmeklang er a eanged me a chutem a uldimukl er ngii a eru el tekoi: El omengederederel a Jehovah me a blakerreng er a klechad. Ngar a Bades, e ngblechoel el omekedong er a Jehovah el “ngikel Kot el Ngarbab.” El ua tiang, a ta er a milluches er a Psalm a milengitakl el kmo: “Ak metik er osebechakl el ngar a [Jehovah] el Dios.” (Psalm 73:28) “A [Jehovah] a ngikel Kot el Ngarbab . . . . el king el mengedereder er a beluulchad el rokir.”​—Psalm 47:2.

5. Ngera uchul me ngkired el melisiich er a omengederederel a Jehovah?

⁵ Me ngii el Jehovah a ngike el Ulemeob a uchul  me ngrredemelel a mengedereder er a eanged me a chutem. (Monguiu er a Chocholt 4:11.) Ngii a dirrek el Chad er a kerrekeriil, e Melib a llach, e dirrek el King, me ngsebechel el toketekii a olbiil er a Rengedel el mo orrurt er a kabelment er ngii el mo mengedereder er a eanged me a chutem. (Isaia 33:22) Me kid a blsel e le ngulemeob er kid a uchul, me a klengar er kid a kirel el ultuil er ngii. Ngdirrek el kired el omes er ngii el Dios er kid, el mengedereder er a cherrengelel a eanged me a chutem. Me sel dolemolem el melatk er ngii el kmo ngdengchokl er sel ngarbab el kingellel er a omerreder engdi ua de kengei el kmo: “A [Jehovah] a mla kudmeklii a kingellel er omerreder el ngar a eanged; ng ngii a king el mengedereder a rokui.”​—Psalm 103:19; Rellir 4:24.

6. Ngerang a blakerreng?

⁶ Ngmo sebeched el smisichii a llemeltel a Jehovah el mengedereder a lsekum e kede melemolem el blak a rengud el bedul Ngii. A “blakerreng” a tekoi el kirel a cherrungel el rolel a kldung. Me a chad el blak a rengul a kirel el chad el diak a telemellel, e dirrek el meruul a llemalt. A rubak el Job a ngklel, a mlokedong el melemalt el chad.​—Job 1:1.

A Uchul Me Ngulemuchel Tia el Blekeradel

7, 8. Ngmilekerang a Satan er a lolasem er a llemeltel a Jehovah el mengedereder?

⁷ Ngbekord el 6,000 el rak er a mla me mong, e a ta er a rechanghel a mlo omtok er sel llemeltel a omengederederel a Jehovah. A ngelbesel a rengul el mlo soal a omengull a lebo er ngii a mlo uchul a ultok me a mekngit el omeruul. Ngmilengitikaik er a Adam me a Eba el mo mengemikr er a llemeltel a Jehovah el mengedereder, e dirrek el ultubii a ngklel a Jehovah er a lolekoi er tirke el teru el obekel el kmo a Dios a ulumulak er tir. (Monguiu er a Genesis 3:1-5.) Ngika el anghel el mlo omtok a mlo okedongall el Cheraro, el Satan e Diabelong el ngii a Omtok, e bersoech (el bulak) e dirrek el dragon (el ngike el omekoad.)​—Chocholt 12:9.

⁸ A Satan a di mle ngii el rullii el mo orribech er a omengederederel a Jehovah. Me a Jehovah el Ngii a mengedereder er a eanged me a chutem, ngmo mekerang el kirel tia el omelsemai? Ngmo olekngemed er tirke el tedei el mlo omtok er ngii, el Satan me a Adam me a Eba? Ngkmal mla er ngii a klisichel el sebechel el rullii tia el tekoi me lobeketakl el kmo ngii el Jehovah a kmal rredemelel a mengedereder, e dirrek el kot el mesisiich el Dios. Ngdirrek el mle sebechel el uchul e ngobeketakl a klemerang el tekingel el kirel a mo belsel a chad el durengul el tomellii a llechul. Me ngngera uchul me a Dios a dimlak loruul er tia el tekoi?

9. A omerellel a Satan, ngua luleker er a ngera el ker?

⁹ Me a Satan er sera lomulak e longesuseu er a Adam me a Eba el mo cheroid er a Jehovah, e ngua luleker el kirel a llemeltel a Jehovah el mengedereder el okiu a blekongesenges er a klechad. Ngdirrek el omerellel el mlo sebechel el mengesuseu er tirke el kot el obekel el mo diak lolengesenges er a Dios, a ua blo lolsemai er a blakerreng er a rechad. El ua le mocholt er a omeruul el mo er a Job, el ngii a mle blak a rengul el melisiich er a omengederederel a Jehovah, e a Satan a dilu el kmo ngsebechel el omult er a rokui el chad el mo cheroid er a Dios.​—Job 2:1-5.

10. Ngera el tekoi a mla meketmokl e le Dios el dimlak lorreched el lomeketakl er a llemeltel el mengedereder?

¹⁰ A omerellel a Jehovah el dimlak lorreched el omeketakl er a llemeltel el mengedereder, a milsang a techellel a Satan el olecholt el kmo ngsebechel el omult er a rechad el mo cheroid er a Dios me a lechub e ngdiak. Ngdirrek el mesterir a techellir a rechad el mo olecholt er a blakerreng er tir el kirel a omengederederel a Dios. Me ngngera dilubech er a chelsel aika el mereko el betok el rak? A Satan a mla toketekii a mesisiich el cheldebechellir a remekngit el chad. Ngkmal di kmedung e a Jehovah a mo okngemedii a Diabelong me a cheldebechelel, el mo meketeklii el kmo ngii el Jehovah el Dios a kmal rredemelel a mengedereder. Ngkmal ulterekokl el mo mutaut sel moktek er a Jehovah el ledillii er a uriul er a leduubech a ultok er a chelsel a sers er a Eden.​—Genesis 3:15.

11. Ngera te mla remuul a rebetok el chad el kirel a omengederederel a Jehovah?

¹¹ A rebetok el chad a mla ocholt a mesisiich el klaumerang er tir e lomolem a blakerreng er tir el kongei el chederedall er a cheungel a omengederederel a Jehovah me a dirrek el omengedolel a ngklel. Tia el cheldellir a rechad a uldimukl er a Abel, Enok, Abraham, Sara, Moses, Ruth, David, me a Jesus, me tirke el disaiplo er a Kristus er a irechar me a rebetok el miliol el blak a rengrir el chad er chelechang. Choua itirka el blak a rengrir el chad el kongei el chederedall er a Dios a dmak el ochotii el kmo a Satan a bulak e a omerellir a dirrek el mengikiid er a ngklel a Jehovah er sel otubel a Diabelong el kmo ngsebechel el mengesuseu er a klechad el mo cheroid er a Dios.​—Osisechakl 27:11.

 Ngmla Mo Ulterekokl a Ulebongel

12. Ngmekerang e mo ulterekokl a rengud el kmo a Dios a diak lekengei a mekngit me lolemolem?

¹² Ngkmal sebechel el mo ulterekokl a rengud el kmo a Jehovah a di kmedung e ngmo otutii a omengederederel, e le ngdiak el kengei me lolemolem a mekngit, e kid a dirrek el medengei el kmo kede kiei er a taem er a ulebongel. A Jehovah a di mle mereched el okngemedeterir a remekngit el chad er a taem er a Ieleb. Ngdirrek el mle mereched el okngemedii a Sodom me a Gomora me a Farao me a resoldau er ngii. A Sisera me a resoldau er ngii me a Senakerib me a urrurt er ngii el chad er a Asiria, me ngkmal dimlak el sebechir el mo mesisiich er a mekemedil ngike el Imong el Kedidai el Jehovah. (Genesis 7:1, 23; 19:24, 25; Exodus 14:30, 31; Mengeteklel 4:15, 16; 2 King 19:35, 36) Misei a uchul me ngkmal ulterekokl a rengud el kmo a Jehovah el Dios a diak el bechei a mekngit el omeruul me bo el uchul e le motuub a ngklel me a lechub e lebechei a mekngit el omeruul me lomekcharm er a Resioning er ngii. Me a lmuut el tang, chelecha el taem, e kede omes a bleketakl el olechotel el kmo a demiel a Jesus a mla mei me a dirrek el ulebongel er tia el mekngit el blekeradel a di kmedu e ngmo nguemed.​—Matteus 24:3.

13. Ngmekerang e mo sebeched el mo suobel er sel taem el Jehovah a mo olekngemed er a recherrouel?

¹³ Me a lsekum e ngsoad el mo suobel er sel taem el Jehovah a mo olekngemed er a recherrouel e ngkmal kired el mo kongei el mo chederedall er a omengederederel. Ngmekerang e mo sebeched el meruul er tia el tekoi? Ngoeak sel dolemolem el mengikiid er kid er aike el mekngit el omerellel a Satan e dirrek el diak de kengei el mekesuseu el mo oltirakl a omerellir a rechedal. (Isaia 52:11; Johanes 17:16; Rellir 5:29) Me sel dolemolem el mengikiid er kid er a omerellel a Satan e ngbelkul a kmo kede melisiich er a omengederederel a Demad el ngar er a eanged, e dirrek el oba omelatk el kirel sel taem el Jehovah a mo kikidii a ngklel er a rokui el otuub, e dirrek el mo meketeklii el kmo Ngii a mera el mengedereder er a cheldellel a eanged me a chutem.

14. Ngera el tekoi a obeketakl er a chelsel a Biblia?

¹⁴ A cherrengelel a Biblia el rokir a mesaod a rokui el tekoi me a cheldecheduch el meketmokl el mo mesaod el kirel a omengederederel a Jehovah. Aike el kot el edei el bliongel er a Biblia a mesaod el kirel a omebelel a Dios me a dirrek el sel taem er a lerebet er a klengit a chad, e aike el edei el ulebongel el bliongel a kuk mesaod er sel taem el lluut el mesmechokl a tekoi el kirel a klechad. E aike el medechel el bliongel er a Biblia a mesaod el kirel a omerellel a Jehovah el mo otaut a moktek er ngii el kirel a klechad me a dirrek el cheldellel a eanged me a chutem. Ngar a babier er a Genesis e ngochotii a rolel e a Satan me a dirrek el klengit a mle soiseb er a beluulechad, e ngar sel ulebongel el babier er a Chocholt e ngochotii sel rolel e a Dios a mo okngemedii a Diabelong, e dirrek el okngemedii a mekngit el omeruul, e dirrek el ochotii a rolel e ngmotaut a soal a Dios er tia el beluulechad el ua omerellel er a eanged. A Biblia a dirrek el meketeklii a uchul a klengit me a kodall, e dirrek el ochotii a rolel e ngmo diak aika el tekoi er tia el beluulechad, e mo mutechei er a diak el mekimd el deurreng, me a diak a ulebengelel el klengar a mo er ngii el kirir tirke el blak a rengrir.

15. Ngmekerang e mo sebechel a derta er kid el ngmai a klungiaol sel lobeketakl a omesodel a llemeltel a dereder?

¹⁵ Ngdi kmedung e tia el beluulechad a mo mengodech a blekeradel er ngii. Tia el cheldecheduch er a  irechar a mo obeketakl a omesodel el kirel a llemeltel a dereder. A Satan a mo diak a klisichel el mengedereder e mo nguemed, engdi a rokui el tekoi el oltirakl a soal a Dios a di melemolem. Engdi a di ta el rolel e ngmo sebeched el ngmai a klungioled er aika el rokui, e bo ledeu a rengud er a betok el klengeltengat el medung el okiu a Tekingel a Dios, a sel de kengei el mo chederedall er a cheungel a omengederederel a Jehovah er chelecha el taem. Ngdiak el sebeched el di urrekodel er tia el beluulechad me a omerellel e domdasu el kmo a Jehovah a obengked. A lsekum e ngsoad el mo ulterekokl a rengud el kmo “a Jehovah obengkek,” e ngkmal kired el mo kiei el oltirakl a soal er a klengar er kid.​—Psalm 118:6, 7.

Ngsebeched el Melemolem el Blak a Rengud!

16. Ngera uchul me ngulterekokl a rengud el kmo ngsebeched el lomelemii a blakerreng er kid el mo er a Dios?

¹⁶ Ngsebeched el melemolem el mengebkall er a omengederederel a Jehovah e dirrek el blak a rengud el mesiou er ngii, e le a apostol Paulus a milluches el kmo: “Ngdiak a medeel ra chad lomengarm ra ikel ilekor kemiu. A Dios a blak a rengul, me ngdiak di lak loltaut er kemiu ra ikel medeel er kemiu lomengarm e le merekong, ngdirrek el rullemiu el mo sebechiu el mtekengelii chomengarm, e kudmeklii a rolel a chiis.” (1 Korinth 10:13) Ngera sel uchul a omengarm el lulsaod er ngii a Paulus, e ngmekerang a Dios a leketmeklii a rolel a chiis el kired?

17-19. (a) Ngera el rolel a omengesuseu a blo lemechitechut er ngii a rechad er a Israel er a lengar a ked? (b) Ngera uchul me ngsebeched el lomelemii a blakerreng er kid el mo er a Jehovah?

¹⁷ A omeruul el dilubech el mo er a rechad er a Israel er a lengar er a ked a ochotii el kmo, a “omengarm” a sebechel el duubech el mo uchul e kede mekesuseu el mo tomellii a llechul a Dios. (Monguiu er a 1 Korinth 10:6-10.) Ngmle sebechir a rechad er a Israel el oltngakl a omengesuseu, engdi te bai mle nguibes a rengrir er a “mekngit” er sel taem el Jehovah a ulemesterir a kelir el quail el ta el buil. Me alta e ngdimlak longang a techel a charm el kemanget el taem engdi a Dios a millemolem el omesterir a kelir el manna. Me nguaisei, a ngelbesel a rengrir a milengesuseu er tir el mo merechorech a rengrir el mlo sorir el melai a betok el quail.​—Ulecherangel 11:19, 20, 31-35.

¹⁸ Telkib el taem er a uchei el Moses a dirk mla er a Rois Sinai el melai a Llach er a Jehovah, e a rechad er a Israel a ulemuchel el mengull er a bleob el ngelekel a kerbou, e oldeu a rengrir er a di ngelbesel a rengrir. Me tiang a ua le belkul a kmo ngmlo dibus a mengeteklir me ngmlo diak a chad el sebechel el omtebechel er tir. (Exodus 32:1, 6) Telkib er a uchei er a bo lesiseb er a Beluu er a Nglat e a rebetok el telael el chad er a Israel a milekesuseu er a redil er a Moab el mo meruul a deleboes el obengterir. Me ngoeak tiaikid el omeruul e a rebetok el telael el chad er a Israel a mlad el mekngit el omerellir a uchul. (Ulecherangel 25:1, 9) Ngmlo er ngii a taem el rechad er a Israel a milengeremrum el kirel a meringel el klengar er tir er a ked, e mle ta el taem el longeremrum el bedul a Moses me a dirrek el Jehovah! (Ulecherangel 21:5) Te dirrek el milengeremrum el kmo ngdimlak el melemalt a kerrekeriil el lurruul er ngii a Jehovah er a lokodir a Kora me a Dathan me a Abiram me tirke el ulebengterir el omtok. Me tiang a mlo uchul e a 14,700 el chad er a Israel a mlad er a mekngit el rakt.​—Ulecherangel 16:41, 49.

¹⁹ Aika el dulsaod er uchei el rolel a omengesuseu a kmal mle sebechir a rechad er a Israel el mo mesisiich er ngii. Engdi te mlo mechitechut e le tir el mlo diak loumerang er a Jehovah e dirrek el ulebes er a bltkil a rengul el mo er tir me a melemalt el omerellel. Me a rolel a omengesuseu er a klechad el de chelebangel er chelecha el taem a kmal di osisiu er a rechad er a Israel. Me a lsekum e kede mo mesisiich el oltngakl er ngii e dirrek el mo ultuil er a Dios el kirel a ngeso, e ngsebechel el melisiich er kid el mo lomelemii a blakerreng er kid. Ngkmal sebechel el mo ulterekokl a rengud el kirel tia el tekoi e le a “Dios a blak a rengul” e dirrek el diak “loltaut er [kid] ra ikel medeel” er kid el omengarm. Me a Jehovah a kmal diak el chitid el mo lmuut er a taem el bo dechelebangel a  omelsemai el ngii a sebechel mengitechut er kid.​—Psalm 94:14.

20, 21. Ngmekerang a Dios a le ‘kedmeklii a rolel a chiis’ el kired sel bo de chelebangel a omengesuseu?

²⁰ A Jehovah a ngosukid el mo “kudmeklii a rolel a chiis” el oeak sel lolisiich er kid el mo oltngakl a omengesuseu. El ua tiang, a rechad el melasem el mengesuseu er kid a locha mo oldechelakl er kid me a lechub e te mo melekoi a tekoi el mengitechut er a klaumerang er kid. Me a chouaika el mekngit el omeruul el oldechelakl e mengelebed er kid el mo lmuut er a kodall, a sebechel el mo uchul e ngmo mechitechut a rengud. Engdi a tekingel a Paulus el medung er a 1 Korinth 10:13 a mengelaod er kid e le aika el omeruul a kmal di tedeb. E a Jehovah a kmal diak el bechei me lolemolem el mo lmuut er a taem el dikea el sebeched el outekangel er a blakerreng er kid. A Dios a kmal sebechel el smisiich a klaumerang er kid e meskid a klisiched el mo sebeched el lomelemii a blakerreng er kid.

²¹ A Jehovah a meskid aike el rokui el dousbech er a klengar er kid el okiu a oureor el klisichel. Tiaikid el oureor el klisichel a sebechel el ngosukid el mo melatk a Bades me bo el sebeched el mtekangel a ngii di el omelsemai el bo dechelebangel. (Johanes 14:26) Me ngoeak tiaikid el omeruul e ngmo diak de mekesuseu el mo meruul a mekngit. El ua tiang, kede medengei a mekngit el tekoi el dilubech el kirel a omelsemai er a omengederederel a Jehovah me sel klungel a ultutelel a blakerreng er kid. Me ngoeak tia el klemedengei, e a rebetok a melemolem el blak a rengrir el mo er a Dios el mo lmuut er a kodall. Engdi ngdiak el kodellir a mlo uchul e te mlo mesisiich, e ngbai okiu a ngelsuil a Jehovah e ngmlo sebechir el outekangel el mo lmuut er a ulebongel er a klengar er tir e mlo mesisiich er a omelsemai. Ngkmal sebechel a Jehovah el meruul a osisiu el tekoi el kired. Chelecha el taem e ngousbech er a reblak a rengrir el anghel er ngii, el tir a “mlodurch el mo mesiou el kirir tirikel chad el kirir el mo mediukes er cholsobel.” (Hebru 1:14) A ongingil el suobel a mo meketeklii el kmo tirke el blak a rengrir el mesiou a oba omelatk el mo oldeu a rengrir er a techall el mengebkall er a omengederederel a Dios el diak a ulebengelel. Ngkmal sebeched el mo teloi er tir a lsekum e kede melemolem el chederedall er a Jehovah el Ngii a mengedereder er a uldekial a eanged me a chutem.

Ngmekerang a Omonger?

• Ngera uchul me ngkired el kongei el mo chederedall er a Jehovah el Ngii a rredemelel a mengedereder er a eanged me a chutem?

• Ngera belkul a dolemolem el blak a rengud el mo er a Dios?

• Kede mekerang e medengei el kmo a Jehovah a di kmedung e ngmo meketeklii a llemeltel el mengedereder?

• Sel domes er a bades er a 1 Korinth 10:13, e ngera me ngulterekokl a rengud el kmo ngsebeched el melemolem el blak a rengud?

[Aike el Ker er a Suobel]

[Siasing el ngar er a 24 el llel]

A Satan a milengesuseu er a Adam me a Eba el mo diak lolengesenges er a Jehovah

[Siasing el ngar er a 26 el llel]

Bo leblak a rengum el mengebkall er a llemeltel a Jehovah el mengedereder er a eanged me a chutem