Rengeasek​—Kom Mo Mekerang er a Klengar er Kemiu?

“El diak kulik el ua kulik a eolt.”​—1 KORINTH 9:26.

1, 2. Ngera kirem el meruul a lsekum ngsoam el mo ungil el chad er a ta er a klebesei?

 OLEKO KE mengetmokl er kau el mo merael er a rael el diak modengelii, e ngungil a omnguu a map me a kombas el mo olecholt er a rael el kirem. A map a ngosukau el mo merael er a melemalt el rael, engdi a kombas a ngosukau me ke melemolem el merael er sel melemalt el rael. Me nguaisei, engdi ngmo diak a belkul aika el teblo el klekedall a lsekum e ngdiak modengelii a basio el soam el mo er ngii. Me ngkmal kirem el mo ulterekokl a rengum el kmo ngar ker el basio a soam el mo er ngii.

² Ke dirrek el mo chelebangel er a osisiu el omelilt sel morael el mo klou el chad. Ngar ngii er kau a teblo el meklou a ultutelel el klekedall, el map me a kombas. A Biblia a map el sebechel el ngosukau el mo melilt er a ungil el rael el bo mokiu ngii. (Osisechakl 3:5, 6) E sel mla muksau el ukltkem a sebechel el ngosukau el mo merael er a melemalt el rael. (Rom 2:15) Me tia el ukltkem a oureor el ua kombas. Me a lsekum ngsoam a klengar er kau a bo lungil, e ngkirel mo ulterekokl a rengum el kmo ke merael el bedul ker. Ngkirem el oterekokl a turrekong el soam el mo meruul.

3. Ngar a 1 Korinth 9:26, e ngera el klungiaol a lulsaod a Paulus el kirel a doterekokl a turrekong er kid?

³ A apostol Paulus a uluuchais a klungiolel a doterekokl a turrekong er kid e doltirakl er a ledu el kmo: “Misei e ngak a diak krurt el ua lak lulterekokl a kbedul ngii, el diak kulik el ua kulik a eolt.” (1 Korinth 9:26) A lsekum ke oterekokl a turrekong er kau e ngmo ulterekokl a omerollem. Ngmo er ngii a taem el mo kirem el melilt a meklou a ultutelel el tekoi, el kirel a omengull me a urerem me a chebechiil me a telungalek me a lmuut el bebil. Ke locha mo melechesukau a lebebil er a taem el chelebangel a betok el kakerous el tekoi el kirem el melilt. Engdi a lsekum kau a oterekokl a turrekong er kau er a uchei, el uchetemel ngii el tekoi a klemerang me a omellach el debetik er a Tekingel a Dios el Biblia, e ngulterekokl el diak bo le cheleuid a omerollem.​—2 Timoteus 4:4, 5.

4, 5. (a) Ngera sebechel el mo duubech a lsekum ngdiak moterekokl a turrekong er kau? (b) Ngera uchul me a omelilt er a klengar er kau a kirel el mukrael er sel urungulem el soam el oldeu er a rengul a Dios?

⁴ A lsekum kau a diak moterekokl a turrekong er kau, e ngngar ngii a techellir a resechelim me a resensei er kau el mo mengesuseu er kau el mo meruul a tekoi el lomdasu el kmo ngungil el kirem. Me alta e ngobeketakl er a uldesuir a turrekong er kau, engdi rebebil a di melemolem el olecholt a uldesuir el kirem. Me sel bo modengei a uldesuir, e di le kau el oker er kau el kmo, ‘Aika el tekoi el losaod ngsebechel ngosukak er a klengeasek er ngak el melatk er ngike el Ulemeob me a lechub e ngmo mengesang er a uldesuek?’​—Monguiu er a Olisechakl 12:1.

⁵ Ngera uchul me a omelilt er a klengar er kau a kirel mukrael er sel urungulem el soam el oldeu er a rengul a Dios? A ta er a klou el uchul a Ngii el Jehovah a uchul a rokui el ungil el tekoi el kired. (Jakobus 1:17) Ngmera el tekoi, a rokui el chad a belsel a Jehovah el kirel a ungil el omerellel. (Chocholt 4:11) Ngera lmuut el ungil el rolel e ke olecholt omereng el saul el mo er a Jehovah el kirel sel moruul a turrekong er kau? Ka me bo dosaod el kmo ngera el turrekong a ungil el kirem, e ngera sebechem el remuul el mo otaut a turrekong er kau.

 Ngera el Turrekong a Sebechem el Oterekokl?

6. Ngera el klou a ultutelel el turrekong a kirem el oterekeklii, e ngera uchul?

⁶ El ua dulsaod er sel mlo merek el suobel, a klou a ultutelel el turrekong er kau el bla moterekeklii a meketeklii el kmo ke oumerang el kmo a tekoi el medung er a Biblia a klemerang. (Rom 12:2; 2 Korinth 13:5) A resechelim a locha oumerang er a osisechakl el kmo kede mla er a mongkii el mei me a lmuut el bebil el klsuul el osisechakl, el rechad a dilu er tir el kmo aika el tekoi a kirir el oumerang. Me nguaisei, engdi kau a sebechem el omdasu el engelakl er aika el uldasu e le ngklaumerang er kau a uchul. Lak mobes, a Jehovah el Dios a soal a obo mosiou er ngii el ngar er a rengum el rokir. (Monguiu er a Matteus 22:36, 37.) Ngika el Demad el ngar a eanged a soal a omoleketek a klaumerang er kau er a tekoi el ngar ngii a bleketakl el olechotel.​—Hebru 11:1.

7, 8. (a) Ngera el mekekerei el turrekong el moterekokl a sebechel el mo smisichii a klaumerang er kau? (b) E ngmo ua ngerang a uldesuem sel motaut a bebil er aika el turrekong er kau?

⁷ Ngsebechem el lmuut el smisichii a klaumerang er kau a lsekum ke oterekokl a mekekerei el turrekong er kau. E a ta er ngii a sebechem el oterekeklii el mo meluluuch er a bek el sils. A lsekum e ngsoam a bo lungil e le bleketakl a nglunguchem, e ngsebechem el melebedebek me a lechub e ke lmuches aike el tekoi el dilubech er a ta el sils, el ngii a soam el mo mesaod er a chelsel a nglunguchem. Mouchais el kirel aike el omelsemai el blo mchelebangel, e lak mobes el ouchais aike el tekoi el mlo uchul a deuil a rengum. (Filipi 4:6) A ta er a turrekong el sebechem el meruul er ngii a mo menguiu er a Biblia er a bek el sils. A lsekum ke menguiu a bek el eua el llel a Biblia er a ta el sils, e ngdi chelsel a ta el rak e ke mla choiuii a Biblia el rokir. * A Psalm 1:1, 2 a kmo: “Ngeltengat ngikel chad el . . . semeriar er a llechul a [Jehovah,] me ng mesuub er ngii er a llomes ma klebesei.”

⁸ A ongedei el kekerei el turrekong el sebechem el oterekeklii a mengetmokl er kau el mo onger er a bek el temel a miting. Ngsebechem el omuchel el menguiu a nger er kau, me a lechub e ke menguiu a bades. E a uriul, e ngsebechem el rullii a turrekong  er kau el mo onger el ngar a di tekingem. Me nguaisei, a bek el taem el monger, e ngua omomsang a Jehovah a mekreos el sengk. (Hebru 13:15) Me sel moterekokl aika el mekekerei el turrekong er kau, e ngmo ulterekokl a rengum e dirrek el mo oba omereng el saul el mo er a Jehovah, e mo sebechem el oterekokl a meklou el turrekong er kau.

9. Ngera el meklou el turrekong a sebechem el oterekokl el kirem, a lsekum ngdirkak bom ta er tirke el omerk er a klumech er a Renged?

⁹ Ngera el meklou el turrekong a sebechem el oterekokl el kirem? A lsekum e ngdirkak bo momerk er a ungil el chais er a Renged el mo er a rechad, e ngsebechem el rullii a turrekong er kau el mo meruul er tia el ureor er a Renged. E sel bocha moruul er tia el ileakl el turrekong er kau, e ngungil a bo blechoel el meruul er ngii er a bek el buil. Ngdirrek el ungil a obo meduch el ousbech er a Biblia el omerk er a klumech. E sel moruul el uaisei, e ke mo melechesukau el dmeu a rengum el meruul er tia el ureor er a berkel a klumech. Ngsebechem el melemolem el mengoit er a klou el temem el meruul er tia el ureor me a lechub e ke melasem el omuchel a omesubel a Biblia el obengterir a rechad. Me a lsekum e ngdirkak metecholb el omerk er a klumech, e ngungil a omrellii a turrekong er kau el mo melatk el kirel a techolb me bo el sebechem el mo ta er a mla metecholb el Sioning er a Jehovah.

10, 11. Ngera el meklou el turrekong a sebechir a remla metecholb el ngeasek el oterekokl el kirir?

¹⁰ A lsekum e ke ta er a mla metecholb el mesiungel a Jehovah, e ngdirrek el ngar ngii a meklou el turrekong el sebechem el meruul. Nglocha sebechem el mo olengeseu a ongdibel el mo omerk er a klumech er aike el basio el diak el blechoel el mo er ngii a odingel er ngii. Ngdirrek el sebechem el ousbech er a klisichem me a klengeasek er kau el mo soiseb er a mui el taem el ureor. A rebetok el telael el mui el taem el mesiou a sebechir el ouchais er kau el kmo tia el ureor a kot el ungil el rolel e ngsebeched el melemolem el melatk er ngike el Ulemeob er a taem er a klengeasek er kid. Aika el turrekong a sebechem el kutmokl er sel taem el dirk mkiei el obengterir a rechad er a blim. Me a omerellem el oterekokl a turrekong er kau a sebechel el mo uchul a klungiolel a ongdibel er kau.

¹¹ A bebil er a meklou el turrekong a sebechel el omekrael er kau el mo meruul a ureor el cheroid er a beluam. El ua tiang, ngsebechem el rullii a turrekong er kau el mo mesiou a bebil el beluu me a lechub e ngbasio el ousbech a ngeso. Me a lechub e ngsebechem el olengeseu a ureor er a okedecherul a Kingdom Hall me aike el obis er a branch er a ngodech el beluu. Ngdirrek el sebechem el mo soiseb er a ureor er a Bethel me a lechub e ke mo missionari. Me aika el rokui el tekoi a sebechem el remuul a turrekong er kau el kirel, engdi ngkirem el mo metecholb. A lsekum e ngdirkak metecholb, e molatk el kmo ngera kirem el meruul me bo el sebechem el otutii tia el turrekong el mo nguu a techolb.

Otutii a Turrekong el Kirel a Techolb

12. Ngera uchul me a rebebil a mo metecholb, e ngera uchul me a uldesuir a diak el melemalt?

¹² Ngmekerang a omosaod er a moktek er a techolb? A rebebil a omdasu el kmo a lenguu a techolb, e ngomekerreu er tir me ngdiak lebo er a klengit. A rebebil a kuk omdasu el kmo ngkirir el mo metecholb e le resechelirir a mla metecholb. A rebebil el ngeasek a kuk sorir el meruul er tiang me bo loldeu a rengrir a ruungalek er tir. Me nguaisei, engdi a techolb a diak el telbiil el mo merrob er kau el mo meruul a tekoi el soam el meruul sel di lekau el tang; me a lechub e ke mo metecholb e le ngorimel er a rebebil a uchul. Ngkirem el mo metecholb el ngar ngii a ungil el klemedengei er kau el kmo ngera kirem el meruul sel bom Sioning er a Jehovah, e dirrek el kirem el mo ulterekokl a rengum e kongei er tia el ngerachel.​—Olisechakl 5:4, 5.

13. Ngera uchul me ngkirem el mo metecholb?

¹³ A ta er a uchul e a chad a mo metecholb a mocholt er sel taem el Jesus a ulemekngerachel er a rulebengkel el mo “rulleterir ar chad el mo Obengkek e molecholb er tir.” Ngdirrek el ulechotii a kerebai er a bo lemetecholb. (Monguiu er a Matteus 28:19, 20; Markus 1:9.) A lmuut el tang, a techolb a klou a ultutelel el bakes el mo er tirke el sorir el mo suobel. A apostol Petrus er a uriul er a losaod er a okedecherul a arhe, el ngii a mlo uchul e ng silobel a Noah me a telungalek er ngii er a ieleb, e ngdilu el kmo: ‘Ma techolb el okesiul . . . a klikiid luklatk el bedul a Dios . . . a oeak chokisel a Jesus Kristus lolsobel er kemiu.’ (1 Petrus 3:20, 21) Tiang a diak  el belkul a kmo a techolb a uai a ulekerreu el omnguu el mo omekerreu er kau er sel taem el lebo er ngii a klou el tellemall. Ke mo nguu a techolb e le ngbltkil a rengum el mo er a Jehovah a uchul, e dirrek el soam el mo mesiou er ngii er a rengum me a uldesuem me a klisichem me a klengar er kau el rokir.​—Markus 12:29, 30.

14. Ngera uchul me a rebebil a omai er a rengrir el mo metecholb, e ngera el tekoi a sebechel el melisiich er a chad el mo nguu a techolb?

¹⁴ A rebebil a locha mo omai er a rengrir el mo metecholb e le te medakt el mo mesuld a ngklir er a uriul. Kau ke oba osisiu el dakt? A lsekum ke uaisei, e tia el dektem a diak el mekngit. Ngsebechel el belkul a kmo ke oba omereng el saul el kirel a klou el ngerachel el kirir a Resioning er a Jehovah el meruul er ngii. Ngngar ngii a lmuut el ta er a uchul e ke medakt? Nglocha dirkak bo lulterekokl a rengum el kmo a klengar el oltirakl a llechul a Jehovah a kot el ungil el rolel a klengar. Me a leuaisei, e sel molatk a telemellel a klengar er tirke el ousumengoit a llach er a Biblia e ngsebechel el ngosukau el mo ungil el melilt a tekoi. Me a lmuut el tang, ngsebechel el betik a rengum er a llechul a Dios engdi ngdiak moumerang el kmo ngsebechem el kiei el oltirakl er a chelsel a klengar er kau. Tiang a sebechel mo uchul a ungil el tekoi e le ngolechotel a klengariourreng er kau. Me nguaisei, a Biblia a melekoi el kmo a rengul a diak el cherrungel el chad a kmal smecher me ngdiak le mukar. (Jeremia 17:9) Engdi ngsebechem el mo mesisiich er aika el uldesuem a lsekum ke melemolem el ‘klikiid el loltirakl’ a tekingel a Dios. (Monguiu er a Psalm 119:9.) Me ngkmal kirem el mo sumechokl a ngii di el tekoi el uchul e ke omai er a rengum el mo metecholb.

15, 16. Ke mekerang e mo medengei el kmo ke mla mo kltmokl el kirel a techolb?

¹⁵ Me ke mekerang e sebechem el mo medengei el kmo ke mla mo kltmokl el mo metecholb? Ngsebechem el di kau el oker aika el ker el kmo: ‘Ngsebechek el mesaod a beot el osisechakl er a Biblia el mo er a rebebil? Ngak ak mo oldingel a obliil el diak di el sel kubengterir a rechad er a blik? Ngak ak blechoel el mo er a bek el miting er a Rekristiano? Ngsebechek el melatk er a taem el blo kmesisiich er a orimel er a resechelik? A lsekum a rechad er a blik me a resechelik a mo diak losiou er a Jehovah, e ngak ngsebechek el melemolem el mesiou er Ngii? Ngak ak meluluuch el kirel a deleuill er ngak me a Dios? Ngak ak mla tibir er a renguk el mo mesiou er a Jehovah el oeak a nglunguuch?’

¹⁶ A techolb a klou el bakes er a klengar el diak di lebeot el tekoi. Kau ke ungil medengelii a klungel a ultutelel tia el bakes? A klloulechad er kau a diak di lemocholt er a ungil el cheldecheduch el bo moltobed er ngii me a lechub e ngungil el nger er kau er a temel a miting. Ngdirrek el uldimukl er a ungil el omelilt er kau el oltirakl a klemedengei er kau er a omellach er a Biblia. (Monguiu er a Hebru 5:14.) A lsekum ke ngar er a taem er a klengar er kau el sebechem el rullii tia el tekoi, e ngolechotel a kmo a klengar er kau a chelebangel er a kot el mekreos el techall el kau a mo mesiou er a Jehovah er a rengum el rokir, e kiei el rolel a klengar er kau a ochotii el kmo ke mera el mla tongetengii a klengar er kau el mo er a Jehovah.

17. Ngera el tekoi a sebechel el ngosukau el mo outekangel a omelsemai er a uriul er a omnguu a techolb?

 ¹⁷ A uriul er a omnguu a techolb e ke mo melechesukau el kmal semeriar el mesiou er a Dios. E di telkib er a uriul e ke mo chelebangel a omelsemai el ngii a mo melasem er a klaumerang me a blakerreng er kau. (2 Timoteus 3:12) Lak momdasu el kmo ngdiak a sebechel el ngosukau el outekangel aika el mondai. Molengit er a rechad er a blim, me a tirke el meklou el chad er a tekingel a Dios el ngar er a ongdibel, el kirel a ngeso er a uldasu. E molemolem a klausechelei er kau el obengterir tirke el modengelterir el kmo ngsebechir el melisiich er kau. E lak mobes el kmo a Jehovah a omekerreu er kau, e dirrek el mo meskau a klisichem el mo sebechem el dechor el outekangel a ngii di el omelsemai el bo mchelebangel.​—1 Petrus 5:6, 7.

A Rolel e Ngmotaut a Turrekong

18, 19. Ngmo uchul a ngera el klungiaol sel bo mungil el merriter a meklou a ultutelel el tekoi?

¹⁸ Alta e ke melasem er a tkurrebab el sebechem el meruul a tekoi engdi ke melechesukau el kmo ngkora mo diak a temem el meruul aike el soam me aike el kirem el meruul. A lsekum ke omdasu el uaisei, e ngkirem el mo ungil el merriter aike el meklou a ultutelel el tekoi. Ngsebeched el omekesiu er tia el tekoi: Mnguu a baket el mei e mlecha bebil er a meklou el bad er a chelsel. E mokekii tia el baket er a chelechol. Chelechang e tia el baket a mla mo mui er a bad me a chelechol. Mochubel aika el chelechol me a bad. E momuchel el mekekii a baket er a chelechol e molasem el olsiseb aika el bad er a chelsel el kmo ngmo sebechel el soiseb el rokui? Ngdikea el sebechel, e le ke ulemuchel el locha chelechol er a chelsel a baket.

¹⁹ Me nguaisei, ke dirrek el mo chelebangel a omelsemai el kirel a usbechel a temem. A lsekum ke nguu a tekoi er a omilil el mo kot, e ngulterekokl el mo diak a temem el meruul a meklou a ultutelel tekoi, el ngii a omesiungem el mo er a Dios. Engdi a lsekum ke oltirakl a ulekrael er a Biblia el mo ‘kutukel a ungil me a mekngit,’ e ngmo er ngii a tabesul el temem el kirel a tekoi er a Renged me a dirrek el omilil.​—Filipi 1:10.

20. Ngera kirem el meruul a lsekum ke mo melechesiu a ringelel a uldasu me a tekoi el molatk sel molasem el oltaut er a turrekong er kau?

²⁰ Sel molasem el oltaut a turrekong er kau el uldimukl er a techolb, e ngmo er ngii a taem e ke mo melechesiu a ringelel a uldasu me a tekoi el molatk. Sel bo muaisei, e “bsa [Jehovah] a berredem, e ng mo ngosukau.” (Psalm 55:22) Chelecha el taem e ke oba mekreos el techall el teloi er tia el kot el klou a ultutelel el ureor el ngii a meketmokl er a beluulechad, el berkel a klumech me a osisechakl el kirel a moktek er a Jehovah. (Rellir 1:8) Ngsebechem el ngiltii el di dengchokl e omes er a rebebil e te meruul er tia el ureor, me a lechub e ke ngiltii el mo teloi er tia el ureor. Lak mongemekl er tia el techellem me a duch er kau el mo meruul er a ureor er a Renged. Ngulterekokl el kmal diak bo mouuchel er a rengum e le kau el milsiou er a Jehovah er sera “dirk mngeasek.”​—Olisechakl 12:1.

[Footnote]

Ngmekerang a Omonger?

• Ngera uchul me ngkirem el meruul a turrekong er kau?

• Ngera bebil er a turrekong el mo uchul a klungioled?

• Ngerang a uldimukl er a dotutii a turrekong er kid el mo nguu a techolb?

• Ngmekerang e mo sebechem el otaut a turrekong er kau sel bo mungil el melilt aike el meklou a ultutelel el tekoi?

[Aike el Ker er a Suobel]

[Siasing el ngar er a 20 el llel]

Kau, ke mla rullii a turrekong er kau el mo menguiu er a Biblia er a bek el sils?

[Siasing el ngar er a 22 el llel]

Ngera el tekoi a sebechel el ngosukau el rullii a turrekong er kau el mo metecholb?

[Siasing el ngar er a 23 el llel]

Ngera el tekoi a sebechem el suubii er tia el okesiu?