Berrotel el Tekoi 1

Bo Lebetik a Rengum er a Rechad, el Diak el Udoud me a Klalo

NGERA NGOLISECHAKL A BIBLIA? “Ele ngibes el mora udoud a risel a bek el mekngit.”​—1 Timoteus 6:10.

NGERANG A OMELSEMAI? A rechad er a siobai a meruul a betok el olechotel a oteruul el rullid el mo omdasu el kmo kede kmal ousbech aika el klalo. Ngkmal sorir a bo de meringel el loureor el mengereker me bo el sebeched el omechar a beches e meklou e dirrek el ungil el klalo. Sel osenged el kirel a udoud a kmal sebechel el rullid el mo betik a rengud er ngii. Me nguaisei, engdi a Biblia a mengelechel er a chad el betik a rengul er a kerruul el kmo ngkmal diak el sebechel el mo ungilbesul er a rengul aike el ngar ngii er ngii. A King Salomon a milluches el kmo: “Ngikel soal a udoud a diak bo lungil a rengul er a udoud, me ngikel soal a ilteet a diak bo lungilbesul er a rengul a ikel lolab.”​—Olisechakl 5:10.

NGERA SEBECHED EL MERUUL ER NGII? Ngungil a doukerebai er a omerellel a Jesus el mle betik a rengul er a rechad el kuk ngaruchei er a klalo a uchul me ngkilengei el tonget a rokui aike el rokui er ngii, el uldimukl er a klengar er ngii. (Johanes 15:13) Ngdilu el kmo: “A dorous e ngbai ngeltengat ra dolai.” (Rellir 20:35) A lsekum e kede mo meruul a tekoi el ua Jesus el merous aike el ngar ngii er kid, e a rechad a ulterekokl el mo meruul a osisiu el tekoi el bedul kid. A Jesus a dirrek el dilu el kmo: “Morous, me lekor kemiu.” (Lukas 6:38) Tirke el chad el sorir el mengereker a betok el udoud me a klalo, a di tir el ochoud a telemellir me a ringelir. (1 Timoteus 6:9, 10) Engdi a tabesul el uldasu a mo er ngii el okiu sel doubltikerreng el mo er a rechad me a rechad loubltikerreng el mei er kid.

Ka di lekau el merriter el kmo kele el sebechem el omekbeot er a rolel a klengar er kau. Ngsebechem el mengesadel a kloklem me a lechub e ngmo diak msal di omechar a klalo. Sel moruul el uaisei, e ngulterekokl el mo er ngii a betok el temem me a klisichem el meruul a meklou a ultutelel el tekoi er a klengar. Ngmo sebechem el lolengeseu er a rechad, e dirrek el mo klou a temem el mesiou er a Jehovah, el ngii a milskau aike el rokui el ngar ngii er kau.​—Matteus 6:24; Rellir 17:28.

[Siasing el ngar er a 4 el llel]

“Morous, me lekor kemiu”