Berrotel el Tekoi 2

Lak Momekesiu er Kau er a Rebebil

NGERA NGOLISECHAKL A BIBLIA? “Ma chad di le ngii el merriter a di omerellel, me bo lsebechel chemat er ngii ra di ngii, e lak le chat er ngii er chomerellel a tara chad.”​—Galatia 6:4.

NGERANG A OMELSEMAI? Kid a ngar ngii a omerelled el soad el mengaiuechit er a rebebil. A lebebil er a taem e kede melsemai er tirke el dodengei el kmo ngdiak a kmal ngerang er tir, engdi a oumesingd el taem e kede melsemai er tirke el mesisiich e betok a ududir me a lechub e ngngar ngii a duch er tir el diak er kid. Me a ngii di el uldasu el kirel tia el omeruul a kmal diak el ungil el kired. Kede blechoel el mo cheleuid a uldesued el omdasu el kmo a klungel a ultutelel a chad a ultuil er a ildisel a kloklel me a lechub aike el tekoi el lemeduch er ngii. A chellechingel a rengud a sebechel el mo uchul e ngmo soad el mengaiuechit er a rechad el ngar bita er kid.​​—Olisechakl 4:4.

NGERA SEBECHED EL MERUUL ER NGII? Ka molasem el merriter er kau el ua lorriter er kau a Dios. Becherei a osengel a Dios me longesuseu er kau el mo meruul a melemalt. “A chad omes er a ikrel, e ngdi ngak [el Jehovah] * omes er a rengul a chad.” (1 Samuel 16:7) A Jehovah a dobedebii a blakerreng er kau el diak loeak a lomekesiu er kau el mo er a rebebil, e ngbai oeak sel longuiu er a rengum me a uldesuem me a dirrek el aike el tekoi el molatk el mo meruul. (Hebru 4:12, 13) A Jehovah a kmal ungil el medengei aike el sebechem el meruul e soal obo modengei e mkiei el meruul aike el sebechem. Me a lsekum e ke kiei el di omekesiu er kau el mo er a rebebil, e ngulterekokl el mo kedidai a rengum e mo blechoel el diak el deu a rengum er aike el ngar ngii er kau. Me a klengariourreng er kau a ulterekokl el di mo uchul a klungiolem.​—Osisechakl 11:2.

Ngera el tekoi a kmal kirem el meruul er ngii me bo el sebechel a Dios el omes er kau el klou a ultutelem er ngii? Ngii a ulemekrael er a profet el Mika el mo meluches el kmo: “A [Jehovah] a mla subedid el kmo ng ngera ungil. Tiakid a longerechir er ngii er kid: mo meruul a melemalt, e mo olecholt er a diak le mengodech el bltikerreng, e mo oba ngariourreng el olengesenges er a Dios er kid.” (Mika 6:8) Me a lsekum e ke oltirakl a ulekrael er a Jehovah, e ngulterekokl el mo omekerreu er kau. (1 Petrus 5:6, 7) E tiaikid a kot el ungil el rolel e ngmo sebechem el dmeu a rengum er aike el ngar ngii er kau.

[Footnote]

[Siasing el ngar er a 5 el llel]

A Jehovah a melebodeb er a klungel a ultutelel a chad el oeak sel lorriter er a rengul