Silobel el Mlo Diak Lolai er a Klengar er Ngii

A REBEBIL el Sioning er a Jehovah a ngar omerollir el mo remei er a uriul er a loldingel er a ta el basio, e ulsiueklii a ta el rubak el mirrael el engelakl er tir el beldoel er a Biblia er ngii. Te millasem el omerk er a “ungil chais” el mo er ngii, engdi ngii a di millemolem er a omerollel e di melekoi el kmo: ‘Bo mcheroid er ngak.’ Engdi uriul e ngmlo sebechel el kongei er a ongtil a ta er tirka el Sioning me ngmlo omesoil el obengkel. E a bo lekukuk e a kuk ta er a Resioning a mlo mengedecheduch er ngii el chad er a blil el mesaod a Bades. Ngika el chad a kiliei er aike el blirir a remechuodel.

Ngar tiaikid el taem e ngika el rubak a dula er ngika el Sioning el kmo: “Kau a ulsebelii a klengar er ngak. Sera chelii e ak mla er a omerollek el mo omes er a debellel a bechik. Ak millatk el kmo ak mong e a uriul e ak mo melai er a klengar er ngak. Uchei er a dekasoues er a chelii, e ak mirrael el eua el sikang er a chelsel a chereomel. Ak ulemiis er a blil a cheliteklek el ulsiik a chelitakl el mo mengelaod er ngak, e dimlak a sebechel el chemolodak. Engdi ak mera el mereng a sulel a Dios el mlo sebechel el lodureklterir a rechad el me ngosukak er sel ungilbesul el taem.”

Omerollel a taem e te mlo medengei el kmo a remekngit el anghel a melasem el mengetikaik er ngii el mo melai er a klengar er ngii. Engdi ngoeak a omesubel a Bades e ngmlo sebechel el mo mesisiich er tia el mekngit el blekeradel. (Efesus 6:11-18) Ngdirrek el kmal mlo mechelaod a rengul er a lesubii el kmo, “ngmorngii chokiis rar melemalt mar diak le melemalt.” (Rellir 24:15) Me ngkmal di mle mereched el taem e ngmlo rullii a telbilel el mo er a Jehovah e mlo metecholb er a bo el 81 a rekil. Me a medemedemek el cheldecheduch me a dirrek el ungil el omeruul el uldimukl er a ongelaod el dengai el okiu a “chedaol Llechukl” el ngii a Biblia, a mlo uchul a osebelel ngika el rubak me ngdimlak lenguu a klengar er ngii, e bai mlo uchul a omelisiich el omelatk el kirel a diak a ulebengelel el klengar.​—Rom 6:23; 15:4.