Moltngakl a Orimel el Mei el Okiu a Uldesuir a Rechad

A ULDESUIR a rechad el kirel a ungil el tekoi me a lechub e ngmekngit me a chetengakl me a chelebirukel a kmal kakerous er a chelsel a kakerous el beluu. Ngii el uldesuir a rechad a dirrek el mengodech er a cherengel a taem. Me sel donguiu aike el betok el cheldecheduch er a chelsel a Biblia el ngii a mileketmokl er a irechar, e ngkmal ungil el tekoi a lsekum e kede melatk aike el uldasu me a belkul a tekoi el oltirakl er a blekeradel er a taem er a Biblia, er a bai dolasem el melisiich a tekoi el di olab a uldesued.

El di uaitiang, ka molatk a eru el tekoi el blechoel el omelekl er a chelsel a Beches el Testament, el chetengakl me a rur el tekoi. Ngkmal sebeched el mo ungil medengei a belkul a chetengakl me a rur el tekoi sel bo dekerekikl el merriter a uldesuir me a rengrir a rechad el kiliei er sel taem er a omelechesel a Biblia.

A Meklou a Ultutelel el Tekoi er a Kot el Dart el Rak

A ta el brobesong a melekoi el kmo: “A rechad er a beluu er a Gris me a Rom me a Judea a ulemes a tekoi, el chetengakl me a rur el kmal mle meklou a ultutelel el tekoi. Me a chad a kiei el kirel el ungil el melilt a tekoi el kirel a omengebkellel a ngklel me a chisel me a dirrek el omengull er a rechad, el belkul a kmo ngsebechel el mo ocherur a kodall el kirel aika el tekoi.” Me a chouaika el tekoi a kmal mle sebechel el orrimel er a rechad el mo oltirakl a uldesuir a rechad er a beluu el kirir.

A deruchall me a ngerachel me a kebkall a rokui el tekoi el mle meklou a ultutelel er a uldesuir a rechad el kirel a blechebechel a dereder, el omuchel er a ngarbab el deruchall el mo lmuut er a klsibai. A chetengakl el tekoi a diak di lultuil er a uldesuel a chad el omdasu el kmo ngii a chetengakl, e ngdirrek el ultuil er sel osengir a rechad el omes er ngii el kmo ngii a chetengakl el chad. Me a rechad a mo kobkellii a chetengakl el chad er a buai el oltirakl er sel ungil e melemalt el blekerdelel. Me a rechad a dirrek el ngmai a chetengakl er a beluu el okiu a kerruul er tir me a urerir me a dirrek el ngarbab el deruchellir. Me a ungil el omerellir a rechad me a lechub a duch er tir el kuk ngarbab er a rebebil, a sebechel el mo uchul a chetengakl el kirir. Ngar a kuk bitang, e a rur el tekoi a mo er ngii el okiu a otuub er a rechad er a beluu el kirel a chad. Me a chad a mo melechesuar a otuub er a rechad e le nguldesuir a rechad er a beluu a uchul, el diak el sel ukltkel a chad me a lechub e ngdi uldesuel a chad el rirellii el mo medengei el kmo ngmla rullii a mekngit el tekoi.

A Jesus er sera losaod el kirel a chad el mokedong el mo “kiei ra ngarbab el kingall” me a lechub e ngmo kiei “ra ngariou el kingall” er a merengel a chebechiil, e ngmillekoi el kirel a tekoi el chetengakl me a lechub e ngotuub el uleltirakl a siukang er sel taem. (Lukas 14:8-​10) Ngmla er ngii a eru el taem el redisaiplo er a Jesus a mlo kaititekangel “ra kmo ngtecha er tir a kot el ngarbab.” (Lukas 9:46; 22:24) Ngoeak a omerellir e kede mo medengei el kmo aika el tekoi er a deruchall a mle meklou el tekoi er sel taem. Me nguaisei, engdi tirke el mekedidai a rengrir e sorir el mengaiuechit el mengeteklel a klechelid er a Judea a ulemes er a rolel a osisecheklel a Jesus el mle sebechel el mo uchul e a rechad er a beluu a mo diak longull me a lechub e loltirakl er tir. Me aike el rokui el tekoi el lullasem el meruul me bo el sebechir el mengitechut a osisecheklel a Jesus er a chelsel a beluu me a seked a kmal di mle blechoel el mo diak a ultutelel.​—Lukas 13:11-​17.

A ta er a mle klou a ultutelel el tekoi er sel taem a sel uldesuir a rechad er a Judea me a Gris me a dirrek el rechad er a Rom el kmo, ngmo uchul a klou el otuub a lsekum “te mdechemii a chad e otuteklii el kirel a klengit.” Ngar a uldesuir a rechad e ngkmal mekngit el tekoi a lsekum a chad a mekelebus me a lechub e ngmo obals. Chouaitia el omeruul a lsekum a chad a mlutaut er a llach me a lemlak, me ngii a kmal di mo ngmai a otuub el kirel er a mederir a resechelil me a telungalek me a dirrek el rechad er a belual. Me sel omerellel el mlo uchul a terached el bedulngii a sebechel el mo uchul e ngchoitechetur a rengul el di kirel, e dirrek el oridii a omengull er a rechad, e dirrek el mo uchul a telemellel a ungil deleuill er ngii me a rebebil. Ngsebechel el mo uchul a rur a lsekum a chad a  mesodel a bilel e mechelebed el kmal mo meringel. Chouaika el tekoi a sebechel el smisichii a mekngit el uldasu el mo uchul e a chad a mengubet er a deruchall el lulebang.

A chad el okodall me ngkirel el mo medeel er a kerrekar a belkul a kmo ngkmal imis el mekngit el chad. A ta el brobesong el Martin Hengel a melekoi el kirel tia el tekoi el kmo: “Choua tia el blals a di kirir a resibai. E le tiang a di olechotel a rur me a otuub me a terached el mo er a chad.” Ngdirrek el rechedal me a resechelil ngika el chad a mo morimel er a rebebil el mo otobedii ngika el chad el mlo uchul a terached el mo er a telungalek er ngii. Me a Kristus el ngii a mlad er a teluo el kerrekar a uchul me tirke el rokui el mle sorir el mo Kristiano er sel taem a dirrek el mlo chelebangel a otuub er a rechad er a beluu. Me ngulterekokl el rechad a ulemdasu el kmo ngkmal klebelung el tekoi a lsekum e kede kongei el oltirakl er a chad el medela er a teluo el kerrekar. A apostol el Paulus a milluches el kmo: “Ngdi kid chomerk ra Kristus el mlekerus, el olibesongel rar Chijudea e klebelung rar Chisentail.” (1 Korinth 1:23) Me te milekerang a rekot el Kristiano e mlo sebechir el outekangel aike el orimel er a rechad er sel taem?

A Kuk Ngodech el Meklou a Ultutelel el Tekoi

Tirke el Kristiano er a kot el dart el rak a uleltirakl a llach, e dirrek el mle kerekikl a omerellir me lak loruul a mekngit el tekoi el mo uchul a otuub. A apostol el Petrus a milluches el kmo: “Lak a ta er kemiu lomekoad, malechub e lorechorech, malechub e loruul a mekngit, malechub e longesechusem er ngii ra tikingir ar chad, me bo le charm.” (1 Petrus 4:15) Nguaisei, a Jesus a dilu el kmo tirke el oltirakl er ngii a mo modechelakl el ngklel a uchul. (Johanes 15:20) A Petrus a dilechelii el kmo: “Ngdi cho mKristiano me bo mcharm, e ngdiak ko merur, e bai kobkellii a Dios er ngiil ngakl.” (1 Petrus 4:16) Me sel blekerdelir a Rekristiano el dimlak el merur e kilengei el modechelakl e le tir el uleltirakl er a Kristus, a mileketeklii el kmo ngdimlak loltirakl a uldesuir a rechad er sel taem.

A Rekristiano a kmal diak el kirir el mechei a uldesuir a rechad me bo lomekrael er tir. Ngar er a osengir  a rechad er sel taem e ngkmal klebelung el tekoi a lsekum kede kongei el kmo a chad el medelang er a kerrekar a ngike el Messias. Tiaikid el uldesuir a rechad a mle klou a klisichel el mle sebechel el orrimel er a Rekristiano el mo oba osisiu el uldasu. Me nguaisei, engdi sel klaumerang er tir el kmo a Jesus a mera el Messias a millisiich er tir me te millemolem el oltirakl er ngii, el mo lmuut er a taem el rechad a uleltuub er tir. A Jesus a dilu el kmo: “Ele ngikel mo merur el kirek ngak ma tikingek er tial melaok a rengul e mekngit el telecheroll, ingikei a dirrek el bo le merur a Ngelekel a chad el kirel sel le mei el ngara klebkellel a Demal lobengterir ar mechedaol anghel.”​—Markus 8:38.

Me chelecha el taem e kede dirrek el mo chelebangel a orimel el ngii a sebechel el mo uchul e kede mo mechitechut er a omesiunged. E aika el orimel a sebechel el mo er ngii el okiu tirke el dedak el ngar er a skuul, me a retonari er kid, me a rechad er a urered, el tir a melasem el mengesuseu er kid el mo meruul a deleboes, e mo omulak me a lmuut el bebil el mekngit el omeruul. Choua itirka el chad a mo melasem el meruul er kid el mo merur e le kid el melasem er a tkurrebab el sebeched el meruul a llemalt. Me ngkired el mo mekerang a lsekum e ngmo uaisei a tekoi?

Moukerebai er Tirke el Dimlak Lomekerreu a Terached

A Jesus a kilengei el mo obals e mad er a kot el mekngit el kodall me bo el sebechel el lomelemii a cherrungel el blakerreng er ngii el mo er a Jehovah. Nguluutekangel a rokui el ringel “el dimlak lomekerreu a terached” el bedulngii. (Hebru 12:2) Me a recherrouel a Jesus a dirrek el millub er ngii, e mengesuar a medal, e mesodel a bilel, e dmelii er a kerrekar, e dirrek el uleltuub er ngii. (Markus 14:65; 15:29-​32) Me nguaisei, engdi a Jesus a uluutekangel a rokui el tekoi, e dimlak lomekerreu a terached me a otuub er a rechad el bedulngii. Me ngmilekerang? Ngdimlak el kengei el mo mechitechut er aike el mekngit el omerellir a rechad el mo er ngii. A Jesus a mle medengei el kmo a Jehovah a dmeu a rengul el kirel a omerellel, e dirrek a klebkellir a rechad a kmal diak a ultutelel er a osengel. Me alta e a Jesus a mlad er a kodall el ua resibai, engdi a Jehovah a chiltengii er a lokisii er a kodall e lebsang a kot el ngarbab el deruchellel el mo dengchokl er bita er Ngii. Ngar er a bades er a Filipi 2:8-​11 e kede menguiu el kmo: “[A Kristus Jesus a] di mle ngii loltubokl er ngii, me ngmle bekongesenges el mo lmuut ra kodall, el sel kodall ra [teluo el kerrekar]. Misei a uchul ma Dios a mlengididai er ngii e milsa ngakl el ngarbab ra bek el ngakl, el kirel ma ikel bek el bkul a uach ra ikel ngara eanged ma chutem ma ngar cheungel a chutem bo le medeu ra ngklel a Jesus, ma bek el ngor bo lochotii el kmo, ‘A Jesus Kristus a Rubak,’ e le kebkellii a Dios el Chedam.”

A Jesus a dirrek el mlo melechesuar a ringelel a uldesuel el kirel aike el mekngit el tekoi el mlo er ngii el mo lmuut er a kodellel. Engdi sel klou el tekoi el mle uchul a ringelel a rengul a sel otuub el kirel a ngklel a Demal, seikid a kmal mle meringel er a rengul ngika el Ngelekel a Dios. Me ngngar tiaikid el blekeradel e ngmle ta el lullengit er a Demal me lenguu tia el ringel el oridii er ngii, me ngmilluluuch el kmo: “Mnguu tial kob el choridii er ngak.” Me nguaisei, engdi ngkmal kilengei el mo oltaut a soal a Dios. (Markus 14:36) Me a Jesus a kmal mle mesisiich el dechor el outekangel aike el omelsemai el blo lechelebangel el dimlak lomekerreu a terached. Me a chouaike el tekoi el kirel a otuub a di mlo omekringel a uldesuir tirke el uleltirakl a uldesuir a rechad er sel taem. Engdi ngkmal mle bleketakl el kmo a Jesus a dimlak el kengei aike el tekoi.

A redisaiplo er a Jesus a dirrek el mlekelebus e mlechelebed. Me ngngar er a osengir a rebetok el chad e te ulemes el kmo aika el tekoi a uchul a otuub. Me te ulemes er tirka el disaiplo el ua lak a belkrir el chad. Me nguaisei, engdi ngdimlak a ta el bo longitechut a rengrir. A remera el disaiplo a blak a rengrir el oltngakl a orimel el mei el okiu a uldesuir a rechad e dirrek el diak lomekerreu a terached. (Matteus 10:17; Rellir 5:40; 2 Korinth 11:23-​25) Te kmal ungil medengei el kmo ngkmal kirir el mo ‘cholngii a [teluo el kerrekar] er tir’ e melemolem el merael el oltirakl er a Jesus.​—Lukas 9:23, 26.

E kid a kuk mekerang er chelecha el taem? Aike el tekoi el beluulechad a omes el kmo ngklebelung, e mechitechut, e uchul a terached, a lomes a Dios el kmo nguchul a llomeserreng e mesisiich e dirrek el chetengakl. (1 Korinth 1:25-​28) Me ngkmal bleketakl el kmo ngkmal rolel a klebelung el tekoi a lsekum e ngsebeched el morimel el mo oltirakl a uldesuir a rechad er a beluulechad.

A ngii di el chad el soal a chetengakl er tia el beluulechad a kmal losiik el mo meruul a tekoi el ua lomdasu a beluulechad. Engdi kid a ua Jesus me tirke el ulebengkel er a kot el dart el rak, el kmal soad el mo sechelil a Jehovah. Me a leuaisei, e ngkmal kired el mo mengebkall aike el tekoi el uchul a kebkall er a osengel a Jehovah, e dirrek el mo oba osisiu el osengel el kirel aike el tekoi el uchul a terached.

[Siasing el ngar er a 20 el llel]

A Jesus a dimlak el kengei el mekesuseu er aike el tekoi el ngii a mle sebechel el mo uchul a terached