Molekeed er Kau er a Dios

“Ng Ngiluu a Rengul el Mor Iou, e Ulebult el Mor a [Jehovah]”

A TA el chad el mla mo diak loltirakl a llechul a Dios el lesiluub er a dirk lekekerei a melekoi el kmo: “Ngak a locha kmal diak a belkuk el chad.” Engdi sera bocha lomuchel el melodech er a klengar er ngii, e ngmlo omdasu el kmo a Dios a locha diak el sebechel el ousubes er ngii. Engdi ngika el chad a mlo mechelaod er a omelatk el ngar er a cheldecheduch er a Biblia el llechukl er a 2 Kronika 33:1-​17 el kirel a Manase. Me kau a lsekum ke dirrek el omdasu el di uai ngika el chad, e ngkmal dirrek el sebechem el mo mechelaod sel monguiu el kirel a kerebil a Manase.

A Manase a mlukeroul er a chelsel a telungalek el milengull er a Dios. A demal el Hesekia, a ta er tirke el kot el mle ungil king er a Juda. Ngii el Manase a milechell er a bekord el edei el rak er a uriul er a taem el Dios a kilemengetii a klengar er a demal. (2 King 20:1-11) Me ngulterekokl el Hesekia a ulemes er a ngelekel el ua ileakl el sengk el olechotel a klechubechub er a Dios, me ngmillasem el omekeroul er ngii el mo oba klou el bltikerreng el kirel a bliochel el omengull. Me nguaisei, engdi tirke el ngalek el mukeroul el ngelekir a rechad el meluu er a Dios a diak el blechoel loltirakl a kerebai er a rechad er a blirir, el di ua Manase.

A uriul er a bo el 12 a rekil a Manase, e a demal a mlad. Me ngkmal klengiterreng, e le Manase a dimlak loltirakl a omerellel a demal, e bai mlo meruul a betok el “mekngit er medal a [Jehovah].” (Bades 1, 2) Me ngika el ngeasek el king, ngmilekesuseu er tirke el chad el ulemekrael er ngii el tir a dimlak loba mera el omengull? A Biblia a diak losaod el kirel. Engdi ngbai ouchais el kmo, a Manase a mirrael el kmal mo mekngit a omerellel el liluut el kmal mo mesisiich el mengull a bleob. Ngdirrek el milleketek a olengetongel el kirel a bleob el chelid, e millenget er a rengelekel el sechal, e dirrek el mirruul a tekoi er a olai, e ngilai a bleob el chelid el lolsiseb er a templo er a Jehovah el ngar er a beluu er a Jerusalem. Ngika el kedidai a rengul el Manase a uleltngakl a uleklatk el lolekoi a Jehovah el Dios, el ngii a uchul a mengasireng el cherellel.​—Bades 3-10.

Me a omerellel a Manase el kmal mlo mekngit a uchul, me a Jehovah a milecherei me te lochetii er a bombatel e nguu el mo er a Babilon. Me ngngar isei e ngkmal mlo rutechii a rengul er a chelebulel e mlo melatk a rokui el mekngit el omerellel. Me ngulterekokl el ngar tia el taem er a chelebulel e nglocha mlo melechesuar el kmo, aike el rokui el chedul a dimlak el sebechel el omekerreu er ngii. E dirrek el locha kmal mlo ungil el melebedebek aike el ungil el osisecheklel a demal el mo er ngii er a dirk el kekerei. Alta ngmlo uaisei me a lechub e ngdiak, ngdi kede medengei el kmo a Manase a kmal mlo ouuchel er a rengul, e ulebult er aike el mekngit el omerellel. A cheldecheduch a melekoi el kmo: “Me ser a bo lecharm e ngngiluu a rengul el mor iou, e ulebult el mo er a [Jehovah] el Dios er ngii, e ulengit er ngii me le ngesuir.” (Bades 12, 13) Engdi a ker a kmo, a chad el uaisei el mla remuul a kmal meklou e oberaod el klengit, ngsebechel a Dios el ousubes er ngii?

A nglunguchel a Manase a kmal rirtechii a rengul a Jehovah. Me ngkmal rirenges a nglunguchel el olengit er a klechubechub er a Dios, me ngliluut el olutii el “mor a rengedel er a Jerusalem.” (Bades 13) Ngmlo meruul a rokui el tekoi el mesmechokl aike el rokui el mekngit el omerellel, e milengikiid er a beluu er a rokui el bleob el chelid e dirrek el milengelechel er a rechad er a beluu “el mo mengull el meluluuch er a [Jehovah] el Dios.”​—Bades 15-17.

A lsekum e ke omdasu el kmo a klengit el murruul er a ngar er a mong a rullau el mo diak a belkum el chad, e molatk er a kerebil a Manase. Tia el cheldecheduch a tedebechel a mlukrael el Tekingel a Dios. (Rom 15:4) Me ngbleketakl el kmo, a Jehovah a kmal soal a bo dodengei el kmo ngii a kmal kltmokl el mo “ousubes” a kngtid. (Psalm 86:5) Ngbleketakl el kmo ngdiak el klengit el lurruul er ngii a chad, e ngbai blekerdelel a rengul a chad a klou a ultutelel er Ngii. A chad el mirruul a klengit e uluuchel er a rengul e olengit a klausubes e mera el mo melodech a blekerdelel, e dirrek el tibir er a rengul el mo meruul a llemalt a ulterekokl el ‘obult el mor a [Jehovah’], el di ua omerellel a Manase.​—Isaia 1:18; 55:6, 7.