Ngmo Uchul a Klou el Klungiaol!

A OMENGULL EL TELUNGALEK me a omesubel a Biblia a kmal klou a ultutelel el kirir a rengalek a lsekum e ngsoad el lomekeroul er tir el okiu a “chomengedung ma chomellach ra [Jehovah].” (Efesus 6:4) Oleko kau a ta er a oungalek el chad e ke ulterekokl el medengei el kmo a rengalek a blechoel el mereched el mo seselk a rengrir. Me ngmekerang e mo sebeched el rulleterir el mo semeriar er a tekoi el dosaod er ngii? Ka me bo dosaod a bebil er a tekoi el loruul a rebebil el oungalek el chad.

A George er a beluu er a California er a Merikel a melekoi el kmo: “Ngak me a bechik a melasem el meruul er a omesubam er a Biblia el telungalek el mo uchul a klemeriarreng er a rengelekam. A lebebil er a taem e aki omail er kemam el ua teletelel a bilir tirke el chad er a taem er a Biblia, e meruul aike el loruul sel ki monguiu er sel babier el A Babilengek el kirel a Cheldecheduch er a Biblia. Aki dirrek el remuul a klekedellam, el ua saider me a skors me a sualo me a lmuut el bebil er a klekedall. Aki dirrek el remuul a klekool el ‘melangch er a rechad er a Biblia’ el ki mosuub a teletelir, e dirrek el lmuches a betok el beot me a dirrek el meringel el ker el kirel a Biblia e melasem el melangch. Ngdirrek el lebebil er a taem e aki mesterir a ngerechelir el mo merriter a suobel el meruul a cheldechedemam e mo mesaod, el ua okedecherul a Arhe er a Noah me aike el betok el tekoi el dilubech er a taem er a Biblia. A lebebil er a taem e aki ousbech a sunga el mesaod er tirke el chad el ngar er a Biblia me aike el cheldechedecherir. Chelecha el taem e aki melasem el ousunga er sel klekedall er a mekemad el losaod er ngii a bades er a Efesus 6:11-​17, el derta er kemam el rokui a mo mesaod er sel klekedall el derta el kemam a omtechei er ngii. Choua ikaikid el rolel a omesuub a kmal mla ngosukemam el mo oba klou el deurreng el kirel tia el omesubel a Biblia el telungalek.”

A Debi el chedil er a beluu er a Michigan er a Merikel a melekoi el kmo: “Ngak me a bechik a kmal mle meringel er kemam el mengelaod er a ngelekam er sera dirk el edei a rekil. Engdi a ta er a klebesei e ak milenguiu er a cheldechedechal a Isak me a Rebeka er sel babier el A Babilengek el kirel a Cheldecheduch er a Biblia, el klou a ngerek, e ngilai a teblo el oningio el mei me a kuluusbech el mesaod er tia el cheldecheduch. Ngika el ngelekek a kmal rirenges a rokui el tekoi el kulsaod el kirel tia el cheldecheduch! Me a uriul er tiang, e aika el teblo el oningio a mlo omtechei er a rebetok el kakerous el chad el ngar aike el cheldecheduch er a Biblia. Me a bek el taem el ki bo merek el menguiu er a cheldecheduch, e a ngelekam a mo remurt el meliuekl er a blai el osiik a omotsia me a lmuut el bebil er a klalo el sebeched el ousbech el omekesiu er a cheldecheduch el ki mulenguiu er ngii. Ngkmal di ua losiik a mekreos el klalo! A blil a oeacher me a dirrek el bekerekard el lechet a mlo blil a Rahab el mekebekabes er ngii a bekerekard el lechet. Me a eim el fit a klemengetel el oningio el bersoech el belebel er a oriik a kmal mlo ungil el omekesiu er sel brons el bersoech el losaod er ngii a Ulecherangel 21:4-9. Aki ngilai aika el klekedall el smuk er a chelsel a klou el tet. Ngkmal mo ungil a rengmam, sel ki momes er a ngelekam el dengchokl er a chelsel a blimam el mechesang el olechetekl er tia el ‘tet er a cheldecheduch er a Biblia.’ Ngdiak a deurreng el sebechel el mo mekesiur a deuil a rengmam sel ki momes er ngii el di ngii el mesaod aike el cheldecheduch er a Biblia el ngar sel rolel a lomdasu a tekoi!”

Ngkmal diak el beot el tekoi a rolel a okurulir a rengalek, ngousbech a lmuut el betok er a di osisecheklel a tekoi er a bek el sandei el mo omekeroul er a urungulir el mo sorir el mesiou er a Jehovah. Engdi a omengull el telungalek me a omesubel a Biblia a kmal sebechel el mo uchul a okurulel a tekingel a Dios er a rengrir a rengalek. E tia el omeruul a kmal sebechel el mo uchul a klou el klungiaol!