Ngerang a “Ullebongel”?

“. . . e sola e ngmochu ullebongel.”​—MATTEUS 24:14.

SESEI el rak er a uchei el me lmuut er chelechang e ngkora kmal mla mo klou a omesodel a ulebongel er a beluulechad. A babier me a mubi me a dirrek el makesin el kora oltobedechur me a lechub e ngoltirakl a omesodir a remellomes a rengrir el chad, a loruul el melasem el mesaod a meklou el tellemall el mo er ngii. E a omesodir a uldimukl er ngii a klou el tellemall el mo er ngii el okiu a meklou el dub, me a meklou el bad el mo katerturk er a melidiul, me a omekodall el rakt, me a diak el mutebechel el ngeldechel a eltel a beluulechad, me a lechub e ngokiu a recheraro el tir a diak el ngar er tia el beluulechad.

A betok el klechelid a kakerous a osisecheklir el kirel a ulebongel, e a rebebil a melisiich er a uldasu el kmo a “ullebongel” a mo uchul a telemellel a rokui el klengar el ngar tia el chutem. A ta el chad el mesuub a tekoi er a klechelid a mesaod er a bades er a Matteus 24:14 el kmo: “Tia el bades a kot el klou a ultutelel er a rokui el tekoi el ngar er a chelsel a Tekingel a Dios . . . Tia el telecheroll er chelecha el taem a chelebangel er a klou el tellemall el di kesai el chad er chelechang a dirk melasem el merriter er ngii el kmo ngmo ua ngerang sel lemei.”

Me a chouaika el uldasu a remuul a uldesuir a rechad el mo meringel er tir el mesang a klou a ultutelel el tekoi el kmo: A Jehovah el Dios a “mirruul er a beluulchad” e “rirellii el meduch e diak le ngemed! Ng dimlak le rellii el di bechachau el beluu, ng bai basio el kirir a re chad el kiei er ngii.” (Isaia 45:18) Me sel taem er a losaod er a “ullebongel” a Jesus, e ngdimlak lolekoi el kmo tia el beluulechad a mo metemall el nguemed, me a lechub e ngmo nguemed el di mo diak a rechad el kiei er ngii. A belkul a tekingel a kmo, tirke el mekngit el chad el diak el kengei el kiei el lolengesenges e loltirakl a ulekrael er a Jehovah el Dios a mo nguemed.

Ka di molatk er tia el okesiu. Oleko ngngar er ngii a kmal beches e klebokel el blim e ke kongei er a rechad el mo kiei er a chelsel el di tada. Me a rebebil er tirka el chad a kmal ungil el kiei el ngar er a budech tir me a rebebil e dirrek el kmal ungil el mengetmokl er tia el blim. Engdi a rekuk bebil a di meruul a uldikel er a chelsel e di kakoad e dirrek el di meruul a mekngit el mo er tirke el ungil el chad el kiei er bita er tir. Te dirrek el melemall er tia el kloklem e diak el kengei el olengesenges  er kau sel momeklatk er tir el kirel a mekngit el omerellir.

Ke mo mekerang a omosmechokl er tia el tekoi? Ke mo melemall er tia el blim? Ngulterekokl el diak bo moruul el uaisei. Ke bai ulterekokl el mo oldik er tirka el mekngit el chad e dirrek el mo kutmokl e mekbeches aike el rokui el telemellel tia el blim el lmuut el mo ungil.

Me a Jehovah me ngdirrek el mo meruul a tekoi el uaisei. Ngii a ulemekrael er a ta er a milluches er a Psalm el mo meluches el kmo: “Tirkel oumeral ulsirs er a [Jehovah] a mo ungilbesrir el kiei er a chelsel a beluu, ngdi re dengerenger a mo modik. Ngdi telkib kung, e a re dengerenger a mo dibus; ke mo osiik er tir, ngdi mo diak ke betik er tir; ngdi tirkel medemedemek a mo ungilbesrir el kiei el ngar a beluu el ungil a rengrir er a cherrungel budech.”​—Psalm 37:9-​11.

A apostol el Petrus a dirrek el millekoi el kirel a osisiu el tekoi. Nguleak a ulekrael er a Jehovah e ngmilluches el kmo: “A irechar e ngmlarngii a eanged, ma ralm a mlo uchelel a belulechad loeak a chomelekingel a Dios, me ngdilubech ra ralm, e a belulechad er isel taem a mleeleb ra ralm el nguemed.” (2 Petrus 3:5, 6) Me ngika el apostol a milsaod el kirel a Ieleb er sel taem er a Noah. A rechad el tir a dimlak lolengesenges er a Dios a ngilemed el rokui, engdi tia el beluulechad a dimlak el ngemed. Me sel klou el Ieleb a kiltmeklii a kerebai el mo er “tirikel mo diak loluu ra Dios er uriul.”​—2 Petrus 2:6.

A Petrus a dirrek el dilechelii el kmo: “Ngdi eanged ma belulechad er chelechang a ulekedelad . . . el mo lmuut er sel sils . . . e ngii a medul ra ngau.” Oleko kede di menguiu el mo er itiang, e ngsebechel el mo cheleuid a uldesued. Engdi mutebengii tia el kmo a bades a melemolem el melekoi el kmo: “El le mukerrekeriil tirikel diak loluu ra Dios e le ngemed.” Me ngbleketakl el kmo sel mo nguemed a diak lolekoi el kirel tia el beluulechad, e ngbai ngemedir a rechad el tir a diak loluu er a Dios. Me ngliluut el meluches a Petrus el kmo: “Ngdi kid a mengiil er sel ngara telbilel a Dios el beches el eanged ma beches el chutem el bo le kiei er ngii a llemalt.”​—2 Petrus 3:7, 13.

A ulaoch er a Biblia a dirrek el meketeklii el kmo a taem er a “ullebongel” a kmal di kmedu el mei. Monguiu er a Matteus 24:3-​14 me a 2 Timoteus 3:1-5 e momtab aike el blekeradel el ochotii el kmo aika el tekoi a kmal klemerang. *

Ngua ngerang a uldesuem sel modengei el kmo a rechad a kmal rrau a rengrir el kirel a bades er a Matteus 24:14, el ngii el bades a beot er a ngalek el mo medengelii a mera el belkul? Ngngar er ngii a ungil el uchul tia el tekoi. A Satan a mla mengeuid a uldesuir a rechad me ngmo diak lesang a klemerang er a mekreos el Tekingel a Dios el ngar er a Biblia. (2 Korinth 4:4) A Dios a dirrek el mla omart a moktek er ngii me lak el sebechir a remekedidai a rengrir el chad el mo medengei, e bai mla ocholt el mo er a rengariou a rengrir el chad. A Jesus a milsaod el kirel tiang er a ledu el kmo: “Chedam, el Rubak ra eanged ma chutem, ak uldanges er kau, le ke milart a ikal tekoi rar mellomes a rengrir mar bekudasu, e ulecholt rar tolechoi.” (Matteus 11:25) Me ngkmal ileakl el techall a dobang el mo teloi er a rengariou a rengrir el chad el tir a kmal ungil el medengelii a belkul a Rengedel a Dios, e dirrek el omes el beduluchei el kirel aike el klengeltengat el mo er tirke el chad el kongei el lolengesenges e chederedall er cheungel ngii el Renged!

[Footnote]

[Siasing el ngar er a 9 el llel]

A Rengedel a Dios a mo uchul a “ullebongel” er a rokui el chelebirukel el ngar tia el chutem