Kede Selebechakl a Demui el Ultuil er a Jehovah

“A [Jehovah] a rongesak sel kumekedong er ngii.”​—PSALM 4:3.

1, 2. (a) Ngera el meringel el blekeradel a blo el chelebangel er ngii a David? (b) Ngera el psalm a bo dosaod?

A KING el David a mla mengedereder er a Israel el meketeket el taem engdi chelechang e ngchudelang, e dirrek el chelebangel er a kmal meringel el blekeradel. A ngelekel er a Absalom a di mle ngii el rullii el mo king, me a David a mle kirel el chemiis el mo cheroid er a Jerusalem. Ngdirrek el mla mecheblad er a kmal sechelil, me chelechang e a David a mlo ngmasech er a Rois el Olib el di lmangel e diak loureacher, el obengterir a redi mekesai el chedal. Me a lmuut el tang, a Simei, el chedal a King el Saul, a ulemetech er a David el olab a bad me a chebechab e dirrek el melebeakl er ngii.​—2 Samuel 15:30, 31; 16:5-​14.

² Tia el meringel el blekeradel ngmo uchul e a David a mo mad el ngar er a klengiterreng me a otuub? Ngdiak, e le ngii a kmal ultuil er a Jehovah. Tiang a mocholt er a Ongedei el Psalm, el dilebechii a David el kirel sera el chiis er a Absalom. Ngii el David a dirrek el lilechesii a Ongeua el Psalm. Aika el eru el chelitakl a ochotii el kmo a Dios a orrenges e dirrek el onger a nglunguuch. (Psalm 3:4; 4:3) Aika el psalm a oterekeklii el kmo a Jehovah a obengterir a reblak a rengrir el mesiungel er a llomes me a klebesei, el omekngeltengat er tir e olengeseu er tir e mesterir a budech e dirrek el mesebechakl er tir. (Psalm 3:5; 4:8) Me a leuaisei, e me bo domtab aika el psalm e desa el kmo ngmekerang a lengesukid el mo ulterekokl a rengud e lolisiich er a klaumerang er kid er a Dios.

Sel Taem el ‘Betok [el Chad a] Mekiis el Me Omtok er Kid’

3. Ngera el blekeradel a blo el chelebangel er ngii a David, el mocholt er a Psalm 3:1, 2?

³ A ta el oderuchel a melekoi el kmo: “A re chad er a Israel a melib a telbilir el mo olab el mor a Absalom.” (2 Samuel 15:13) A David a millatk el kmo ngmilekerang a Absalom e mlo sebechel el ngoititerir a rebetok el chad el mo olab el mo er ngii me ngoker el kmo: “O [Jehovah], te meral betok a re cherrouek! Te betok a re mla mekiis el me omtok er ngak. Te melekoi el kmo a Dios a diak bo lolengeseu er ngii.” (Psalm 3:1, 2) Te betok el chad er a Israel a omdasu el kmo a Jehovah a diak el bo el losebechakl er a David er a chimal a Absalom me a rechedal.

4, 5. (a) Ngmle ulterekokl a rengul a David el kirel a ngerang? (b) Ngera belkul aike el tekoi el kmo “e uchul mak dmangesbab”?

⁴ Engdi a David a ulterekokl a rengul e le ngkmal oumerang er a Dios. Ngmengitakl el kmo: “Ngdi kau e [Jehovah] a cheuotelek, ke klebkellek, e uchul mak dmangesbab.” (Psalm 3:3) A David a ungil el medengei el kmo a Jehovah a mo omekerreu er ngii el di ua omekreakl el omekerreu er a soldau. Nguaisei, ngika el chudelang el king a chemiis er a recherrouel, el delekedek a bdelul e oberaod a rengul er tia el mekngit el blekeradel el mocha er ngii. Engdi ngike el Kot el Ngarbab a mo ngodechii a blekeradel el mo er a David el mo uchul a klebkall el mo er ngii. A Jehovah a mo okisii a bdelul e ngosuir el mo melemalt el dechor. A David a meluluuch el klou a ngerel el oumerang el kmo a Dios a mo onger er ngii. Kau ke olecholt er a chouaisei el klaumerang el bedul a Jehovah?

⁵ Ngoeak aike el tekoi el kmo “e uchul mak dmangesbab” e a David a mle ungil el medengei el kmo a Jehovah a mo ngosuir. A ta er a Biblia el Today’s English Version a kmo: “Ngdi kau e RUBAK, a blechoel el omekerreu er ngak er a kdekudel; ke meskak a klisiich el mo kats e rullak el lmuut el mo bekeu.” A ta er a babier a mesaod er aike el tekoi el “uchul mak dmangesbab” el kmo: “A Dios sel lerellii a chad el mo dmangesbab, e ngbelkul a kmo Ngii a omsang ngika el chad a omelatk e rullii el mo ulterekokl a rengul.” A David a kmal mle mekngit a rengul e le ngii el mla modik el dikea el king er a Israel. Me nguaisei engdi ngii el “dmangesbab” a uchul me ngliluut el mo bekeu, e selebechakl, e mui el ultuil er a Dios.

 ‘A Jehovah a Mo Onger!’

6. Ngera uchul me a David a dilu el kmo sel loluluuch e a Jehovah a ngar er a chedaol el rois er ngii e onger er ngii?

⁶ A David el ngii a oumerang el ultuil er a Jehovah, a melemolem el melekoi el kmo: “Ng klou a ngerek el omekedong er a [Jehovah], me ng ngar a chedaol bukl er ngii e onger er ngak.” (Psalm 3:4) Me ngokiu a tekingel a David, e a blil a telbiil, el omekesiu er a Dios el ngar er a delongelir a rechedal, a mlengai el mo er a Rois Sion. (Monguiu er a 2 Samuel 15:23-25.) Seikid e a David a sebechel el melekoi el kmo a Jehovah a ngar er a chedaol el rois er ngii e onger a nglunguchel.

7. Ngera uchul me a David a dimlak a ngera el lemedakt er ngii?

⁷ A David a mle medengei el kmo a nglunguuch el mo er a Dios a kmal klou a ultutelel a uchul me ngdiak a ngera el lemedakt er ngii. Me ngmengitakl el kmo: “Ak mo bad el imiit a medak; ak lmuut el mo mekiis, ele [Jehovah] a mengkar er ngak.” (Psalm 3:5) Me sel leklebesei, el taem el recherraro a beot er tir el oldechelakl, e a David a diak el medakt el mo mechiuaiu. Ngungil el medengei el kmo ngmo mekiis a letutau e le tekoi el dilubech el mo er ngii er a ngar er a mong a mla oterekeklii a rengul el kmo a Dios a mo mesebechakl er ngii. Me kid me ngsebeched el mo uaisei a lsekum e kede olengesenges er a “llechul a [Jehovah]” e diak bo decheroid er ngii.​—Monguiu er a 2 Samuel 22:21, 22.

8. Ngmekerang a Psalm 27:1-4 e ochotii el kmo a David a mle mui el oumerang er a Dios?

⁸ A klaumerang er a David me ngii el mle mui el ultuil er a Dios a mocholt er a kuk ta er a psalm er ngii, el llechukl aika el tekoi el kmo: “A [Jehovah] a llemesek e osebelek; ng diak a bo kmedatk er ngii. A [Jehovah] a mesebechakl er ngak er a rokui el kdekudel; me ng diak bo kmedakt. . . . E lmuut kung ma lsekum a cheldebechel er a re soldau el rokir a iueklak, me ng diak bo kmedakt; . . . Ak mla olengit er a [Jehovah] er a tal tekoi, ng di tal tekoi a soak el kmo: bo kkiei er a blil a [Jehovah] er a klemengetel a klengar er ngak, e bo le mechas a renguk er a klungiolel, e bo kulengit er ongetikaik er ngii er isei.” (Psalm 27:1-4) A lsekum aika el tekoi a mera el ngar er a rengum e ngungil a oblechoel el mo er a bek el miting er a Rekristiano el obengterir a rekldemem er a klaumerang.​—Hebru 10:23-​25.

9, 10. Ngera uchul me kede melekoi el kmo a David a dimlak el soal el melaitechei, alta e ngmilluches aike el tekoi el ngar er a Psalm 3:6, 7?

⁹ Me alta e a David a mlo chelebangel er a  ultekengel a Absalom me a rebetok el chad a chilitii, engdi ngii a milengitakl el kmo: “Ng diak kmedakt er a re betok el telael el chad el mla iueklak. [Jehovah], bekiis! Mosebelak e Dios er ngak! Le kau omar otengir a rokui el cherrouek, ke mengam a ungelir a re dengerenger.”​—Psalm 3:6, 7.

¹⁰ Ngdimlak el blekerdelel a David el soal el melaitechei er a rebebil. A lsekum a recherrouel a mo ‘obar a otengir’ e ng Dios a ngike el mo omar er tir. Ngii el King el David a mla lemuches a Llechul a Dios er a ta er a babier, me ngmedengei a tekoi el medung er a chelsel el kmo: “A [Jehovah] a mo melaitechei e omals er tir.” (Duteronomi 17:14, 15, 18; 32:35) E ngii el Dios a dirrek el mo “mengam a ungelir a re dengerenger” el belkul a kmo a redengerenger a mo diak a klisichir el melemall. A Jehovah a medengelterir a redengerenger e le ngsebechel el “omes er a rengul a chad.” (1 Samuel 16:7) Kede oba klou el omereng el saul e le Dios a omeskid a klaumerang me a klisiich el mo sebeched el dechor el omtok er ngike el kot el mekngit, el ngii a Satan, el di kmedung e ngmo mekelebus er a diak a btil deliobech el ua ongumk el laion el chelam a ungelel el di kirel el okodall!​—1 Petrus 5:8, 9; Chocholt 20:1, 2, 7-​10.

“Osobel a Kloklel a [Jehovah]”

11. Ngera uchul me kede meluluuch el kirir a rekldemed er a klaumerang?

¹¹ A David a milechesuar el kmo ngdi ta el Jehovah a sebechel el mo uchul a osobel el kirel. Engdi ngdimlak lolatk el di kirel e lemerekong e le ngdirrek el millatk er a rokui el chedal a Jehovah. Sei a uchul me ngngar er a ulebengelel a mlukrael el tekingel e ngmelekoi el kmo: “Osobel a kloklel a [Jehovah]. A klengeltengat er kau le bor a re chedam.” (Psalm 3:8) Nguaisei, a David a kmal mle betok a mondai er ngii, engdi ngdirrek el mle blechoel el millatk el kirir a rechedal a Jehovah el rokui, e mel ulterekokl a rengul el medengei el kmo a Jehovah a mo omekngeltengat er tir. Me kid me ngdirrek el kmal kired el mo blechoel el melatk er tirke el kldemed er a klaumerang. Bo deblechoel el melatk er tir er a nglunguched, e dolengit er a Jehovah me lebesterir sel oureor el klisichel me lengesuterir el mo oba blekeu e bo leblak a rengrir el omerk er a ungil el chais.​—Efesus 6:17-​20.

12, 13. Ngera dilubech el mo er a Absalom, e milekerang a David el kirel?

¹² Ngkmal mle mekngit a kodellel a Absalom e tiang a uleklatk el mo er tirke el mekngit a blekerdelir el mo er a rebebil, el ileakl el mo er a rengellitel er a Dios, el uai a David. (Monguiu er a Osisechakl 3:31-​35.) Ngmlo er ngii a mekemad, me a resoldau er a Absalom a mlo mechitechut. Me a Absalom a ngilasech er a chermel el mule el chemiis e a chiul a miltecherakl er a rechelel a klou el kerrekar. Me ngklebikl er a rachel, el dirk chad el diak el sebechel el mekerang, e a Joab a ngilai a kldei el biskang el dulemakl er a ulul el mekodir.​—2 Samuel 18:6-​17.

¹³ Me a David nguleldeu er a rengul er a bo lodengei el kmo a ngelekel a mla mad? Ngdiak, ngbai merael e lmangel el oldiu el kmo: “A ngelekek! A ngelekek el Absalom! Absalom el ngelekek! Chulekum ng ngak a bai mlad, e rungalek! Absalom el ngelekek!” (2 Samuel 18:24-​33) Engdi a tekingel a Joab el mo er a David a rirellii el mo diak el sal mekngit a rengul. Ngkmal mle mekngit a ulebengelel a klengar er a Absalom, el kldidiul a rengul a rirellii el mo oumekemad er a demal, el ngii a ngellitel er a Jehovah, el mlo uchul a telemall el di kirel!​—2 Samuel 19:1-8; Osisechakl 12:21; 24:21, 22.

A David a Lmuut el Olecholt a Klaumerang er Ngii el Mo er a Dios

14. Ngera sebeched el dmung el kirel a Ongeua el Psalm?

¹⁴ A Ongeua el Psalm a di uai a Ongedei el Psalm el nglunguchel a David el olecholt er a cherrungel el klaumerang er ngii el mo er a Jehovah. (Psalm 3:4; 4:3) A David a locha dilebechii tia el chelitakl el mo olecholt a omereng el saul el mo er a Dios er a uriul er a lak bo el taut a ultekengel a Absalom. Me a lechub e ngmilluches er ngii el melatk er a Relevait el chad er a chelitakl. Me a leuaisei, e a dolebedebek er ngii e ngsebechel el melisiich er a klaumerang er kid er a Jehovah.

15. Ngera me ngsebeched el meluluuch el mo er a Jehovah el okiu a Ngelekel?

¹⁵ A David a lmuut el ochotii el kmo ngmui el ultuil er a Jehovah e oumerang el kmo a Dios a orrenges e dirrek el onger a nglunguchel. Me ngmengitakl el kmo: “Monger er ngak sel kumekedong, kaul Dios el osebecheklek! Ke diledesak er ser a kngar a chelebulek. Beskak a krasia, e mrenges a nglunguchek.” (Psalm 4:1) Kid me ngdirrek el sebeched el mo ulterekokl a rengud a lsekum kede meruul a melemalt el tekoi. Kede medengei el kmo a Jehovah, el ngii a  “[melemalt el] Dios” a omekngeltengat er a remelemalt el chedal, me kede meluluuch el mo er ngii el oeak a klaumerang er a olubet el tengetengel a Ngelekel el Jesus Kristus. (Johanes 3:16, 36) E tiang a mo uchul a budech er a rengud!

16. Ngera rirellii a David el mo mechitechut a rengul?

¹⁶ A lebebil er a taem, e ngsebeched el mo chelebangel er a meringel el blekeradel el sebechel el mengitechut er a rengud. A David a mlo er ngii a taem e ngmlo chelebangel er a osisiu el tekoi, e le ngmengitakl el kmo: “Ng ua ngera klteketel el di momekrur er ngak? Ng di somiu a chelsengsang el tekoi e oltoir a blulak el mo oingerang?” (Psalm 4:2) Me a tekingel a David el mesaod er tirke el di sorir a chelsengsang el tekoi a melutk el mo er a rechad el tir a diak loluu er a Dios. A recherrouel a David a ‘sorir a chelsengsang el tekoi.’ Sel Biblia el New International Version a oleiuid er tia el bades el kmo: “Ngua ngera klteketel el di moumerang a blulak el tekoi e mosiik er a klsuul el chelid?” Ngmo lmuut er sel taem el omerellir a rechad a mengitechut er kid, me kid a di melemolem el blak a rengud el meluluuch el mo er a di ta el mera el Dios e mui el otuil a klaumerang er kid er ngii.

17. Mosaod a rolel e a omerelled a oltirakl er a tekoi el medung er a Psalm 4:3.

¹⁷ A klaumerang er a David el mo er a Dios a kmal bleketakl er aika el tekingel el kmo: “A [Jehovah] a mla meleakl er a re kmongii el mo chedal; a [Jehovah] a rongesak sel kumekedong er ngii.” (Psalm 4:3) Kede ousbech a blekeu me a mui el klaumerang el mo er a Dios me bo el sebeched el melemolem el blak a rengud el mo er ngii. El uai tiang, a telungalek el Kristiano a kmal ousbech aika el blekeradel sel sekum a ta er a kmeed el chederir a diak lobult er a kngtil me ngmesuld a ngklel er a ongdibel. A Dios a mengebkall er tirke el blak a rengrir el mo er ngii e dirrek el oltirakl a omerellel. A blakerreng me a cherrungel el klaumerang el mo er a Jehovah a mo uchul a deurreng er a delongelir a rechedal.​—Psalm 84:11, 12.

18. Ngera kired el meruul er ngii a lsekum a tekingel me a lechub a omerellel a chad a tomellii a rengud, el oltirakl er a uleklatk er a Psalm 4:4?

¹⁸ E kuk mekerang a lsekum a tekingel me a lechub a omerellel a chad a tomellii a rengud? Ngsebeched el melemolem el dmeu a rengud a lsekum e kede oltirakl a tekingel a David el kmo: “Sel bo louedikel a rengum, e lak bor a klengit; mongedecheduch er a rengum er a dukllem, e bo mchelellakl.” (Psalm 4:4) Me a lsekum a tekingel me a lechub a omerellel a chad a tomellii a rengud, e lak dolaitechei me bo el uchul e derebet er a klengit. (Rom 12:17-​19) Me ngsebeched el ocholt a uldesued el kirel tia el tekoi el oeak a nglunguuch el mo er a Dios sel dengar er a duklled. Me sel doruul el uaisei, e ngsebechel el mengodech a uldesued el mo uchul e kede ousubes el oeak a bltikerreng. (1 Petrus 4:8) Momtab a uleklatk er a apostol el Paulus el mlengai a uchetemel er a Psalm 4:4 el kmo: “Lak bora klengit a bo le kesib a rengmiu; e lak di le kesib a rengmiu el mo ngmelt a sils, e lako bsa techellel a diabelong.”​—Efesus 4:26, 27.

19. Ngmekerang a Psalm 4:5 a lengesukid el kirel a omengull er kid el mo er a Dios?

¹⁹ Me a lolisiich er a klungel a ultutelel a doumerang er a Dios, e a David a mengitakl el kmo: “Molenget a ikel kerioll el tenget, e moumeral ulsirs er a [Jehovah].” (Psalm 4:5) Aike el tenget el lullenget a rechad er a Israel a mo er ngii a ultutelel a lsekum e ngmle melemalt a uldesuir el meruul a tekoi. (Isaia 1:11-​17) Kid me ngdirrek el kirel el mo melemalt a uldesued e mui el oumerang er a Dios me bo el sebechel el kongei er a omengull er kid.​—Monguiu er a Osisechakl 3:5, 6; Hebru 13:15, 16.

20. Ngera belkul sel tekoi el kmo “lediich a medam [e Jehovah]”?

²⁰ A David a melemolem el kmo: “A re betok el chad a melekoi el kmo, ‘A le chulekum kede mes a bebil er a klungiaol! Lediich a medam el mer kemam e [Jehovah]!’ ” (Psalm 4:6) Sel tekoi el “lediich a medam [e Jehovah]” a olecholt er a kengei er a Jehovah. (Psalm 89:15) Me a David sel loluluuch el kmo:  “Lediich a medam el mer kemam,” e ngbelkul a kmo ‘mkengei er kemam.’ Kid el mui el oumerang er a Jehovah a uchul me kede oba kengei er ngii e dmeu a rengud el meruul a soal.

21. Ngkirel el mo ulterekokl a rengud el kirel a ngera el tekoi a lsekum e ngsoad el churrengelii a omesiunged el meruul er a ureor er a berkel a klumech?

²¹ Me a lomes el beduluchei el kirel a deurreng el lomeskid a Dios el kuk ngaruchei er a deurreng er a taem er a omeridm, e a David a mengitakl el mo er a Jehovah el kmo: “Ke mla meskak a deuil a renguk el kuk ngar uchei er a deuil a rengrir sel bo le betok a grain ma bilong.” (Psalm 4:7) Ngulterekokl a rengud el kirel a klou el deurreng el mo er ngii a lsekum ngblak a rengud el teloi er a ureor er a berkel a klumech. (Lukas 10:2) Kid er chelechang a dmeu a rengud er tia el di merael el mo klou el ildois er a rechad er a ureor el kirel a sim, el dmak el oureor el obengterir a rengellitel er a Jehovah, el tir a ngar er a medal tia el ureor. (Isaia 9:3) Me kau ngdmeu a rengum el teloi er tia el ureor er a omeridm?

Bo el Ulterekokl a Rengum el Melemolem el Otuil a Mui el Klaumerang er Kau er a Dios

22. Ngmle ua ngera blekeradel el kirir a rechad er a Israel er sel taem er a loltaut a Llechul a Dios, el oltirakl er a Psalm 4:8?

²² A David a merekui er tia el psalm el melekoi el kmo: “Ak mo mechiuaiu el imiit a medak el ngar a budech; ele ng di kaul tang e [Jehovah] a kudmeklak mak selebechakl.” (Psalm 4:8) Me a rechad er a Israel sel loltaut a Llechul a Jehovah, e te mlo selebechakl e dirrek el milechesuar a budech el obengkel a Dios. El uai tiang, sel taem er a longedereder a Salomon e a ‘re chad er a Juda me a Israel . . . a mle ulecheliu a delengcheklir.’ (1 King 4:25) Me tirke el mle ultuil er a Dios a uleldeu a rengrir er a budech alta e aike el renged el meliuekl er tir a uluuketui er tir. Me nguai a David e ngsebechel el ungil el imiit a medad e le Dios a mesebechakl er kid.

23. Kede mo melechesiu a ngerang a lsekum e kede otuil a mui el klaumerang er kid er a Dios?

²³ Bo el ulterekokl a rengud el melemolem er a omesiunged el mo er a Jehovah. E me doluluuch el ngar er a klaumerang me bo dodengelii a “diak le metuk ra klemedengei rar chad el budech ra Dios.” (Filipi 4:6, 7) E tiang a mo uchul a klou el deurreng er a chelsel a klengar er kid! E sebechel el mo ulterekokl a rengud el kirel a ngar medad el klebesei a lsekum e kede melemolem el otuil a mui el klaumerang er kid er a Jehovah.

Ngmekerang a Omonger?

• Ngera el mondai a blo el chelebangel a David el Absalom a uchul?

• Ngmekerang a Ongedei el Psalm e sebechel el loterekokl a rengud?

• Ngoeak a ngera el rolel e a Ongeua el Psalm a smisichii a klaumerang er kid el mo er a Jehovah?

• Ngera el klengeltengat a dengai a dotuil a mui el klaumerang er kid er a Dios?

[Aike el Ker er a Suobel]

[Siasing el ngar er a 29 el llel]

A David a millemolem el oumerang er a Jehovah el mo lmuut er sel taem er a lechiis er a Absalom

[Siasing el ngar er a 32 el llel]

Kau ke otuil a mui el klaumerang er kau er a Jehovah?