A Jehovah a Ochotii a Bltkil a Rengul el Mei er Kid

“Ma grazia bo longedereder loeak a llemalt, el kirel me de nguu a diak a ullebengelel klengar.”​—ROM 5:21.

1, 2. Ngera el eru el bedengel a sengk a dosaod, e ngera er ngii a kot el klou a ultutelel?

A SENSEI er a University er a Melbourne er a beluu er a Australia a milluches el kmo a llach er a Renged er a Rom a sengk el klou a ultutelel el kirel a klechad. Engdi a Biblia a olisechakl el kmo a Dios a milskid a kmal ungil el sengk el lmuut el klou a kerresel. Tia el sengk a rolel a Dios e ngmo sebechel el mo er ngii a ungil e melemalt el delecherud er a osengel me bo denguu a osobel me a omelatk er a diak a ulebengelel el klengar.

² A Dios a kiltmeklii tia el sengk el ousbech a melemalt el rolel. Ngar er a 5 el klou el bliongel er a Rom, e a apostol el Paulus a dimlak losaod er a rolel a Dios a bo loruul er tiang el ousbech a komakai el tekoi er a llach. Ngbai ulemuchel er a babilengel el kmo: “Me kede uaisei el mla muklemalt el kloumera uchul, me kede mla nguu a budech el bedul a Dios loeak a Rubak er kid el Jesus Kristus.” Tirke el nguu a sengk er a Dios a ulterekokl el mo betik a rengrir er ngii. A Paulus a mle ta er tirka el ngiluu a sengk er a Dios. Ngmilluches el kmo: “Ele bltikerreng ra Dios a mloitel el mora rengud luleak sel mler kid el [oureor el klisichel a Dios].”​—Rom 5:1, 5.

3. Ngera el ker a sebechel el mo duubech?

³ Ngera uchul me tia el ungil el sengk a kmal klou a ultutelel? Ngmekerang a Dios a leketmeklii el ngar er a melemalt e tabesul el rolel? E a rechad ngkirir el mo mekerang me bo el sebechir el rredemelel a mo nguu tia el sengk? Me bo dorriter  a ungil el nger er aika el ker e desa el kmo ngmekerang a lomeketakl er a bltkil a rengul a Dios.

A Bltkil a Rengul a Dios a Mengaiuechit er a Klengit

4, 5. (a) Ngoeak a ngera el rolel e a Jehovah a ulechotii a klou el bltkil a rengul? (b) A bo dodengei a ngera el tekoi el kirel a Adam me a Eba e ngmekerang e ngosukid el mo medengelii a Rom 5:12?

⁴ Nguleak a klou el bltkil a rengul a Jehovah, e nguldureklii a di ta el Ngelekel el me olsobel er a rechad. A Paulus a milsaod er tia el tekoi el kmo: “Ngdi Dios a ulechotii a bltikerreng er ngii el bedul kid luleak a kodellel a Kristus el kired er sera dirke doruul a klengit.” (Rom 5:8) Ka momtab er a tekoi el medung er tiang el kmo: “Sera dirke doruul a klengit.” A rokui el chad a kirir el mo medengei el kmo te mlekerang e mlo urrebet er a klengit.

⁵ A Paulus a ulemuchel el mesaod er tia el tekoi el kmo: “Le tal chad a uchul ma klengit a siliseb ra belulechad ma rokuil chad a mlora klengit, me ngsiliseb ra rokuil chad a kodall, el ua kodall luleak a klengit el me soiseb.” (Rom 5:12) Kid a ngar er ngii a techelled el mo medengelii tia el tekoi e le Dios a kiltmokl a rekord er sel rolel e ngulemuchel a klengar er a rechad. A Jehovah a milebeterir a reteru el chad el Adam me a Eba. Ngika el Ulemeob a cherrungel el Dios, me tirke el mle kot el demad me a delad a dirrek el mle cherrungel. A Dios a milsterir a ta el llach el mle kirir el otireklii e a lak e te mo mad. (Genesis 2:17) Engdi te ngileltii el mo tomellii a llechul a Dios me te ultngeklii Ngika el Ulemesterir a llach e dirrek el Merreder er a eanged me a chutem.​—Duteronomi 32:4, 5.

6. (a) Ngera uchul me a ruldidellel a rsechel a Adam a mlad er a uchei er a Dios a leketmeklii a Llach er a Moses me a dirrek el uriul er ngii? (b) Ngera sebeched el omekesiu er ngii er a bebil el rakt el sebeched el ngmai er a rechad er blid?

⁶ Uriul er a lerebet er a klengit a Adam e ngmlochu er ngii a rengelekel me te mludiukes er a klengit me aike el telemellel. Me nguaisei engdi tir a dimlak el temellii a llach el ua demerir er a Adam a uchul me ngdimlak el lobals el kirel a osisiu el klengit me a dirrek el dirkak a llechukl el llach el meketmokl. (Genesis 2:17) Engdi tir el ngelekel a Adam a uchul me te di mechell el uldiukes er a klengit. Me a klengit me a kodall a mlengedereder er tir el mo er sel taem el Dios a milsterir a rechad er a Israel a llechul, el mileketeklii el kmo te urrebet er a klengit. (Monguiu er a Rom 5:13, 14.) A telemellel a mludiukes el klengit a sebeched el lomekesiu er ngii er a bebil el rakt el sebeched el ngmai er a rechad er a blid. Me alta e a rebebil er a rengalek a mo smecher er tia el rakt, engdi a rekuk bebil a diak bo el secher er ngii. Engdi tia el blekeradel a diak el uaisei el kirel a klengit. Kid el rokui a mludiukes er a klengit er a Adam me kede rokui el mo mad. A chouaitia el chetituokel el blekeradel ngsebechel el mo diak?

A Tekoi el Leriruul a Dios el Okiu a Jesus Kristus

7, 8. Ngmilekerang a omerellir a reteru el cherrungel el chad e mlo uchul a kakerous el tekoi?

⁷ Me ngoeak a bltikerreng, e a Jehovah a kiltmeklii a rolel el ngosuterir a rechad el mo mengubet er a blsel a klengit. A Paulus a milsaod el kmo tia el tekoi a sebechel el meketmokl el okiu a ta er a cherrungel el chad el ngii a mlo ongeru el Adam. (1 Korinth 15:45) Engdi a omerellir tirka el teru el mecherrungel el chad a mlo uchul a kakerous el tekoi. E tiang mekerang e mo uaisei?​—Monguiu er a Rom 5:15, 16.

⁸ A Paulus a milluches el kmo: “Ngdi ngat el grazia a ngodech ra blekeradel ra teluchakl.” Me a Adam a rirebet er a klengit me ngtilemellii a llach, me ngulebals e mlad. Me nguaisei engdi ngdimlak el di el ngii el tang a mlad. Kede menguiu el kmo: “A telucheklel a tal chad a uchul mar betok el chad a mlad.” Me sel blals el mlo er a Adam a dirrek el blo loudiukes er ngii a rediak el mecherrungel el ngelekel, el uldimukl er kid. Me nguaisei engdi ngmo mechelaod a rengud sel dodengei el kmo ngike el cherrungel el chad el Jesus a mle sebechel el kutmeklii a tekoi el mo sumecheklii tia el tellemall. El ngera el tekoi? Kede mesa nger er ngii er a tekingel a Paulus el melekoi el kmo “ma melemalt lomerellel a tal chad a uchul ma uklemalt el meskid a klengar a mlora rokuil chad.”​—Rom 5:18.

9. Ngerang mirruul er ngii a Dios el mo ngubeteterir a rechad el ua losaod er ngii a Rom 5:16, 18?

⁹ Ngerang a belkul a tekoi er a Grik el kirel a “chomekdubech a uklemalt” me a “uklemalt el meskid a klengar”? A chad el oleiuid a Biblia a melluches el kmo: “Ngtekoi el sebeched el ousbech er ngii el ua lokesiu el omeketakl a llach. Tiang a mesaod er a ngeldechel a deruchellel a chad er a medal a Dios el diak el sel mera el blekerdelel a rengul.  . . Ngdirrek  el olecholt er a Dios el ua chad er a kerrekeriil el ngii a mla oterekeklii el kmo ngika el chad el mlei er a medal a kort el mla obals er a diak el melemalt el omeruul, a mla mengubet er a kngtil. Me a Dios a ngike el melekoi el kmo ngii el chad a diak a telemellel.”

10. Ngerang rirellii a Jesus me lebo er ngii a techellir a rechad el mo moterekokl el kmo te melemalt?

¹⁰ “Ngikel oukerrekeriil er a beluulchad el rokir” ngmekerang e sebechel el melubet er a rediak el melemalt el chad? (Genesis 18:25) Ngmeruul er tiang el oeak a klou el bltkil a rengul el uldureklii a di ta el Ngelekel el mei er a beluulechad. A Jesus a mle cherrungel el oltaut er a soal a Demal, alta e ngmlo chelebangel a omengesuseu, me a mekngit el otuub, me a meringel el odechelakl. Ngmillemolem er a blakerreng er ngii el mo lmuut er a bo lemad er a teluo el kerrekar. (Hebru 2:10) Me sera bo el tengetengii a cherrungel el klengar er ngii, e tia el olubet el tenget a mlo melubet me a lechub e ngmengkad er a klengit me a kodall el lemludiukes er ngii a rengelekel a Adam.​—Matteus 20:28; Rom 5:6-8.

11. Ngera el omeruul a meketmokl a uchetemel er a olubet el tenget?

¹¹ A Paulus a dirrek el milsaod er tia el tekoi el kmo ng “olbatel.” (1 Timoteus 2:6) Me ngngera tia el olbatel? A Adam a mlo uchul a diak el cherrungel el blekeradel me a kodall el mo er a rebetok el biliol el chad, el tir el rokui el ngelekel. E a Jesus el mle cherrungel el chad a mle sebechel el mo demerir a rebetok el biliol el mecherrungel el ngelekel. * Me a klemedengei er kid er seikid el taem a kmo a klengar er a Jesus me tirke el mle sebechir el mo ngelekel el cherrungel el chad a kiltmeklii a tenget el mo melubet er a rediak el mecherrungel el ngelekel a Adam er a klengit me a kodall. Nguaisei engdi a Biblia a diak lolekoi el kmo tirke el mle sebechir el mo ngelekel a Jesus a tedebechel a olubet. A Rom 5:15-​19 a meketeklii el kmo a kodellel a “tal chad” a mlo uchul a olubet. Nguaisei, a cherrungel el klengar er a Jesus a mle osisiu a kerresel er a klengar er a Adam. Me a klou a ultutelel el tekoi a melutk el di kirel a Jesus Kristus. Me ngmlo sebechir a rebek el bedengir a rechad el mo nguu a diak locheraol el sengk me a dirrek el klengar el oeak a “omerellel a tal chad” el Jesus, el ngii a mle bekongesenges e blak a rengul el mo lmuut er a kodellel. (2 Korinth 5:14, 15; 1 Petrus 3:18) Me ngngera mlo rsel?

A Tenget el Melubet er a Chad er a Kngtil

12, 13. Ngera uchul me tirke el mloterekokl el kmo te melemalt a uluusbech er a klechubechub me a bltkil a rengul a Dios?

¹² A Jehovah el Dios a kilengei er a olubet el tengetengel a Ngelekel. (Hebru 9:24; 10:10, 12) Me nguaisei, engdi a redisaiplo er a Jesus el ngar tia el chutem el uldimukl er a rechapostol er ngii a dimlak el mecherrungel. Me alta e te millasem el meruul a llemalt, engdi ngdimlak el sebechir el kmal mo cherrungel el meruul a llemalt. E ngera uchul? E le tir el uldiukes er a klengit. (Rom 7:18-​20) Engdi a Dios a kmal mle sebechel e dirrek el rirellii a tekoi el mo mesmechokl er ngii. Ngkilengei er sel mlodars el tenget el “olbatel,” e dirrek el kmal kilengei el mo oltaut er ngii el kirir a rediak el mecherrungel el mesiungel.

¹³ Tiang a diak el belkul a kmo a Dios a meruul er tia el tekoi e le ngii a belsir a rechapostol me a  relmuut el bebil, el ungil el omerellir me a urerir a uchul. Ngbai meruul er ngii el oeak a klechubechub er ngii me sel klou el bltkil a rengul. Ngdirrek el ngii el Dios a millilt el mo melubet er a rechapostol me a relmuut el bebil er a kerrekeriil el mloterekokl er tir, e dirrek el ulemes er tir el kmo te melemalt. Me a tekingel a Paulus a kmal mileketeklii tiang el kmo: “Ele kemiu a mlosobel loeak a grazia, el kloumera uchul, el diak di ble le kemiu, ngbai sengk ra Dios.”​—Efesus 2:8.

14, 15. Ngera el ileakl el sengk a mlo er tirke el chad el Dios a omekedong er tir el kmo te melemalt, engdi ngngera el tekoi a dirk kirir el meruul er chelecha el taem?

¹⁴ Ka di molatk er tia el kmal ileakl el sengk el mlo sebechel ngike el Kot el Mesisiich el Dios el ousubes a kngtil a chad el mludiukes er a klengit e dirrek el mirruul a klengit! Ngkmal diak el sebechel el mochur a ildisel a klengit el leruul a chad er a uchei er a bo le Kristiano, engdi ngoeak a olubet el tenget, e a Dios a mo sebechel el ousubes ngii el klengit. A Paulus a milluches el kirel tia el tekoi el kmo: Ngdi “ngat ra grazia chomekdubech a uklemalt ra teluchekllir ar betok el chad.” (Rom 5:16) A rechapostol me a relmuut el bebil el tir a mla nguu tia el ileakl el sengk (el mla obeketakl el kmo te melemalt) a kirir el melemolem el omekeroul er a klaumerang er tir el mo er a Dios e mengull er ngii. Me ngngera el sengk a bo el nguu er a uriul? “E tirikel nguu cholsibes el grazia ma ngat el llemalt a bai kmal ngara klengar el mengedereder loeak ngiil tal chad el Jesus Kristus.” Me ngklemerang el tekoi, tia el sengk er a llemalt a oureor el okiu a kuk ngodech el rolel. Ngii el sengk a mo uchul a diak a ulebengelel el klengar.​—Rom 5:17; monguiu er a Lukas 22:28-​30.

¹⁵ Tirke el mo nguu tia el ileakl el sengk a obeketakl el kmo te melemalt, e dirrek el mo ileakl el ngelekel a Dios. Tir el mo oudiukes el obengkel a Kristus a uchul me te oba omelatk el mo mekiis el mo er a eanged el mo “mengedereder” el king el obengkel a Jesus Kristus.​—Monguiu er a Rom 8:15-​17, 23.

A Bltkil a Rengul a Dios a Mocholt el Mo er a Rebebil

16. Me tirke el oba omelatk el mo kiei er tia el chutem, ngkuk ua ngerang a bo lolai er tia el ileakl el sengk?

¹⁶ Ngdiak el rokui el chad el tir a oumerang e mesiou er a Dios el blak a rengrir el Kristiano a mo “mengedereder el king” er a eanged el obengkel a Kristus. A rebetok el chad el mesuub er a Biblia a oba osisiu el omelatk el ua tirke el Kristiano el mle mesiungel a Dios er a irechar. Te oba omelatk el mo kiei er a paradis el chutem el diak a ulebengelel. Me a ker a kmo, tirkang ngsebechir el nguu tia el ileakl el sengk, e dirrek el mokedong el kmo te melemalt er a osengel a Dios, e mo oba omelatk el mo kiei er tia el chutem? A doltirakl er a babilengel a Paulus el mo er a Rekristiano er a beluu er a Rom, e ngkmal bleketakl a nger er tia el ker el kmo, chochoi!

17, 18. (a) Ngera osengel a Jehovah el kirel a klaumerang er a Abraham? (b) Nguleak a ngera el rolel e a Jehovah a ulemes er a Abraham el kmo ngmelemalt el chad?

¹⁷ A Paulus a milsaod er a kot el ngarbab el kerebil a Abraham el ngii a uleba klou el klaumerang el kiliei er a uchei er a Jehovah a lerellii a llach el kirir a rechad er a Israel el oltirakl, e dirrek el uchei er a Kristus a lebekengii a techall el kirel a omelatk el mo kiei er a eanged. (Hebru 10:19, 20) Kede menguiu el kmo: “Ngmediukes ra beluulechad, el mlora Abraham ma klengelakel er ngii el dimlak loeak a llach, e nguleak a llemalt ra kloumerang.” (Rom 4:13; Jakobus 2:23, 24) Me a Dios a ulemasech er a Abraham el kmo ngmelemalt el chad.​—Monguiu er a Rom 4:20-​22.

¹⁸ Me tiang a diak el belkul a kmo a Abraham a dimlak a kngtil er a klemengetel a taem el losiou er a Jehovah. A blekeradel er a llemalt el lulebang a dimlak el uaisei a belkul. (Rom 3:10, 23) A llemesel a rengul a Jehovah a uchul me ngmle medengelii a klaumerang me a meringel el urerel a Abraham er a uchelel el mei. Ngmle ileakl a klaumerang er a Abraham el kirel ngike el ngar a telbiil el “uldidellel a rasech” el mo er ngii el okiu a ruldidellel a rsechel. E ngii el Uldidellel a Rasech a ngike el mo Messias me a lechub e ng Kristus. (Genesis 15:6; 22:15-​18) Me ngoeak a “ngubet el ngara Kristus Jesus” e a Dios a mo ousubes aike el klengit el dilubech er a uchei. Me tiang a meketeklii el kmo a Abraham me a relmuut el bebil el blak a rengrir el chad el kiliei er a uchei er a taem er a Klekristiano a dirrek el ngar ngii a techellir el mo nguu a okiis.​—Monguiu er a Rom 3:24, 25; Psalm 32:1, 2.

 Ngdmeu a Rengud er Chelechang el Obasech el Melemalt

19. Ngera me a osengel a Dios el bedul a Abraham a uchul a klou el deurreng er a rebetok el chad er chelecha el taem?

¹⁹ Ngkmal dmeu a rengrir a remera el Kristiano er chelechang e le tir el medengei el kmo a Dios er a bltikerreng a ulemasech er a Abraham el melemalt el chad. A Jehovah a dimlak lomasech er ngii el kmo ngmelemalt el chad el ua omeruul el loruul er ngii el mo er tirke el ngellitel el chedal el tir a mo ‘obengkel a Kristus’ el loudiukes. Tiaikid el kekerei el delebechel er a rechad a okedongall el “chedaol” el tir a mla nguu a kengei el mo “ngelekel a Dios.” (Rom 1:7; 8:14, 17, 33) A Abraham a bai kuk mlo okedongall el “sechelil a Dios,” e tiang a dilubech er a uchei er a bo lemeketmokl a olubet el tenget. (Jakobus 2:23; Isaia 41:8) Me chelechang, e ngkuk ua ngerang a blekeradel el kirir a remera el Kristiano el tir a oba omelatk el mo kiei er a Paradis el beluulechad?

20. A Dios ngmengerechir a ngerang er tirke el chad el lomes er tir er chelecha el taem el kmo te melemalt el ua Abraham?

²⁰ Tirka el chad a dimlak el nguu a “ngat el llemalt” el mo kiei er a eanged el okiu a “ngubet el ngara Kristus Jesus.” (Rom 3:24; 5:15, 17) Me nguaisei, engdi tir a melemolem el oba mesisiich el klaumerang el kirel a Dios me aike el lomesterir, e dirrek el olecholt er a klaumerang er tir el okiu a ungil el urerir. E a ta er ngii el ureor a “berkel a klumech er a rengedel a Dios . . . e dirrek el olisechakl aike el tekoi el kirel a Rubak el Jesus Kristus.” (Rellir 28:31) Me a Jehovah a sebechel el omes er tir el melemalt el chad el di ua sel osengel el bedul a Abraham. Me tirka el chad a nguu a ileakl el sengk el dirrek el mo sechelil a Dios el ngii a kuk ngodech er sel “diak locheraol” el sengk el mo er tirke el ngellitel el chedal a Dios. Me te kmal oba klou el omereng el saul er ngii el klengeltengat el mla moterekokl el kirir.

21. Ngera el klungiaol a sebeched el ngmai el okiu a bltkil a rengul a Dios me a dirrek el llemeltel?

²¹ A lsekum kede melatk el mo kiei er tia el chutem el diak a ulebengelel el dmeu a rengud, e ngkired el mo medengei el kmo tia el ileakl el techall a kmal dimlak denguu er a ngii di el chad. Tiang a bai ochotii a moktek er ngike el Kot el Ngarbab el Mengedereder el Jehovah el Dios, el mla kutmeklii a ileakl el rolel e ngmo sebechel el motaut a moktek er ngii. Me tia el ileakl el rolel a mileketmokl el okiu a mera el llemalt. Me a lmuut el tang, ngolechotel a klou el bltkil a rengul a Dios. Sei a uchul me a Paulus a mle sebechel el melekoi el kmo: “Ngdi Dios a ulechotii a bltikerreng er ngii el bedul kid luleak a Kristus el kired er sera dirk doruul a klengit.”​—Rom 5:8.

[Footnote]

Ke Dirk Melatk?

• A ruldidellel a rsechel a Adam, te ngiluu a ngera el diukes, e tiang ngmlo uchul a ngera el tekoi?

• Ngmilekerang e mlo sebechel el meketmokl a olubet el tenget, e oeak a ngera el rolel e ngmileketmokl tia el olubet el tenget?

• Me tia el ileakl el sengk el lobasech el melemalt, ngmo uchul a ngera el omelatk el kirem?

[Aike el Ker er a Suobel]

[Siasing el ngar er a 17 el llel]

A cherrungel el chad el Adam a rirebet er a klengit. Me a cherrungel el chad el Jesus a kilengei el mo “kutmeklii a olubet el tenget”

[Siasing el ngar er a 19 el llel]

Me tia kmal ungil el chais​—el okiu a Jesus e ngsebeched el obasech el melemalt el chad!