Kau Ke Semeriar el Mesuub el Di Kau el Tang?

A BEK el mesiungel a Dios a ulterekokl el semeriar el mengoit a klou el temir el di tir el mesuub a Biblia. (Psalm 1:1, 2) Me nguaisei engdi ngbetok a tekoi el mengesang a temir me a klisichel a bedengir me ngua bo el lolengesonges a taem el sebechir el ousbech el mesuub el di tir el tang.

Me a blak a rengrir el mesiungel a Dios a bo el sebechir el melemolem er a omesiungir el mo er a Dios, e ngkirir el omekbeches a deuil a rengrir me a klisichir er a bek el sils, el okiu a omesubir er a beches me a dmolech el klemerang el tekoi el ngar er a Tekingel a Dios. Aike el klemerang el tekoi er a Biblia el millisiich er kau er a ngar er a mong a locha diak el sal melisiich er kau er chelechang. Me ngklou a ultutelel a bo leblak a rengud el blechoel el melai a beches el klemedengei er a klemerang me lolemolem el mesisiich a deleongel er kid me a Dios.

Te milekerang a reblak a rengrir el chad er a irechar a lolemolem a mesisiich el deleongel er tir me a Dios el okiu a omesubir er a Tekingel a Dios el di tir el tang? Te mekerang a remesiungel a Jehovah er chelecha el taem e rullii a omesubir el di tir el tang el mo uchul a deurreng me a klungiaol? Te mlekerang e ngmai a klungiolir er a omesubir el di tir el tang?

Te Ulemekbeches a Klisichir el Oeak a Omesubir el Di Tir el Tang

A King el Josia er a Juda a uleba blakerreng el omuchel er a klou el ureor el mengikiid er a beluu er a klsuul el omengull, er a uriul er a lerenges aike el tekoi el mla er “sel Llach el Dios a ngiluu el msa Moses.” A Josia a ulterekokl el mla suubii tia el tekoi er a chelsel a Tekingel a Dios, engdi sera el rengesii a omengiuel el mla er sel llach er a Moses, e ngsilsichii el mo blak a rengul el kirel a bliochel el omengull.​—2 Kronika 34:14-19.

A profet el Daniel a ulemtab “el kirel 70 el rak el le telemall a Jerusaelm” me a otutel el ngar er a babier a Jeremia me a lmuut el “bebil el babier.” Aika el babier a uldimukl er ngii a Levitikus (26:34, 35), Isaia (44:26-28), Hosea (14:4-7), me a Amos (9:13-15). Me aike el tekoi el blo lodengei el okiu a omesubel er a babier er a Biblia a rirellii ngika el blak a rengul el chad el mo osiik er a Dios el ngar er a nglunguuch. Me a Dios a ulenger er a ongtil e  milsa bebil er a ocholt me a omelisiich el kirel a mats er a Jerusalem me a rechedal.​—Daniel, 9 el bliongel.

A Josia el “mirruul a ikel oldeu er a rengul a [Jehovah] el tekoi” me a Daniel el “Dios a betik a rengul er [ngii]” a di mle uai kid el chad. (2 King 22:2; Daniel 9:23) A blakerreng er tir el mesuub aike el Bades el mla er ngii er sel taem a ngilsuterir el mo kmes a deleuill er tir me a Dios. A osisiu el tekoi a sebechel el medung el kirir a rebetok el mesiungel a Jehovah er a irechar el ua Jeftha, me a ta er a milluches er a psalm el chedal a Asaf, me a Nehemia, me a Stefanus. Tirka el rokui a ullecholt el kmo te mle blak a rengrir el di tir el mesuub er aike el babier er a Biblia el mla er ngii er a taem er tir.​—Mengeteklel 11:14-27; Psalm 79,​80; Nehemia 1:8-10; 8:9-12; 13:29-31; Rellir 6:15–7:53.

Mrellii a Omesiou el Mo Uchul a Omelisiich

A ruumesingd el mesiungel a Jehovah er chelechang el mla mesiou er ngii el betok el rak a ngar er ngii a ulterekokl el temir el mesuub el di tir el tang. Te mla metik er ngii el kmo tiang a klou a ultutelel me bo el sebechir el melemolem el mekar e bo lungil el oltaut a ngerechelir el Kristiano. Me nguaisei, a rebetok er tir a melekoi el kmo ngmeringel er tir el mo tabesul a usbechir er a temir me a klisichir el kirel a omesuub me a lmuut el bebil er a tekoi el kirel ruoll.

Nguaisei, engdi ngkmal klou a ultutelel a dolemolem el mekar el okiu a omesubed el di kid el tang e le ngusbechall el kirel a omesiunged el Kristiano er chelecha el taem el kmal orechudel tia el ureor er a berkel a klumech er a Renged er a beluulechad el rokir. Tirke el semeriar er aike el beches e dmolech el klemedengei el kirel a Tekingel a Dios a sebechir el ngosuterir tirke el chad el sorir el mo medengelii a Dios. Tiang a klemerang el ngar er aike el basio el betok el chad a semeriar el mo medengelii a Dios me a lechub e ngkuk ngar er aike el basio el rechad er ngii a diak el sorir el orrenges er a klumech.

Bo Blechoel el Menguiu er a Tekingel a Dios

A tekoi el loruul a rebebil a sebechel el meskau a uldasu er a rolel e ngmo sebechem el mo semeriar er a omesubem me a lechub e ngmekerang e kau me a telungalek er kau a rullii a omesubiu el telungalek el mo uchul a klungioliu. A ta el tekoi el mesiungel a Dios a kirel el blechoel el meruul er ngii a omengiuel a Biblia er a bek el sils. Te betok el chad a mla remuul a turrekong er tir el mo menguiu a lekesai e ngedei el mo er a eua el bliongel er a Biblia er a bek el sandei. Ngsoam el mo chiuii a Biblia el rokir er a chelsel a ta el rak? A leuaisei, e ngungil a omchoit a okedei el bung er a bek el sils el menguiu er ngii.

Kau ke mla choiuii a Biblia el rokir el betok el taem? Nglocha ungil a omrellii a beches el turrekong er kau el kirel a ongingil el omengiuem er a Biblia. A ta el redil el Kristiano a ngildechii a rolel a omengiuel er a Biblia el mo oltirakl er a bldeklel me a blechebechel a tekoi el dilubech. Ngmlo sebechel el suub a betok el tekoi el kirel a blekerdelel a klengar er a rechad el dimlak el suub er a uchei. A kuk ta er a redil el Kristiano el mla choiuii a Biblia el rokir el eim el taem er aika el mereko el eim el rak, a rirellii tiang el ngar er a kakerous el rolel. A kot el taem, e ngdi chiliuii er a uchelel el mo er a ulebengelel. E a ongeru el taem, e ngmle sebechel el lemuches er a babilengel a bebil el tekoi el lesiluub er aike el bliongel er a Biblia. Ngar er a ongedei el taem el mong, e ngmlo omuchel el menguiu er sel klou el Biblia er kid, e omes aike el bades el ngar er a belngel me aike el footnote me aike el tekoi el ngar er a appendix. E a ongeim el taem, e nguluusbech a map el mo medengei aike el beluu el losaod er a chelsel a Biblia. Ngdilu el kmo: “Ak melechesuar el kmo, a omengiuek er a Biblia a mlo uchul a klou el deuil a renguk el di ua kmal ungil el kall.”

A rebebil el blak a rengrir el chad el mesuub er a Biblia a mla metik er ngii el kmo ngungil a lengar er ngii a Biblia el lousbech er ngii sel di el tir el tang el mesuub, me bo el sebechir el lemuches a lesemeriar er ngii el tekoi er a llel, me a ungil el okesiu, me a lechub e sel lambang er a llel aike el bebil el babilenged el sebeched el mo omes er a uriul. A ta er a odos el ngar er a mui el taem el omesiou a oldeu er a rengul er a ulebengelel a bek el buil el sebechel el lemuches aike el beches el tekoi el bla el suub er a chelsel seikid el buil. Ngdilu el kmo: “Me sel kumes el bedul aika el mekreos el temek, e ngngosukak el mo sebechek el mereched el oltaut  a bebil er a turrekong er ngak er a bek el buil.”

A Bebil el Ungil el Uldasu

A temem er a bek el sils me a bek el sandei ke mla oterekokl el kirel aike el meklou a ultutelel el tekoi me ke ousbech a ulekrael el kirel aike el medechel el temem? A leuaisei, e molab aike el babier el soam el menguiu me a lebo er ngii a techellem e monguiu. Me a omngar er a blim me a omngar sel basio el sebechem el mesuub er ngii, e modekdak aike el babier me a klekedall er a omesuub er bita er kau. Mrellii sel basio er a omesubem el mo ungilbesul me bo el sebechem el mesuub e lak el iit a medam. Ngar er ngii a cheldechedecham er a skuul er a miting? Mereched el choiuii a subelem e molebedebek er ngii er sel taem el omolengull me a lechub e ke meruul a urerem.

Ngsebechem el kaingeseu kau me a rebebil el kirel aike el taem el mousbech el mesuub el mo uchul a klungioliu. El ua tiang, ngsebechem el olengit er a chad me ngmenguiu el klou a ngerel a bebil el suobel e kau a meruul a urerem me a lechub e ke omsang a imelel. A telungalek a sebechir el oterekokl a taem el bek el chad a di tir el mesuub. “Ngera el suobel a bla mchiuii er chelecha el sandei?” A lebebil er a taem e ngsebechem el oker er a resechelim er tiaikid el ker el mo omuchel a cheldecheduch er a delongeliu.

Kau ke semeriar el mesuub a beches el tekoi er a omesubem el di kau el tang? Ngsebechem el oterekokl a taem el kirel a omesuub el ua blekerdelir a rebebil el mla oterekokl a taem el kirel a longedecheduch er a rechad el kirel a Biblia. A ta el redil el ngar er a mui el taem el omesiou a mla oterekokl a tela el sikang er a bek el buil el kirel a omesubel e dmeu a rengul sel lesa el kmo ngmla oltaut aika el turrekong er ngii er seikid el buil. A rekuk bebil a mla kosadel a temir el omes a tv me bo el sebechir el ousbech a temir el kirel a omesuub. A rebetok a mla oterekeklii a dai er a suobel el bo losuub er ngii, el ua rodech er a oureor el klisichel a Dios, me a omesodel a blekeradel el mla er ngii er sel taem er a omelechesel aike el babier er a Biblia, me a lechub a rolel a doleketek er a duch er kid el olisechakl. A rebebil a semeriar el meruul a babier el mesaod a bldeklel me a blechebechel a tekoi el ua delongelel a reking er a Israel me tirke el profet * er seikid el taem me a lechub aike el tekoi el dilubech el ngar er a Rellir a re Apostol me aike el tekoi el ngar er aike el babilengel a Paulus.

Kemiu el mekekerei el chad, ngsomiu a lemeteketek a klaumerang er kemiu el lmuut el mo mesisiich? A leuaisei, e mngiltii a ta er a babilenged el  bo mosuub er ngii er a temel a ulengull er a skuul. A ta el mla metecholb el redil el ngar er a high skuul a ngileltii a ta er a babier el Mankind’s Search for God, el lurruul er ngii a Watch Tower Society. Me ngulemuchel el mesuub er a kot el bliongel el mong e lemuches aike el lesiluub er a derta el bliongel er a babilengel. Tia mle telkib el meringel el tekoi e dirrek el uluusbech er a klou el taem el meruul er ngii. Nguaisei, engdi sera lesubii tia el babier el rokir, e ngkmal mlo ungil a rengul er a klemerang el tekoi el ngar er a chelsel a Biblia.

Mlemelemii a Klemeriarreng er Kau el Kirel a Omesuub

A ruumesingd el blak a rengrir el mesiungel a Jehovah er chelecha el taem a kmal ‘blak a rengrir ra urerel a Rubak.’ (1 Korinth 15:58) Me alta e ngmla moterekokl a tekoi el moruul er a bek el sandei el blechoel el moltirakl er ngii me ke omdasu el kmo ngungiang el dikea el sebechel el mengodech. Engdi kau el semeriar el mo medengei a dmolech el tekoi er a klemerang e melemolem el mesuub el kirel a otutel a moktek er a Jehovah a uchul e ngsebechel el mo mesisiich a klaumerang er kau.

Ngkmal melisiich a rengud sel derenges a chisir a rechad el mla ngmai a klungiolir e le tir el mle sebechir el mo oba ungil el uldasu el kirel a omesubir el di tir el tang. A ta er a chad el Kristiano, el mlo medengei el kmo ngdikea loba ungil el uldasu el kirel a omesubel er a dmolech el klemedengei el kirel a klemerang, a kiltmokl a tekoi er a klengar er ngii me bo el klou a temel el mesuub el di ngii el tang. Ngmelekoi el kmo: “Tia el omesubek a mla meskak a klou el deurreng el dimlak kudengelii er a uchei. Me ngak el mera el mla mo ulterekokl a renguk er a Jehovah el ngii a ulemekrael er a omelechesel a Biblia a uchul me ak kmal semeriar el mesaod er a klaumerang er ngak el mo er a rebebil. Ak kumelechesiu er ngak el klou a klemedengei er ngak er a Tekingel a Dios e kmal ungil a renguk er a bek el sils.”

A ta el odam el oldingel a ongdibel er a Resioning er a Jehovah a mesaod a bebil el klungiaol el kmo: “Tirke el blak a rengrir el di tir el mesuub a blechoel el klikmechur e mesaod a ungil el tekoi. Te meduch el obengterir a rechad, e diak el mereched el omtab a mekngit el tekingir a rechad. E sel loldingel a obliil, e ngsebechir el olengeseu er a rechad er aike el lousbech.”

Ngdirrek el dillii a ta er a tekoi el rebebil a locha sebechir el melebedebek er ngii sel lorritel er a blekerdelel a omesubir. Ngmelekoi el kmo: “Me sel temel a miting er a ongdibel, e a rebetok el chad a menguiu a nger er tir el mengai er a babier el dosuub er ngii. Ngsebechir el ngmai a bebil el klungiaol a lsekum e te melebedebek el kmo ngmekerang e sel suobel el losaod er ngii a kmeed el osisiu ngii me a tekoi el bla lesubii me a lechub e te mla mo chelebangel er ngii er a klengar er tir.” Omomdasu e ngsebechem el lmuut el olengeriakl er a rolel a omesubem?

A profet el Daniel er a uriul er a bla el chad el kuk betok er a 90 el rak a milechesuar el kmo ngkmal betok el tekoi a diak lodengei el kirel a Jehovah. Me ngngar er a ulebengelel a klengar er ngii, e nguleker el kirel a tekoi el dimlak el sal medengelii el kmo: “Ngdi, rubak, ng ngera mo ulebengelel?” (Daniel 12:8) Tiaikid el klemeriarreng er a Daniel el mle soal el mo medengei a betok el klemerang el tekoi el kirel a Jehovah, a mle uchul me ngkmal mle blak a rengul er a omesiungel er a klengar er ngii el rokir.​—Daniel 7:8, 16, 19, 20.

Me a derta el mesiungel a Jehovah er chelechang a ngar er ngii a ngerechelir el kirir el mo mesisiich el dechor el Sioning er a Ngii. Mlemelemii a klemeriarreng er kau el kirel a omesuub el di kau el tang me di el mesisiich a delongelem kau me a Jehovah. Molasem el odekiar a tang me a lechub e ngeru el beches el tekoi er a omesubem el di kau el tang er a bek el sandei me a bek el buil me a lechub a bek el rak. E bo mesa rolel a Jehovah a lomekngeltengat er kau el kirel a blakerreng er kau. Nguaisei, moldeu er a rengum er a omesubem el di kau el tang me aike el klengeltengat el mo er ngii el oeak a blakerreng er kau.​—Psalm 107:43.

[Footnote]