A Ungil el Chais el Mo er a Remechebuul

A TEKINGEL A DIOS a mengelaod er kid el kmo: “Ele re metacherbesrir a diak di le blechoel el obes er tir.” (Psalm 9:18) A Biblia a dirrek el melekoi el kirel ngika el Ulemeob er kid el kmo: “Ng mesterir a ungil a ildisel; ng mesterir a rokui a ikel lousbech.” (Psalm 145:16) Me tia el omelatk el medung er a tekingel a Dios a kmal diak el di el berrous. Ngika el kot el mesisiich el Dios a kmal sebechel el meskid aike el rokui el dousbech el mo torebengii a meringel el chelebuul. Me a ker a kmo, a remechebuul ngera te ousbech?

A ta el redil er a Africa el oureor el meluches a chais el kirel a keizai er a beluu a melekoi el kmo “ a remechebuul a kmal kirir el chederedall er a cheungel a melemalt e ungil a omerellel el chad.” El belkul a kmo kede ousbech er a chad el ngar er ngii a klou el klisichel, e ungil el chad, e dirrek el melemalt a omerellel el mo sebechel el torebengii a meringel el chelebuul. Ngdirrek el sebeched el mesang el kmo, a mesisiich el chad el ngii a sebechel el torebengii a meringel el chelebuul a kirel el mo mengedereder er a beluulechad, e le rechad el di meruul a tekoi el mo uchul a klungiolir a uchul me ngkmal klou a chelebuul er chelecha el taem. Me a lmuut el tang, a chad el mo mengedereder el ngii a sebechel el torebengii a chelebuul a dirrek el kirel el mo sebechel el rullii a lmuut el ta er a klou el tekoi el kirel tia el meringel el chelebuul, e tiang a rechorecherreng er a klechad. Me ngsebeched el mo metik er ngika el ileakl el merreder er ker?

A Dios a uldureklii a Jesus el mei el oba ungil el chais el mo er a remechebuul. Me ngii el Jesus er a bo el dechor e losaod er a ngerachel el Dios a ulterekeklii er ngii, e ngdilu el kmo: “A [klisichel a Jehovah] a kiei er ngak, ele ngchileltak el kirel omerk ra ungil klumech el morar mechebuul.”​—Lukas 4:16-18.

Ngerang a Ungil el Chais?

A Dios a mla tutkii a Jesus el mo King. E tiang a kmal ungil el chais. Ngii ngike el kot el ungil el Merreder el kmal sebechel el torebengii a chelebuul e le (1) ngmo mengedereder er a rokui el chad e dirrek el ngar er ngii a klisichel el meruul a tekoi; (2) ngoba klou el klechubechub el kirir a remechebuul e dirrek el olisechakl er a rulebengkel el mo ungil el omekerreu er tir; e dirrek el (3) sebechel el torebengii sel uchul a klou el chelebuul, el ngii a uldiukes el klengit el uchul me kede meruul a tekoi el di oltirakl a soad. Ka me bo dorriter a 3 el tekoi el kirel tia el ungil el chais.

1. A omengederederel a Jesus er a rokui el renged A Tekingel a Dios a melekoi el kirel a Jesus el kmo: “Ngiluu a klisiich, ma omengull, ma klisichel omerreder, el kirel me losiou er ngii a re chad er a bek el beluu, ma re bek el bedengir a re chad, ma kakerous el omelekoi.” (Daniel 7:14) Ngulterekokl el kmal mo betok a klungiaol el dengai er cheungel a di ta el bedengel a kabelment el ngii a mo mengedereder er a rechad el rokui. Tiaikid el chimo el kabelment a mo okngemed a rokui el mekemad me a klaititekangel el kirel a tekoi er a kerruul er tia el beluulechad. Ngdirrek el mo tabesul a klungiaol el mo er a rokui el chad. A Jesus a kmal ulterekeklii tia el tekoi el kmo ngii a mo Mengedereder er a beluulechad el oba klou el klisiich e meruul er tia el urerel. Ngmle bleketakl el melekoi el kmo: “A rokuil klisichel chomerreder ra eanged ma chutem a le bilskak.”​—Matteus 28:18.

2. Sel klechubechub er a Jesus el mo er a remechebuul Ngar er a omesiungel a Jesus er tia el chutem, e ngulechotii a klou el klechubechub el mo er a remechebuul. El uai tiang, a redil el chiloit a rokui el ududel me a kerruul er ngii el kirel a ukeruul a riretechii a ikrel a bilel a Jesus, el millatk el kmo ngmo ungil er a rektel. Ngmla mo 12 el rak el di lorael a rasech er ngii me ngulterekokl el kmal mekngit a bedengel. Ngoeak a Llach, e a lsekum ngii el redil a rutechii a chad e ngrullii ngike el chad el mo diak el klikiid. Engdi a Jesus a mle ungil a omerellel el bedul ngii. Ngdilu el kmo: “Rungalek, a kloumera er kau a ulemekungil er kau; morael el ngara budech, me bo mungil era rekdem.”​—Markus 5:25-​34.

Me a osisecheklel a Jesus a ngar er ngii a klisichel el melodech a rengrir a rechad el mo sebechir el dirrek el olecholt er a klechubechub. El uai tiang, ka molatk er a nger er ngii el mo er ngike el chad el mle soal el mo medengei el kmo ngmekerang a doldeu er a rengul a Dios. Ngii el chad a mle medengei el kmo a Dios a soal a doubltikerreng el mo er a rengar bita er kid, engdi nguleker er a Jesus el kmo: Me a leuaisei e ngtecha “ngikel ngar bita er ngak?”

 Me a Jesus a ulenger er ngii el uluusbech er sel kot el merael a chisel el okesiu el kirel a chad el mirrael er a rael er a Jerusalem el mo er a beluu er a Jeriko, e a remekngit el chad a metik er ngii e cholebedii el kmal mlo meringel el mlo “ocherur a kodall” e ruchorech a kloklel e choitii e merael. E a ta el prist a mo engelakl er ngii e mo imuul er a bita el rael e merael. E a ta er a chad er a Levi a dirrek el mlo engelakl er ngii e mesang e merael. “E a tal chad ra Samaria el ngar chomerolel a mlo engelakl er ngiil chad, e mesenge me ngmocha chubur.” Me ngulemuchel el lmechet a bedengel ngii el chad e nguu el mo er a yadoya, e msang a ududel a chad er tia el blai me bo el sebechel el ngosuir ngika el telemall el chad. Me a Jesus a uleker el kmo: “Ngtecha er tirikal tedei chotutii a kmo ngar bita er ngikal meltemall rar bekeu el merechorech?” Me ngdula el kmo: “Ngikel mlor chomerellel a klechubechub el mor ngiil chad.” Me a Jesus a dula el kmo, “Morael e bo moruul el uaisei.”​—Lukas 10:25-​37.

A rechad el mo Sioning er a Jehovah a mesuub a chouaika el osisechakl el kirel a Jesus e mo ngmodech a uldesuir me a omerellir me bo el sebechir el olengeseu er a rechad el ousbech a ngeso. El uai tiang, a ta el redil er a beluu er a Latvia el meluches a hong a lilechesii a tekingel el ngar er a chelsel a babilengel el dai er ngii a Women in Soviet Prisons el kirel a taem er a loureor er a blil a kelebus er a beluu er a Potma e bo el secher er a rak er a 1960. Ngmelekoi el kmo: “A Resioning er a Jehovah a mera el blak a rengrir el olengeseu er a rechad el rokui, te mera el omes er a rechad el rokui el di osisiu el diak a omengetukel er a uldesuir me a rengrir.”

Sel taem er a lemetemall a tekoi er a keizai er a Ancon er a beluu er a Ecuador, e a rebebil er a Resioning er a Jehovah a kmal mlo chebuul e le ngmlo diak a urerir. Me a rekldemir el Sioning a tilbir el mo mengudel a udoud el olengeseu er tir, me te mlo meruul a kall el olterau el mo er a rechad er a omenged el merema remei, (el mocholt er tia el siasing). Me a rokui el chad er a ongdibel a kmal mle blak a rengrir el olengeseu el uldimukl er a rengalek. Te ulemuchel er a ta el klok er a mochu tutau me bo el sebechir el remuul a kall el mechii a temel a bilas el me soiseb er a eua el klok. Me aike el rokui el udoud el soiseb a mlo sebechel el ngosuterir tirke el rudam me a rudos el kirel aike el rokui el luluusbech.

Choua ikaikid el ungil el tekoi el dilubech, a ochotii el kmo a kerebil a Jesus me a osisecheklel a mera el ngar er ngii a klisichel el ngmodech a uldesuir me a rengrir a rechad el mo kongei el olengeseu er tirke el chebuul el ousbech a ngeso.

3. A Jesus a ngar er ngii a klisichel el melodech a mekngit el uldesuir a rechad A mekngit el uldesued a rechad a kmal bleketakl el dodengelii el rokui e dirrek el kongei el kmo ngmera el tekoi. A Biblia a omekedong er ngii el klengit. Me a apostol el Paulus a dirrek el milluches el kirel tia el tekoi el kmo: “Misei e ak metik ra blekeradel el ngarngii er ngak el kmo, ngsoak el meruul a ungil, ma mekngit a me soiseb.” Ngliluut el dochelii el kmo: “Ngkol techa ngikel mo osobelak er tial chelechad ra kodall? Doreng a sulel a Dios loeak a Jesus Kristus.” (Rom 7:21-​25) A Paulus a milsaod el kirel sel rolel er a Dios, el okiu a Jesus e ngolsobel er tirke el mera el mengull er ngii er a belsel a klengit, e a ta er ngii a sel blekerdeled a rechad el di melatk a soad me aike el mo uchul a klungioled el ngii a blekeradel el uchul a meringel el chelebuul. Me tia ngmekerang e mo sebechel el meketmokl?

Sesei el taem er a uriul er a lemetecholb a Jesus, e a Johanes el Techolb a milsaod e kirel ngii el Jesus el kmo: “Mesa Ngelekel a sib ra Dios, el melai a kngtil a belulechad el mengeroid!” (Johanes 1:29) Ngkmal di kmedung e tia el beluulechad a mo mui er a rechad el tir a mo mengubet er a belsel a klengit, e dirrek el mo diak di loruul e lolatk a tekoi el di mo uchul a klungiolir. (Isaia 11:9) Isei e a Jesus a mera el mo torob a rokui el tekoi el ngii a uchetemel a meringel el chelebuul.

Ngulterekokl el kmal mo dmeu a rengud sel dolatk el kirel a taem el mei el mo sebechir a rokui el chad el mo kiei el ungilbesrir el diak a ngesonges er tir! A Tekingel a Dios a kmo: “A re bek el chad a mo kiei el ngar a budech er bita er a dellemelir el bilong ma kerrekar er tir el fig, el diak a mo omekdakt er tir.” (Mika 4:4) Me aika el tekoi a mera el mesaod er sel taem el rokui el chad a mo dmeu a rengrir er a urerir, e ngar cheungel a ulekerreu, e dirrek el mo er ngii a techellir el kiei el ngar er a deurreng el diak a chelebuul, e ngii el rokui el tekoi a uchul a klou el omengebkall el mo er a Jehovah.