A Blekeradel el Mchelebangel Ngomekrael er a Klengar er Kau?

ABLSECHEL a ringel me a mondai er a klengar a ngar er ngii er chelecha el taem er a “uriul sils.” (2 Timoteus 3:1) A bebil er a mondai a di tedeb e dirrek el di mereched el mo diak. E a kuk bebil a sebechel el mo melai a buil me a lechub e ngbetok el rak. Me aika el tekoi a mo uchul e a rebetok a mo melechesuar a tekingel a David, el lilangel el mo er a Jehovah el kmo: “Modesebii a renguk er a tellemall, e motebedak er a chelebulek.”​—Psalm 25:17.

Kau ke melasem el outekangel a meringel el mondai er kau? A leuaisei e ngsebechem el metik a ngeso me a omelisiich er a chelsel a Biblia. Me bo dosaod a blekerdelel a klengar er a reteru el mle blak a rengrir el mesiungel a Jehovah el tir a uluutekangel el blak a rengrir me te mlo mesisiich er a mondai er a klengar er tir. Tirkang a Josef me a dirrek el David. Kede mo merriter el kmo te milekerang e mlo sebechir el outekangel a mondai er tir, e dengai a klubeled er tir el mo ngosukid el outekangel a omelsemai er a klengar er chelecha el taem.

Chelebangel a Meringel el Omelsemai

Sera bo el 17 a rekil a Josef, e ngmlo chelebangel er a meringel el omelsemai er a chelsel a delengcheklel. A rubekul a mle medengei el kmo a demerir er a Jakob a “kuk ngarbab a bltikerreng er ngii el mor a Josef er a mor tir.” Me te ulemuchel el “kmal mlo ouketui er ochellir me ng mlo diak lungil mengedecheduch er ngii.” (Genesis 37:4) Ngdirrek el sebeched el melechesuar a mondai el blo lechelebangel er ngii a Josef el kirel tia el tekoi. Me a cherengel a taem e tia el kltui er a rengrir a rubekul a Josef a kmal mlo mesisiich me te ulterur el mo sibai.​—Genesis 37:26-33.

Sel taem er a loureor el sibai er a beluu er a Ekipten, e a Josef a mlo chelebangel er a omengesuseu er a bechil a mastang er ngii. Ngmle mesisiich a Josef el  otngeklii ngika el redil me ngkmal ngilasech a rengul e ultelecheklii el kmo ngmillasem el olterebek er ngii. Me te mlo “chosmerii er a kelebus” el “ochil a mle llechotel er a bombatel e mlar ngii a deel el meliuekl er a chiklel.” (Genesis 39:7-20; Psalm 105:17, 18) Ngulterekokl el kmal mle chuarm a rengul a Josef! Ngmle bekord el 13 el rak el sibai me a lechub e ngkelebus el chebirukel el omerellir a rebebil a uchul, el uldimukl er a rechad er a blil.​—Genesis 37:2; 41:46.

A David er a irechar a dirrek el mlo chelebangel a betok el ringel er a dirk lekekerei el chad. Ngmle betok el rak el lechiis el omart er ngii, e le King el Saul a mle soal lomekoad er ngii el di ua lomekoad a charm. Me a klengar er a David a mle chelebangel er a kdekudel el blekeradel. Ta el taem e ngmlo er a prist el Ahimelek el mlo olengit a kall. (1 Samuel 21:1-7) Me a Saul er sera bo lodengei el kmo a Ahimelek a ngilsuir a David, e ngultebedii a tekoi el diak di lomekoad er a Ahimelek e ngdirrek el mle soal a lemad tirke el rokui el prist me a telungalek er tir. (1 Samuel 22:12-19) Kau ngsebechem el melechesuar a ringelel a rengul me a uldesuel a David er sera bo lodengei el ngii a mlo uchul tia el klou el chelebuul?

Ka di molatk aike el betok el rak el luluutekangel a ringel me a chelebirukel el omeruul a Josef me a David. Me sel bo dungil el merriter a rolel e ngmlo sebechir el outekangel aika el ringel, e ngsebeched el suub a betok el meklou a ultutelel el tekoi. Me bo domes a edei el rolel e ngsebechir tirka el chad el mo rredemelel a ungil el kerebai.

Mongikiid er a Uldesuem er a Ngasecherreng me a Kltui

A kot el uchul, e tirka el blak a rengrir el chad a dimlak el bechei a ngasecherreng me a kltui me lolemolem el ngar er a uldesuir. Sera lengar er a kelebus a Josef, e ngmle sebechel el melemolem el melatk aike el mekngit el omerellir a rubekul, el mo uchul a mesisiich el kltui er ngii me ngmo melatk el melaitechei a mekngit el omerellir sel lluut el mo mesterir. Engdi kede mekerang e medengei el kmo a Josef a dimlak el bo lemekngit a uldesuel? Ka di molatk a omerellel er sel taem el mlo er ngii a techellel el melaitechei er a rubekul er a lemerema er a Ekipten el me omechar a grain. A cheldecheduch a ouchais el kmo: “A Josef a mlor cheroid e lmangel . . . [e] ultebedii a tekingel el mo [er a remesiungel] el mo omekeek a bekengir [a rubekul] er a kall e oluut  a ududir a re bek el chad el mor a tutungir, e mesterir a bento er tir.” Me sel taem er a loldurech er a rubekul el mo melai er a demerir el mei er a Ekipten, e ngii el Josef a milengelechel er tir el kmo: “Kele mkautoketok er a rael.” Me nguleak a tekingel me a omerellel a Josef e kede mo medengei el kmo, ngdimlak lebechei a ngasecherreng me a kltui me letemellii a klengar er ngii.​—Genesis 42:24, 25; 45:24.

Me ngdi osisiu, a David a dimlak lomekeroul er a ngesechel a rengul el mo er a King el Saul. Ngmlo er ngii a eru el taem el mle sebechel a David el mekodir a Saul. Me ngngar er aike el taem e a rechedal a millisiich er ngii el mo omekoad er ngii, engdi a David a dilu el kmo: “A RUBAK bo longkar er ngak me lak temelii a mastang er ngak el ngii a le ngileltii a RUBAK el mo king! Ng kmal diak le kirek el tomellii ele ngii a king el mlengilt er a RUBAK.” A David a milecherei tia el tekoi er a chimal a Jehovah, e dilu er a rechedal el kmo: “A RUBAK a di ngar, me ng RUBAK a mo mekodir. Ng di mochu er a belsechel a kodellel, ma lechub e ng mor a mekemad e mad.” A uriul, e a David a lilechesii a chelitakl er a klengiterreng el kirel a kodellel a Saul me a ngelekel er a Jonathan. Me ngdi ua Josef, a David a dimlak lebecherei a ngasecherreng me a kltui me lolemolem el ngar er a chelsel a rengul.​—1 Samuel 24:3-6; 26:7-13; 2 Samuel 1:17-27.

Me kid kede melemolem el urrekodel a ngasecherreng me a kltui sel bo dechelebangel a chelebirukel el omeruul el mo uchul a kngtil a rengud? Ngkmal sebechel el mo uaisei. A lsekum e kede mechei a kngtil a rengud me ngmelemolem, e ngsebechel el melisiich a mekngit el uldesued el uchul e kede melemolem el urrekodel a ngasecherreng me a kltui er a chelsel a rengud. (Efesus 4:26, 27) Me alta e ngdiak el sebeched el mtebechel a omerellir a rebebil, engdi ngsebeched el omtebechel a omerelled. Ngkmal mo beot el dongikiid a rengud er a ngasecherreng me a kltui, a lsekum e kede mui el oumerang el kmo a Jehovah a mo sumechokl a rokui el tekoi el ngar sel ungil el temel.​—Rom 12:17-19.

Bo er a Tkurrebab el Sebechem el Meruul a Ungil

A ongeru el tekoi el sebeched el suubii, a lak debechei a blekeradel el dechelebangel me bo letemellii a ungil el klengar er kid. Ngngar er ngii a techelled el mo mechesang el di melatk aike el tekoi el diak el sebeched el remuul, me ngmo diak delatk aike el kuk sebeched el remuul. Me ngoeak itiang e ngsebechel a meringel el blekeradel el bo dechelebangel el omuchel el omekrael er a klengar er kid. Tia el omeruul a mle sebechel el duubech el mo er a Josef. Engdi ngii a bai millilt el mo meruul a ungil el tekoi. Me sel taem el oureor el sibai, e a “Potifar a mle dmeu a rengul er a Josef ma blekerdelel omesiungel el mor ngii; me ng ngiluu el mo mengedngil a blil.” Ngdirrek el di mle osisiu a omerellel a Josef er sel taem er a lengar er a kelebus. Me ngoeak a klengeltengat er a Jehovah me a blakerreng er a Josef, e a merreder er a kelebus a “rirellii a Josef el mo oungerachel er a rokui el kelebus. Ng uluungerachel a rokuil tekoi el mle kedmekill er a kelebus.”​—Genesis 39:4, 21-23.

Ngar er aike el taem el dirk el chiis el omart er ngii a David, e ngdirrek el mlo er a tkurrebab el sebechel el meruul a ungil. Sera leberrotel er a ked er a Paran, e ngii me a rechedal a ulemekerreu a delebechel el cheremel a Nabal er a remerechorech. A ta er a mengkerengel a cheremel a Nabal a dilu el kmo, “Tulemecheliu er kemam er a llomes ma klebesei.” (1 Samuel 25:16) E a uriul, er a taem er a lekiei er a Ziklag, e a David a uluumekemad aike el beluu el cherrouel a Israel el mo bedul a dimes, el oterekokl er a sakai er a beluu e a Judah.​—1 Samuel 27:8; 1 Kronika 12:20-22.

 Me kid, ngkired el mo blak a rengud el meruul aike el sebeched sel bo dechelebangel a meringel el blekeradel er a klengar er kid? Nguaisei, alta ngmeringel a doruul er ngii, engdi ngkmal el sebeched el rullii. A apostol el Paulus er a losaod er a klengar er ngii e ngmilluches el kmo: “Ele kmla mesuub el mo ungilbesul er ngak sel kbetik a ngiidi le blekeradel. . . . “Ak medengelii a rolel a kngara chelebuul, e medengelii a rolel a kngara kerruul; ma kmedinges, ma ksengerenger, ma kmerau, ma kchebuul, ma kmedecha ra rolel a bo kbetik a ngiidil tekoi.” A Paulus ngmilekera e mo sebechel el outekangel aika el tekoi er a chelsel a klengar er ngii? Nguleak a mesisiich el klaumerang er ngii el mle mui el ultuil er a Jehovah. Me ngmillekoi el kmo: “Ngsebechek el meruul a rokuil tekoi loeak a Kristus, el ngikel melisiich er ngak.”​—Filipi 4:11-13.

Mongiil er Sel Temel a Jehovah

A ongedei el tekoi el sebeched el ousbech er ngii a okiu sel dongiil er sel temel a Jehovah er a bai dousbech a tekoi el mo melodech er a blekerdelel a klengar er kid el ngii el tekoi a diak el mengai a uchetemel er a bades. A disaiplo el Jakobus a milluches el kmo: “Mcherrengelii a urerel a ducherreng, el kirel me bo mcherrungel el diak a tellemall ma ngelsonges er kemiu.” (Jakobus 1:4) A ducherreng a sebechel el mo ‘churrengelii a urerel’ a lsekum kede kongei el chobengelii a omelsemai e diak dolasem el osiik er a beot el rolel el ousbech a tekoi el diak loltirakl er a bades el lorreched el mesmechokl a mondai. Seikid e a klaumerang er kid a mo measem e obiich, e dirrek el obeketakl a klisichel. A Josef me a David a uleba tiaikid el rolel a ducherreng. Te dul dimlak losiik a mereched el rolel a loruul a tekoi el mo uchul a kngtil a rengul a Jehovah. Te bai mle meduch a rengrir el outekangel a meringel el blekeradel er a klengar er tir. Te dirrek el milengiil er sel ungil el temel a Jehovah, me ngkmal mlo klou a klengeltengat el lengilai e le tir el mle meduch a rengrir el outekangel! Me a Jehovah a mlo ousbech er tir el omekerreu, e dirrek el omekrael er a rechedal.​—Genesis 41:39-41; 45:5; 2 Samuel 5:4, 5.

 Kid me kede dirrek el mo chelebangel a tekoi el sebechel el mo uchul e kede mo osiik a rolel e mesmechokl er ngii el diak loltirakl er a bades. El uai tiang, kau ke omelechesiu er kau el mechitechetong a rengum e le ngdiak ko betik er a chad el sebechem el mo bechil? A lsekum e nguaisei, e mongeroid er kau er a ngii di el tekoi el sebechel el mengesuseu er kau el mo melemall er a llechul a Jehovah el kmo bo bechiil el di “ngara Rubak.” (1 Korinth 7:39) Kau ke chelebangel a mondai er a chelsel a chebechiielem? Lak becherei a uldasu er tia el beluulechad el di melisiich dertel a chebechiil me lomekrael er kau, e molasem el dmak kau me a bechim el outekangel a ngii di el mondai el mchelebangel. (Malakai 2:16; Efesus 5:21-33) Ngmeringel er kau el omekerreu er a telungalek er kau el telemellel a tekoi er a keizai a uchul? A dongiil er sel temel a Jehovah e nguldimukl er a dongeroid er kid er a ngii di el rolel a omengereker el ngii a diak el melemalt. (Psalm 37:25; Hebru 13:18) Nguaisei, kid el rokui a kired el mo meduch a rengud el outekangel a ngii di el omelsemai er a klengar, e msang a Jehovah a ungil el uchul e ngdmeu a rengul el omekngeltengat er kid. Me sel doruul el uaisei, e ngmo ulterekokl a rengud el mengiil er sel ungil el temel a Jehovah el mo mesmechokl a rokui el tekoi.​—Mika 7:7.

A Jehovah a Mo Melisiich er Kau

Sel dolebedebek a blekerdelir a rechad el ngar er a Biblia el ua Josef me a David el tir a uluutekangel a meringel el chelebuul me a odechelakl e ngulterekokl el melisiich er kid. Me alta e ngdi mekedeb a cheldechedecherir el ngar er a Biblia, engdi a meringel el tekoi el ble lechelebangel a millemolem el betok el rak. Di le kau el oker er kau el kmo: ‘Te milekerang tirka el mesiungel a Dios e outekangel aika el mondai er tir? Te milekerang e melemolem el dmeu a rengrir? E ngmle kirir el omekeroul a ngera el blekeradel?’

Ngdirrek el kired el melatk a ducherreng er a remesiungel a Jehovah er chelecha el taem. (1 Petrus 5:9) Ngar er a chelsel A Ongkerongel me a Awake! el babier e ngbetok a cheldecheduch el kirir er a chelsel. Kau ke menguiu e dirrek el melebedebek aika kerebai er tirka el blak a rengrir el Kristiano? Ngdirrek el ngar er a chelsel a ongdibel er kid, e te ngar er ngii a rebebil el blak a rengrir el outekangel a meringel el mondai el lechelebangel er chelechang. Kau ke blechoel el mengedecheduch er tir e melai a klubelem er tir sel omngar er aike el miting er a ongdibel?​—Hebru 10:24, 25.

Sel bo mchelebangel a meringel el mondai, a bo lulterekokl a rengum el kmo a Jehovah a omekerreu er kau e mo melisiich er kau. (1 Petrus 5:6-10) Bo leblak a rengum e lak bechei a ngii di el meringel el tekoi me bo lomekrael er a klengar er kau. Moltirakl er a kerebil a Josef me a David me a relmuut el bebil el oeak sel mongikiid er a uldesuem er a ngasecherreng, e bo er a tkurrebab el sebechem el meruul a ungil, e mongiil er sel temel a Jehovah el mo mesmechokl a rokui el tekoi. Molekeed er kau er ngii el oeak a nglunguuch me a omesiungem el mo er ngii. Ngoeak tia el rolel, e ngsebechel el melemolem el dmeu a rengum er a chelsel a ngii di el meringel el mondai el bo mchelebangel.​—Psalm 34:8.

[Siasing el ngar er a 11 el llel]

A Josef a mlo er sel tkurrebab el sebechel el meruul a ungil

[Siasing el ngar er a 13 el llel]

A David a milengiil er a ungil temel a Jehovah el mo mesmechokl a mondai er ngii

[Blurb el ngar er a 14 el llel]

Sel bo mchelebangel a meringel el mondai, a bo lulterekokl a rengum el kmo a Jehovah a omekerreu er kau e mo melisiich er kau