Te Milengiil er a Messias

“E ar chad a mlengiil ra Kristus, me te rokui el ulemdasu ra chelsel a rengrir ra blekerdelel a Johanes el kmo kele le ngii a Kristus.”​—LUKAS 3:15.

1. A rebebil el klekerengel a sib te rirengesii a ngera el subed er a anghel?

NGMOCHA kebesengei. A remengkar a sib a ngar er a ked el mengkar a cheremir. Te kmal kilebetiekl er a lesa anghel er a Jehovah el dechor er a mederir me a klebkellel a Dios a diliich el meliuekl er tir! Morrenges! A anghel a melekoi er a klou el subed el kmo: “Lako medakd, mesang, ak mesubed er kemiu era ungil klumech el kloul deourreng el morar chad el rokui er tial renged; ele chelechang e Chosobel . . . ingii a Kristus el Rubak,” a ngike el mo Messias. A remengkar a sib a mo metik er a ngalek el ulekedurs er a chelsel a ongolel a charm. E di mle mereched e a “chobdois lurrurt ra eanged el dmak tir mar anghel el oldanges ra Dios el kmo, ‘A klebkall le bora Dios er sel imong el kididai, ma budech le bor tirkel ungil besul ra rengul ra belulechad!’ ”​—Lukas 2:8-​14.

2. Ngera belkul a tekoi el “Messias,” e mekerang e sebechel el medangch?

² Nguaisei a Rechijudea el mengkar a charm a medengei el kmo a “Messias” me a lechub a “Kristus” a melekoi el kirel ngike el ‘Cheledaol el mor a [Jehovah].’ (Exodus 29:5-7) Engdi te mekerang e suub a lmuut el betok e mo ngosuterir a rebebil el mo medengei el kmo a tolechoi el lulsaod er ngii a anghel a ngike el meltutk er a Jehovah el mo Messias? Ngoeak a bo lorriter aike el ulaoch el ngar a Chuodel el Testament e bo lomekesiu ngii el ulaoch er a omerellel me a blekerdelel a klengar er ngika el ngalek.

Ngera me a Rechad a Milengiil er a Messias?

3, 4. Kede mekerang e mo medengelii a omesodel a Daniel 9:24, 25?

³ A Johanes el Techolb er a lomuchel er a urerel, e a tekingel me a omerellel a rirelleterir a rechad el mo omdasu el kmo kele lengii a ngike el Messias. (Monguiu er a Lukas 3:15.) A rebebil er a rechad a locha mle medengelii sel ulaoch el kirel a Messias el melekoi er a “euid el 70 el rak.” A leuaisei, e ngmle sebechir el mo medengei el kmo ngme duum a Messias er a oingerang. A ulaoch a omuchel el kmo: “Sel taem el le tobed a tekoi el bo lluut el meteketek a Jerusalem el mor  sel le mei ngiil ngellitel er a Dios el merreder e ng mo 49 el rak. A Jerusalem a lmuut el mo meteketek el mor ngii a rael ma mesisiich el cheuatel, el mo dechor el 434 el rak.”​—Daniel 9:24, 25.

⁴ Chelecha el taem, e a remesiungel a Jehovah a medengei el kmo a 49 el rak me a 434 el rak el losaod er ngii a Daniel 9:25 a bo lemodak e ngmo 483 el rak, el ngii a ulemuchel er a rak er a 455 er a uchei er a taem er kid. Tiaikid sel taem el King el Artakserses er a Persia a dilu er a Nehemia me lebo er a Jerusalem e lluut el toketekii. (Nehemia 2:1-8) Aike el 483 el rak a mlo merek a temel er sel rak er a 29 er a lemetecholb a Jesus. Tiaikid el taem, e a Jehovah a ngileltii a Jesus el oeak a oureor el klisichel me ngmlo Messias.​—Matteus 3:13-​17. *

5. Ngera el ulaoch a bo dosaod er ngii?

⁵ Ka me bo dosaod a bebil er aike el ulaoch el kirel a Messias el tilaut er a cherellel a Jesus, me a klengar er ngii er a lengalek, me a dirrek el omesiungel. Tia ulterekokl el mo smisichii a klaumerang er kid el kirel a ulochel a Dios. Ngdirrek el meskid a ungil el ocholt el kmo a Jesus a ngike el Messias el lulengiil er ngii a rechad.

Ulaoch el Mesaod er a Klengar er a Jesus er a Lengalek

6. Mosaod el kmo ngmlekerang e motaut a Genesis 49:10.

⁶ A Messias a mo mechell er a kebliil er a Juda el chad er a Israel. A rubak el Jakob er a lemedkung e ngdilu aika el tekoi el kmo: “Ng orreked er a skersel a king, me ng loia er a delongelel ochil; ng mo orekedii a klisichel el dimerkmo le mei ngikel kirel el mo nguu el ngii a bo lolengesenges er ngii a rokui el chad.” (Genesis 49:10) Me a rebetok el mellomes a rengrir el chad er a Judea er a ngar er a mong a mle medengei el kmo aike el tekoi a melutk el kirel a Messias. Me ngngera mle belkul a tekingel a Jakob? Kede medengei el kmo ngmesaod er a king e le skersel a king a olecholt el kmo ngar er ngii a llemeltel el mengedereder e oltobed a llach er a beluu. Me tia el ulaoch a ochotii el kmo a king, el ngike el ngar er ngii a llemeltel el mengedereder, a mle kirel el chad er a kebliil er a Juda. Me a David a mle kot el king er a Juda, e a Sedekia a ngike el ulebongel el king er a Juda el ngar tia el chutem. Engdi a ulochel a Jakob a milsaod el kirel a kuk ta er a king el mei er a uriul er a Sedekia. E ngikang a mo king el mo cherechar. E a Dios a dilu er a Sedekia el kmo ngkaikid el king a ngike el kirel el mo oungerachel a rokui el tekoi. (Esekiel 21:26, 27) Me a uchei er a lemechell a Jesus e a anghel el Gabriel a dilu er a Maria el kmo: “A [Jehovah] el Dios a mo msa kingall ra demal el David, e ngii a mo mengedereder ra blil a Jakob el mo cherechar; ma chomerrederel a di ngarngii el diak a ullebengelel.” (Lukas 1:32, 33) Me a Jesus a mla er a kebliil er a Juda e mle uldidellel a rsechel a David. Ngdi ta el Jesus el uldidellel a rsechel a David a letilbir a Jehovah el mo msang a deruchall er a kleking. Me ngike el king a melutk el kirel a Jesus Kristus.​—Matteus 1:1-3, 6; Lukas 3:23, 31-​34.

7. A Messias ngmilechell er ker, e ngera me tiang a klou a ultutelel?

⁷ A Messias a mo mechell er a Bethlehem. A profet el Mika a milluches el kmo: “Bethlehem el Efrata, kau a tar a kot el kekerei el beluu er a Juda. E ngdi kmo otebedii er kau a mo merreder er a Israel. A telungalek er ngii a uldedelid el mor a kmal irechar.” (Mika 5:2) A Messias a mo mechell er a Bethlehem el ngar er a Judea, el ngklel er a uchei a mle Efrata. Me a Maria el delal a Jesus me a bechil er a Josef, alta e te kiliei er a Nazareth, engdi a meirei er a Rom el mo melai a ulecherengelir a rechad a uchul me te mlo er a Bethlehem, el beluu el lemlechell er ngii a Jesus er a rak er a 2 er a uchei er a taem er kid. (Matteus 2:1, 5, 6) Ngkmal mengasireng a otutel tia el ulaoch!

8, 9. Ngerang a mildung el kirel a cherellel a Messias me a tekoi el dilubech er a uriul er ngii?

⁸ A Messias a bo lebechellii a ta el kekerei el redil me a lechub a birhen. (Monguiu er a Isaia 7: 14.) Me tia el bades a mesaod el kmo a kekerei el redil a mo mechelii a ngalek el sechal. A tekoi er a Hebru el lousbech er ngii el mesaod er a birhen a bethu·lahʹ. E tia el bades a ousbech er a tekoi el ʽal·mahʹ, el belkul a kmo “kekerel dil.” Engdi kede medengei el kmo a ʽal·mahʹ a dirrek el belkul a kmo ngredil el “dirkak bo lodengelii a tal sechal,” e le Biblia a omekedong er a Rebeka el kmo kekerei el redil (ʽal·mahʹ) er a uchei er a bo lebechiil. (Genesis 24:16, 43) A oureor el klisichel a Dios a ulemekrael er a Matteus el meluches el kmo a Isaia 7:14 a tilaut er sel taem er a lemechell a Jesus. Ngar tia el bades, e ngdimlak lousbech er a tekoi er a Grik el kirel a “kekerel dil.” Ngbai uluusbech er a tekoi er a Grik el par·theʹnos el mesaod er a redil el “dirkak bo lodengelii a tal sechal.” Me a Matteus me a Lukas el milluches er a Evangkelio a di dul melekoi el kmo a Maria a mle birhen e mlo dioll el oeak a oureor el klisichel a Dios.​—Matteus 1:18-​25; Lukas 1:26-​35.

⁹ A remekekerei el ngalek a mo okodall er a uriul er a cherellel a Messias. A osisiu el tekoi a dilubech er a betok el rak er a uchei er sel taem el Farao er a Ekipten a dilung me a rengelekir a Rechijudea el sechal el tolechoi bo lemechoit er a Omoachel el Nail. (Exodus 1:22) A Jeremia 31:15, 16 a kmal utebengall e le ngmelekoi el kirel a Rahel el lmangel el kirir a rengelekel el mlengai el mo er a “belurir a re cherrouir.” E a lengelel a mlorenges er a cheroid el beluu er a Rama, el ngar er a beluu er a Benjamin, el ngar er a diluches er a Jerusalem. A Matteus a olecholt el kmo a tekingel a Jeremia a tilaut er sel taem el King el Herodes a ultebedii a tekingel me bo lokodall a remekekerei el ngalek el sechal er a Bethlehem me aike el beluu el meliuekl er ngii. (Monguiu er a Matteus 2:16-​18.) Ka di molatk er sel klou el klengiterreng el mlo er ngii er a chelsel aike el beluu!

10. Mosaod el kmo ngmekerang a Hosea 11:1 e tilaut el kirel a Jesus.

¹⁰ El di ua rechad er a Israel, e a Messias a mo tuobed er a beluu er a Ekipten. (Hosea 11:1) Uchei er a letobed a meirei er a Herodes el kirel a okodellir a rengalek, e a anghel a dilu er a Josef me a Maria me a Jesus me lebo er a beluu er a Ekipten. Te kiliei er isei el mo lmuut er a “le mad a Herodes, el kirel loltaut ra le dillii a [Jehovah] loeak a profet [Hosea] el kmo, ‘Ak ulekerir a Ngelekek lotobedii ra Egipten.’ ” (Matteus 2:13-​15) Nguaisei, ngii el Jesus a dimlak el sebechel el di ngii el omtebechel aike el tekoi el dilubech er a taem er a cherellel me a klengar er ngii er a lengalek.

A Messias a Omuchel er a Omesiungel!

11. Ngmilekerang e meketmokl a rael er a uchei er a lemei a Messias?

¹¹ A oderuchel a mo mengetmokl er a rael el kirel a Messias. A Malakai a ulemlaoch el kmo a “Profet Elias” a mo meruul er tia el ureor el mengetmokl a rengrir a rechad el kirel a demiel a Messias. (Monguiu er a Malakai 4:5, 6.) A Jesus a millekoi el kirel ngika el “Elias” el kmo ngii a Johanes el Techolb. (Matteus 11:12-​14) E a Markus a millutk el kirel a omesiungel a Johanes el kmo ngmo oltaut aike el tekoi er a ulochel a Isaia. (Isaia 40:3; Markus 1:1-4) A Jesus a dimlak lolekoi er a Johanes me longetmokl er a rael el kirel. A urerel a Johanes el Techolb el ua “Elias” a mileketmokl el oltirakl er a soal a Dios a uchul me a Messias a mlo sebechel el medangch.

12. Ngera el ureor a ngosukid el mo dongchii a Messias?

¹² A urerel el mla er a Dios a ngosukid el mo dongchii a Messias. Ngar er a blil a ongdibel er a Nazareth el lemlukeroul er ngii a Jesus, e ngmilenguiu er a iluil el babier er a Isaia e uleltaut aika el tekoi el kirel el kmo: “A [oureor el klisichel a Jehovah] a kiei er ngak, ele ngchileltak el kirel omerk ra ungil klumech el morar mechebuul. Ngiil [Jehovah] a ulderchak el mo mesubed el kmo, ‘Ar blebaol a mengubet, mar meiko a mo omes, mar ulsarech a mor tir a ilmokl,’ e mesubed a rak ra grazia ra [Jehovah].” Ngii el Jesus a ngike el mera el Messias me ngsebechel el melekoi el kmo: “A ikal chedaol llechukl el mrengesa er chelechang a toutang.”​—Lukas 4:16-​21.

13. Ngmilekerang a omesiungel a Jesus el ngar er a Galilea e mildung er a ulaoch?

 ¹³ A omesiungel a Messias el ngar er a Galilea a mildung er a ulaoch. A Isaia a milluches el kirel “a chutem er a klebliil er a Sebulun, ma Naftali . . . el mor a Galilea, er sel le kiei er ngii a re chad er a ngodech el beluu,” el kmo: “A re chad el mirrael er a chelsel a ilkolk a mla mesa klou el llomes! Te kiliei er a mesesilkolk el beluu, ngdi chelechang e a llomes a dmiich er bebrir.” (Isaia 9:1, 2) A Jesus a ulemuchel er a omesiungel el ngar er a beluu er a Galilea, e kiliei er a Kapernaum el ngii a ble lekiei er ngii a rechad er a Sebulun me a Naftali el uleldeu a rengrir er a klungiolel a llomes el ngii el Jesus a ulemesterir. (Matteus 4:12-​16) Ngar er a Galilea e a Jesus a ultebedii sel Cheldecheduch el ngar er a Rois, e millilt er a rechapostol er ngii, e rirellii sel kot el ongasireng el omeruul, e locha mlo duum er a bekord el 500 el disaiplo er ngii er a uriul er a lebekiis er a kodall. (Matteus 5:1–​7:27; 28:16-​20; Markus 3:13, 14; Johanes 2:8-​11; 1 Korinth 15:6) Seikid e nguleltaut er a ulochel a Isaia er a lolisechakl er “a chutem er a klebliil er a Sebulun, ma Naftali.” Nguaisei, a Jesus a dirrek el ullisechakl er a klumech el kirel a Renged el ngar er a bebil er a beluu er a Israel.

Lmuut el Bebil er a Ulaoch el Kirel a Messias

14. Ngoeak a ngera el rolel e a Jesus a uleltaut er a Psalm 78:2?

¹⁴ A Messias a mo mengedecheduch el ousbech a okesiu. A milluches er a Psalm el Asaf a milengitakl el kmo: “Ak mo melekoi okesiu.” (Psalm 78:2) Kede mekerang e medengei el kmo tia el ulaoch a motaut er a Jesus? A Matteus a mileketeklii tia el tekoi. Ngmesaod aike el okesiu el Jesus a uluusbech el omekesiu er a Renged el mo er a tane er a meringel me a ongemim er a blauang el kmo: “E a le mlak lolab chokesiu e ngdimlak longedecheduch a ngera er tir, el kirel me bo ltaut a ikel meldu ra profet el kmo: ‘Ak mo mekengii a ngerek el mengedecheduch chokesiu, el melekoi a ikel mle berrotel ra kot luchul a belulechad.’ ” (Matteus 13:31-​35) A okesiu a ta er aike el rolel a osisechakl el luluusbech er ngii a Jesus el olengeseu er a rechad el mo medengelii a Jehovah.

15. Mosaod el kmo ngmilekerang e motaut a Isaia 53:4.

¹⁵ A Messias a uleltekau a rengeled. A Isaia a ulemlaoch el kmo: “Ngdi ngii a miltekengelii a rengul el chuarm er a mle kired el chuarm er ngii; ma ringel el mle kired el oltekau er ngii.” (Isaia 53:4) A Matteus a milsaod el kmo uriul er a lomekungil er a delal a bechil a Petrus, e a Jesus a dirrek el ulemekungil er a rebebil el kirel “me bo ltaut a tekoi el meldu ra profet el Jesaia el kmo, ‘Ngii a ngila rngeled el choroid e ultour a rekded.’ ” (Matteus 8:14-​17) Tiang a di tang er aike el kmal betok el taem el Jesus a ulemekungil er a resmecher.

16. Ngmilekerang a apostol el Johanes er a lolecholt el kmo a Jesus a uleltaut er a Isaia 53:1?

¹⁶ Ngkmal mle betok a ungil el tekoi el lurruul a Messias engdi a rebetok el chad a dimlak loumerang er ngii. (Monguiu er a Isaia 53:1.) Me a lolecholt el kmo tia el ulaoch a tilaut, e a apostol el Johanes a milluches el kmo: “Nguaisei el betok lolangch a lriruul [a Jesus] er mederir, e te di dimlak bo loumera er ngii; e lotutii a tikingel a Jesaia el profet el kmo: ‘[Jehovah], ngtecha choumera ikel tekoi el le rirenges er kid, ma chimal a Rubak ngchilolt er techang?’ ” (Johanes 12:37, 38) Nguaisei, ngdi mle kesai el chad a uluumerang er a ungil el chais el kirel a Jesus, el Messias, er sel taem er a loruul er a omesiungel a apostol el Paulus.​—Rom 10:16, 17.

17. A Johanes ngmilekerang er a losaod er a otutel a Psalm 69:4?

¹⁷ A Messias a bo louketui er ngii a rechad el di diak a ungil el uchul. (Psalm 69:4) A apostol el Johanes  a melekoi a tekingel a Jesus el kmo: “Chomko ngdimlak kuruul a ikel urreor el direkak a ngodech el chad el meruul ra delongelir, e ngdimlak a kngterir; e ngdi chelechang e te mla mes e dirke ouketui er ngak ma Demak. Me toltaut a tekoi el llechukl ra llach er tir el kmo, ‘Ngdiak a uchul e touketui er ngak.’ ” (Johanes 15:24, 25) Ngblechoel a “llach” el melekoi el kirel aike el rokui el Bades el mla er ngii er sel taem. (Johanes 10:34; 12:34) Aike el cheldecheduch el ngar er a Evangkelio a ochotii el kmo a Jesus a mluketui, el ileakl er a remengeteklel a klechelid er a Rechijudea. A Kristus a dirrek el dilu el kmo: “A belulechad a diak el sebechel louketui er kemiu, e ngdi ouketui er ngak, ele kulecholt el kmo ngmekngit chomerellel.”​—Johanes 7:7.

18. Ngera el tekoi el kirel a Messias a bo dorriter er a ongingil el suobel?

¹⁸ Tirke el uleltirakl er a Jesus er a kot el dart el rak a mle ulterekokl a rengrir el kmo a Jesus a ngike el Messias, e le nguleltaut aike el ulaoch el kirel a Messias el ngar er a Chuodel el Testament. (Matteus 16:16) Ngar tia el suobel e kede milsuub el kmo aike el ulaoch el kirel a uchelel a klengar er a Jesus me a dirrek el omesiungel a rokui el di tilaut. A kuk bebil er a ulaoch el kirel a Messias a bo dorriter er a ongingil el suobel. E a lsekum e kede mo dmolech el melebedebek aika el ulaoch, e kede kmal mo oumerang el kmo a Jesus a ngike el chad el Jehovah a ngileltii el mo Messias.

[Footnote]

Ngmekerang a Omonger?

• Ngera el ulaoch a mlo tmaut el kirel a cherellel a Jesus?

• Ngmilekerang e meketmokl a rael er a uchei er a be ldum a Messias?

• Ngera el tekoi er a ulochel a Isaia er a 53 el bliongel a mlotaut er a Jesus?

[Aike el Ker er a Suobel]