Ngngar er Ngii a Chad el Uchul a Rokui el Mekngit?

A TA el mengeteklel a urrurt er a klsoldau er a United Nation er a beluu er a Rwanda, a melatk er a klou el kngterir e le ngdimlak el sebechir el torebengii a okodellir a rechad er sel beluu er a rak er a 1994, me ngdilu el kmo “ak mla mesang a diabelong.” A kuk ta er a chad el ulemes er tia el mekngit el omeruul er sel taem a millekoi el kmo: “A lsekum a chad dirrek el dirkak el bo loumerang el kmo ngngar er ngii a Satan, e ngsebechel el ki bo mkasoues er sel klou el olekull er a beluu er a Rwanda.” Me a chouaika el kmal meklou e mekngit el okodellir a rechad, ngmera el urerel a Diabelong?

A ruumesingd el chad a diak lomes aika el mekngit el kdekudel el okodellir a rechad el kmo ngurerel a diak el lemoues el mekngit el anghel. Betok er tir a omdasu el kmo a chouaika el mekngit el omeruul a urerel a klechad, e sel mera el uchul aika el mekngit el tekoi a sel mekngit el blekerdelel a chad. A rebebil a kuk omdasu el kmo ngngar er ngii a cheldebechel er a remerau e mesisiich el chad, el meklou el cheldebechel er a rechad el diak a medengelterir, el mengetmokl a tekoi el mo mengesuseu er a rechad el melasem el melai er a dereder er tia el beluulechad. E dirrek el ngar er ngii tirke el kuk oumerang el kmo aika el kabelment er a beluu me tirke el olab a dereder a uchul aika el chelebirukel me a ringelel a klechad el lomes.

Ngera ke oumerang er ngii? Ngera uchul me a chelebirukel, mekngit el omeruul, okodellir a rechad, me a ringelel a klechad a kmal imis el klou er chelecha el taem, alta e ngklou a ureor el melasem el merrob aika el mekngit el tekoi? Ngera uchul me a klechad a domes er ngii e ngua di lorael el bedul a tellemall, el meruul er a rechad el mo ua lemechad a dingerir er a blelekl el uleklatk el ngar er ngii? Ngngar er ngii a chad el uchul aika el rokui el tekoi? Ngtecha ngike el mera el mengedereder er a beluulechad? Ngulterekokl el kmal mo mechas a rengum er a nger er tia el ker.