Ngtechang a Mera el Mengedereder er a Beluulechad?

NGULTEREKOKL el dirkak a ta el mesang a ta er a remengeteklel a cheldebechel er a remekngit el chad. Me tiang belkul a kmo tirkang a diak el mera el chad? A remengeteklir a remekngit el chad a kot el meduch el omart er tir me a lechub e te di chelsimer er a kelebus e meruul a mekngit el tekoi. A chais er a beluu el kirel a oterullel a mekngit el kar, me a siobai er a ruteruul el redil, me a oterullir a rechad el mo sibai, me a lmuut el bebil, a di mekltkid er aika el betok el rolel a omengesuseu me a meklou el tellemall el mo er ngii el mekngit el omerellir a rechad a uchul. Me ngokiu aikaikid el mekngit el tekoi el meketmokl e kede mo medengei el kmo te mera el ngar er ngii a remengeteklir a remekngit el chad.

A Tekingel a Dios el Biblia, a ochotii el kmo a Satan a mera el ngar er ngii, el di ua blekerdelel a mengeteklel a chelechad er a remekngit el chad, el ngii a meringel el oureor el omes me bo el sebechel el meketmokl a moktek er ngii “el blulak” me a “ongetikaik ra chelebirukel.” Ngmera el tekoi, ngii el “Satan me ngdirrek el meruul a teletelel el leko ngchanghel ra llomes.” (2 Thesalonika 2:9, 10; 2 Korinth 11:14) Me ngsebeched el mo medengei el kmo ngmera el ngar er ngii a Diabelong el oeak a mekngit el tekoi el loruul. Me nguaisei engdi a rebetok a meringel er tir el mo oumerang el kmo ngngar er ngii a diak lemeues el mekngit el anghel. Me a uchei er a deluut el mo merriter aike el tekoi el lolekoi a Biblia el kirel a Diabelong, e ngungil a bo domes a bebil el omelsemai me a cheleuid el klaumerang el rulleterir a rebetok el mo diak loumerang el kmo a Diabelong a mera el ngar er ngii.

◼ “Ngmilekerang a betik a rengul el Dios e mebii a Diabelong?” A Biblia a melekoi el kmo a Dios a ungil e cherrungel, me ngkora mo ketouch a uldasu a lsekum e ngmebii a mekngit, e bulak, e chebirukel a omerellel el anghel. Engdi ngklemerang, a Biblia a diak a ta el lolekoi el kmo a Dios a ulemeob er a chad el uaisei a omerellel. Ngbai melekoi el kirel a Dios el kmo: “A RUBAK a mesisiich el osebechekliu, ng cherrungel e melemalt el ngar a rokui el rolel. A Dios er kemiu a blak a rengul e merang, ng meruul a llemalt ma ungil.”​—Duteronomi 32:4; Psalm 5:4.

Me a tekoi el kired el mo ungil el melatk er ngii a kmo a cherrungel el chad el ulebeob er a Dios a kmal sebechel el meruul a ngii di el tekoi el diak el di lemelemalt el tekoi e lemerekong. A Dios a dimlak lomeob er a reblebelel el ua robot, ngbai ulemeob er tir e milsterir a llemeltir el melilt, el ngii a techall el mo sebechir el di tir el melilt a tekoi el sorir el meruul. Me a leuaisei, a cherrungel e mellomes a rengul el bleob a sebechel el di ngii el melilt el mo meruul a ungil me a lechub e ngmeruul a mekngit. Me ngbleketakl el kmo, ngdi ike el tekoi el loruul a mellomes a rengul el bleob el chad me a lechub e ng anghel, el okiu a llemeltel el melilt, a sebechel el mo er ngii a mera el belkul.

Me ngkmal bleketakl, a Dios a diak el sebechel el kongei el mesterir a llemeltir a reblebelel el melilt a tekoi e a osisiu el taem e bo lorrob er tir a loruul a mekngit el tekoi a lsekum te mla ngiltii el mo meruul er ngii. A Jesus a dirrek el milsaod er a terrekakl el usbechel a llemeltel a chad el melilt a tekoi, er sera lolekoi el kirel a Diabelong el kmo: “Ngdiak el dechor ra klemerang.” (Johanes 8:44) Tia el tekoi a meketeklii el kmo ngika el di mle ngii el rullii el mo Diabelong a mle ta el taem el ble lecherrungel el anghel, el mle “dechor ra klemerang.” * A Jehovah el Dios a ulemeob er a reblebelel e milsterir a ilmeklir el melilt a tekoi e le  ngkmal betik a rengul er tir e dirrek el oumerang er tir.​—Momes er a baks el  “Ngsebechel a Cherrungel el Chad el Mo Diak el Cherrungel?” el ngar er a 6 el llel.

◼ “A Diabelong a mesiungel a Dios” A rebebil er a rechad a omdasu el kmo a Biblia a mesaod er tia el tekoi el ngar er a babier er a Job. Ngar er a ta el omesodel a Biblia, e ngmelekoi el kirel sel taem el Diabelong a ulemais el “omoid er a beluulchad,” el omekesiu er ngii er sel rolel el tirke el uluurabek er a beluu er a Persia er a irechar, el ulemoid er a beluu e me mesubed er a king er tir el kirel a tekoi el meketmeklang er a chelsel a beluu. (Job 1:7) Me nguaisei, engdi a lsekum a Diabelong a mera el oureor el ourabek e me mesubed er a Dios a tekoi, e ngera uchul me ngmle kirel mesaod er ngii er a Dios el kmo ngdirk mlei el “omoid er a beluulchad”? Ngbleketakl el kmo ngii a kmal diak el mesiungel a Dios, e a cheldecheduch a bai melekoi el kmo a Job a ulemekedong er a Diabelong er a ngakl el Satan el belkul a kmo “Ngike el Omtok,” el olechotel a kmo ngii a mera el cherrouel a Dios. (Job 1:6) Me a leuaisei, e tia el uldasu el kmo a Diabelong a oureor el mesiungel a Dios ngmla er ker el mei?

Ngar er a kot el dart el rak e aike el apocryphal el babier, el ua “Book of Jubilees” me a “Common Rule” er a cheldebechel el okedongall el Qumran Sect, a mesaod er a Diabelong el ua lolasem el mengeluch er a Dios e dirrek el kongei el meruul a soal a Dios. Ngar er a babilengel a chad el milluches a reksi el J. B. Russell el Mephistopheles, e ngmilsaod el kmo ngike el milekdebechii a klechelid er a Protestant el Martin Luther a millekoi el kmo, a Diabelong a ua dongu er a Dios “el ua kekerei el osib me a lechub e ng hoe el lousbech er ngii el mengerad er a chetemel a sersel el meruul er  ngii el mo ungil,” me a Russel a dilechelii el kmo tia el uldasu el “hoe el lousbech er ngii el mengerad er a chetemel a sersel el meruul er ngii el mo ungil,” a ngerchelel a Dios el okiu a klisichel e ngmo otaut a soal. Me a uriul e ngika el chad er a Furans el John Calvin, a mlo kongei er tia el osisecheklel a Luther el mlo uchul e ngmillibas er a rebetok el uluumerang el kirel a otutel a tekoi er a llemalt. Ngmekerang a betik a rengul el Dios e kongei a mekngit, e dirrek el mechei a mekngit me ngmelemolem el ngar er ngii? (Jakobus 1:13) Tia el osisechakl me aike el lmuut el betok el kdekudel el klaumerang el mla meteketek er a chelsel tia el 19 el dart el rak, a merrob er a rebetok el chad me ngmo diak loumerang el kmo ngngar er ngii a Dios me a dirrek el Diabelong.

◼ “Ngdiak a Diabelong e ngbai di okesiul a klengit e merekong” A lsekum e kede mo omdasu el kmo ngdiak a Diabelong el ngii a uchul a klengit e ngulterekokl el mo meringel er kid el mo medengei a belkul a bebil el bades. El ua losaod er ngii a Job 2:3-6, a Dios ngmilengedecheduch er techang el ngar er tia el bades? Ngdi milengedecheduch er sel okesiu el klengit el ngar er a uldesuel a Job, me a lechub e ngdi mle ngii el mengedecheduch er ngii? Me a lmuut el tang, ngsebechel a Dios el chemat aike el ungil el blekerdelel a Job er a ta er a taem e kuk mo omekcharm er ngii er a ta er a taem? Sel domtab aika el omeruul e a lsekum a Dios a mirruul a tekoi el uaisei e ngmo ua lak el ulterekokl a blekerdelel el Dios, el ngii a “diak a le chebirukel er ngii.” (Psalm 92:15) Engdi a Dios a kmal diak el uaisei a blekerdelel, ngdimlak el kengei el ‘omekringel’ er a Job. Me ngkmal bleketakl el kmo a Diabelong a diak di lokesiul a mekngit me a lechub e lemekngit el blekerdelel a Dios, e ngbai mera el mekngit el anghel el di mle ngii el rullii el mo cherrouel a Dios.

Ngtecha Ngike el Mera el Mengedereder er a Beluulechad?

Chelecha el taem e a rebetok el chad a melekoi el kmo a klaumerang el kmo ngngar er ngii a Diabelong a kmal tekoi er a irechar. Engdi ngdiak a bleketakl el omesodel el kmo ngdiak a Diabelong. A klemerang el tekoi a bai kmal bleketakl el kmo, sel uldasu el kmo ngdiak a Diabelong a mla mengeuid er a rebetok el mo otngeklii a Dios e dirrek el mla rulleterir el mo mengemikr er a llechul a Dios el kirel a tekoi er a kldung.

A chad er a omeluches er a chelsel a 18 el dart el rak el Charles Pierre Baudelaire a milluches el kmo, “Sel kot el klou el blulekngel a diabelong a kmal soal el meruul er kid el mo oumerang el kmo ngdiak a diabelong.” Me a diabelong sel lolasem el mengeuid a uldesuir a rechad, e ngua lomekerrau a rengrir me te mo omdasu el kmo nglocha dirrek el diak a Dios. Me a lsekum e ngdiak a Diabelong, e tiang ngdiak el rellii a Dios el mo uchul aika el mekngit el tekoi? Tia ngdiak el sel tekoi el kmal soal a diabelong a bo loumerang er ngii a rechad?

A Diabelong a kmal di ua mengeteklel a cheldebechel er a remekngit el chad, el soal el omart er a mekngit el blekerdelel me bo el sebechel el remuul aike el mekngit el tekoi el soal el meruul. Me ngngerang a moktek er ngii? A Biblia a onger el kmo: “A chelid er tial belulechad a mla chouid a rengrir tirikel diak loumerang, e meruul er tir me lak lesa llemesel a evangkelio ra klebkellel a Kristus, el ingii a teletelel a Dios.”​—2 Korinth 4:4.

Ngngar er ngii a klou a ultutelel el ker el dirk medechel. A Dios ngmo mekerang er ngika el bulak el anghel el ngii a mera el uchul a mekngit me a ringelel a klechad? Kede mo mesaod er tia el tekoi er a ongingil el suobel.

[Footnote]

[Blurb el ngar er a 5 el llel]

A Diabelong ngmesiungel a Dios me a lechub e ngngike el omtok er a Dios?

[Baks/Siasing el ngar er a 6 el llel]

 Ngsebechel a Cherrungel el Chad el Mo Diak el Cherrungel?

A cherrungel el blekeradel el Dios a milsterir a reblebelel a dirrek el ngar er ngii a telkelel. Me alta e a Adam a ulebeob el cherrungel, engdi ngdirk mle kirel el medengei el kmo ngngar er ngii a telkelel a tekoi el Ngike el Ulemeob a kiltmokl. El uaitiang, ngdimlak el sebechel el menga chutem, baras, me a lechub e ngkerrekar e le ngmo smecher. Me a lsekum e ngmengemikr er a llach el kirel a gravity e mo merdekekl er a kedidai el basio, e ngulterekokl el mo mad me a lechub e ngmo meringel el metemall.

Me nguaisei ngdiak a ngii di el cherrungel el chad me a lechub e ng anghel el sebechel el meruul a tekoi el engelakl er aike el telkael el Dios a mla oterekokl e diak el metemall. Me a mellomes a rengul el bleob sel bo lemekngit el ousbech er a techellel el melilt a tekoi, e ngmo beot er ngii el mo cheleuid e dirrek el mo ruebet er a klengit.​—Genesis 1:29; Matteus 4:4.