Uldasu el kirel a Omengull el Ongalek me a Omesubed el Di Kid el Tang

NGAR er a uchelel a rak er a 2009, e a bek el ongdibel er a Resioning er a Jehovah el meliuekl er a beluulechad a ngilodech a temel a miting er tir. A eru el miting el mla er ngii er a chelsel a ta el sandei a luleldak, me lebo er ngii a techall el kirel a omengull el ongalek me a lechub e ngomesubed el di kid el tang. Kau ke mla mo ungil el ousbech er tia el beches el tekoi el mileketmokl? Ke mla ngmai a klungiolem er ngii?

A rebebil a locha melebedebek el kmo ngera el suobel a bo lousbech er a temel a omengull el ongalek er tir. A Chelechad er a Ruungerachel a diak el soal el oterekeklii a di ta el rolel a omesuub el kirir a rebek el ongalek. Ngkakerous a blekerdelel a klengar er a rechad me ngkirel a derta el bdelul a delengchokl me a lechub e ngderta el chad el merriter el kmo ngmekerang e sebechir el mo ungil el ousbech er tia el taem.

A rebebil a mengetmokl el kirel a miting er a ongdibel, engdi ngdiak di el tiakid a sebeched el meruul er ngii er a temel a omengull el ongalek. E a rekuk bebil a menguiu e mesaod e ousibai a suobel er a Biblia, el ileakl el kirel a klungiolir a remekekerei el ngalek. Nglocha diak el lungil a deblechoel el ousbech a ker me a nger el rolel a omesuub, el ua doruul er ngii er a temel a miting er a ongdibel. A temel a omengull el ongalek a ungil el taem el sebeched el chadecheduch e kauchais er a delongeled aike el ngar er a rengud. Seikid el taem e ngsebeched el ousbech a kora beches el uldasu el ouchais a ungil el tekoi el bla dechuiu er a Biblia el mo uchul a deuil a rengud el rokui.

A chedam el tedei a rengelekel a meluches el kmo: “Aki blechoel ousbech a suobel el mengai er a omengiuel a Biblia el kirel sel sandei. A derta er kemam a di me a uchei e aki menguiu aike el bliongel, e a rengalek a melilt aike el sorir el mo merriter, e mo mesaod aike el bla lesuub. A Michael [el euid a rekil] a blechoel el ousunga me a lechub e ngluchesii a cheldechedechal. A David me a Kaitlyn [el 13 me a 15 a rekrir] a meluches a cheldecheduch er a Biblia el oba osengel a ta er a chad. El ua tiang, sera ki monguiu el kirel a Josef er a losaod er a berrusel a chad er a omeruul el blauang me a chad er a oitelel a bilong er a Farao, e a Kaitlyn a milluches er a cheldecheduch el loba osengel a chad el ngar er a kelebus el lomes er tia el tekoi el dubechang.”​—Genesis er a 40 el bliongel.

Nguaisei, ngkakerous a blekerdelel a klengar er a rechad. Me a tekoi el ungil el kirel a ta el chad me a lechub a ongalek a locha diak el ungil el kirel a kuk tang. A baks el ngar er a ongingil el llel a olecholt a bebil el tekoi el sebeched el meruul er a temel a omengull el ongalek er kid me a lechub e ngomesubed el di kid el tang. Kau me kulterekokl el sebechem el mdasu a lmuut el bebil er a tekoi el sebechemiu el remuul.

[Baks/Siasing el ngar er a 23 el llel]

 Mo er tirke el oungalek er a rengeasek:

• Bo mdak el longalek el klou a ngeriu el menguiu er a Biblia. A chedam er a blai a locha sebechel el menguiu er a cheldecheduch er a Biblia, e a chedil me a rengalek a mo melekoi a tekingir tirke el chad el ngar tia el cheldecheduch, el melasem el leko te tirke el chad.

• Mosaod aike el turrekong el sebechel el meketmokl er a chelsel a kedeb el taem me aike el kuk ousbech a kemanget el taem el meketmokl.

• A lebebil er a taem, e ngsebechiu el omes e mesaod er a ta er a video er kid el mesaod a suobel el mlengai a uchetemel er a Biblia.

• Mdak el mesuub er a suobel el ngar a chelsel A Ongkerongel el dai er ngii a kmo “Mo er a Remekekerei el Chad.”

Mo er a rubekel el diak a rengelekir:

• Mosaod aike el suobel el bla morriter el kirel a omengiuel a Biblia.

• Mdak el mesuub el kirel a Omesubel a Biblia er a Ongdibel me a lechub a Omesubel A Ongkerongel.

• Mosaod a kakerous el rolel e ngsebechiu el menglou er a omesiungiu.

Mo er a remesobil el rudam me a rudos me tirke el kldemed el becherir a ngodech a klechelid er tir:

• Mosuub aike el beches el babier el motobed er a temel aike el eru el sils el ongdibel er kid.

• Monguiu er a beches el Yearbook me aike el Yearbook er a ngar a mong.

• Morriter a suobel el kirel aike el ker el leblechoel el oker a rechad el ngar a beluad.

• Dongetmokl a cheldechedechad el bo dousbech sel bo doldingel a obliil.

Mo er a ruungalek el ngar er ngii a remekekerei el ngelekir:

• Mongetmokl a sibai el kirel a cheldecheduch er a Biblia.

• Mosuub er sel suobel el ngar a Watchtower el kmo “Teach Your Children.”