1 Ngmeringel a Bo Dodengelii a Dios​—Tia Ngklemerang?

A tekoi el bla mrenges: “A Dios a meruul a tekoi el ngar er a mengasireng el rolel.”

“Ngdiak el sebeched el mo medengelii a Chedam me a Ngalek me a Chedaol Reng.”​—Omesodel a Athanasian Creed el kirel a Trinidad el lolisechakl er ngii a betok el ikelesia er a Klsuul el Klekristiano.

Aike el lolisechakl a Biblia: A Jesus a dilu el kmo tirke el mo ‘medengelii a dital meral Dios’ a mo mukngeltengat. (Johanes 17:3) Engdi kede mekerang e mo medengelii a Dios a lsekum e ngmeringel el bo dodengelii? A Dios a diak lomart er ngii, ngbai soal a rokui el chad a bo lodengelii.​—Jeremia 31:34.

Me ngbleketakl el kmo ngdiak el sebeched el mo medengei a rokui el tekoi el kirel a Dios, e le kede medengei el kmo a uldesuel me a rolel a kuk ngarbab er a uldesued me a roled.​—Olisechakl 3:11; Isaia 55:8, 9.

Sel rolel a klemerang a lengesukau: A lsekum e ngkmal diak el sebeched el mo medengelii a Dios, e ngera uchul me kede melasem el mo medengelii? A mera er ngii, ngdiak di el soal a bo dodengelii e ngdirrek el soal a dokurulii a ungil el klausechelei er kid el obengkel. A Dios a milsaod er a blak a rengul el Abraham el kmo ‘ngsechelik,’ me a King el David er a Israel a milluches el kmo: “A [Jehovah] a ousechelei er tirkel meluu er ngii.”​—Isaia 41:8; Psalm 25:14.

A uldasu el kmo ngsebeched el mo sechelil a Dios, ngdi ua berrous el tekoi? Ngsebechel el mo uaisei, engdi ka molatk er a Rellir 17:27 el kmo: “[A Dios] a diak le cheroid ra di derta er kid.” El okiu a ngera el rolel? Ngar er a Biblia e a Dios a meskid aike el dousbech me bo el sebeched el mo ungil medengelii. *

A Dios a ouchais er kid er a ngklel el Jehovah. (Isaia 42:8) Ngmla lmuches aike el bla leruul el kirel a klechad, me bo el sebeched el mo medengei el kmo ngua techa el Dios. Me a lmuut el tang a Dios a olecholt er kid aike el tekoi el lomelechesiu. Ngii a ‘mui er a blekokuii ma klechubechub, el diak le mereched el ngmasech a rengul, e olecholt er a blechoel bltikerreng ma blakerreng.’ (Exodus 34:6) A omerelled a ngar er ngii a lerellii er a uldesuel. El uai tiang, a renged er a Israel er a irechar a rirellii el mo “mekngit a rengul” er sera bo lomtok er ngii, engdi tirke el olengesenges er ngii er chelechang a mo uchul a deuil a rengul.​—Psalm 78:40; Osisechakl 27:11.

[Footnote]

[Blurb el ngar er a 4 el llel]

Oleko Dios a Trinidad el meringel er kid el mo medengelii, e ngmekerang e sebeched el mo ungil el medengelii?

[Credit Line]

The Trinity c.1500, Flemish School, (16th century) / H. Shickman Gallery, New York, USA / The Bridgeman Art Library International