2 A Dios a Diak Lomekerreu​—Tia Ngklemerang?

A tekoi el bla mrenges: “A lsekum a Dios a mera el omekerreu er a klechad, e ngulterekokl el mla okngemed a klengit me a ringel er tia el beluulechad. Me alta ngmelatk er a klechad el rokir, engdi ngdiak lomekerreu er ngak.”

Aike el lolisechakl a Biblia: A Jehovah el Dios a diak el uchul a mekngit. (Jakobus 1:13) Me alta ngsebechel choroid a mekngit el tekoi er a ngii di el taem, engdi ngmechei me ngngar er ngii er chelechang me bo el sebechel el monger aike el meklou a ultutelel el ker el mleuuchel er a uchelel a reksi er a klechad. Ngulterekokl el mo meruul a tekoi el kirel a klechad e choroid a rokui el mondai el lurruul tirke el ultngeklii a omengederederel.​—Genesis 3:1-6; Isaia 65:17. *

A Dios a diak di lolatk er a klechad el rokir, ngdirrek el ochotii el kmo ngmelatk er a derta me a derta er kid. A Biblia a ochotii el kmo ngmedengei a rokui el tekoi el kired el mo lmuut er aike el diak dodengei. A Matteus 10:29-​31 a kmo: “A teblol sisebangiau ngkora moterau ra chimol sens? E lmuutkung ma lak le kenge Demmiu e ngdiak el rebet a chimo er ngii ra chutem. El mo lmuut ra chui ra bdelmiu me ngdi ulecherangel el rokui. Misei e lako medakd; e kom kuk ngaruchei ra betok el sisebangiau.”

Sel rolel a klemerang a lengesukau: Kid a blechoel el mengeroid er kid er a rechad el mekngit a blekerdelir e diak lomekerreu. Me ngdiak el mechas a rengud el kmo, sel blulak el kmo a Dios a diak lomekerreu a rulleterir a rebetok el mo diak el sorir el mo medengelii me a lechub e te di mo er ngii er sel taem el lodengei el kmo ngdikea cheldechulel. Me sel klemedengei el kmo a Jehovah el Dios a kmal lomekerreu, a sebechel rullau el mo soam el lmuut el mo medengei a betok el kirel ngii el Dios e mo omekeroul er a klausechelei er kau el obengkel.

El uai tiang, ke locha milluluuch el mo er a Dios, engdi ngdiak msal medengei el kmo ngulerrenges er kau me a lechub e ngmo onger er kau. A Biblia a mengelaod er kid el kmo Ngike el Orrenges a nglunguuch a kmal kltmokl el orrenges er a nglunguchir tirke el mo er ngii el mera el ngar er a rengrir.​—Psalm 65:2.

A Biblia a kmo “a Dios chomekerreu er kemiu, mo moterekokl er ngii a ikel rokuil tekoi el suebek a rengmiu er ngii.” (1 Petrus 5:7) Me ngulterekokl a rengud el kmo ngkmal dirk melatk er kid er a temel a ringel me a chelebuul, e le Tekingel a kmo: “A [Jehovah] a kmeed er tirkel chelam a rengrir; ng olsobel er tirkel di dikea omeltkir.”​—Psalm 34:18.

[Footnote]

[Blurb el ngar er a 5 el llel]

A lsekum a Dios a diak lomekerreu, e ngera me ngmengemedaol er kid el mo meluluuch el mo er ngii?