3 A Dios a Soal el Melaitechei​—Tia Ngklemerang?

A tekoi el bla mrenges: “A Dios a blechoel el melatk a bek el klengit e omals er a rechad er a diak a ulebengelel el tellemall er a beluu er a ngau.”

“A Dios a omals er tirke el meruul a klengit el ousbech a meklou el telemellel a beluu.”

Aike el lolisechakl a Biblia: A Ongeru el Petrus 3:9 a melekoi el kmo a Jehovah a “chetil a lriid a tang, e bai soal cho bora bult el rokui.” Me ngdiak di lomes aike el mekngit el doruul e ngbai omes aike el ungil el doruul. A osengel a Dios a “mekelekelii a beluulchad el rokir, me ng omesterir a klisichir tirkel blak a rengrir er ngii.”​—2 Kronika 16:9.

A beluu er a ngau a diak lolisechakl er ngii a Biblia, e le tia el uldasu el kirel a diak a ulebengelel el ringel a kmal kikiongel er a osengel a Dios. Sel kot el ngarbab el kerrekerilel el mo er a remekngit el chad a mo okngemedeterir me te mo mad. (Jeremia 7:31; Rom 6:7) Me a Dios a diak el uchul a meklou el telemellel a beluu, el ngii a uchul a tellemall el mo er a rebek el chad.​—Olisechakl 9:11.

Sel rolel a klemerang a lengesukau: Ngsebeched el olekeed er kid er a Dios sel bo dodengei el kmo ngkltmokl el mo “ousubes” e diak el mereched el oukerrekeriil. (Psalm 86:5) Ngdiak el kired el mesiou er a Dios e le ngmekngit a ukltked me a lechub e kede medakt el kmo ngmo omals er kid. E ngbai sebeched el meleketek er a klaumerang er kid el oeak a kot el ungil el tekoi, el ngii a bltkil a rengud el mo er a Jehovah. A chouaitia el bltikerreng a smisichid el mo er a tkurrebab el klisiched el oldeu er a rengul.​—Matteus 22:36-38; 1 Johanes 5:3.

Alta e a Dios a soal a rokui el chad a bo lobult e bo loruul a ungil, engdi ngungil el medengei el kmo te betok a diak bo leuaisei. Oleko ngdiak lomals er tirke el durengrir el meruul a mekngit, e ngmo diak a klekakerous er ngii me a merreder el ngii a meruul a llach engdi ngdiak loltaut, me ngmechei a chelebirukel me a ringel me ngdi melemolem. (Olisechakl 8:11) Me kid el medengei el kmo a Dios a diak bo lomechei a mekngit me lolemolem, a meskid a ungil el omelatk el kirel a ngar er a medad el klebesei. A Dios a mla tibir el mo olekngemed er tirke el di melemolem el meruul a mekngit, me bo el sebechir “tirkel medemedemek” el oldeu a rengrir er a diak a ulebengelel el klengar el ngar er tia el chutem el ngii a di mla moktek er ngii.​—Psalm 37:10, 11, 29. *

[Footnote]

[Blurb el ngar er a 6 el llel]

A Dios ngsoal a dongull er ngii e le kede medakt el mo obals?

[Credit Line]

Engravings by Doré