5 A Dios a Kongei a Rokui el Rolel a Omengull​—Tia Ngklemerang?

A tekoi el bla mrenges: “Ngkmal betok a rael el mo er a Dios el di osisiu el ua aike el betok el kakerous el rael el merael el mo er a di ta el basio. Me a chad a di ngii el osiik er a rolel el mo er a Dios.”

Aike el lolisechakl a Biblia: Ngkmal kired el mengull er a Dios el oba rengud el rokir el diak a cheleblad er a chelsel. A Jesus a uluuchais er a remengeteklel a klechelid er a taem er ngii er sel uchul me a Dios a uleltngakl er tir, ngdilu el kmo: “A Jesaia ulemlaoch a ikang el kiriu, kemiul cheblad, el tmaut er kemiu, el ua llechukl el kmo, ‘Ar chad er tial renged a mengull er ngak era di berdel a ngerir, e a rengrir a cheroid er ngak.’ ” (Markus 7:6) Engdi a di dosiou er a Dios el oba rengud el rokir e ngdiak el belkul a kmo ngulterekokl el mo kongei er a omengull er kid.

A Jesus a mileketeklii tia el tekoi er a lochotii a cheleuid el rolel a omengull el lullisiich er ngii a remengeteklel a klechelid me a rekldemir. Ngmilsaod er ngii el ousbech a tekingel a Dios el kmo: “Te mla ngma llach rar chad me ngosisecheklir, me tolisechakl, me te mengull el meluluuch er ngak el diak a blkul.” (Markus 7:7) Me a omengull er tir a mle “diak a blkul,” e le te ngilai a osisecheklir a rechad el mo er uchei er a tekingel a Dios.

Me alta ngkmal betok a uldasu el kmo ngbetok a rael el mo er a Dios, engdi a Biblia a olisechakl el kmo ngkmal di chimong a rael. A Matteus 7:13, 14 a kmo: “Bo msiseb er chobutek el siseball; e a siseball el mora tellemall a klou, ma rael er ngii a meteu, me te betok ar chad el soiseb er ngii. E a siseball el mora klengar chobutek, ma rael er ngii a kekerei, me te mekesai ar chad el metik er ngii.”

Sel rolel a klemerang a lengesukau: Ngmo ua ngerang a uldesuem, oleko ngmle blak a rengum el remurt er a chelsel a betok el buil el mengetmokl er kau el kirel a klaidesachel, e mo kot er a rurt, engdi ngdimlak el sebechem el nguu a nguked e le ke tilemellii a llach el dimlak modengelii. Ke ulterekokl el mo melatk el kmo ngdimlak a belkul a klou el klisichem el mchilitii el kirel tia el tekoi. Me a chouaitia el tekoi ngsebechel el duubech el mo er a omengull er kid el mo er a Dios?

A apostol el Paulus a milluches el ulemekesiu er a omengull er kid el ua chad el ngar er a klaidesachel el kmo: “Me ngikel ngara klaidesachel ra klekool ma lak longaidesachel loltirakl a telbiil e ngdiak le nguu a krone.” (2 Timoteus 2:5) Kede nguu a kengei er a Dios sel dongull er ngii “loltirakl a telbiil,” el belkul a kmo ngrolel a omengull el ngii a kongei er ngii. Me ngdi ua chad er a rurt el diak el sebechel el di remurt er sel soal e bo lenguu a nguked, me kid me ngdiak el sebeched el di melilt er a soad el rael el mo er a Dios.

A lsekum e ngsoad el oldeu er a rengul a Dios, e ngkirel a omengull er kid el mo klikiid e diak a blulak er a chelsel. A Jesus a dilu el kmo: “Ar meral meluluuch ra Chedam [a] meluluuch loba reng ma klemerang.” (Johanes 4:23) Kede mo medengelii a mera el rael el mo er a Dios el okiu a Tekingel el Biblia.​—Johanes 17:17. *

[Footnote]

[Blurb el ngar er a 8 el llel]

A rokui el klechelid ngolisechakl er a rechad el mo mengull er a Dios el oltirakl er a soal?