Olengeseu er a Resechal el Mo Olengeriakl er a Klemerang

“Chelechal mong e ke mo mengesokes rar chad.”​—LUKAS 5:10.

1, 2. (a) Ngmle ua ngerang a uldesuir a resechal el kirel a osisecheklel a Jesus? (b) Ngera kede mo mesaod er tia el suobel?

SERA lomerk a klumech er a beluu er a Galilea, e a Jesus me a redisaiplo er ngii a ngilasech er a bos el mo er a cheroid el mo olengull. Engdi a seked a mirrael el oltirakl er tir. Tirke el mlei er sel el sils a “bekord el 5,000 el sechal, el diak domechur er a redil ma re ngalek.” (Matteus 14:21) A kuk ta er a taem, e a seked a mlo er a Jesus el sorir el orrenges er ngii e dirrek el bo lomekungil er tir. E uldimukl er tirkang a mle “4000 el sechal, e diak domechur er a redil ma re ngalek.” (Matteus 15:38) Ngbleketakl el kmo, ngmle betok a resechal el mlei er a Jesus e ullecholt a klemeriarreng er a osisecheklel. Me nguaisei, a Jesus a mle medengei el kmo a lmuut el betok el chad a mo kongei a osisecheklel, e le uriul er a ongasireng el ngemedel a ngikel, e ngdilu er a disaiplo er ngii er a Simon el kmo: “Chelechal mong e ke mo mengesokes rar chad.” (Lukas 5:10) A redisaiplo er ngii a mle kirir el oltengel a ukedir el “mengesokes” er a rechad, el uldimukl er a rebetok el sechal.

² Chelecha el sils, e a resechal a dirrek el semeriar er a klumech er a Biblia el domerk er ngii me te kongei el mesuub. (Matteus 5:3) Engdi, a rebetok er tir a omai er a rengrir el mesuub me ngdiak el sebechir el olengeriakl er a klaumerang er tir. Me ngmekerang a dolengeseu er tir? Alta e a Jesus a dimlak a ileakl el rolel a longedecheduch er a resechal, engdi ngmilsaod aike el tekoi el lullatk a resechal er sel taem. Me a doukerebai er ngii, e kede mo merriter er a rolel a dolengeseu er a resechal el kirel a edei el tekoi el blechoel el lolatk er chelechang el kmo: (1) omengereker, (2) dakt er a rechad, me a (3) uldasu el kmo te metitur.

Omengereker

3, 4. (a) Ngerang a meklou a ultutelel el tekoi er a uldesuir a rebetok el sechal? (b) Ngera me a rebebil el sechal a nguu a tekoi er a omengereker el mo er uchei er a omesubel a Biblia?

³ A ta el chellimosk er a llach a dilu er a Jesus el kmo: “Sensei, ak di oltirakl er kau el mora ngiidi le ker el bor ngii.” Engdi a Jesus er a ledu er ngii el kmo a “Ngelekel a chad a diak a bo lotilii a bdelul er ngii,” e ngmlo omai er a rengul el oltirakl er a Jesus. Ngii el chad a mle suebek a rengul e le ngdimlak lodengei el kmo ngerang a bo longang e mo kiei er ker, me ngdiak a olechotel a kmo ngmlo oltirakl er a Kristus.​—Matteus 8:19, 20.

⁴ A resechal a blechoel el ngmai a kerruul el mo er a uchei er a omesubel a Biblia. Te omes er a ngarbab el skuul me a ungil el ureor el meklou a ultutelel el tekoi. Te dirrek el omdasu el kmo a dosuk a betok el udoud a kuk ngaruchei er a ngii di el klungiaol el sebechir el ngmai el oeak a omesubir er a Biblia me a kmes el deleuill er tir el obengkel a Dios. Ngsorir a osisecheklel a Biblia, engdi a “ulekerreu er tir er tial belulechad, ma chelebldil a ilteet” a merrob er tir me ngmo diak losuub el kirel a Dios e bo lolengesenges a tekingel. (Markus 4:18, 19) Me bo domtab er sel rolel a Jesus a lengesuterir a redisaiplo er ngii el mo ungil el melilt a meklou a ultutelel el tekoi.

5, 6. Ngera ngilsuterir a rua Andreas me a Petrus me a Jakobus me a Johanes el mo ungil melilt er a klou a ultutelel el lureor el bo loruul er ngii?

⁵ A Andreas me a obekul er a Simon Petrus a mle chad er a omenged. A Johanes me a obekul el Jakobus me a demerir er a Zebedeus a dirrek el mle chad er a omenged. A siobai er tir a kmal mle ungil me ngmlo kirir el ousbech er a rechad el olengeseu er tir. (Markus 1:16-​20) A Andreas me a Johanes er a lekot el remenges a chisel a Jesus er a Johanes el Techolb, e ngmlo ulterekokl a rengrir el kmo te mla metik er a Messias. A Andreas a uluuchais aika el tekoi el mo er a obekul er a Simon Petrus, me a Johanes me nglocha dirrek el mirruul el uaisei el mo er a obekul er a Jakobus. (Johanes 1:29, 35-​41) Ngar er a chelsel a sesei el buil, e tir el teuang a ulebengkel a Jesus er a lomerk a klumech er a Galilea me a Judea me a Samaria. E a uriul er isei, e tirka el teua el disaiplo  a liluut el mo chad er a omenged. Te mle semeriar er a tekingel a Dios, engdi a berkel a klumech a dimlak el kot el tekoi er a chelsel a rengrir.

⁶ A uriul er tiang, e a Jesus a dilu er a Petrus me a Andreas el mo okiuellel el “mo mengesokes rar chad.” Me te milekerang? “Te dimlemereched el chemoit a ukedir e oltirakl er ngii.” A Jakobus me a Johanes a dirrek el mirruul el uaisei. “Te dimlemereched el mecherei a bos ma demerir, e mo oltirakl er ngii.” (Matteus 4:18-​22) Ngera ngilsuterir tirka el sechal el mo soiseb er a mui el taem el omesiou? Te kmal mle kerekikl el lomdasu er tia el tekoi. Tirka el sechal a ullerrenges er a Jesus, e milsang el meruul a mengasireng el tekoi, e ulemtab a blakerreng er ngii el kirel a llemalt, e dirrek el milsang el kmo a rechad a kmal mle sorir a osisecheklel. Me tiang a mlo uchul e a klaumerang er tir er a Jehovah a mlo mesisiich, me tir a mlo mui el ulsirs er ngii!

7. Ngmekerang a dengesuterir a remesuub a Biblia el mo omekeroul a klaumerang er tir er a Jehovah, el sebechel el omesterir a rechedal aike el lousbech?

⁷ Ngmekerang a doukerebai er a Jesus el olengeseu er a remesuub a Biblia el obengked el mo omekeroul a klaumerang er tir er a Jehovah? (Osisechakl 3:5, 6) Ngsebeched el meruul er tiang el oeak a rolel a dolisechakl. Me sel dolisechakl, e kede melisiich er a telbilel a Dios el mo omeskid a betok el klengeltengat a lsekum e kede ngmai a tekoi er a Renged el mo kot er a klengar er kid. (Monguiu er a Malakai 3:10; Matteus 6:33.) Alta e ngsebeched el ousbech a kakerous el bades el mo olecholt a rolel a Jehovah a lolengeseu er a rechedal, engdi ngdiak el kired el obes er a klungel a ultutelel a ungil kerebai er kid. A douchais a tekoi el dilubech er a klengar er kid a mo ngosuterir tirke el dosuub el obengterir el mo ultuil er a Jehovah. Ngdirrek el sebeched el ouchais a tekoi el dilubech el mo er a rekldemed er a klaumerang el dulenguiu el kirel el ngar er aike el babilenged. *

8. (a) Ngera me ngklou a ultutelel el kirel a chad el mesuub el mo mesa el kmo “ng ua ngeral ungil a [Jehovah]”? (b) Ngmekerang a dengesuir a chad el mesuub el mo medengelii a ungilreng er a Jehovah?

⁸ A doleketek a mesisiich el klaumerang a ousbech a lmuut el betok er a di donguiu e dorrenges el kirel a klengeltengetel a Jehovah el mo er a rebebil. Ngike el mesuub a ungil a di lengii el omelechesiu er a ungilreng er a Jehovah er a chelsel a klengar er ngii. A milluches er a Psalm a milengitakl el kmo: “Di le kau el osiik el kmo ng ua ngeral ungil a [Jehovah]! Ngeltengat ngikel chad el metik er osebechakl el ngar ingii el [Jehovah]!” (Psalm 34:8) Ngmekerang a dengesuir a chad el mesuub a Biblia el mo medengelii a ungilreng er a Jehovah? E kuk mekerang omko ngike el mesuub a chelebangel a mondai el kirel a udoud e dirrek el melasem el mengoit a mekngit el blekeradel, el ua omeloko el dekool me a omelamech el buuch me a imis el omelim el rrom? (Osisechakl 23:20, 21; 2 Korinth 7:1; 1 Timoteus 6:10) A dolisechakl er a chad el mesuub el mo meluluuch el olengit a ngeso er a Dios, e a omomdasu, e ngmo medengelii a ungilreng er a Jehovah sel lengesuir el mengoit a mekngit el blekerdelel? Momtab er a tekoi el sebechel el duubech sel dolisiich er ngike el mesuub el nguu a omesubel er a Tekingel a Dios el mo kot, el oeak a losuub er a Biblia er a bek el sandei e longetmokl er ngii e lebo er a bek el miting er a ongdibel. Nguaisei, sel bo lomelechesiu er a klengeltengat er a Jehovah er aike el loruul, e ngmo melisiich er a klaumerang er ngii!

 Dakt er a Uldesuir a Rechad

9, 10. (a) Ngera me a Nikodemus me a Josef er a Arimathea a dimlak el sorir a Rechijudea a bo lodengei el kmo te oltirakl er a Jesus? (b) Ngera me a rebebil el sechal er chelechang a omai er a rengrir el mo oltirakl er a Kristus?

⁹ A orimel er a resechelirir a uchul me a rebebil el sechal a omai er a rengrir el mo oltirakl er a Kristus. A Nikodemus me a Josef er a Arimathea a dimlak el sorir a Rechijudea a bo lodengei el kmo te oltirakl er a Jesus, e le te mle medakt a tekingir me a omerellir a Rechijudea el mo er tir a bo lodengelii tia el tekoi. (Johanes 3:1, 2; 19:38) Ngmla er ngii a uchul me te mle medakt. A remengeteklel a klechelid a kmal uluuketui er a Jesus a uchul, me a ngii di el chad el mo oumerang er ngii a mlodik er a blil a ongdibel er tir.​—Johanes 9:22.

¹⁰ Ngar er a bebil el beluu er chelechang, e a lsekum a chad a kmal semeriar er a Dios, me a Biblia, me a tekoi er a klechelid, e a rechad er a urerel me a resechelil me a lechub a rechedal a locha mo melenguul er ngii. Ngar er a kuk bebil er a beluu, e ngkengaol el tekoi a lsoad el melodech a klechelid er kid. A orrimel el mla er a rebebil a sebechel el kmal mo meringel el mo er tirke el ngar er a klsoldau, me a reteloi er a balatiks, me a lechub e ngngar er ngii a ngerechelir er a belurir. El ua tiang, a chad el ngar er a Dois a dilu el kmo: “A klumech er a Biblia el momerk er ngii kemiu el Sioning a klemerang. Engdi omko ak mo Sioning er chelecha el sils, e a klukuk e a rebek el chad a mo medengelii ngii el tekoi. Ngera mo uldesuir a rechad er a urerek, me a retonari er ngak, me sel cheldebechel el kchad er ngii ngak me a telungalek er ngak? Ngkmal diak kkengei el mo chelebangel er a chouaitia el tekoi.”

11. Ngmilekerang a Jesus er a lengesuterir a redisaiplo er ngii el mo outekangel a dektir er a rechad?

¹¹ A rechapostol er a Jesus a ullecholt a blekeu engdi ngdirrek el mla er ngii a dektir er a rechad. (Markus 14:50, 66-​72) Me ngmilekerang a Jesus a lengesuterir el olengeriakl er a klemerang alta e te chilebangel a orimel er a resechelirir? A Jesus a kiltmeklterir a redisaiplo er ngii el mo sebechir el outekangel a ultok el mlo er tir er a uriul. Ngdilu el kmo: “Kom ngeltengat sel louketui er kemiu, ma loldik er kemiu e loltuub er kemiu, e lolemall a ngkliu el Ngelekel a chad a uchul!” (Lukas 6:22) A Jesus a ulemeklatk er a rulebengkel el kmo ngmo er ngii a otuub el mo er tir, e a ngii di el otuub a mo er ngii “el Ngelekel a chad a uchul!” Ngdirrek el dilu el kmo a Dios a mo ngosuterir a lsekum te mo ultuil er Ngii el kirel a ngeso me a omelisiich. (Lukas 12:4-​12) Me a lmuut el tang, a Jesus a uluuetkeu er a rebeches el chad el mo obengterir a redisaiplo er ngii e mo sechelirir.​—Markus 10:29, 30.

12. Ngoeak a ngera el rolel e ngsebeched el ngosuterir a remesuub a Biblia el mo mesisiich er a dektir er a rechad?

¹² Ngdirrek el kired el ngosuterir a remesuub a Biblia el mo diak el medakt er a rechad. A omelsemai a sebeched el outekangel er ngii a lsekum kede kltmokl el kirel. (Johanes 15:19) El ua tiang, ngsebeched el ngosuir a mesuub el mo kutmokl a beot e melemalt el nger el mlengai er a Biblia, el kirel a kerrir me a ultekengir a rechad er a urerel me a rekuk bebil. Kid el sechelil a dirrek el sebeched el ngosuir el mo medengelterir a rebebil el ngar er a ongdibel, el tirke el dodengelterir el kmo te dul semeriar er a osisiu el tekoi. E a ngaruchei er ngii, e ngkired el osisecheklii el mo blechoel el meluluuch el olecholt aike el ngar er a rengul. Tiang a sebechel el ngosuir el mo kmeed er a Jehovah e rullii ngii el Dios el mo Omertelel e Osebecheklel.​—Monguiu er a Psalm 94:21-​23; Jakobus 4:8.

 Uldasu el Kmo Te Metitur

13. Ngmekerang a uldasu el kmo te metitur a rulleterir a rebebil el sechal el mo omai er a rengrir el mesiou er a Dios?

¹³ A rebebil el sechal a omai er a rengrir er a omesiou el mo er a Dios, e le ngdiak el sebechir el lungil el menguiu e locholt a uldesuir me a lechub e te kuk di sekemerur. A rekuk bebil el sechal a diak el sorir el ouchais a uldesuir el ngar er a mederir a rechad. Sei a uchul me ngmeringel er tir el mesuub e onger er a temel a miting er a Rekristiano me a lechub e te olecholt er a klaumerang er tir el mo er a rebebil. A ta el odam a melekoi el kmo: “Sera kngeasek e kuldingel a obliil, e ak di mereched el mo er a tuangel er a blai el leko kmelngod er a chesimer, e mekekokak el merael el mo cheroid er a blai, el oureng el kmo ulekum ngdimlak a rongesak me a lechub e lesekak. . . . Sel kulatk a mo oldingel a obliil e ngrullak el mo smecher.”

14. Ngera me a redisaiplo er a Jesus a dimlak el sebechir el omekungil er a buik el mle blekall er a mekngit el anghel?

¹⁴ Molatk er a uldesuir a redisaiplo er a Jesus er sel taem el dimlak el sebechir el omekungil er a buik el mle blekall er a mekngit el anghel. A demal ngii el buik a mlo er a Jesus e dilu el kmo: “Bo mchebur a ngelekek el sechal, el kmal chuarm el bellek. E ngbetekngal le bo lubuu ra chelsel a ngau ma ralm. Ma kchilteklii el morar Ubengkem, e ngdimlak el sebechir el omekungil er ngii.” Me a Jesus a uldikii ngika el mekngit el anghel, me ngmlo ungil ngii el buik. A uriul e a redisaiplo a mlo er a Jesus e uleker er ngii el kmo: “Ngera me ngdimlak el sebecham lodikii?” Me a Jesus a ulenger el kmo: “A uchul e ngngesonges a kloumera er kemiu. Ak meral dmu er kemiu el kmo, a lsekum ngngarngii er kemiu choua di tal chiusel a meringel el kloumerang, e cho molekoi er tial rois el kmo, ‘Mengukl er tia el mor sei,’ e ngmengukl; me nguaisei el diak a tal tekoi el diak lak el sebechiu.” (Matteus 17:14-​20) A klaumerang el ngar er a Jehovah a dousbech er ngii me bo el sebeched el mo mesisiich er a meklou el chetituokel el tekoi. Ngera mo duubech a lsekum a chad a obes er tiang e di mo ultuil er a dechal el meruul a tekoi? A di lultuil er a dechal e lak lemeketmokl sel lullatk el mo meruul er ngii, e ngmo omdasu el kmo ngdiak el rredemelel a mesiou er a Jehovah.

15, 16. Ngmekerang a dengesuir a chad el mesuub a Biblia el mo diak el lomdasu el kmo ngmetitur?

¹⁵ A ta er a ungil el rolel a dengesuir a chad el lomdasu el kmo ngmetitur a sel dolisiich er ngii el mo melatk er a Jehovah er a bai di lolatk el kirel. A Petrus a milluches el kmo: “Moruul er kemiu el ngariou a rengmiu er cheungel a misisiich el chimal a Dios, ma le me blsechel e longididai er kemiu. . . . Mo moterekokl er ngii a ikel rokuil tekoi el suebek a rengmiu er ngii.” (1 Petrus 5:6, 7) Me ngkired el ngosuir a chad el mesuub a Biblia el mo betik a rengul er a Jehovah e mo kongei a ulekrael er ngii. Tia belkul a kmo ngkirel el mo betik a rengul er aike el tekoi el losuub el ngar er a Biblia, e mo olecholt “a rodech ra [oureor el klisichel a Dios]” er a chelsel a klengar er ngii. (Galatia 5:22, 23) Ngdirrek el kirel el mo omes er a nglunguuch el kmal klou a ultutelel el tekoi. (Filipi 4:6, 7) Me a lmuut el tang, ngmo ultuil er a Dios el kirel a blekeu me a omelisiich el lousbech sel bo el chelebangel a ngii di el blekeradel me bo lungil el kutmokl a ngerechelel.​—Monguiu er a 2 Timoteus 1:7, 8.

¹⁶ A rebebil el mesuub a Biblia a dirrek el ousbech a ngeso el mo olengeriakl er a omengiuir me a rolel a longedecheduch. A rekuk bebil a omdasu el kmo ngdiak el rredemelel a mo mesiou er a Dios, e le tir el mirruul a mekngit er a uchei er a bo lodengelii a Jehovah. Ngar er aika el eru el blekeradel, e sel dolecholt a bltikerreng me a kllourreng el mo er tir, e ngsebeched el ngosuterir er aike el lousbech. A Jesus a dilu el kmo: “Ar misisiich a diak lousbech ra toktang, e te bai smecher chousbech er ngii.”​—Matteus 9:12.

 Mngesuterir a Rebetok el Sechal el Mo Medengelii a Jehovah

17, 18. (a) Ngmekerang a domerk er tia el klumech el mo er a rebetok el sechal sel doldingel a obliil? (b) Ngera kede mo mesuub er ngii er sel ongingil el suobel?

¹⁷ Ngkmal soad a rebetok el sechal a bo lekengei er tia el ungil el klumech el di sebeched el metik er ngii er a Biblia. (2 Timoteus 3:16, 17) Me ngmekerang a domerk er tia el klumech el mo er a rebetok el sechal sel doldingel a obliil? Ngoeak sel dongoit a klou el taem el loldingel sel lekebesengei, me a ieta sils er a Sebadong me a Sandei, me a lechub e ngsel lulengull el sils er a beluu, el taem el betok el sechal a ngar er a blirir. A rudam a sebechir el olengit el mo mengedecheduch er ngike el bdelul a delengchokl a lungilbesul. Me bo el sebeched el rokui el ousioning el mo er a resechal el dedak el oureor e dengesuterir tirke el becherir a rudos el diak el ngar er a klemerang.

¹⁸ Me sel domerk a klumech el mo er a rebek el chad el debetik er tir, e ngsebechel el mo ulterekokl a rengud el kmo, tirke el osiik er a klemerang a mo kongei er tia el klumech. Me bo doba kllourreng e dengesuterir tirke el olecholt a klemeriarreng el kirel a klemerang. Nguaisei, engdi ngmekerang a dengesuterir a remla metecholb el sechal el ngar er a ongdibel el mo olengeriakl, e mo rredemelel a olab a ngerachel er a chelsel a cheldebechelel a Dios? A ongingil el suobel a mo onger er tia el ker.

[Footnote]

Ngmekerang a Omonger?

• Ngmekerang a dengesuterir a resechal el mo omes er a omesubel a Biblia el kmo ngklou a ultutelel?

• Ngmekerang a dengesuterir a rebeches el chad el mo outekangel a orimel er a resechelirir?

• Ngera sebechel el ngosuterir a rebebil el mo mesisiich er a uldasu el kmo te metitur?

[Aike el Ker er a Suobel]

[Siasing el ngar er a 25 el llel]

Kau ke osiik a techall el mo omerk er a ungil el chais el mo er a resechal?

[Siasing el ngar er a 26 el llel]

Ngmekerang a omngesuir a chad el mesuub a Biblia el mo sebechel el outekangel a ringel?