Olisechakl er a Rudam el Mo Kongei a Ngerachel
Olisechakl er a Rudam el Mo Kongei a Ngerachel
“Ngdi le mecherrungel chomesubel e ngmo ua sensei er ngii.”—LUKAS 6:40.
1. Ngar er a omesiungel er tia el chutem, e ngmilekerang a Jesus er a leketmeklii a uchetemel a kmal ungil el ongdibel?
NGAR er a ulebengelel a Evangkelio er a klengar er a Jesus, e a apostol el Johanes a milluches el kmo: “A ikel le riruul a Jesus el tekoi a dirke ngarngii a lmuut el betok el ngodech era ikang; el chomko kede ouderta el meluches, e a renguk a kmo a belulechad a diak el sebechel tokau a babier el bo de luches.” (Johanes 21:25) A bebil er aike el tekoi el lekiltmokl a Jesus er a chelsel a kedeb el taem er a omesiungel, a ulsiik e olisechakl e dirrek el melilt er a resechal el mo olab a ngerachel er a omesiou er a uriul er a lluut el mo er a eanged. Me sera lluut el mo er a eanged er a rak er a 33, e a Jesus a mla kutmeklii a uchetemel a ongdibel el di meleketek el mo betok el telael a rechedal.—Rellir 2:41, 42; 4:4; 6:7.
2, 3. (a) Ngera me te kmal usbechall a resechal el mla metecholb el mo olab a ngerachel er a ongdibel? (b) Ngera kede mo mesaod er tia el suobel?
2 Ngar er ngii a betok er a euid el miliol el chad el omerk er a klumech er a Renged, el ngar er a betok er a 100,000 el ongdibel er a beluulechad el rokir er chelechang. Sei a uchul, me te kmal usbechall a rudam el mo omekrael aika el ongdibel. El ua tiang, te kmal usbechall a remechuodel el Kristiano a uchul, me tirke el kongei er tia el techall er a omesiou a ‘sorir a ungil lurreor.’—1 Timoteus 3:1.
3 Me ngngar er ngii a tekoi el kirel a odam el meruul er a uchei er a bo el sebechel el olab a ngerachel er a ongdibel. A skulel a chad me a klemedengei er ngii me a dechal el kirel a klengar a diak el ketmeklii a chad el kirel a chouaitia el ureor. A rolel a klengar er a chad a kirel el oltirakl a ulekrael er a Biblia el kirir a rudam el tir a sorir el mo olab a ngerachel er a ongdibel. Ngmekerang a resechal e mongeseu me bo el sebechir el mo rredemelel tia el ureor? A Jesus a dilu el kmo: “Ngdi le mecherrungel chomesubel e ngmo ua sensei er ngii.” (Lukas 6:40) Ngar er tia el suobel, e kede mo mesaod a bebil el rolel e a Klou el Sensei, el Jesus Kristus, a ngilsuterir a redisaiplo er ngii el mo rredemelel a meklou el ngerachel, e dirrek el mo sebeched el ngmai a klubeled er a tekoi el lurruul.
“A Kuleker er Kemiu el Kmo Sechelik”
4. Ngmilekerang a Jesus er a lochotii el kmo a redisaiplo er ngii a mle sechelil?
4 A Jesus a dimlak el lomdasu el kmo ngkuk ngarbab er a redisaiplo er ngii. Ngchiloit a taem el lobengterir e uluumerang er tir, me ‘ngullecholt er tir a ike el rokui el lerirenges er a Demal.’ (Monguiu er a Johanes 15:15.) Molatk er a deuil a rengrir er sel taem el Jesus a ulenger er a kerrir el kmo: “Ngeral olangch a morngii kau sel mei, ma ullebongel ra taem ra belulechad?” (Matteus 24:3, 4) A Jesus a dirrek el mle soal a bo lodengei a tekoi el ngar er a rengul me a uldesuel. El uai tiang, sel kesus er a lemoterekokl, e a Jesus a chilteklii a Petrus me a Jakobus me a Johanes el mo er a sers er a Gethsemane, e mla er isei e ngmle blak a rengul el meluluuch. Me tirka el tedei el apostol a locha dimlak el rengesii a nglunguchel a Jesus, engdi ngmle sebechir el melechesuar el kmo ngmla er ngii a kmal loberaod el tekoi er a rengul. (Markus 14:33-38) Ka molatk er sel taem er a lemengodech a teletelel a Jesus er a mederir, el ulterekokl el kmal millisiich er tir. (Markus 9:2-8; 2 Petrus 1:16-18) Me a kmes el klausechelei er a Jesus me a redisaiplo er ngii a millisiich er tir el mo sebechir el melemolem er tia el klou a ultutelel el ureor el mloterekokl er tir.
5. Ngmekerang a remechuodel el Kristiano a lolengeseu er a rebebil?
5 A remechuodel el Kristiano er chelechang a uai a Jesus, el olengeseu er a rudam me a rudos er tir e sorir el mo sechelirir. Te omak a kmes el deleuill er tir me a rekldemir er a klaumerang el oeak sel lolecholt el kmo te semeriar er aike el tekoi el ngar er a rengrir. A lebebil er a taem e ngngar er ngii a blekeradel el diak el sebechir a remechuodel el mesaod el kirel, engdi ngsebechir el louchais aike el tekoi el bla el suub er a Biblia. A remechuodel a oumerang er a rudam er tir me ngdiak loumerreder er tir er a kekerei el chad el ngii a olengeseu er tir. Te ungil medengei el kmo ngika el kekerei el chad a mla olengeriakl er a klemerang e sebechel el melemolem el melai a klemedengei el kirel a Dios el ngar er a Biblia. E dirrek el medengei el kmo ngii el chad a betik a rengul er a Jehovah e obengterir el mesiou er a ongdibel.
“Ma Kmla Ochotii er Kemiu a Kerebai”
6, 7. Mosaod er a kerebai el lebilecherei a Jesus el kirir a redisaiplo er ngii, e milekerang e a kerebil a ngilsuterir.
6 A redisaiplo er a Jesus a mle betik a rengrir er a Tekingel a Dios, engdi a siukang er tir me a blekerdelel a klengar er tir a mla er ngii a lerellii er a uldesuir. (Matteus 19:9, 10; Lukas 9:46-48; Johanes 4:27) Me nguaisei, engdi a Jesus a dimlak lollach er tir me a lechub e loungeroel er tir. Ngdirrek el dimlak lomekberaod er tir er a meringel el tekoi me a lechub e lorrimel er tir el mo meruul er a tekoi el ngii a dimlak loruul er ngii. A Jesus a bai ullisechakl er tir el okiu a kerebai er ngii.—Monguiu er a Johanes 13:15.
7 Ngua ngera el kerebai a lebilecherei a Jesus el kirir a redisaiplo er ngii? (1 Petrus 2:21) Ngulemekbeot er a klengar er ngii me bo el sebechel el mesiou er a rebebil. (Lukas 9:58) A Jesus a mle ngariou a rengul e mle blechoel el ousbech a Bades sel lolisechakl. (Johanes 5:19; 17:14, 17) Ngmle bekokeuii e mle beot er a rechad el mo kmeed er ngii. Me a omerellel a ulecholt el kmo ngkmal mle betik a rengul er a rechad. (Matteus 19:13-15; Johanes 15:12) A kerebil a Jesus a ngilsuterir a redisaiplo er ngii. El ua tiang, a Jakobus a dimlak el medakt el mo chemau a kodall me ngmle blak a rengul el mesiou er a Dios el mo lmuut er a kodellel. (Rellir 12:1, 2) A Johanes a mle blak a rengul el oltirakl er a Jesus el kuk betok er a 60 el rak.—Chocholt 1:1, 2, 9.
8. Ngera el kerebai a lolecholt er ngii a remechuodel el kirir a remekekerei el chad me a rebebil?
8 A remechuodel er a ongdibel a ungil kerebai el kirir a remekekerei el chad, e le tir el ngariou a rengrir e olecholt a bltikerreng e ousbech a temir me a klisichir el olengeseu er a rebebil. (1 Petrus 5:2, 3) Te dirrek el ungil kerebai er a klaumerang er tir me a osisecheklir me a blekerdelel a klengar er tir me a omesiungir. Sei a uchul me a rebebil a sebechir el oukerebai er a klaumerang er tir.—Hebru 13:7.
‘A Jesus a Mlellach er Tir e Uldercheterir’
9. Kede mekera e medengei el kmo a Jesus a ulsisecheklterir a redisaiplo er ngii el kirel a ureor er a berkel a klumech?
9 Uriul er a lomerk er a klumech el bekord el eru el rak, e a Jesus a dirrek el uldercheterir tirke el 12 el apostol er ngii el mo omerk er a klumech. Engdi a kot e ngmilsterir a ulekrael el kirel a urerir. (Matteus 10:5-14) E sera lebochu lomekang er a rebetok el telael el chad el oeak a mengasireng el rolel, e a Jesus a milsaod el mo er a redisaiplo er ngii a rolel a bo lomii er tia el klou el seked e lorous a kelir. (Lukas 9:12-17) Me ngbleketakl el kmo a Jesus a ulisechakl er a redisaiplo er ngii el oeak a lomesterir a ulterekokl el ulekrael. A chouaisei el rolel a osisechakl, el obengkel a ulekrael er a oureor el klisichel a Dios, a ngilsuterir a rechapostol er a uriul el mo mengetmokl er a klou el ureor er a berkel a klumech, el ulemuchel er a rak er a 33.
10, 11. Ngmekerang a remechuodel me a rebebil a losisecheklterir a resechal el mo mesiou er a ongdibel?
10 Chelecha el taem, e kede omuchel el olisechakl er a chad sel dosuub a Biblia el obengkel. Ngsebeched el ngosuir el mo ungil menguiu e melemolem el olengeseu er ngii sel dosuub el obengkel. Me sel lomuchel el mo er a bek el miting er a Rekristiano, e ngmo sebechel el mo teloi er a Skuul el kirel a Urerel a Dios, e mesuub el mo ta er tirke el dirkak el metecholb el chad el oldingel a obliil, me a lmuut el bebil el tekoi. A uriul er a lemetecholb, e ngsebechel el mosisechakl el mo olengeseu el mengetmokl er a Kingdom Hall. A cherengel a taem, e ngsebechel el mongeseu er a rolel a lolengeriakl el mo rredemelel a mesiou el olengeseu er a remechuodel er a ongdibel.
11 A remechuodel sel lomsang a mla metecholb el sechal a ngerachel, e ngkirir el smaod a teletelel a lemeketmokl a tekoi er a chelsel a cheldebechel e msang aike el ulekrael el lousbech. A mla mosisechakl el odam a kirel medengei aike el tekoi el ngii a kirel meruul. Me a lsekum e ngdiak el sebechel el kutmeklii a ureor, e a remechuodel a diak di lemereched el lomdasu el kmo ngika el odam a diak el rredemelel tia el ureor. Te bai oba blekokeuii e mo ungil smaod aike el kirel meruul me a rolel a bo loruul er ngii. A remechuodel a dmeu a rengrir el olengeseu er a odam el mo kutmokl a ngerechelel, e le te medengei el kmo a losiou er a rebebil el ngar er a ongdibel e ngmo uchul a deuil a rengul.—Rellir 20:35.
A “Mellomes a Rengul Chad a Orrenges a Uldesuir a Re Bebil”
12. Ngera me ngkmal mle ungil a omellach er a Jesus?
12 A Jesus a ulisechakl er a redisaiplo er ngii el oeak a lomesterir a ulekrael el lousbech. El ua tiang, ngchileklii a Jakobus me a Johanes e le ngmle sorir el oltengel er a ngau er a eanged el sosebeterir a rebebil el chad er a Samaria, el dimlak el kengei el orrenges er a Jesus. (Lukas 9:52-55) A delal a Jakobus me a Johanes er a lebo er a Jesus e lolengit a meklou el deruchall er a Renged el kirir a rengelekel, e a Jesus a di mle beches el dmu er tirka el odam el kmo: “Ngdi mo dengchokl ra kidekmek ma katruk a diak le kirek el meskemiu, ngbai kirir tirikel le meltutk el kirir era Demak.” (Matteus 20:20-23) A ulekrael er a Jesus a mle blechoel el bleketakl, e sebeched el ousbech er a chelsel a klengar er kid, e dirrek el mlengai a uchetemel er a omellach er a Dios. A Jesus a mle soal a redisaiplo er ngii a losuub el mo omdasu e bo loruul a tekoi el oltirakl er a Tekingel a Dios. (Matteus 17:24-27) Ngdirrek el mle medengei el kmo a redisaiplo er ngii a diak el mecherrungel a uchul e ngngar er ngii a bebil el tekoi el diak el sebechir el remuul. Me ngulemesterir a omellach e le ngkmal mle betik a rengul er tir.—Johanes 13:1.
13, 14. (a) Ngtechang a ousbech a uleklatk? (b) Mocholt a bebil el kerebai el sebechir a remechuodel el ousbech el lomeltii a chad el diak lolengeriakl er a omesiungel.
13 A rebek el sechal el kongei el mo olab a ngerachel er a ongdibel er a Rekristiano a ousbech a uleklatk me a ulekrael er a Bades a lebebil er a taem. A Osisechakl 12:15 a kmo: “Ngdi mellomes a rengul chad a orrenges a uldesuir a re bebil.” A ta el ngeasek el odam a ulemdasu er a ngar er a mong el kmo ngdimlak el rredemelel a mo mesiou er a ongdibel. Me a ta er a remechuodel a ngilsuir el mo medengei el kmo alta e ngdiak el cherrungel, engdi ngsebechel el mo mesiou er a ongdibel.
14 A lsekum a remechuodel a mes a mekngit el blekerdelel a chad el sebechel el uchul e ngmo diak el olengeriakl er a omesiungel, e te mo oba delemedemek el lomeltii ngii el chad. (Galatia 6:1) A lebebil er a taem, e a uleklatk a usbechall el mo sumechokl a mekngit el blekerdelel a chad. A remechuodel sel lesa odam el kora beot a rengul er a omesiungel, e ngsebechir el ouchais er ngii el kirel a kerebil a Jesus, el mle blak a rengul el omerk er a klumech er a Renged, e dirrek el ulemekngerachel er a rulebengkel el mo meruul er a redisaiplo. (Matteus 28:19, 20; Lukas 8:1) Me a lsekum a ta er a odam a kora soal el mo ngarbab er a rebebil, e a remechuodel a sebechir el lochotii el kmo ngmilekerang a Jesus er a lengesuterir a redisaiplo er ngii el mo medengelii a telemellel a losiik a ngarbab el deruchall. (Lukas 22:24-27) E kuk mekerang a lsekum a odam a diak el soal el ousubes er a rebebil? A okesiu er a sibai, el mlusubes a klou el belsel er a uchei engdi ngdimlak lousubes er a kekerei el belsel a chad, a sebechel el ngosuir a odam el mo medengelii a klungel a ultutelel a dousubes a telemellel a chad el bedul kid. (Matteus 18:21-35) A chad sel bo lousbech a uleklatk, e a remechuodel a kmal lungil a lemereched el lousbech er a techall el mo ngosuir.—Monguiu er a Osisechakl 15:23.
“E Momeksau er Kau”
15. Ngmekerang a bechil me a rengelekel a odam a lengesuir el mo mesiou er a rebebil?
15 A remechuodel a olengeseu er a resechal el mo olengeriakl er a omesiungir, engdi a rebebil a dirrek el sebechir el olengeseu. El ua tiang, a bechil a chad me a rengelekel a sebechir e dirrek el kirir el ngosuir el mo olengeriakl er a omesiungel. Me a lsekum a odam a ta er a remechuodel, e a ngelsuil a bechil me a rengelekel a sebechel el mo ngosuir el meruul a urerel er a ongdibel. Te medengei el kmo ngkirel el ousbech a bebil er a temel me a klisichel el meruul a ngerechelel er a ongdibel. Me a omelenget er tirka el ongalek a uchul a deuil a rengul ngika el odam, e dirrek el uchul a omereng el saul er a rebebil.—Osisechakl 15:20; 31:10, 23.
16. (a) Ngtechang a kirel el olecholt el kmo ngsoal el mesiou er a rebebil? (b) Ngmekerang a chad e mo sebechel el olab a ngerachel er a ongdibel?
16 A rebebil a sebechir el olengeseu, engdi a chad a lsekum e ngsoal el mo olab a ngerachel er a ongdibel, e ngngerechelel el mo oltaut aike el kerioll el tekoi. (Monguiu er a Galatia 6:5.) Nguaisei, a odam a diak el kirel el mo ta er a olengeseu er a remechuodel me a lechub e ngta er a remechuodel, me bo el sebechel el ngosuterir a rebebil e bo leblak a rengul er a omesiungel. Engdi tirke el sechal el kongei el mo olab a ngerachel er a ongdibel a kirir el mo oltaut aike el kerioll el Bades er a klengar er tir. (1 Timoteus 3:1-13; Titus 1:5-9; 1 Petrus 5:1-3) A lsekum a chad a oureng el mo mesiou el olengeseu er a remechuodel me a lechub e ngta er a remechuodel e dirkak el metutk el mo olab a ngerachel, e ngkirel el mo omdasu el kirel aike el tekoi el bo loruul el mo rredemelel tia el ureor. Me ngii el chad a kirel el omeksau er ngii el blechoel el menguiu er a Biblia, e blak a rengul el mesuub el di ngii el tang, e mo dmolech el melebedebek a suobel, e meluluuch el ngar er a rengul, e dirrek el mo oba blakerreng er a omesiungel. Ngoeak aikaikid el rolel, e ngsebechel el oltaut a ulekrael er a Paulus el mo er a Timoteus el kmo: “E momeksau er kau er chomeluu ra Dios.”—1 Timoteus 4:7.
17, 18. Ngmo mekerang a odam a lsekum ngmo suebek a rengul, e omdasu el kmo ngmetitur, e diak el soal el mesiou?
17 Engdi ngkuk mekerang a lsekum a chad a diak el soal el mo olab a ngerachel er a ongdibel e le ngomdasu el kmo ngmetitur? A leuaisei, e ngungil a bo lolatk aike el betok el tekoi el bla leketmokl a Jehovah el Dios me a Jesus Kristus el kired el rokui. Nguaisei, a Jehovah a “bek el sils el le chellungel a chelngeled.” (Psalm 68:19) Me a Demad el ngar er a eanged a sebechel el ngosuir a odam el mo kongei a ngerachel er a chelsel a ongdibel. Me a odam el dirkak el bo losiou el ta er a olengeseu er a remechuodel me a lechub e ngta er a remechuodel, a ungil a bo lolatk el kmo ngkmal klou a usbechir a rudam el mo kongei a techall er a omesiou el ngar er a cheldebechelel a Dios. Me a bo lomtab aika el tekoi, e ngsebechel el ngosuir el mo diak lomdasu el kmo ngmetitur. Ngsebechel el meluluuch el kirel a oureor el klisichel a Dios me lengesuir el mo oba budech e lulserechakl a rengul, el blekeradel el dousbech el mo mesisiich er a sebekreng me a uldasu el kmo kede metitur. (Lukas 11:13; Galatia 5:22, 23) Ngdirrek el sebechel el mo ulterekokl a rengul el kmo a Jehovah a omekngeltengat er tirke el sechal el sorir el mo mesiou er a rebebil.
18 E kuk mekerang a lsekum a odam a diak a urungulel el soal el mesiou er a ongdibel? Ngerang a sebechel el ngosuir? A apostol el Paulus a milluches el kmo: “Le Dios choureor ra chelsiu lolekiis a urrunguliu e oltaut, le tiakid a ungilbesul ra Dios.” (Filipi 2:13) Me ngdi ta el Dios a sebechel el smisichii a rengul a chad el mo er ngii a urungulel el mo mesiou er a rebebil e dirrek el mo meruul a soal a Dios. (2 Korinth 4:7) Me a Kristiano a dirrek el sebechel el meluluuch el mo er a Dios me lengesuir el meruul a melemalt el tekoi.—Psalm 25:4, 5.
19. A Mika 5:5 ngoterekeklii a ngera el tekoi el kired?
19 A Jehovah a omekngeltengat a urerir a remechuodel el olsisechakl er a rebebil. Me tirke el kongei el mo olab a ngerachel er a ongdibel a dirrek el mo ngmai a klengeltengat er a Jehovah. Me a Bades a oterekeklii el kmo a Dios a mo tutketerir a ungil a ildisir el sechal er a delongelir a rechedal el mo olab a ngerachel er a cheldebechelel. (Mika 5:5) Chelecha el taem, e te kmal betok el ngariou a rengrir el odam a mla mosisechakl e dirrek el mla kongei el mo olab a ngerachel er a ongdibel. Tiang a uchul a odanges el mo er a Jehovah me a betok el klengeltengat el kired.
Ngmekerang a Omonger?
• Ngmilekerang a Jesus er a lengesuterir a redisaiplo er ngii el mo rredemelel a olab a meklou el ngerachel?
• Te mekerang a remechuodel a loukerebai er a Jesus sel lolengeseu er a resechal el mo olab a ngerachel er a ongdibel?
• Ngmekerang a bechil me a rengelekel a odam a lengesuir el mo mesiou er a rebebil?
• Ngmekerang a chad e mo sebechel el olab a ngerachel er a ongdibel?
[Aike el Ker er a Suobel]
[Siasing el ngar er a 31 el llel]
Ngera el rolel a osisechakl a omousbech el ngosuir a chad el mesuub a Biblia me bo lolengeriakl er a omesubel?
[Siasing el ngar er a 32 el llel]
Ngmekerang a resechal a lolecholt el kmo ngsorir el mo olab a ngerachel?
