Ngera Me Ngkired el Mukrael er a Oureor el Klisichel a Dios?

“Kau a Dios er ngak. A klungiolel a rengum lorrael er ngak er a meral rael!”​—PSALM 143:10.

1. Mochotii a rolel e a diak el meues el klisiich a sebechel el omekrael er a rechad.

NGMLA ta el mousbech a kombas el omekrael er kau? A kombas a klalo el ngar er ngii a ongesimel el olecholt aike el eua el uchul a eolt. Ngar er ngii a diak el meues el klisiich el meliuekl er a beluulechad el kora sisiak el rullii tia el resmel me ngdi melutk er a diluches. Ngar er aika el mereko el betok el rak, e a rechad el mlo er aike el cheroid el beluu a uluusbech a kombas el omekrael er tir er a omerollir er a beluu me a daob.

2, 3. (a) Ngera el mesisiich el klisiich a luluusbech er ngii a Jehovah er a betok el rak er a ngar er a mong? (b) Kede mekerang e medengei el kmo a oureor el klisichel a Dios a sebechel el omekrael er a klengar er kid er chelechang?

² Ngdirrek el ngar er ngii a ta er a diak el meues el klisiich el lmuut el klou a ultutelel el sebechel el omekrael er kid. Tiang ngerang? Ngsel klisiich el losaod er ngii aike el bades er a uchelel a Biblia. A babier er a Genesis a melekoi el kirel aike el lurruul a Jehovah er a betok el rak er a ngar er a mong el kmo: “Ser a lomuchel a Dios el omeob er a beluulchad ma bek el tekoi el ngar a melidiul.” Me sera loruul el uaisei, e nguluusbech er a mesisiich el klisiich, el ua donguiu el kirel el kmo: “Ma [oureor el klisichel] a Dios a mlar bebul.” (Genesis 1:1, 2) Me ngngera el klisiich a luluusbech er ngii a Dios? Ngchedaol el klisiich, el ngii a sel oureor el klisichel a Dios. Kede oba klou el omereng el saul e le Jehovah a uluusbech er sel chedaol el klisichel el ulemeob a rokui el tekoi e meskid a klengar er kid.​—Job 33:4; Psalm 104:30.

³ Kede uaisei el medengei el kmo a Jehovah a uluusbech er a oureor el klisichel el omeob er kid, engdi tia el klisiich ngsebechel el omekrael er kid er a kuk bebil el rolel? Nguaisei, e le Ngelekel a Dios el Jesus a dilu er a redisaiplo er ngii el kmo: “Sel le me [chedaol el klisichel a Dios] . . . e ngmo chotikikemiu el mora rokuil klemerang.” (Johanes 16:13) Me ngngera tia el oureor el klisichel a Dios, e ngera uchul me ngsoad a bo lomekrael er kid?

Ngera Tia el Chedaol el Klisichel a Dios?

4, 5. (a) Ngera sel cheleuid el uldesuir tirke el oumerang er a Trinidad el kirel a chedaol el klisiich? (b) Ngera tia el chedaol el klisichel a Dios?

⁴ A rebebil er a rechad el mongedecheduch er tir sel moldingel a oumerang er sel tekoi el ngar er a Chedaol Biblia el kmo “Chedaol Reng.” Tirke el oumerang er a Trinidad a omdasu el kmo a Chedaol Reng a chad el reng el osisiu a klisichel el ua Dios el Chedam.​—1 Korinth 8:6.

⁵ Me ngngera tia el tekoi el mloiuid el kmo “Chedaol Reng”? A footnote er a Genesis 1:2 er a Chedaol Biblia a mesaod er a tekoi el “Reng” el kmo: “Ng reng er a Dios ma lechub e ng klisichel a Dios ma lechub e ng mesisiich el eolt.” Me a tekoi er a Hebru el ru’ach el lousbech er ngii er tiang a dirrek el mloiuid el kmo “eolt” me ngmesaod er a diak el meues el klisiich. (Momes er a Genesis 8:1.) Me ngdi ua eolt el diak el meues engdi ngngar er ngii a klisichel, me nguaisei sel oureor el klisichel a Dios a diak el meues el klisiich engdi ngsebeched el mes a olechotel a urerel. Tiaikid el klisiich a mla er a Dios el mei el mo omekrael er a rechad me a lechub e ngtekoi el mo otutii a soal a Dios. Me a omomdasu, ngmeringel er kid el oumerang el kmo a chouaitia el klisiich a mla er Ngike el Chedaol e Mesisiich el Dios el mei? Ngkmal diak!​—Monguiu er a Rom 1:20.

6. Ngera el tekoi a lullengit er ngii a David er a Jehovah?

⁶ Ngsebechel a Jehovah el melemolem el ousbech er tia el klisichel el omekrael er kid? Ngtilbir el mo er a David el kmo: “Ak mo osisecheklau er a rael el kirem el merael er ngii.” (Psalm 32:8)  A David, ngmle soal tia el tekoi? Chochoi, e le ngmilluluuch el mo er a Jehovah el kmo: “Mosisecheklak el mo meruul a soam, kau a Dios er ngak. A klungiolel a rengum lorrael er ngak er a meral rael!” (Psalm 143:10) Kid me ngdirrek el soad a lomekrael er kid tia el chedaol el klisichel a Dios. E ngera uchul? Kede mo mesaod a eua el uchul.

Ngdiak el Sebeched el Di Kid el Omekrael er Kid

7, 8. (a) Ngera me ngdiak el sebeched el di kid el omekrael er a klengar er kid, el ileakl er a Dios? (b) Ngera el okesiu a ngosukid el mo medengelii a uchul me kede ousbech er a ulekrael er a Dios er a chelsel tia el mekngit el beluulechad?

⁷ A kot, e ngsoad a bo lomekrael er kid a chedaol el klisichel a Dios e le ngdiak el sebeched el di kid el omekrael er kid. A domekrael er a chad a belkul a kmo kede olecholt er ngii sel melemalt el rael el kirel el merael er ngii. A Jehovah a dimlak lomeob er kid el ngar er ngii a duch er kid el di kid el omekrael er kid. Kid a diak demecherrungel me kede mo meruul a betok el cheleuid el tekoi sel dolasem el di kid el omekrael er kid. A profet el Jeremia a milluches el kmo: “[Jehovah], ak medengei el kmo ng diak a chad el medengelii a le bor ngii er a ngar medal, e diak a chad el sebechel el chodereder a blekeklel.” (Jeremia 10:23) E ngera uchul me ngdiak el sebeched? A Dios a milskid a uchul el okiu a Jeremia el kmo: “Ng techa sebechel el mo medengelii a rengul a chad? Ng diak a cheblad el ua ingii; ng kmal smecher me ng diak le mukar.”​—Jeremia 17:9; Matteus 15:19.

⁸ Ka di molatk er a chad el mo melisebekl er a kdekudel el basio el diak lodengelii, el ua chereomel me a lechub e ngked, el diak loba kombas me a lechub e lobengkel a chad el medengelii tia el rael. A lsekum a chad a diak lodengelii a rolel a di lengii el sobecheklii er a chelsel choua iseikid el basio, e diak lodengelii sel rael el kirel el merael er ngii, e a klengar er ngii a sebechel el mo ocherur a kodall. Me nguaisei, a chad el lomdasu el kmo ngsebechel el di ngii el omekrael er a klengar er ngii er a chelsel tia el mekngit el beluulechad, el diak lousbech er a ulekrael er a Dios a ulterekokl el mo chemau a kmal kdekudel el blekeradel. Me a di ta el rolel e ngmo sebeched el omekerreu er kid er a chelsel tia el mekngit el blekeradel a oeak sel doluluuch el uai a David er a lolengit er a Jehovah el kmo: “Mocholt a rolem er ngak e [Jehovah]; mosisecheklak el merael er ngii.” (Psalm 25:4; 23:3) Me ngmekerang e mo sebeched el nguu tia el ulekrael?

9. Ngmekerang a chedaol el klisichel a Dios a lomekrael er kid el ua lemocholt er sel siasing er a 18 el llel?

⁹ A lsekum e ngngariou a rengud e kongei el mo ultuil er a Jehovah, e ngmo meskid sel chedaol el klisichel el omekrael a roled. Ngmekera tia el oureor el klisichel a Dios a lolengeseu er kid? A Jesus a milsaod el mo er a redisaiplo er ngii el kmo: “E Chongeseu, el [chedaol el klisichel a Dios], el modurch ra Chedam loba ngklek a mo olisechakl er kemiu ra rokuil tekoi, e omeklatk er kemiu ra ikel bek el tekoi el kdilu er kemiu.” (Johanes 14:26) Me sel deblechoel el mesuub a Tekingel a Dios, el uldimukl er aike el lullekoi a Jesus, e doluluuch el kirel aike el tekoi el dosuub, e a chedaol el klisiich a mo toketekii a klemedengei er kid el kirel a dmolech el llomeserreng er a  Jehovah, me bo el sebeched el mo oltirakl er sel soal a rengul. (1 Korinth 2:10) Ngdirrek el sel leduubech a chetituokel el tekoi er a klengar er kid, e a chedaol el klisichel a Dios a ngosukid el mo medengelii a tekoi el kired el meruul er ngii. Ngngosukid el mo melatk aike el omellach er a Biblia el bla desuub e ngosukid el mo ungil el melilt a tekoi el bo doruul.

A Jesus a Mlukrael er a Chedaol el Klisichel a Dios

10, 11. Ngerang mle medengei a Jesus el kirel a rolel a chedaol el klisiich a bo lengesuir, e milekerang e tilaut tia el tekoi?

¹⁰ A ongerung, e ngsoad a chedaol el klisiich a lomekrael er kid e le a Dios a uluusbech er ngii el omekrael er a Ngelekel. Me a uchei er a lemei er tia el chutem, e a di ta el Ngelekel a Dios a mle medengelii sel ulaoch el kmo: “A klisichel a [Jehovah] a mo msa llomeserreng, ma klemedengei, ma duch el mo mengedereder er a re chedal. Ng mo medengelii a soal a [Jehovah] e mo meluu er ngii.” (Isaia 11:2) A Jesus a mle medengei el kmo ngmo meringel a klengar er ngii el ngar tia el chutem. Me ka di molatk er a Jesus el kmal mle semeriar el mo nguu a ngelsuil a chedaol el klisichel a Dios!

¹¹ A tekingel a Jehovah a tilaut. A Evangkelio a mesaod a tekoi el dilubech er uriul er a lemetecholb a Jesus el kmo: “E a Jesus a mlo mui ra [chedaol el klisiich], e mlar chomoachel ra Jordan el moremei, e mle chelsel chokoual sils el le ngara ked el cheltakl ra [klisichel a Dios].” (Lukas 4:1) A Jesus er a lengar er a ked el olsengerenger e loluluuch e lolebedebek, e a Jehovah a locha ulsisecheklii e ullecholt aike el tekoi el mo duubech el mo er ngii. A oureor el klisichel a Dios a ulemekrael er a uldesuel me a rengul a Jesus, el ngosuir el mo ungil el melebedebek e melilt a tekoi el bo loruul. Sei a uchul me a Jesus a mle medengei aike el bo loruul er a chelsel a ngii di el blekeradel, e uleltaut aike el mle soal a Demal a bo loruul.

12. Ngera me ngklou a ultutelel el dolengit er a chedaol el klisichel a Dios me lomekrael er kid?

¹² A Jesus a mle medengelii a klungel a ultutelel a ulekrael er a chedaol el klisiich er a klengar er ngii, me ngmle blechoel el melisiich er a redisaiplo er ngii me lolengit el kirel e lekengei me lomekrael er a klengar er tir. (Monguiu er a Lukas 11:9-​13.) Ngera me tia dirrek el klou a ultutelel el kired? E le ngsebechel el ngmodech a uldesued el mo oltirakl er a uldesuel a Kristus. (Rom 12:2; 1 Korinth 2:16) Me sel debecherei a chedaol el klisichel a Dios me lomekrael er a klengar er kid, e ngsebeched el mo omdasu el ua Kristus e mo oukerebai er ngii.​—1 Petrus 2:21.

A Eltel a Beluulechad a Sebechel el Choitikikid el Mo er a Cheleuid el Rael

13. Ngerang a eltel a beluulechad, e tiang rulleterir a rechad el mo mekerang?

¹³ A ongedei, e ngsoad a chedaol el klisiich a lomekrael er kid, e le a lak leuaisei, e a eltel a beluulechad a mo choitikikid el mo er a cheleuid el rael. A ruumesingd el chad er chelechang a mukrael er a eltel tia el beluulechad. Tiang a diak el meues el klisiich, el ngii a melisiich a rolel a klengar el omtok er sel lolisiich er ngii a chedaol el klisichel a Dios. A eltel tia el beluulechad a diak lerelleterir a rechad el mo omdasu el ua Kristus, e ngbai remuul a uldesuir me a omerellir el mo  oltirakl er a merredel er tia el beluulechad, el ngii a Satan. (Monguiu er a 1 Johanes 2:16; Titus 3:3.) Me a lsekum a chad a mo oltirakl er a eltel a beluulechad e mo meruul a “urerel a tech,” e ngdi mo uchul a telemellel, me ngmo “diak el sebechel mediukes ra rengedel a Dios.”​—Galatia 5:19-​21.

14, 15. Ngmekerang e sebeched el omtok er a eltel tia el beluulechad?

¹⁴ A Jehovah a mla meskid aike el dousbech el mo omtok er a eltel a beluulechad. A apostol el Paulus a dilu el kmo “mngara Rubak e bo misisiich loeak sel klisiich ra ngarbab el klisichel . . . me cho mosiueklii a mekngit el sils, e lsebechiu el dechor el mtekengii.” (Efesus 6:10, 13) Me ngoeak a chedaol el klisichel, e a Jehovah a smisichid el mo sebeched el omtok a omengetikaik er a Satan. (Chocholt 12:9) A eltel a beluulechad a mesisiich me ngdiak el sebeched el olechib er kid er ngii. Me nguaisei, engdi ngsebeched el mo omtok er ngii. A chedaol el klisichel a Jehovah a kuk mesisiich me ngmo ngosukid!

¹⁵ A apostol el Petrus a milsaod el kirir tirke el mlo cheroid er a klemerang er a kot el dart el rak el kmo: “Te mla imiit ra melemalt el rael me te mocha ra cheleuid.” (2 Petrus 2:15) Kede oba omereng el saul e le kede mla nguu “a diak le [eltel a] belulechad, e ng[chedaol el klisiich] el mlara Dios el mei.” (1 Korinth 2:12) Me a debecherei a chedaol el klisiich me lomekrael er kid, e dousbech aike el rokui el tekoi el bla lebeskid a Jehovah el melisiich er a deleuill er kid el obengkel, e ngmo sebeched el blechoel el omtok er a eltel tia el mekngit el beluulechad.​—Galatia 5:16.

A Chedaol el Klisiich a Omekdubech a Ungil el Rodech

16. Ngera el blekeradel a sebechel a chedaol el klisiich el mekdubech er a chelsel a rengud?

¹⁶ A ongeuang, e ngsoad a chedaol el klisichel a Dios a lomekrael er kid e le ngomekdubech a ungil el rodech er a chelsel a klengar er tirke el mukrael er ngii. (Monguiu er a Galatia 5: 22, 23.) Ngtecha er kid a diak el soal el mo ungil el olecholt a bltikerreng e mo dmeu a rengul e mo chad er a budech? Ngtecha er kid a diak el soal el mo oba kllourreng me a blekokeuii me a ungilreng? Kid el rokui, ngdiak dousbech a mesisiich el klaumerang me a delemedemek me a omengerem? A chedaol el klisichel a Dios a mekdubech a ungil el blekeradel el mo uchul a klungioled me a klungiolir a rechad er a blid me a rekldemed er a klaumerang. Me ngkired el melemolem el oureor el olecholt er tia el rodech e le ngkmal usbechall me ngsebeched el di blechoel el omekeroul er ngii.

17. Ngmekerang a demeringel el oureor el olecholt er a rodech er a chedaol el klisichel a Dios?

¹⁷ Ngungil a dolatk el kirel tia el ker: A tekinged me a omerelled ngolecholt el kmo kede mukrael er a chedaol el klisiich e olecholt a blekeradel el lomekdubech? (2 Korinth 13:5; Galatia 5:25) A lsekum e kede mesa el kmo ngkired el omekeroul a bebil er a telengtengil a redechel a chedaol el klisichel a Dios, e ngungil a dekengei er a ulekrael er a chedaol el klisiich el mo omekdubech aike el blekeradel. Kede meruul er tiang el oeak a omesubel aike el telengtengil tia el rodech, el ousbech er a Biblia me aike el babilenged a Rekristiano. Ngkired el melatk er a rolel e ngsebeched el olecholt er a rodech er a chedaol el klisiich er a klengar er kid er a bek el sils e mo melasem el oltaut er ngii. * Me sel domes a rolel a chedaol el klisiich a lomekdubech a ungil el blekeradel er a chelsel a klengar er kid me a rekldemed el Kristiano, e ngmeketeklii a klungel a ultutelel a bo demukrael er ngii.

Kau Ke Kongei er a Chedaol el Klisichel a Dios Me Lomekrael er Kau?

18. Ngmekerang a Jesus e ungil el kerebai er a rolel a dekengei el oltirakl er a ulekrael er a chedaol el klisichel a Dios?

¹⁸ A Jesus a mle “chad er omelib el blai” er sel taem er a lomeob er a eanged me a chutem a Dios. Me ngmle medengei a rokui el tekoi el kirel a diak el meues el klisiich el kora sisiak el meliuekl er a beluulechad, el rechad a ousbech er ngii el omekrael er tir er a omerollir er tia el chutem. (Osisechakl 8:30; Johanes 1:3) A Biblia a diak lolekoi el kmo a Jesus a uluusbech er tia el klisiich el kora sisiak el omekrael er a rolel er sera lengar tia el chutem. A Biblia a bai mesaod el kmo a chedaol el klisichel a Dios a mle mesisiich el klisiich er a chelsel a klengar er a Jesus er sera lechad el ngar tia el chutem. Ngkilengei er a ulekrael er ngii, me sera lolisiich er ngii el mo meruul er a tekoi, e ngmlo oltirakl er sel ulekrael. (Markus 1:12, 13; Lukas 4:14) Kau ke kongei er a chedaol el klisichel a Dios me lomekrael er kau el ua lurruul er ngii a Jesus?

19. Ngera kired el meruul er ngii me bo lomekrael er a klengar er kid a chedaol el klisichel a Dios?

¹⁹ A chedaol el klisichel a Dios a dirk omekrael er a uldesuir me a rengrir tirke el kongei el mo mukrael er ngii. Me ngmekerang a omkengei er ngii me lomekrael er kau er a melemalt el rael? Bo blechoel el meluluuch el mo er a Jehovah me lebeskau a chedaol el klisichel el ngosukau el mo kongei er a ulekrael er ngii. (Monguiu er a Efesus 3:14-​16.) Mochotii er a blekerdelel a klengar er kau el kmo ngsoam a lomekrael er kau a chedaol el klisichel a Dios el oeak a omosuub er a Biblia, el ngii a mlukrael er a Dios el oeak a chedaol el klisichel. (2 Timoteus 3:16, 17) Molengesenges a mellomes el uleklatk er a Biblia e mkengei er a ulekrael er a chedaol el klisichel a Dios. A omoruul el uaisei, e ke ochotii el kmo ke kmal oumerang er a Jehovah, el ngii a sebechel el omekrael er kau er sel kot el ungil el rolel er a chelsel tia el mekngit el blekeradel er a beluulechad.

[Footnote]

Ke Ulemtab Aike el Meklou a Ultutelel el Tekoi?

• Ngmekerang a chedaol el klisichel a Dios a lomekrael er a klengar er kid?

• Ngerang aike el eua el uchul e ngsoad a lomekrael er kid a chedaol el klisichel a Dios?

• Ngera kired el meruul me bo dengai a mui el klungioled er a ulekrael er a chedaol el klisichel a Dios?

[Aike el Ker er a Suobel]

[Siasing el ngar er a 17 el llel]

A chedaol el klisichel a Dios a mle mesisiich el klisiich er a klengar er a Jesus

[Siasing el ngar er a 18 el llel]

A chedaol el klisichel a Dios a oureor er a uldesuir me a rengrir a rechad el melisiich e omekrael er tir