Ngera Uchul Me Kede Kiei el Oltirakl a Omellach er a Biblia?

A OSENGEL a Biblia el kirel a durs ngtekoi er a irechar e dirrek el meringel er kid el oltirakl? Ngdiak. A llach el ngar er a Biblia a bai kmal sebechel el ngosukid el oibngid er a:

▪ Bekoiueiuul el rakt el mo er ngii el oeak a deleboes el omeruul

▪ Diak el telbiil el kldiull

▪ Telemellel a mla metemall el chebechiil

▪ Mekngit el ukltked

▪ Rur el mo er ngii e le rechad a mla ousbech er kid

Ngika el Ulemeob er kid, el Jehovah el Dios, * a soal a bo el deu a rengud e dolai a klungioled er a usbeched er aike el rokui el sengk el mla er ngii el mei er kid. Ngii el Dios a ‘olsisechakl er kid el mo ungilbesud.’ (Isaia 48:17) Me a chad el kiei el oltirakl a ulekrael er a Biblia el kirel a durs a mo:

▪ Nguu a kengei er a Dios

▪ Budech a uldesuel

▪ Mesisiich a deleuill er ngii me a rechad er a blil

▪ Ungil a chisel

▪ Oba ungil el uldasu el kirel

E kuk mekerang a lsekum kau a diak mkiei el oltirakl a omellach er a Biblia el kirel a tekoi er a kldung? Ngngar er ngii a techellem el mo ngodechii a rolel a klengar er kau? A Dios ngmo melemolem el oukerrekeriil er kau el kirel a mekngit el tekoi el mriruul er a uchei?

Ka di molatk er tiang: A rebebil er tirke el Kristiano er a chelsel a ongdibel er a kot el dart el rak a mla er a deleboes me a laokreng e mle mengolchotaor er a uchei. Engdi te millilt el mo melodech a klengar er tir, me ngmlo uchul a betok el klungiaol el mo er tir. (1 Korinth 6:9-11) Me chelecha el taem, e a rebetok el telael el chad el meliuekl er a beluulechad a dirrek el mla meruul er a osisiu el rolel a omelilt. Te mla mo mimokl er a mle mekngit el blekerdelel a klengar er tir e dirrek el mla mo omelechesiu a betok el ungil el tekoi, e le tir el mla remuul a klengar er tir el mo oltirakl a  omellach er a Biblia. Ka di momtab er a tekoi el dilubech el mo er a Sarah, el dulsaod er ngii er a uchelel tia el suobel.

“Ngdi Mle Mereched el Mo Chelellakl a Renguk”

A Sarah a mlo melechesuar el kmo a diak el ultebechel el blekerdelel a klengar er ngii a dimlak el bsang a ilmokl me a deurreng el lulsiik er ngii. Ngmelekoi el kmo: “Ak milechesuar el kmo a ukltkek a dikea loureor. Ak mle merur er a blekerdelel a klengar er ngak e mle bekikl el kmo ak locha mo dioll me a lechub e ak mo smecher er a mekngit el rakt. Ngdimlak a ta el bo lak kuumerang el kmo ngngar er ngii a Dios, e dirrek el mle medengei el kmo a rolel a klengar er ngak a millemall er a rengul. Ak dirrek el millatk el kmo ak kmal mle kikiongel el chad el uchul me ngdi milengitechut er a renguk.”

Cherengel a taem, e a Sarah a mlo sebechel el ngodechii a blekerdelel a klengar er ngii. Ngmlo olengit a ngeso er a demal me a delal, el tir a Sioning er a Jehovah. Ngdirrek el mlo olengit a ngeso er a rulsemuul el Kristiano el mechuodel er a ongdibel. Ngmelekoi el kmo: “Ak kmal mlo mechas a renguk er a ungil el omerellir me a bltikerreng er a rechad er a blik me a remechuodel er a ongdibel el bedul ngak, me ngdi mle mereched el mo chelellakl a renguk.”

Chelecha el taem, e a Sarah a omekeroul er a reteru el ngelekel. Ngmelekoi el kmo: “Ak kmal di bleketakl sel kungedecheduch er a rengelekek el kirel a tekoi el kullilt el mo meruul. Ngkmal soak a bo lungil el medengei aike el tekoi el dilubech el mei er ngak e le ngak el dimlak kultirakl a llechul a Dios. Me a turrekong er ngak a kmal soak el ngosuterir el mo medengelii a klungiaol el mo er ngii er a bedenged me a rengud me a uldesued, e le kid el kiei el oltirakl a llechul a Dios el kirel a tekoi er a durs. Ak kmal oumerang el kmo a Dios a meskid a ulekrael el kirel a tekoi er a kldung e le ngdiak el soal a demetemall.”

Kau me ngdirrek el sebechem el ngmai a klungiaol a lsekum e ke oltirakl a ulekrael er a Dios. A Biblia a tibir tia el tekoi el kmo: “A llechul a [Jehovah] a melemalt, me tirkel oltirakl a mo dmeu a rengrir; ma loltobed el tekingel a kmal melemalt, el omekllomes a uldasu. . . . Me ngak a nguu omeksullek a kulengesenges.”​—Psalm 19:8, 11. *

[Aike el Footnote]

[Blurb el ngar er a 8 el llel]

Tirke el chad el mengemikr a ulekrael er a Biblia a blechoel el mo mekngit a rengrir

[Blurb el ngar er a 9 el llel]

Tirke el kiei el oltirakl a ulekrael er a Biblia a klikiid a ukltkir e dirrek el mo dmeu a rengrir er a kmes el deleuill er a chelsel a delengcheklir