A Remenguiu a Oker el Kmo . . .

Ngkirir a ruungalek el olisechakl er a rengelekir el kirel a durs?

▪ A rebetok el oungalek el chad a kmal blak a rengrir el omekerreu er a rengelekir me lak bo el secher er a mekngit el rakt. Me ngdirrek el kmal kirir el meruul er a osisiu el tekoi el mo omekerreu er a rengelekir er a ngii di el ngerang el sebechel el mo uchul e ngtomall a tekoi er a kldung er a rengrir. Me a ta er a rolel e ngsebechir el meruul er tiang a oeak sel losisecheklterir el mo medengei a tabesul el llechul a tekoi er a durs. (Osisechakl 5:3-​23) A chouaika el rolel a osisechakl me a ulekrael el kirel a tekoi er a kldung a meklou a ultutelel e le a rengalek a klou a techellir el omes a mekngit el tekoi me a siasing el okiu a TV, Internet, me a dirrek el betok el kakerous el bedengel a babier.

A Diane Levin, el Brobesong er a skuul e dirrek el meluches a babier a mesaod el kmo: “A mondai er chelecha el sils a diak el rengeleked el mesuub el kirel a durs, e ngbai aike el tekoi el losuub, me a rekrir sel lomuchel el mesuub er ngii, me a techang a olisechakl er tir. A rengalek a suub a kot el mekngit el tekoi el kirel a durs el ngii a sebechel el tomelleterir, el oeak a rulterau a klalo me a haeri el tekoi.”

A ruungalek a kirir el omekerreu er a rengelekir er a mekngit e kikiongel el osengel a tekoi er a durs, el ngii a klou a letemellii er a uldesuir a rechad. (Osisechakl 5:1; Efesus 6:4) A rengalek a kirir el mo ungil el medengei el kmo ngmekerang a loureor a bek el klekedellel a bedengir, e mekerang a lomekerreu er a bedengir, e mekerang a lomekerreu er tir er a remekngit el chad. Sel taem el lemukeroul el mo ngeasek, el ngii a taem el bedengir a omuchel el mo er ngii a urungulel el soal el meruul a tekoi er a durs, e a ngalek el redil a kirel el mo ungil el medengei aike el ngeldechel a bedengel e mo medengei el kmo ngmekerang e ngera uchul e ngmo smecher er a buil. Me ngdi osisiu, a ngalek el sechal me ngkirel el mo medengei er a uchei el kirel aike el mo merael el me tuobed er a klekedellel a bedengel me a uchul e ngmo er ngii a mesisiich el urungulel el soal el meruul a tekoi er a durs. A ruungalek a sebechir el omuchel el olisechakl er a rengelekir er a ngklel aika el klekedellel a bedengir er sel dirk lemekekerei. A rebetik a rengrir el oungalek a osisecheklterir a rengelekir a edei el meklou a ultutelel el tekoi el kirel a klekedellel a bedengir: (1) Ngokedeldaol. (2) Ngdiak el kirir el mesaod el ngar er a mekngit el rolel. (3) Ngdiak el kirel a ngii di el chad el mo merutech me a lechub e lemocholt el mo er a rebebil. Me a rengalek sel lemukeroul el mo meklou, e a ruungalek a kirir el mo ungil el smodii el kmo ngmekerang a redil e mo dioll. *

Ngkirir a ruungalek el omuchel el olisechakl er a rengelekir el kirel aika el tekoi er oingerang? Sel kot el mereched el taem. A ngalek el redil a sebechel el omuchel el mo smecher er a buil sel le 10 a rekil me a lechub e nguchei er isei. A ngalek el sechal a sebechel el omuchel el mo er ngii a merael el me tuobed er a bedengel er a bekord el 11 me a lechub e ng 12 a rekil. Aika el meklou el omeldechel a klengar a klou a lerellii er a uldesuel a ngalek a lsekum e ngdiak lodengelii a uchul me ngdubechang el mo er ngii. Sei a uchul me a rengalek a kirir el mo medengei er a uchei el kmo aikang a kirel el mo er ngii e diak a telemellel el kirel a okurulel a bedengir. Tiakid a dirrek el taem el kired el ngosuterir el mo medengelii a klungel a ultutelel a doltirakl a omellach er a Biblia el kirel a tekoi er a kldung, el ngii a kot el ngarbab el rolel a osisechakl el sebeched el nguu, el diak el uai aike el betok el osisechakl el kirel a durs el diak a ngera el bla leketmeklii.​—Osisechakl 6:27-35.

[Footnote]