Ngngar er Ngii a Belkul a Bo Dodengelii a Nger?

“Ngmle teruich a rekik er sera kumuchel el milil el obengterir a resechal. A kot, e aki di mle kaiuereked chim e ketungel mad. Ngdi mle telkib, e aki mocha kerutech a klekedellel a bedengam e mocha meruul a kakerous el tekoi er a durs. Me sera bo el 15 a rekik, e a kulemuchel el oureor, me a resechal el chad er a urerek a mlo sorir el meruul a tekoi er a durs el obengkek. Ngmle soak a bo lomdasu a rechad el kmo ak bekeu, e dirrek el mle soak el obengterir a rechad er a urerek el meruul a ngii di el tekoi el loruul. Ngkmal mle soak a rechad er a urerek a bo lekengei er ngak, e tiang a mlo uchul e ak mlo melasem a betok el rolel a tekoi er a durs.”​—SARAH, * AUSTRALIA.

NGMO mechas a rengum a lsekum e ke mo medengei el kmo a Sarah a mlukeroul er a chelsel a delengchokl el kmal mle mesisiich el chedal a klechelid? A rechad er a blil a millasem el omekeroul er ngii el oltirakl a omellach er a Biblia, engdi a Sarah a millilt el mo meruul a ngodech el tekoi.

A rebetok el chad a dirrek el kongei er a uldesuel a Sarah. Te oumerang el kmo a uldasu el ngar er a Biblia el kirel a tekoi er a durs a kmal tekoi er a irechar. A rekuk bebil a omdasu el kmo ngdiak a kngtil a demesisiich el chedal a klechelid e a osisiu el taem e a klengar er kid a melisiich a tekoi er a durs.

Ngngar er ngii a ultutelel a bo modengei a osisecheklel a Biblia el kirel a tekoi er a durs e mo kiei el oltirakl? A Biblia a melekoi el kmo ngbabier el “melluches luleak a [chedaol el klisichel] a Dios, me ngngarngii a blkul er chosisechakl.” (2 Timoteus 3:16) Me a lsekum ke oumerang el kmo a Dios a ulemeob er a rechad me a Biblia a mlukrael el Tekingel, e ngbelkul a kmo a tekoi el medung er a chelsel a kmal klou a ultutelel el kired el mo medengei.

Engdi ngklengiterreng, e le rebetok el chad a rrau a rengrir el kirel a osisecheklel a Biblia el kirel a tekoi er a durs. A remengeteklel a klechelid el tir a melekoi el kmo te mengull a llach el ngar er a Biblia a melisiich a uldasu el omtok er a Biblia. Me tia el omeruul a mla mekdubech a tekoi el mo uchul a klekakeakl er a chelsel a betok el klechelid.

Nglocha ungil a omchoit a sesei el bung el di kau el merriter er tia el tekoi er a bai di multuil aike el tekoi el lolekoi a rechad. A ongingil el suobel a mo mesaod a teruich el ker el kirel a osisecheklel a Biblia el kirel a tekoi er a durs. Ngar er a chelsel ngii el suobel, e ke mo metik a melemalt el nger el mlengai a uchetemel er a tekoi el mera el lolisechakl a Biblia. E sel ulebongel el suobel er tia el babier a mo mesaod er a uchul me a tekoi el dolilt a ngar er ngii a klou el tekoi el lerellii el kired.

[Footnote]