Mosuub a ‘Teletelel a Klemerang’
Mosuub a ‘Teletelel a Klemerang’
“[Ke] oba teletelel a klemedengei ma klemerang ra llach.”—ROM 2:20.
MOSIIK A NGER ER AIKA EL KER:
Ngulemtechei a ngerang aike el tenget el mla er a Llach er a Moses?
Ngera klaisisiu er a bebil er a tenget el lurruul a Rechisrael me a tenget el loruul a Rekristiano er chelechang?
Ngera el tekoi a oterekeklii el kmo a tenget a bo lekengei er ngii a Jehovah me a lechub e ngdiak?
1. Ngera me kede semeriar el mo medengelii a klungel a ultutelel a Llach er a Moses?
OMKO ngdimlak a mlukrael el babilengel a apostol el Paulus, e nglocha kmal mo meringel er kid el mo medengei a belkul a betok el telengtengil a Llach er a Moses. Ngar er a babilengel el mo er a Rehebru el Kristiano, e ngmileketeklii a rolel e a Jesus el “blak a rengul ngarbab el priist” a mle sebechel el di ta el taem el lodersii a “ngubet” el tenget me bo el sebechir tirke el rokui el olecholt a klaumerang er tir er a olubet, el mo nguu a “ngubet el mo cherechar.” (Hebru 2:17; 9:11, 12) A Paulus a milsaod el kmo a tento el templo a di “chungel a chedaol blil a Dios el ngara eanged” me a Jesus a mlo Deleuill er a “lmuut el ngarbab el telbiil” er sel telbiil el mlo er ngii loeak a Moses. (Hebru 7:22; 8:1-5) Ngar sel taem er a Paulus, e a chouaisei el omesodel a Llach a mle klou a ultutelel el mo er a Rekristiano, e dirk uaisei er chelechang. A omesodel ngii el Llach a ngosukid el mo medengelii a kerresel aike el tekoi el lekiltmokl a Dios el kired.
2. Ngera el klemedengei a lulebang a Rechijudea el Kristiano, el Rechisentael a dimlak el lodengelii?
2 A Paulus er sera loluches el mo er a Rekristiano el ngar er a Rom, e a bebil el tekingel a mlo er a Rechijudea el Kristiano, el mlosisechakl er a Llach er a Moses. Nguluuchais er tir el kmo, tir el mle medengelii a llechul a Dios a uchul, me ngngar er ngii a klemedengei er tir er a “teletelel a klemedengei ma klemerang” el kirel a Jehovah me a melemalt el omellach er ngii. A klaodengei me a omengull el kirel a ‘teletelel a klemerang’ a ngilsuterir a Rechijudea el Kristiano, el mo uai a reblak a rengrir el Rechijudea er a uchei er tir, el mo sebechir el omekrael e olisechakl e omeketakl a Llach el Jehovah a milsterir a rechedal, el mo er tirke el dimlak lodengelii.—Monguiu er a Rom 2:17-20.
CHUNGEL A TENGETENGEL A JESUS
3. Ngmekerang e sebeched el ngmai a klungioled a dosuub el kirel aike el tengetengir a Rechijudea er a irechar?
3 A teletelel a klemerang el lulsaod er ngii a Paulus a dirk klou a ultutelel el kirel a klemedengei er kid er a moktek er a Jehovah. Aike el omellach el mla er a Llach er a Moses a dirk ngar er ngii a ultutelel me a kerresel er chelechang. Me a leuaisei, e me bo dosaod er a ta er a telengtengil sel Llach el kmo, ngmilekerang aike el tenget me a uldars a lomekrael er a rengariou a rengrir el Rechijudea el mo er a Kristus e dirrek el ngilsuterir el mo medengei aike el soal a Dios a bo loruul. E le ike el longerechir a Jehovah er a remesiungel a dirkak lemengodech a uchul, me kede mo mesa el kmo a llechul a Dios el mo er a Rechisrael el kirel a tenget me a uldars a sebechel el ngosukid el mo merriter er a blekerdelel a omesiunged el mo er a Dios.—Malakai 3:6.
4, 5. (a) A Llach er a Moses ngulemeklatk er a rechedal a Dios el kirel a ngerang? (b) A llechul a Dios el kirel a tenget ngmellutk el kirel a ngerang?
4 Ngbetok el telengtengil a Llach er a Moses a ulemeklatk er a Rechijudea el kmo te urrebet er a klengit. El uai tiang, a chad el rirtechii a ulekoad el chad a mle kirel el mo mekikiid. A bo loruul er tia el tekoi, e a bekerekard el kerbou el diak a telemall er ngii a bo lokodir e durur. E a chebul a meketmokl el kirel a “ralm er a omengikiid,” el mo meliim er a chad el kirel el mo mengikiid er ngii er a ongedei me a ongeuid el klebesei er a uriul er a lemukidokel. (Ulecherangel 19:1-13) A uleklatk el kmo a cherellir a rechad a oliuul a klengit me a diak el cherrungel el blekeradel a uchul me a redil el omechell a mo diak el klikiid el telkib el taem, e a uriul e ngmo melenget a tenget el kirel a klausubes er a klengit.—Levitikus 12:1-8.
5 A omelenget el ousbech a charm a luluusbech el kirel a betok el blekeradel er a bek el sils el mo melubet a klengit. Me ngke el chad el melenget a ble lodengei me a lak, engdi aika el tenget me a dirrek el ike el tenget el mlodars er a templo er a Jehovah er a uriul, a rokui el mle “chungel” a cherrungel el tengetengel a Jesus.—Hebru 10:1-10.
MELEMALT EL OSENGED EL KIREL A TENGET
6, 7. (a) Ngera el tekoi a ulemekrael er a Rechisrael er a omelilt er tir el kirel a tengetengir, e tiang ngmillutk el kirel a ngerang? (b) Ngera el ker a kired el di kid el oker er kid?
6 A klou el tekoi el kirel a ngii di el charm el mo modars el mo er a Jehovah a kmo ngkirel el diak a telemall er ngii e cherrungel, el diak el meiko e diak el chelemus e diak el chitechut, me a diak el secher. (Levitikus 22:20-22) A Rechisrael sel loldars a rodech me a lechub a mungi el mo er a Jehovah, e ngmle kirel el “kot el rodech,” el “ikel kot el ungil” er a dellemelir. (Ulecherangel 18:12, 29) A Jehovah a dimlak el kengei er aike el diak lungil el tenget. A klou a ultutelel el tekoi el kirel a tenget el charm a millutk el kirel a tengetengel a Jesus, el diak a telemellel el diak a dimech er ngii, e dirrek el olecholt el kmo a Jehovah a mo odersii ngike el kot el ungil e kmal mekreos er a rengul, el mo melubet er a klechad er a klengit me a kodall.—1 Petrus 1:18, 19.
7 A lsekum a chad el oldars er a tengetengel a oba klou el omereng el saul el kirel a Jehovah me a ungilreng er Ngii, e a omomdasu, ngmo dmeu a rengul el ngiltii sel kot el ungil er ngii el msa Jehovah? A klungiolel a tenget a mle ultuil er a chad el melenget er ngii. E le ngka el chad a mle medengei el kmo a Dios a diak el deu a rengul er a mekngit el tenget, e le chouaisei el tenget a ochotii el kmo, ngii el chad a omes er a tengetengel el ua lak a ultutelel me a lechub e ngomekberaod er ngii. (Monguiu er a Malakai 1:6-8, 13.) Tia kirel el rullid el mo melebedebek aike el tekoi el kirel a omesiunged el mo er a Dios el kmo: ‘Ngera uchul me ak mesiou er a Jehovah? Ngmla mo kirek el merriter er a blekerdelel a omesiungek me a moktek er ngak el mesiou er ngii?’
8, 9. Ngera kede suubii er a osengir a Rechisrael er a loldars a tengetengir?
8 A lsekum a chad er a Israel a millenget el mla er a rengul el mo er a Jehovah el olechotel a klou el omereng el saul er ngii, me a lechub e ngodersii a delaol el tenget el olengit a kengei er a Jehovah, e nglocha dimlak el meringel er ngii el melilt er a charm el mo tenget. Ngii el chad a mo dmeu a rengul el msa Jehovah sel kot el ungil er ngii. A Rekristiano er chelechang a diak loldars a tenget el mildung er a Llach er a Moses, engdi te meruul a tengetengir sel lousbech a temir me a klisichir me aike el ngar er ngii er tir el mesiou er a Jehovah. A apostol el Paulus a milsaod er a ochotel a omelatk er a Rekristiano me a “chomeruul lungil ma blekerurau” el ua tenget el oldeu er a rengul a Dios. (Hebru 13:15, 16) A osengir a rechedal a Jehovah el kirel a omesiungir a ochotii a omereng el saul er tir el kirel aike el rokui el tekoi el Dios a mla mesterir. Me ngngar er ngii a klaisisiu er a blekerdelir me a moktek er a Rekristiano el mesiou er a Jehovah er chelechang, me tirke el millenget a tengetengir el mla er a rengrir er a irechar.
9 Ngar er a bebil el blekeradel, e a Llach er a Moses a mellach el kmo a chad er a Israel a kirel el melenget a tenget el kirel a klengit me a lechub e ngtenget el kirel a ileakl el klengit, el kirel a kngtil. Aika el tenget a kmal mle kirel a chad el melenget, me a omomdasu, e ngmle meringel er a chad er a Israel el mo kongei el meruul er ngii? (Levitikus 4:27, 28) Ngkmal diak bo lemeringel er ngii, a lsekum e ngsoal el melemolem er a ungil el deleuill er ngii me a Jehovah.
10. Ngera el “tenget” a sebechel a Kristiano el meruul er ngii el mo sumecheklii a mla metemall el deleuill?
10 Me ngosisiu er chelechang, ngsebechem el melechesuar el kmo ngdimlak el durengum e soibesengii a ta er a odam. Me a ukltkem a sebechel el omeklatk er kau el kmo ngmlo mekngit a omerellem. A ngii di el chad el blak a rengul el mesiou er a Jehovah a mo meruul aike el rokui el sebechel el mo mesmechokl er tia el omerellel, adang nguaisei ngdiak? Nglocha kirel el mo olengit a klausubes er ngike el chad el milsibas me a lechub e a lsal oberaod tia el tekoi, e ngkirel el osiik a ngeso er a rebetik a rengrir el mechuodel er a ongdibel. (Matteus 5:23, 24; Jakobus 5:14, 15) Me a bo dosmechokl er a klengit el derirellii el mo er a odam me a lechub e ng Dios, e ngkmal ngar er ngii a kired el meruul er ngii. Me tiang a di ua rolel a dolenget er a tenget. Me sel doruul er a chouaisei el “tenget,” e ngmo sumecheklii a deleuill er kid me a Jehovah me a odam er kid e dirrek el meskid a klikiid el ukltked. E tiang a oterekeklii a rengud el kmo a rolel a Jehovah a kot el ungil.
11, 12. (a) Ngera mle tenget er a budech? (b) Ngera sebeched el suubii er a tenget er a budech?
11 A bebil el tenget el mla er a Llach er a Moses a mle tenget er a budech. Aika el tenget a ullecholt el kmo ngar er ngii a budech er a delongelel a chad me a Jehovah. Ngike el meruul er a chouaisei el tenget me a ongalek er ngii a mo dmak el mengang er a techel a tenget el charm er a ta er a blil a blengur er a templo. Ngike el mesiou el prist me tirke el bebil er a reprist el mesiou er a templo a dirrek el ngmai a blingelir er tia el tenget el charm. (Levitikus 3:1; 7:31-33) Ngike el mle melenget a mirruul er a tengetengel e le ngmle soal el oldeu er a rengul er a ungil el deleuill er ngii me a Dios. Me ngike el mle melenget me a ongalek er ngii, me a reprist, me a Jehovah, a ua ble ledeu a rengrir el dmak el omengur el ngar er a budech.
12 Me a doruul a tenget er a budech a uai a dongemedaol er a Jehovah el mei er a blengur. Ngkmal klou el techall el kirel a chad er a Israel a lsekum a Jehovah a kongei el mo omengur el obengkel. Me ngulterekokl el soal el omsa Jehovah sel kot el ungil er ngii. Me tia el tenget er a budech, el ta er a telengtengil a teletelel a klemerang er a Llach, a mileketeklii el kmo ngoeak a ngarbab el tengetengel a Jesus, e tirke el rokui el chad el sorir a lebo er ngii a kmes e ungil el deleuill er tir el obengkel a Omebelir a kmal sebechir el meruul el uaisei. Chelecha el sils, e ngsebeched el oldeu a rengud er a ungil el deleuill er kid me a Jehovah sel dekengei el melenget aike el ngar er ngii er kid me a klisichel a bedenged el mesiou er ngii.
ULEKLATK EL KIREL A TENGET
13, 14. Ngera me a Jehovah a dimlak el kengei a tengetengel a King el Saul?
13 Aike el tenget el meldung er a Llach er a Moses a mle kirel el mera el mla er a rengul a chad e mlodars, me bo el sebechel a Jehovah el kongei er ngii. Me nguaisei, ngdirrek el ngar er ngii a uleklatk er a Biblia el kirel aike el tenget el dimlak lekengei a Dios. Ngera uchul me nguleltngakl aike el tenget? Me bo dosaod a eru el blekeradel.
14 A profet el Samuel a dilu er a King el Saul el kmo a taem a mla mei el kirel a Jehovah el mo okngemedeterir a rechad er a Amalek. Misei e a Saul a mle kirel el okngemedii sel renged er a recherraro el obengkel a rokui el charm. Engdi uriul er a bo lemesisiich er a mekemad, e a Saul a kilengei er a rechedal me ngdimlak lokodir a Agag, el king er a Amalek. Ngdirrek el milechei aike el kot el ungil el charm el mo tenget el mo er a Jehovah. (1 Samuel 15:2, 3, 21) Me ngmilekerang a Jehovah? Ngultngeklii a Saul e le ngii el ulerrengesmengoit. (Monguiu er a 1 Samuel 15:22, 23.) Ngera kede suubii er tia el tekoi? A Dios a kongei el ngmai a tengetenged a lsekum e kede olengesenges a llechul.
15. A mekngit el omerellir a rebebil el chad er a Israel el millenget a tengetengir er a taem er a Isaia, ngullecholt a ngerang?
15 A osisiu el blekeradel a sebeched el metik er ngii er a babier er a Isaia. Seikid el taem, e a Rechisrael a dimlak lolenget a tengetengir el mera el mla er a rengrir el mo er a Jehovah. A mekngit el omerellir a riruul aike el tengetengir el mo diak a ultutelel er a Dios. Me a Jehovah a dilu el kmo: “Cho momdasu, e ng soak a ikal rokui el tenget el di molenget el mer ngak? Ng ungia ikel sib el molul ma tenget ma lekel a ikel ungil chermiu. Ng mla tmurk a renguk er a rsechel a sechal kerbou ma sib ma kaming. . . . Ng mla mo diak el soak a ikel diak a belkul tengetengiu. Ng chetik a bul a ochod el molenget.” Ngera me a Dios a dimlak el soal a tengetengir? Ngdilu er tir el kmo: “Cho msal kmal meluluuch, me ngak a di diak bo kurrenges, ele chimomiu a chelsechusem er a klengit. Molecholb el mo beches. E le mereko ikal rokui el mekngit el kumes er kemiu el meruul. Choi, le mereko omeruul el mekngit.”—Isaia 1:11-16.
16. Ngera ochotii el kmo a Dios a kongei er a tenget?
16 A Jehovah a dimlak el deu a rengul er a tengetengel a chad el dimlak lobult er a kngtil. Engdi ngkilengei a nglunguchir me a tengetengir tirke el millasem el kiei el oltirakl a llechul a Dios er a klengar er tir. A teletelel a Llach a ulsisecheklterir tirka el chad el kmo te mle urrebet er a klengit me te uluusbech er a klausubes er a Jehovah. (Galatia 3:19) A chad er a Israel sel bo lodengelii a belkul a osisecheklel a Llach, e ngkmal mlo mekngit a rengul er a kngtil e mle soal a Jehovah a bo lousubes er ngii. Me nguaisei er chelecha el sils, ngkired el mo medengei el kmo ngdi oeak a tengetengel a Kristus e a Jehovah a sebechel el ousubes a kngtid. Me a lsekum e tia el tekoi a mo bleketakl er a rengud me kid a oba omereng el saul el kirel, e seikid e a Jehovah a mo ‘dmeu a rengul’ er aike el rokui el doruul er a omesiunged el mo er ngii.—Monguiu er a Psalm 51:17, 19.
MOCHOTII A KLAUMERANG ER A TENGETENGEL A JESUS
17-19. (a) Ngmekerang a dolecholt a omereng el saul er kid el mo er a Jehovah el kirel a olubet el tengetengel a Jesus? (b) Ngera kede mo mesaod er a ongingil el suobel?
17 A Rechisrael a di ulemes er a “chungel” aike el moktek er a Dios, engdi kid er chelechang a mla mo medengelii a mera el belkul. (Hebru 10:1) Aike el llach el kirel a tenget a ulsisecheklterir a Rechijudea el mo medengei aike el kirir el meruul me lebo er ngii a ungil el deleuill er tir el obengkel a Dios. Ngmle kirir el olecholt a omereng el saul er tir el mo er a Dios, e mo sorir el msang aike el kot el ungil er tir, e dirrek el mo medengei el kmo te uluusbech a klausubes er ngii. Chelecha el sils, e a Bades er a tekoi er a Grik a ngosukid el mo medengei el kmo ngoeak a olubet el tengetengel a Jesus, e a Jehovah a mo okngemedii a klengit me a kodall el mo cherechar. Me ngoeak a olubet el tenget, e a Dios a ousubes a kngtid me ngmo sebechel el mo ungil a ukltked er chelechang. Me tia el olubet el tengetengel a Jesus a kmal ungil el sengk el mla er a Jehovah el mei er kid!—Galatia 3:13; Hebru 9:9, 14.
18 Nguaisei, kede ousbech er a lmuut el klou el klemedengei el kirel a olubet el tenget me bo el sebeched el ngmai a klungioled er ngii. A apostol el Paulus a milluches el kmo: “Ma llach a uleuaisei el mle tebecheled el mo lmuut er sera le merma Kristus, me bo de muklemalt loeak a kloumerang.” (Galatia 3:24) A chouaisei el klaumerang a kirel el obengkel a omeruul. (Jakobus 2:26) Me a Paulus a millisiich er a Rekristiano er a kot el dart el rak el ulebang a teletelel a klemedengei el mla er a Llach er a Moses, el mo ochotii tia el klemedengei el oeak a omerellir. Me a loruul el uaisei, e a omerellir a mo oltirakl aike el omellach er a Dios el lullisechakl el mo er a rebebil.—Monguiu er a Rom 2:21-23.
19 Me alta Rekristiano er chelechang a diak el kirir el oltirakl er a Llach er a Moses, engdi ngdirk kirir el melenget a tenget el lekengei er ngii a Jehovah. Ngar er a ongingil el suobel, e kede mo mesuub el kmo ngmekerang a doruul el uaisei.
[Aike el Ker er a Suobel]
[Blurb el ngar er a 19 el llel]
Aike el tekoi el Jehovah a soal a remesiungel a loruul a dirkak lemengodech el mei er chelechang
[Siasing el ngar er a 20 el llel]
Ngera el charm a bo modersii el tenget el mo er a Jehovah?
[Siasing el ngar er a 21 el llel]
Tirke el oldars a tenget el lekengei er ngii a Jehovah a dmeu a rengrir er a kengei er ngii
