Outekangel a Meklou el Tellemall

Chelecha el taem el di lorael el mo betok a tellemall el ngii a mo uchul a klou el chelebuul el mo er a rechad, e ngmekera chad e sebechel el outekangel aika el chelebuul? Ka me bo domes a bebil er a ungil el rolel el sebeched el remuul.

Bo mcheroid er a merekung el tellemall. A Biblia a kmo: “A medengei a tekoi el chad a mo mesa tellemall a le mei e oibngii er ngii, e ngdi diak lomdasu el chad a di mong, e a uriul e ng ouuchel er a rengul.” (Osisechakl 22:3) Tiang a mellomes el ulekrael el kirel a tellemall. A lsekum kede nguu a subed el kirel a tsunami, me a ieleb, me a lechub e ngses el eolt el mochu er ngii, e ngrolel a llomeserreng el kirir a rechad el ngar aike el basio el chemiis el mo er cheroid. A klengar a kuk klou a ultutelel er a blai me a klalo.

A rebebil a locha sebechir el diak bo lekiei er aike el basio el blechoel el mo er ngii a tellemall. A ta el omesuub a kmo: “A tellemall a di blechoel el mo er ngii er a di bebil er a beluu. A bebil er a basio a kmal kdekudel e le ngoumesingd er aike el meklou el tellemall a mo duubech er isei.” E tiang a klemerang el kirel aike el ngariou el beluu el kmeed er a daob me aike el beluu el blechoel el omuchel a desiu er ngii. Me a lsekum e ngsebechem el diak mkiei er chouaike el basio me a lechub e ke melukl el mo er a kuk ta er a basio, e nglocha mo sebechem el oibngau er a tellemall.

Mketmeklau er a uchei. Alta e ke melasem el mo cheroid er a tellemall engdi ngdirk sebechem el mo chelebangel er ngii. Me a lsekum e ke kltmokl er a uchei, e ngmo sebechem el mtekangel aike el chelebuul el mo er ngii. Tiang a dirrek el oltirakl er sel ulekrael el medung er a Osisechakl 22:3. Kau ke mla kutmeklii a tim el ngar er ngii aike el bo mousbech el kirel a tellemall? Sel babier el 1-2-3 of Disaster Education a mesaod aike el dousbech, el uldimukl a first-aid me a ilumel el ralm me a kansume me aike el meklou a ultutelel el babier. Ngdirrek el rolel a llomeserreng a omolatk el kirel aike el tellemall el sebechel el duubech el mo er a ongalek er kau, me a ngerang a sebechel el meketmokl er a uchei.

Molemolem er a kmes el deleuill el obengkel a Dios. Tiang a sebechel el ngosukau er a chelsel a ngii di el blekeradel. A Biblia a melekoi el kirel a Dios, el ngii a “Chedam ra klechubechub, el Dios er a bek longelaod, el mengelaod er kid sel de ngara chelsel a ngiidil ringel.” Me a ta er a bades a mesaod er ngii el kmo ng Dios “el mengelaod er tirikel chormang.”​—2 Korinth 1:3, 4; 7:6.

Nguaisei, a Dios a kmal ungil el medengei a blekeradel el mo er tirke el oumerang er ngii. Ngii a Dios er a bltikerreng me ngmesterir a omelisiich er a kakerous el rolel. (1 Johanes 4:8) A nglunguuch, el diak el kirel a mengasireng el omeruul, e ngbai ongit el kirel sel chedaol el klisichel a Dios, a sebechel el ngosuir a chad el ngar er a chelsel a  ngii di el blekeradel. Tia el chedaol el klisichel a Dios a sebechel el rullii a chad el mo melatk aike el bades er a Biblia el sebechel el mengelaod er tirke el chelebangel a ringel. A reblak a rengrir el mesiungel a Dios a sebechir el omelechesiu el ua David, el mle king er a Israel er a irechar, el dilu el kmo: “Ng mo lmuut ma lsekum sel rael a mo oeak a kmal milkolk, e ng diak bo kmedakt e RUBAK, ele kau a obengkek! A skersem ma chelebedem a mesebechakl er ngak.”​—Psalm 23:4.

A Rekristiano a kaingeseu er a delongelir. Ngar a kot el dart el rak, e a ta el Kristiano el profet el Agabus a ngklel, a ulemlaoch el kmo “ngmo duubech a kloul bosech ra belulechad el rokir; me ngdilubech ra taem ra Klaudius el kaiser.” Tia el klou el bosech a mlo uchul a chelebulir a rebetok el disaiplo er a Jesus el ngar a Judea. Me te milekerang a redisaiplo el kiliei er a ngodech el beluu er a lerenges a chisel a chelebulir a rekldemir el Kristiano? A cheldecheduch a kmo: “Ar Ubengkel a Jesus a tilbir choldurokl a ngeso el morar udam el kiei ra beluu ra Judea el ngara redemelel a klisichel a derta er tir.” (Rellir 11:28, 29) Te ullecholt a bltikerreng er a lodurokl aike el lousbech er tia el taem er a chelebuul.

Sel lebo er ngii a meklou el tellemall er chelechang, e a remesiungel a Dios a dirk meruul a osisiu el tekoi. A rechad a medengelterir a Resioning er a Jehovah el kmo te kaingeseu er a delongelir. El ua sel taem er a lebo er ngii a desiu er a beluu er a Chile er a February 27, 2010, e a Resioning er a Jehovah a di mle mereched el mo olengeseu er a rekldemir el mla er sel basio. A Karla, el miltemall a blil er a tsunami, a milsaod el kmo: “Ngkmal millisiich er ngak er sera kisterir [a rekldemek el Sioning] er a lemei el me olengeseu er kemam er a bo lekukuk. A Jehovah a milengelaod a rengmam el okiu a ungil el omerellir tirke el mle olengeseu er kemam. Ak milechesuar a bltikerreng me a ulekerreu er a Jehovah.” A demal el rubak, el diak el Sioning, a miles a urerir el olengeseu, me ngdilu el kmo: “Tiang a diak el ua omeruul el bla kumes er a rechad er a ikelesia er ngak.” A tekoi el lulemes a rirellii el mo soal el olengit er a Resioning er a Jehovah me bo losuub a Biblia el obengkel.

Sel leduubech a tellemall e ngkmal ungil a dobengterir tirke el betik a rengrir er a Dios.

[Siasing el ngar er a 6 el llel]

Ke mla kutmeklii a tim el kirel a tellemall?

[Siasing el ngar er a 7 el llel]

Moluluuch el kirel a ngeso er a chedaol el klisichel a Dios, el diak el kirel a mengasireng el tekoi

[Siasing el ngar er a 7 el llel]

A Rekristiano a kaingeseu sel ledubech a tellemall

[Siasing el ngar er a 7 el llel]

“Ak milechesuar a bltikerreng me a ulekerreu”