A Jehovah a Meduch el Olsobel er a Rechedal

“Mar meluu ra Dios a sebechel a Rubak lolsobel er tir ra chelsel chomengarm.”​—2 PETRUS 2:9.

NGERA UCHUL ME KEDE OUMERANG EL KMO A JEHOVAH A:

Oterekokl a taem el bo loltaut a moktek er ngii?

Mo ousbech er a klisichel el olsobel er a rechedal?

Ungil el medengei aike el mo duubech er a taem er a klou el ringel?

1. Ngera el blekeradel a mo er ngii er sel taem er a “kloul ringel”?

 SEL lemei a blsechel e ngkmal di mereched el mo tmaut a kerrekerilel a Dios el kirel a beluulechad er a Satan. (1 Thesalonika 5:2, 3) Ngar sel “kloul sils er a [Jehovah],” e ngkmal mo klou a uldikel me a rraurreng er a rechad. (Sefania 1:14-​17) A klengar a kmal mo meringel me a rechad a mo chuarm a uchul me a Biblia a mesaod er tia el taem er a chelebuul el kmo ng “kloul ringel, el direkak le borngii ra uchelel a belulechad el me lmuut er chelechang.”​—Monguiu er a Matteus 24:21, 22.

2, 3. (a) A rechedal a Dios te mo chelebangel a ngerang er a temel a “kloul ringel”? (b) Ngerang a mo smisichii a klaumerang er kid er sel klisichel a Jehovah el olsobel er a rechedal?

² A Esekiel a ulemlaoch el kirel a odechelakl el mo er ngii er a ulebengelel a “kloul ringel.” “A Kok . . . er a beluu er a Makok” a mo oldechelakl er a rechedal el Dios, el obengkel a “klou el mesisiich el cheldebechel er a re soldau,” el tir a mo “ua eabed el mchelchebii a beluu.” (Esekiel 38:2, 14-16) Ngdiak a ta el cheldebechel el mo mesebechakl er a rechedal a Jehovah, me a osobelir a di mo ultuil er a Dios. Me te mo mekerang sel ledubech tia el odechelakl?

³ Me kau el mesiungel a Jehovah, ke oumerang el kmo a Jehovah a sebechel, e dirrek el mo olsobel er a rechedal er a taem er a klou el ringel? A apostol el Petrus a kmo: “Mar meluu ra Dios a sebechel a Rubak lolsobel er tir ra chelsel chomengarm, e ar diak le melemalt a longkar er tir el mo lmuut er sel sils ra kerrekeriil e omlals er tir.” (2 Petrus 2:9) Sel dolatk aike el lurruul a Jehovah er a irechar el milsebechakl er a rechedal, e nglmuut el smisichii a klaumerang er kid. Me bo dosaod a edei er aike el tekoi el lurruul.

SILOBEL ER A KLOU EL IELEB

4. Ngera mle kirel el meketmokl er a uchei er a lemei a Ieleb?

⁴ Ka molatk er a Ieleb er a temel a Noah. Ngmla er ngii  a tekoi el mle soal a Jehovah a lemeketmokl er a uchei er a lemei a Ieleb. Ngmle kirel meteketek a klou el arhe e bo lesiseb er ngii a charm. A babier er a Genesis a ochotii el kmo a Jehovah a dimlak longiil er a arhe el mo merek e lolterekokl er a temel a Ieleb. Ngbai ulterekeklii a temel a Ieleb er a betok el rak er a uchei, el dimlak lultuil er a rechedel a Noah el merekui er a urerel. Kede mekerang e mo medengei?

5. Ngerang dilung a Jehovah el ngar er a Genesis 6:3, e oingerang e ngdillii tia el tekoi?

⁵ A Biblia a ouchais el kmo a Jehovah a rirellii a telbilel, e uluuchais er ngii el ngar er a eanged. Kede menguiu er a tekingel el ngar er a Genesis 6:3 el kmo: “Ngdiak bo kulemolem el mechititerir a rechad me lengar, e le te di chad el tech me a rasech. Me a klteketel a klengar er tir a di mo 120 el rak.” (Genesis 6:3, NW) Tia el bades a dimlak losaod er a ildisel a rekrir a rechad. Ngbai uluuchais el kirel a taem el Jehovah a mo olekngemed a rokui el mekngit er tia el chutem. A Ieleb a ulemuchel er a rak er a 2370 er a uchei er a Kristus. Me a leuaisei e a Dios a dillii a tekingel er a rak er a 2490 er a uchei er a Kristus, e sel taem e a Noah a mle 480 a rekil. (Genesis 7:6) Me a bekord el 20 el rak er a uriul, e ngmlochu er ngii a rengelekel el sechal. (Genesis 5:32) Me a bekord el 100 el rak er a uchei er a lemei a Ieleb, e a Jehovah a dirkak lsbedii a Noah er a ileakl el ngerachel el kirel rullii me lemosobel a klechad. Me ngsilbedii a Noah er oingerang?

6. Ngoingerang e a Jehovah a dilu er a Noah me ngmo meleketek er a arhe?

⁶ A Jehovah a milengiil el kemanget el taem er a uchei er a losubed er a Noah er aike el bo loruul. Kede mekerang e medengei? A Biblia a meketeklii el kmo a rengelekel a Noah a mla mo meklou el chad el mla mo bechiil er sel taem er a ledu er ngii a Dios me bo loruul er a arhe. Ngdilu er ngii el kmo: “Ngak a mo rullii a telbiil er a delongelem kau me ngak. Ke mo doiderekl er ngii el diall kau ma bechim, ma re ngelekem el sechal ma re becherir.” (Genesis 6:9-18) Me sel taem er a lsbedii a Noah me bo loruul er a arhe, e nglocha di mle medechel a 40 me a lechub e ng 50 el rak er a uchei er a lemei a Ieleb.

7. (a) Ngmilekerang a Noah me a telungalek er ngii e ochotii a klaumerang? (b) Ngoingerang e a Dios a silbedii a Noah er a temel a Ieleb?

⁷ Me sel taem er a loleketek er a arhe a Noah me a rengelekel, e te ulterekokl el millatk el kmo ngmekerang a Dios a bo lotutii a telbilel el kirel a Ieleb, e oingerang e ngmei. Me alta ngdimlak lodengelii a temel, engdi te ullecholt a klaumerang e millemolem el meruul er a arhe. A bades a kmo: “Ma Noah a riruul a rokui el tekoi el le dilu er ngii a Dios.” (Genesis 6:22) E sola, e a Jehovah a silbedii el kmo ngdi medechel a euid el klebesei e ngmo er ngii a Ieleb. Me tiang a milsterir a taem el lousbech el mo olsiseb a charm er a arhe. Me sera lerebet a chull, e a Noah a mle “600 a rekil, er a truich me euid el kebesengil ongerul buil,” e a rokui el tekoi a mla meketmokl.​—Genesis 7:1-5, 11.

8. Ngera me a omesodel a Ieleb a smisichii a klaumerang er kid el kmo a Jehovah a medengelii a ungil el taem el bo lolsobel er a rechedal?

⁸ A omesodel a Ieleb a meketeklii el kmo a Jehovah a medengelii a kot el ungil el taem me a rolel a lolsobel er a rechedal. Me chelecha el lolekedang a ulebongel er tia el mekngit el beluulechad, e ngulterekokl a rengud el kmo a rokui el moktek er a Jehovah a mo mutaut er ‘sel sils ma sikang’ el bla letibir.​—Matteus 24:36; monguiu er a Habakuk 2:3.

TE SILOBEL ER A BEKEREKARD EL DAOB

9, 10. Ngmilekerang a Jehovah er a lousbech er a rechedal el omedikl er a resoldau er a Ekipten?

⁹ Kede mla mo medengei el kmo a Jehovah a oterekeklii a taem el bo lotaut a moktek er ngii. A ongeru el cheldecheduch a meskid a ungil el uchul me kede oumerang el kmo a Dios a mo ousbech er a klou el klisichel el olsobel er a rechedal, e oltaut a moktek er ngii.  Me kede medengei el kmo ngkmal meduch el olsobel er a rechedal a uchul, me a lebebil e ngmechititerir me te mo chelebangel a omelsemai me bo lsebechel el omedikl er a recherrouel. E rirellii tia el tekoi er sera loltobed er a Rechisrael er a klsibai er a Ekipten.

¹⁰ Te bekord el mle edei el miliol a tilobed er a Ekipten. E a Jehovah a uluusbech er a Moses el omekrael er tir el rullii a Farao el mo omdasu el kmo te mla mecheuid e remiid. (Monguiu er a Exodus 14:1-4.) Me a Farao me a urrurt er ngii a uleltoir er tir el mo er a Bekerekard el Daob, me ngua lekea techellir el chemiis. (Exodus 14:5-​10) Engdi a rechad er a Israel a dimlak el kirir el mo medakt. E ngera uchul? E le Jehovah a mocha mesebechakl er tir.

11, 12. (a) Ngmilekerang a Jehovah er a losebechakl er a rechedal? (b) Ngera dilubech? E ngera kede suubii el kirel a Jehovah?

¹¹ “Sel chelsakl el eabed” el ulemekrael er a rechad er a Israel a milengukl el mo er uriul, el mlo melenget er a resoldau er a Farao me ngmlo diak lesa rolir. E bai mlo ua olbidel el kirir a rechad er a Israel. (Monguiu er a Exodus 14:19, 20.) Me a Jehovah a uluusbech er a mesisiich el eltel a ongos el mingii a daob me ng “mlo medirt el ua beluu.” Tia dimlak lemereched el tekoi e le eltel ongos a “mle meses el tal kesus.” E a uriul e a “re chad er a Israel a mirrael er a daob el mla mo medirt el chutem.” Alta e a urrurt er a Farao a mle bekerurt, engdi ngdimlak a techellir el mdechemeterir a redi merael el chad er a Israel, e le Jehovah a uluumekemad el kirir a rechedal. “Ng tirrob ochil a kuruma er tir, misei e ng mlo meringel er tir el merael.”​—Exodus 14:21-​25.

¹² A rechad er a Israel er sera bo leiuul el mo er a bitang, e a Jehovah a dilu er a Moses el kmo: “Modersii a chimam el mor bebul a daob, ma daob bo le mosiu er a re chad er a Ekipten, ma kuruma er tir, ma rumekall a kuruma.” Me a resoldau sera lolasem el chemiis er tia el daob el meremang, e a Jehovah a “ulerros er tir er a daob.” Ngdimlak a techellir el chemiis, “me te di ngilemed el rokui.” (Exodus 14:26-28) Me a Jehovah a ulechotii el kmo ngar er ngii a klisichel el olsobel er a rechedal er a chelsel a ngii di el blekeradel.

CHILIIS ER A TELEMELLEL A JERUSALEM

13. Ngera el ulekrael a ledilu a Jesus? E a ruleltirakl er ngii te locha millatk a ngerang?

¹³ A ongede el tekoi el bo dosaod er ngii a sel taem el resoldau er a Rom a mlo oldechelakl er a Jerusalem. Me tia el cheldecheduch a meketeklii el kmo a Jehovah a ungil medengei a tekoi el mo duubech me bo loltaut a moktek er ngii. A Jehovah a uluusbech er a Jesus el omekrael er a Rekristiano el kiliei er a Jerusalem me a Judea er a uchei er a telemellel a Jerusalem. A Jesus a dilu el kmo: “Me cho mesengei a melemall a chedaol el meldu ra profet el Daniel, el mocha dechor ra chedaol . . . isei e tirikel ngara Judea le chiis el mora rois.” (Matteus 24:15, 16) Engdi te milekerang a ruleltirakl er a Jesus e mo medengei el kmo ngtoutang a ulaoch?

14. Ngera el tekoi a dilubech el mileketeklii a belkul a ulekrael er a Jesus?

¹⁴ A cherengel a taem e a tekingel a Jesus a ulebeketakl. Ngar er a rak er a 66 er a uriul er a Kristus, e a resoldau er a Rom el longetakl er tir a Cestius Gallus a mlo merrob a uldikel er a Jerusalem. Me sera lechiis el mo er a templo a Rechijudea el lulemtok er a Rom, el tir a okedongall el Zealot, e a resoldau er a Rom a mocha merruud er a cheotelel a templo. Me  a Rekristiano el ulemtab er tiang a mlo medengei el kmo: A resoldau el olab a banderang el omtechei a chederir el (“melemall a chedaol”) a mocha kmeed er a cheotelel a templo el (“chedaol”). Me ngmocha kirir a ruleltirakl er a Jesus el ‘chemiis el mora rois.’ Engdi te mekerang e tuobed er a mats el mla miuekl er a recherraro? Ngmlo er ngii a ileakl el tekoi el dilubech.

15, 16. (a) Ngerang a bleketakl el ulekrael er a Jesus, e ngera uchul e ngmle kirir a ruleltirakl el mo olengesenges er ngii? (b) E a osobeled ngmo ultuil er a ngerang?

¹⁵ Ngdiak dodengelii a uchul, engdi a Cestius Gallus me a resoldau er ngii a tilobed er a Jerusalem el merael, me tirke el Zealot a uleltoir er tir. Me chelechang e ngmocha er ngii a techellir a ruleltirakl er a Jesus el chemiis. A Jesus a mle bleketakl el dmu er tir el kmo, ngkirir el mereched el merael el diak lolai a ngii di lengerang. (Monguiu er a Matteus 24:17, 18.) Me sel rechedir el merael a mle klou a ultutelel. E ngera uchul? Ngdi mle chelsel a sesei el klebesei, e a Rezealot a liluut el mei, e mlo orrimel er a rechad er a Jerusalem me a Judea el mo teloi er tir el oumekemad. Me tiang a mlo uchul a klou el ringel, me ngmlo meringel er tir el chemiis. Me sera lluut el mei a resoldau er a Rom er a rak er a 70 er a uriul er a Kristus, e ngdikea rolel e lechiis. (Lukas 19:43) Me tirke el kiliei a mlad! E tirke el Kristiano el ullengesenges er a Jesus e chiliis el mo er a rois, a silobel. Me te mlo medengei el kmo a Jehovah a meduch el olsobel er a rechedal. Ngera kede suubii er tiang?

¹⁶ Sel taem er a klou el ringel e a Rekristiano a kirir el mo orrenges a ulekrael el mei el okiu a Tekingel a Dios me a cheldebechelel. El ua tiang, a Jesus a milengelechel er a ruleltirakl er ngii el mo ‘chemiis el mora rois.’ Me kid a dirrek el mo ngmai a ulekrael el kirel a “chiis” er a taem er a klou el ringel. Kede mekerang e ‘chemiis’? Ngdiak dodengei, engdi ngulterekokl a rengud el kmo a Jehovah a mo meketakl a rokui er sel taem me bo lsebeched el oltirakl. * Me a osobeled a mo ultuil er a blekongesenges er kid a uchul, me ngkired el melatk a ker el kmo: ‘Ngerang a uldesuek el kirel a ulekrael el omeskak a Jehovah er chelechang? Ak mereched el mo oltirakl me a lechub e ngdiak?’​—Jakobus 3:17.

SMISICHID EL KIREL A MERAEL EL MEI EL TEKOI

17. Ngera kede suubii er a ulochel a Habakuk el kirel a odechelakl er a rechedal a Dios?

¹⁷ Deluut el mo mesaod er sel mekemedil a Kok. El ua Esekiel, a Habakuk a dirrek el milsaod er sel taem er a ledu el kmo: “Ak urrenges a ikal rokui ma kumritel; a berdel a ngerek omritel er a dakt. Ng mechitechut a bedengek, ma ochik a motetab. Ak mo chelellakl e mengiil er sel taem a le mei, el le mei e a Dios a mo omals er tirkel oldechelakl er kemam.” (Habakuk 3:16) Sera lerenges el kmo a odechelakl er a rechedal a Dios a meremang, e ngkmal mlo medakt me ngmlo mechitechut a bedengel. Me a omerellel a ochotii el kmo kid me kede dirrek el mo medakt sel dodengei el kmo a odechelakl er a rechedal a Kok a meremang. Me nguaisei, engdi a profet a uluutekangel “e mengiil” er sel klou el sils er a Jehovah, el uluumerang el kmo ngmo olsobel er a rechedal. Me ngsebeched el mo oba osisiu el klaumerang.​—Habakuk 3:18, 19.

18. (a) Ngera uchul me ngdiak demedakt er a merekung el odechelakl? (b) Ngera kede mo mesaod er a ongingil el suobel?

¹⁸ Aika el edei el tekoi el dilubech a meketeklii el kmo a Jehovah a kmal meduch el olsobel er a rechedal. Ngulterekokl el mo tmaut a moktek er ngii, e dirrek el mo kats er a recherrouel. Me a lsoad el mo mesang a Jehovah el mo kats, e ngkirel el mo blak a rengud el mo lmuut er a ulebongel. Ngmekerang a Jehovah e ngosukid el melemolem el blak a rengud er chelechang? A ongingil el suobel a mo mesaod er ngii.

[Footnote]

[Aike el Ker er a Suobel]