Dosiou er a Jehovah er a Rengud el Rokir

“Rungalek . . . , bo modengelii a Dios er a demam, e mosiou er ngii er a rengum el rokir.”​—1 KRONIKA 28:9.

MOSIIK A NGER ER AIKA EL KER:

A rengud ngomtechei er a ngerang?

Ngera ta er a rolel e ngsebeched el merriter er a rengud?

Ngmekerang a dosiou er a Jehovah el oba rengud el rokir?

1, 2. (a) Ngera sel klekedellel a bedenged el blechoel el ousbech er ngii a Biblia? (b) Ngera uchul me ngklou a ultutelel el bo dodengelii a belkul a tekoi el rengud?

 A BIBLIA a blechoel el ousbech a kakerous el klekedellel a bedenged el omekesiu a tekoi. El ua tekingel a Job el kmo: Ng “diak kchelsechusem er a ngii di le ulecheracheb.” A King el Salomon a dilu el kmo: “Ma ungil chais a sisichii a bedengem.” E a Jehovah a dilu er a Esekiel el kmo: “Ak mo rullau el kuk mo mesisiich er a ngii di le bad.” Me a apostol el Paulus a mluchelechel el kmo: “E kolsiseb a ngodech el tekoi ra dingemam.”​—Job 16:17; Osisechakl 15:30; Esekiel 3:9; Rellir 17:20.

² Ngar er ngii a klekedellel a bedenged el leblechoel el ousbech er ngii a Biblia el omekesiu a tekoi. E tiang a medung er a nglunguchel a Hana el kmo: “A [Jehovah] a mla mekekii a renguk er a deurreng.” (1 Samuel 2:1) A remilluches er a Biblia a ousbech er a tekoi el chaidireng el bekord el ta el telael taem, engdi ngblechoel el lusbechall el mesaod er a rengul a chad. Ngklou a ultutelel el bo dodengei el kmo ngera belkul a tekoi el rengud, e le Biblia a melekoi el kmo ngcheblad me ngkired el kerekikl el mengkar er ngii.​—Monguiu er a Jeremia 17:9.

A RENGUD NGOMTECHEI ER A NGERANG?

3. Kede mekerang e mo medengelii a belkul a tekoi el ‘rengud’ el ngar a Biblia?

³ Alta e a Biblia a diak lebeskid a belkul a tekoi el ‘rengud,’ engdi ngsebeched el mo medengelii a belkul. El mekerang? Ngkired el omes aike el betok bades el llechukl er ngii a tekoi el ‘rengud’ me bo dodengelii a mera el belkul. Me tia el ‘rengud’ ngomtechei er a ngerang?

4. (a) A tekoi el ‘rengud’ ngomtechei er a ngerang? (b) Ngera belkul a tekingel a Jesus el ngar er a Matteus 22:37?

 ⁴ A remilluches er a Biblia a ousbech er a tekoi el ‘rengud’ el mesaod a rokui el blekerdelel a chad, el uldimukl er a urungulel, uldesuel, blekerdelel, duch er ngii, moktek, me a turrekong er ngii. (Monguiu er a Osisechakl 13:12; Isaia 10:7; Rellir 2:26.) Engdi ngar er ngii a taem el tekoi el ‘rengud’ a diak lomekesiu aika el rokui. El ua tekingel a Jesus el kmo: “Bo le betik a rengum er a [Jehovah] el Dios er kau er a rengum el rokir, ma klengar er kau el rokir, ma uldesuem el rokir.” (Matteus 22:37) Ngar tia el bades, e a tekoi el ‘rengud’ a di mesaod aike el ngar er a rengul a chad. A Jesus a milengelechel er kid el mo olecholt er a bltkil a rengud el mo er a Dios, el okiu a rolel a klengar er kid me a uldesued me aike el ngar er a rengud. (Johanes 17:3; Efesus 6:6) Engdi a lsekum a Biblia a di ousbech er a tekoi el ‘rengud,’ e ngmelutk el kirel aike el rokui el blekerdelel a chad.

A UCHUL ME NGKIRED EL MO KEREKIKL ER A RENGUD

5. Ngera uchul me ngsoad el mesiou er a Jehovah el oba rengud el rokir?

⁵ A King el David a ulemeklatk er a Salomon el kmo: “Bo modengelii a Dios er a demam, e mosiou er ngii er a rengum el rokir ma uldesuem el rokir. A [Jehovah] a merriter a bek el reng e medengei a bek el uldesuel ma telbilel a reng.” (1 Kronika 28:9) A Jehovah a Ngike el merriter a rengrir a rokui el chad, el uldimukl er kid. (Osisechakl 17:3; 21:2) Me a deleuill er kid el obengkel me klengar er kid er a ngar medad a ultuil er aike el tekoi el lomes er a chelsel a rengud. Me ngngar er ngii a ungil el uchul e ngkired el otireklii a uleklatk er a David el mo mesiou er a Jehovah el oba rengud el rokir.

6. Ngera me ngkired el mo kerekikl er a blakerreng er kid el mo er a Jehovah?

⁶ A blakerreng er kid el mesiou el chedal a Jehovah a ochotii el kmo ngsoad el mesiou er Ngii el oba rengud el rokir. Engdi a orimel er tia el mekngit el beluulechad me a chelitechetul a klechad a mesisiich el tekoi el sebechel el choitechetur a blakerreng er kid el mo er a Dios. (Jeremia 17:9; Efesus 2:2) Seikid a uchul me ngkired el mo kerekikl el merriter a rengud me lak bo lemechitechut. Ngmekerang a doruul er tiang?

7. Ngerang a ochotii a mera el blekerdelel a rengud?

⁷ Ngdiak a chad el sebechel el mesa chelsel a rengud, el ua chelsel a kerrekar el diak el sebeched el mesang. Me nguaisei, engdi a Cheldechedechal a Jesus er a lengar a rois a ochotii el kmo a chelsel a kerrekar a sebechel el medangch el okiu a rdechel. Me ngdi osisiu, a omerelled a ochotii el kmo ngua ngerang a chelsel a rengud. (Matteus 7:17-​20) Me bo dosaod.

TA EL ROLEL A DORRITER A RENGUD

8. Kede mekerang e ochotii a ngar er a rengud el oltirakl er a Matteus 6:33?

⁸ A Jesus a uluuchais er a rulerrenges er ngii er a tekoi el mle kirir el meruul a lsekum ngsorir el mesiou er a Jehovah er a rengrir el rokir. Ngdilu el kmo: “Momuchel losiik ra rengedel a Dios ma llemeltel, ma ika le medchel el rokui lekor kemiu.” (Matteus 6:33) Me nguaisei, aike el meklou a ultutelel el tekoi er a klengar er kid a mo ochotii el kmo a urunguled me a uldesued me a rengud ngua ngerang. Me sel dekerekikl el merriter a tekoi el doruul e ngmeketeklii el kmo kede mesiou er a Dios el oba rengud el rokir.

9. Ngera mle okedongel a Jesus el mo er a rebebil, e a omerellir ngullecholt er a ngerang?

⁹ Ka molatk er a blekeradel el dilubech er a uriul er a Jesus er a ledu er  a rulebengkel me bo losiik er a Renged el kot. Tia el blekeradel a ochotii el kmo ngsebeched el mo medengelii a rengul a chad el okiu aike el meklou a ultutelel el tekoi er a klengar er ngii. A Lukas a ouchais el kmo a Jesus a “tilbir ra rengul” el mo er a Jerusalem, alta e ngmle medengei el kmo ngera mo duubech el mo er ngii. “Me tial le ngar a rael,” e a Jesus a milengemedaol er a rebebil el kmo: “Mei me mobengkek.” Tirka el chad a kilengei er a okedongel, engdi ngmle sorir el mo meruul a bebil el tekoi er a uchei. A ta er tir a dilu el kmo: “A kot e bechikak me bo kdeklii a demak.” E a kuk tang a kmo: “Ngsoak el obengkem e Rubak, ngdi kot e mkengei me bo kulmesumech er a telungalek er ngak.” (Lukas 9:51, 57-​61) Ngsebeched el mesang a klekakerous er a blakerreng er a Jesus me tirke el mechitechut a rengrir el chad! Me a blekerdelir el ngilai a tekoi er a klechad el mo er uchei er a Renged, a ochotii el kmo ngdimlak el kltmokl el mo mesiou er a Dios el oba rengrir el rokir.

10. (a) Ngera kede mla rullii el kirel a okedongel a Jesus? (b) Ngera el okesiu a lulsaod er ngii a Jesus?

¹⁰ A omerelled a kuk ngodech er a omerellir tirka el chad. Kede mla kongei er a okedongel a Jesus me chelechang e kede mesiou er a Jehovah er a bek el sils. Sel doruul el uaisei, e kede ochotii el kmo ngua ngera rengud el bedul a Jehovah. Me alta e ngblak a rengud er a omesiunged, engdi ngkired el mo kerekikl a tekoi el sebechel el choitechetur a rengud. Tiang ngera el tekoi? Ngar er a osisiu el tekingel a Jesus el mo er tirka el chad, e ngmilengelechel el kmo: “Ngikel omuchel el mesib e di mechechisngekl el bedul uriul a diak lungil el kirel a Rengedel a Dios.” (Lukas 9:62) Ngera kede suubii er tia el okesiu?

KID KEDE “BEREKED RA UNGIL”?

11. Ngera dilubech er a urerel a chad er a sers el ngar a okesiu er a Jesus, e ngera uchul?

¹¹ Ka me detelkib el mesaod er a okesiu er a Jesus, me bo dungil medengelii a belkul. A chad el oureor er a sers a blak a rengul el mesib. Ngdi mle telkib e ngmocha melatk er a blil, telungalek er ngii, resechelil, chelitakl, dereuakl me a ungil el cheluut, me ngmocha oureng aika el tekoi. Me ngdi mle telkib el mesib, e a urungulel er aika el ungil el tekoi a kmal mocha mesisiich, me ngchilsngekl el “bedul uriul.” Me alta e ngdirk klou a ureor el medechel, engdi ngika el chad a mocha mechesang me ngdikea lungil el meruul er a urerel. Me ngulterekokl a mastang er ngii el mo mekngit a rengul, e le ngdimlak loutekangel el rullii a urerel.

12. Ngmekerang a Kristiano er chelechang e sebechel el mo ua blekerdelel a chad el ngar okesiu er a Jesus?

¹² Ka molatk er a osisiu el tekoi el sebechel el duubech er chelechang. A chad el oureor er a sers a sebechel el omtechei er a Kristiano el ua lungil a omesiungel engdi ngmechitechetong a rengul. El ua tiang, ka molatk er a odam el mo er a miting e mo oldingel a obliil, engdi osisiu el taem ngdi melatk a bebil el tekoi er tia el beluulechad el kmal soal, me ngmelemolem el oureng er ngii. Me ngmelemolem el mesiou el sese el rak, engdi aika el urungulel a kmal mesisichang me ngobult e mocha omes el “bedul uriul.” Me alta e ngdirk klou a ureor el medechel, engdi ngmo mechesang a uldesuel me ngmo diak lungil mesiou er a Dios el ua lurruul er a uchei. (Filipi 2:16) Me a Jehovah el “Rubak ra sim” a kmal mekngtei rengul er a omerellel, e le ngdimlak loutekangel.​—Lukas 10:2.

13. Ngera belkul a dosiou er a Jehovah el oba rengud el rokir?

 ¹³ A suobel a kmal bleketakl. A dosiou er a Jehovah er a rengud el rokir a diak di loeak sel debo er a miting e domerk er a klumech, e ngdirrek el uldimukl er a lmuut el bebil er a tekoi. (2 Kronika 25:1, 2, 27) A lsekum a Kristiano a melemolem el omes el “bedul uriul” el blechoel el melatk er a rolel a klengar er tia el beluulechad, e ngklou a techellel el mo oridii a kengei er a Dios. (Lukas 17:32) Me a lsoad el mesiou er a Jehovah el oba rengud el rokir e ngkmal kired el ‘ouketui a mekngit, e mo bereked ra ungil.’ (Rom 12:9; Lukas 9:62) Me kid el rokui a kmal kired el mo kerekikl, me lak debechei a ngii di el tekoi el ua lungil er tia el beluulechad er a Satan me bo luchul e lechitechetur a blakerreng er kid el kirel a omesiunged.​—2 Korinth 11:14; monguiu er a Filipi 3:13, 14.

MOLEMOLEM EL KLEKAR!

14, 15. (a) Ngmekerang a longitechut er a rengud a Satan? (b) Ka msodii sel uchul me ngkmal kdekudel a chelebeldil a Satan?

¹⁴ A bltkil a rengud el mo er a Jehovah a uchul e kede tilbir a rengud el mo mesiou er ngii. Me sel taem el me er chelechang e a rebetok er kid a melemolem el mesiou er a Jehovah el oba rengud el rokir el kemanget el taem. Me nguaisei, engdi a Satan a dirkak lemeterob el melasem el mengesuseu er a rengud. (Efesus 6:12) Ngungil el medengei el kmo ngdiak el sebeched el mereched el choitii a Jehovah. Me ngousbech er “tia el belulechad” el mekekokil el mengesuseu er kid el mo cheroid er a Dios. (Monguiu er a Markus 4:18, 19.) Ngera uchul me ngkmal oureor a chelebeldil a Satan?

¹⁵ A okesiu a ngosukid el mo medengelii a uchul. Oleko ke menguiu er a babier e ngmedul a 100 watt el tama er a dengki me ngmocha milkolk. Me ke mtechir er a beches el tama me nglmuut el mo mellomes. E a bo lekukuk, e ke menguiu el ousbech er a osisiu el dengki, engdi ngdiak modengei el kmo a chad a mla mtechir el ousbech er a 95 watt el tama er a dengki. Ngsebechem el mtebengii a klekakerous er ngii? Nglocha diak. E kuk mekerang a lsekum a chad a lmuut  el mtechir er a 90 watt el tama? Nglocha dirkak bo el sebechem el mtebengii. E ngera me ngdiak? A dichel a dengki a mekekokil el merael el mo mengemengemed me ngmeringel er kau el melechesuar. Me ngdi osisiu, a omengesuseu er tia el beluulechad er a Satan a sebechel el mekekokil el mengitechut er a blakerreng er kid. Me tia el omeruul a ua de dul el kmo a Satan a mengitechut er a 100 watt el blakerreng er kid el mesiou er a Jehovah. Me a lsekum a Kristiano a diak el kerekikl, e ngdi diak lolechesuar e mechitechetong a blakerreng er ngii.​—Matteus 24:42; 1 Petrus 5:8.

A NGLUNGUUCH A KLOU A ULTUTELEL

16. Kede mekerang e omekerreu er kid er a chelebeldil a Satan?

¹⁶ Kede mekerang e omekerreu er kid er a chelebeldil a Satan e melemolem el blak a rengud el mo er a Jehovah? (2 Korinth 2:11) A nglunguuch a klou a ultutelel. Me a Paulus a millisiich er a rekldemel el mo “dechor el mtekengelii a ulekbat ra diabelong.” Ngdirrek el milengelechel er tir el kmo: “Bo blechoel meluluuch e molengit a bek el blekeradel longit el meluluuch.”​—Efesus 6:11, 18; 1 Petrus 4:7.

17. A nglunguchel a Jesus ngosisecheklid er a ngerang?

¹⁷ Ngolechotel a llomeserreng a doukerebai er a blakerreng er a Jesus el mo er a Jehovah me bo lsebeched el dechor el omtok er a Satan. Ka molatk er a tekingel a Lukas el kirel sel rolel a loluluuch a Jesus er sel kesus er a uchei er a kodellel el kmo: “Ng kmal mlo chuarm er a ringel me ng mengal mlo blak a rengul el meluluuch.” (Lukas 22:44) A Jesus a mle blechoel el blak a rengul el meluluuch, engdi ngar tiaikid el taem el blo lechelebangel er sel kot el klou el ongarm er a klengar er ngii er tia el chutem, e “ng mengal mlo blak a rengul” el meluluuch, me a nglunguchel a mlonger. A kerebil a Jesus a ochotii el kmo ngkakerous a blekerdelel a nglunguuch. Me a lsekum kede mo chemau a kmal meringel el ongarm el oeak a chelebeldil a Satan, e ngkired el ‘mengal mo blak a rengud’ el meluluuch el olengit er a ulekerreuil a Jehovah.

18. (a) Ngera el ker el kirel a nglunguuch a kired el melatk er ngii, e ngera uchul? (b) Ngera el tekoi a ngar er ngii a lerellii er a rengud, el okiu a ngera el rolel? (Momes er a baks er a 22 el llel.)

¹⁸ Me a chouaika el nglunguuch, ngerang ngrullii el kired? A Paulus a kmo: “Di moba chomereng el saul loldars a nglunguuch ma chongit ra bek el tekoi el subedii a Dios ra ikel molengit. Ma diak le metuk ra klemedengei rar chad el budech ra Dios a mo kokar a rengmiu.” (Filipi 4:6, 7) Me ngklou a ultutelel el deblechoel el meluluuch el melisiich er a blakerreng er kid el mo er a Jehovah. (Lukas 6:12) Me a ker a kmo, ‘Ngua ngera kdemel me a delechel a nglunguchek?’ (Matteus 7:7; Rom 12:12) A nger er kau a ochotii a delechel a urungulem el soam el mesiou er a Dios.

19. Ngera ke mo meruul me bo el sebechem el mesiou er a Jehovah er a rengum el rokir?

¹⁹ El ua dulsaod er a uchei, aike el meklou a ultutelel el tekoi er a klengar er kid a ochotii a mera el blekerdelel a rengud. Ngsoad el mo kerekikl me lak debechei a ngii di el tekoi me a lechub e ngbedeklel a Satan, me bo longitechut er kid me lak dosiou er a Jehovah el oba rengud el rokir. (Monguiu er a Lukas 21:19, 34-​36.) Me bo deua David el melemolem el meluluuch el mo er a Jehovah el kmo: “Mrellii a renguk el mo meluu er a ngklem.”​—Psalm 86:11.

[Aike el Ker er a Suobel]

[Baks el ngar er a 22 el llel]

EDEI EL TEKOI EL NGAR ER NGII A LERELLII ER A RENGUD

El di ua doruul a tekoi el mo kerekikl er a chaidirengud, e ngdirrek el sebeched el meruul a tekoi el mo melisiich er a rengud. Me bo dosaod a edei el rolel:

1 Kall: A chaidirengud a ousbech a ungil el kall el melisiich er ngii. Me a omesuub a di ua kall el kirel a rengud, me ngkired el mo blechoel el mesuub er a Tekingel a Dios, e melebedebek, e mo er a miting, me bo lsebechel el mo mesisiich a rengud.​—Psalm 1:1, 2; Osisechakl 15:28; Hebru 10:24, 25.

2 Exercise: Ngkired el exercise me lolemolem el mesisiich a chaidirengud. Me ngdi osisiu, ngmo melemolem el mesisiich a rengud a lsekum e ngblak a rengud er a omesiunged.​—Lukas 13:24; Filipi 3:12.

3 Blekerdelel a klengar: A klengar er tia el mekngit el beluulechad a sebechel el mo uchul a secherel a chaidireng, ringelel a uldesued me a rengud. Ngsebeched el mengesadel a ringel sel deblechoel el teloi er a rudam me a rudos, el tir a betik a rengrir er kid e mesiou er a Dios el oba rengrir el rokir.​—Psalm 119:63; Osisechakl 13:20.