Molekeed er Kau er a Dios

“Mkengei Me Ki Mluut el Me Remei”

Kau ngmla ta el mosiou er a Jehovah? Ke melatk el soam el lmuut el mo mesiou er ngii engdi ngdiak modengei el kmo ngmo kongei er kau me a lechub e ngdiak? Bo mungil el menguiu er tia el suobel e le ngmileketmokl el kirem.

“A K MILLULUUCH el olengit er a Jehovah me lekengei er ngak el me remei e lousubes er ngak e le ktilemellii a rengul.” Aikang a mle tekingel a ta el redil el mlo cheroid er a rolel a klengar er a Rekristiano el lemlukeroul er ngii. Ngmo mekngit a rengum sel molatk er ngii? Ngmla ta el molatk el kmo: ‘A Dios ngua ngera uldesuel el kirir tirke el mla ta el losiou er ngii? Ngdirk melatk er tir? Ngsoal a lluut el me remei?’ Me a bo donger aika el ker, e me bo domes a tekoi el lulluches a Jeremia. A nger er aikang a ulterekokl el mo odeuir a rengum.​—Monguiu er a Jeremia 31:18-​20.

Ka molatk a tekoi el dilubech er a uchei er a temel a Jeremia. A Jehovah a kilengei er a teruich el kebliil er a Israel me te mengai el mo sibai er a Asiria er a rak er a 740 er a uchei er a Kristus. * A Dios a milecherei tia el tekoi me leduubech el ua lomellach el mo er a rechedal, e le te ulemuchel el meruul a oberaod el klengit e dimlak lorrenges aike el uleklatk er a reprofet er ngii. (2 King 17:5-​18) Tirka el chad te millodech a blekerdelir e le tir el mlo chelebangel a ringel er sera leblebaol e lecheroid er a Dios er tir me a belurir? A Jehovah ngulebes er tir? Nglmuut el mo kongei er tir me te me remei?

“Aki Chilid a Chiklam el Mekngit a Rengmam”

Tirka el chad a mlo medengei a mekngit el blekerdelir e mlo er a bult, e a Jehovah a milsa el kmo te mera el mirruul el uaisei. Momtab a tekingel a Jehovah er a losaod er a blekerdelir me a uldesuir a rechad er a Israel er a leblebaol.

A Jehovah a kmo: “Ak urrenges er a re chad er a Israel el oumekikngiterreng.” (18 el kekerei el bades) Ngulerrenges er a rechad er a Israel er a llangel el kirel aike el dilubech e le tir el mlo er a klengit. Te mle uai a ngalek el mlo er a klengit el melmesim er a bdelul sel lolatk aike el tekoi el blo lecharm e loureng er a di mla klengar er ngii er a uchei. (Lukas 15:11-​17) Ngera te millekoi a rechad?

“Aki mle ua ikel tebelik e kedidai a rengul sechal kerbou, ngdi kulsisecheklemam el olengesenges.” (18 el kekerei el bades) Tirka el chad a kilengei el kmo te uluusbech a omellach, el di ua kerebou el melsumes e le ngdimlak lolengesenges er a chad el lorrael er ngii. A ta el babier a mesaod er ngii el kmo, omko ngdimlak bo lomtok ngika el kerebou, e ngdiak bo lousbech a omesmechokl.

“Mngikemam el mo remei, me kimluut er a smecham; kau a [Jehovah] el Dios er kemam.” (18 el kekerei el bades) Te uleba ngariourreng e ullengit a ngeso er a Dios. Alta e te ririid e le ngklengit el lerirellii  a uchul, engdi chelechang e te ullengit a ngeso me bo el sebechir el lmuut el nguu a kengei er a Dios. A ta el oidel a Biblia a melekoi el kmo: “Kau a Dios er kemam​—mkengei me ki mluut el me remei.”​—Contemporary English Version.

“Aki chilid a chiklam el mekngit a rengmam. Aki mlukrur e mlotuub.” (19 el kekerei el bades) Tirka el chad a mlo ouuchel a rengrir el kirel a kngterir e kilengei el kmo te mlo er a klengit. Te dirrek el mlo merur e mlotuub.​—Lukas 15:18, 19, 21.

A rechad er a Israel a kmal uluuchel er a rengrir. Te mle mekngit a rengrir, e uluuchais a kngterir el mo er a Dios, e ulebult er a mekngit el omerellir. Me tiang rirellii a Dios el mo mekngit a rengul er tir? Ngmo kongei er tir me te lmuut el me remei?

“Ak Mo Chubkau”

A Jehovah a mla er ngii a ileakl el deleuill er ngii me a rechad er a Israel. Ngdilu el kmo: “Ak ua chedam el bedul a Israel, e a Efraim a kot el klou el ngelekek el sechal.” (Jeremia 31:9) Ngmekerang a betik a rengul el chedam a lak el kengei er a ngelekel el mla ouuchel a rengul er a kngtil? Momtab er a rolel a Jehovah a lolecholt er a uldesuel el ua Chedam el kirir a rechedal.

“Israel, kau a kmal cheleoch el ngelekek el sechal, el kot el betik er a renguk el ngalek. Me sel kdelii a ngklem, e ak melebedebek er kau el oba bltikerreng.” (20 el kekerei el bades) Aika el tekoi a mera el olecholt a klechubechub! Nguai a betik a rengul el chad el oungalek el mellach el oeak a bltikerreng, e a Dios a mle kirel el mellach er a rengelekel, e blechoel el omeklatk er tir el kirel a mekngit el omerellir. Me sera lebo el kedidai a rengrir e lak lorrenges, e ngmilechititerir me te mlo blebaol el mo cheroid er a belurir. Me alta e ngmle kirel el omals er tir, engdi ngdimlak lobes er tir. Ngkmal diak el sebechel el meruul el uaisei e le a betik a rengul el chedam a diak lobes er a rengelekel. Nguaisei, engdi ngmle ua ngerang a uldesuel a Jehovah er a lesterir a rengelekel el mo er a bult?

“A renguk a melatk er kau; ak mo chubkau.” (20 el kekerei el bades) A Jehovah a kmal melatk er a rengelekel, me sel lobult er a mekngit el omerellir, e ngkmal mo ungil a rengul e semeriar el mengiil er tir el lmuut el mei er ngii. Me nguai ngike el chedam el ngar sel okesiu el luluusbech er ngii a Jesus el kirel a ririid el ngalek, e a Jehovah a ‘mlo chubteterir’ a rengelekel e kmal mle soal a lluut el me remei.​—Lukas 15:20.

“Jehovah a Kilengei er Ngak Me Ak Me Remei!”

A tekoi el ngar er a Jeremia 31:18-​20 a ngosukid el mo medengelii a dmolech el klechubechub er a Jehovah. A Dios a diak lobes er tirke el mla ta el losiou er ngii. E mekerang a lsekum e ngsorir el lmuut el mo er ngii? A Dios a kltmokl el mo ousubes er tir. (Psalm 86:5) Ngdiak bo loltngakl er tirke el mla obult er a kngterir. (Psalm 51:17) Ngbai kmal dmeu a rengul el outkeu er tir el me remei.​—Lukas 15:22-​24.

Ngike el redil el dulsaod er ngii er a uchei a kilengei el lmuut el mo er a Jehovah me ngmlo er a ongdibel er a Resioning er a Jehovah. A kot, e ngmle kirel el mo mesisiich er aike el mekngit el uldesuel. Ngmillekoi el kmo, “Ak mera el ulemelechesiu er ngak el ua lak a belkuk.” Engdi a remechuodel er a ongdibel a millisiich er ngii e ngilsuir el mo mesisiich a klaumerang er ngii. Ngoba klou el omereng el saul e melekoi el kmo, “Ngkmal ungil el tekoi e le Jehovah a kilengei er ngak me ak me remei.”

A lsekum e ngmla ta el mosiou er a Jehovah e melatk el lmuut el mo mesiou er ngii, e aki mengemedaol er kau el mo er a ongdibel er a Resioning er a Jehovah el ngar er a beluam. Lak mobes el kmo a Jehovah a kongei el olecholt er a klechubechub el mo er tirke el mla obult er a kngterir e olengit er ngii el kmo, “Mkengei me ki mluut el me remei.”

Omengiuel a Biblia er a Ongeua el Buil:

◼ Jeremia 17-​31

[Footnote]