Kau Ke Mengebkall er a Jehovah?

MORELII

Kau Ke Mengebkall er a Jehovah?

“Rubak el Dios er ngak, . . . ak mo mengebkall er a ngklem el mo cherechar.”—PSALM 86:12.

NGMEKERANG A OMONGER?

Kid el diak demecherrungel el chad, kede mekerang e kobkellii a Jehovah?

Ngmekerang a miting er kid me a nglunguched e ngosukid el mengebkall er a Dios?

Ngera mo ngosukid el melemolem el mengebkall er a Jehovah?

1, 2. Ngera uchul me ngsebechir a rechad el olecholt a blekerdelel a Jehovah?

KID a ngar er ngii a blekerdeled el osisiu er a blekerdelir a rechad er a blid. Ke locha mla rongesii a chad el melekoi er a ngalek el kmo, ‘Ke kmal di ua demam,’ me a lechub e ‘Ke kora mekltkak er a delam.’ A rengalek a blechoel el mesuub aike el lomes el blekerdelir a redemerir me a rederrir. E kid a mekerang? Ngsebeched el mesuub a omerellel a Demad el Jehovah? Alta ngdirkak desang, engdi kede mo medengei a ungil blekerdelel el okiu sel dosuub a Tekingel, e domes a blebelel, e dolebedebek a bades, el ileakl a tekingel me a omerellel a Ngelekel el Jesus Kristus. (Johanes 1:18; Rom 1:20) Ngsebeched el kobkellii a Jehovah sel doukerebai er Ngii.

² A uchei er a lobeob a Adam me a Eva, e a Dios a uluumerang el kmo a rechad a mo sebechir el meruul a soal e olecholt aike el blekerdelel e mo kobkellii. (Monguiu er a Genesis 1:26, 27.) Me kid el Kristiano a soad el olecholt aike el blekerdelel Ngike el ulemeob er kid, e tiang a ileakl techelled el mo kobkellii, alta ngkakerous a beluad, siukang er kid me a skuled. E ngera uchul? E le “Dios a diak longetukel rar chad, me tirikel meluu ra Dios e meruul a llemalt a le ngiiteterir ra bek el beluu.”—Rellir 10:34, 35.

3. Ngkirel el mo ua ngerang a uldesued sel dosiou er a Jehovah?

³ A rengellitel el Kristiano a mengebkall er a Jehovah. Me a apostol el Paulus el ta er tir a milluches el kmo: “Kede rokui, el diak el delekedokel a medad me deua dirk el olecholt er a klebkellel a Jehovah, e dengar er a klebkall el mo er a klebkall el mengodech el mo osisiu el teletael kid me a Jehovah.” (2 Korinth 3:18, NW) Me sera be lemetengel er a Rois el Sinai a Moses el olab a Teruich el llach, e a medal a mle dmiich e le ngdirk mlo merek el mengedecheduch er a Jehovah. (Exodus 34:29, 30) Me alta e a Rekristiano a dirkak lechermii a choua tia el tekoi, el mo dmiich a mederir, engdi ngsebechir a rechad el meseterir el dmeu a rengrir el ouchais el kirel aike el blekerdelel a Jehovah, me sel ungil el moktek er ngii el kirel a klechad. A dengellitel me a lechub e kede ngodech el sib, me kid a ua dirk el olecholt er a klebkellel a Jehovah er a klengar er kid me a omesiunged. (2 Korinth 4:1) Kau ke mengebkall er a Jehovah el oeak a omerellem me a omesiungem, el ta er a rumerk er a klumech er a Renged?

NGSOAD EL MENGEBKALL ER A JEHOVAH

4, 5. (a) Kede ua Paulus el kired el oltngakl a ngera el tekoi? (b) Ngera ngrullii er kid a klengit?

⁴ Kid el mesiungel a Jehovah a uchul me ngsoad el meruul a rokui el tekoi el mo mengebkall er ngii. Engdi kede blechoel el mo cheleuid, alta ngsoad el meruul a llemalt. A Paulus a dirrek el mle uaisei. (Monguiu er a Rom 7:21-25.) Ngkired el oureor el mengoit aike el mekngit el uldesued. A Paulus a dilu el kmo: A “rokuil chad a mlora klengit, ma uchul e ngdiak el sebechir el nguu a klebkellel a Dios.” (Rom 3:23) A kngtil a Adam a uchul, me kid el rokui a mechell el chederedall er a klengit.—Rom 5:12; 6:12.

⁵ Ngerang a klengit? A klengit a ngii di el tekoi el diak loltirakl aike el soal a Jehovah, me a blekerdelel me a rolel. Ngtomellii a deleuill er a chad el obengkel a Dios. A klengit a rullid me ngmo diak dongebkall er a Jehovah el di ua chad er a balech el diak el sebechel el melechii sel soal lomalech er ngii. Me kid a sebeched el durengud el mo er a klengit e a lebebil ngdiak el durengud. (Ulecherangel 15:27-31) A klengit a mesisiich el mengesuseu er a rechad e mengeroid er tir er Ngike el Ulemeob. (Psalm 51:5; Isaia 59:2; Kolose 1:21) Tiaikid a uchul me a rolel a klengar er a rebetok el chad a cheroid er a Dios me ngdiak a techellir el olecholt er a klebkellel. Me a klengit a kot el klou el chelitechetul a klechad.

6. Ngmekerang e sebeched el kobkellii a Dios alta ngdiak demecherrungel?

⁶ Kede di mechell el ngar er a klengit, engdi a Jehovah a mla meskid a omelatk. (Rom 15:13) Ngmla kutmeklii a rolel e kede mengubet er a klengit el okiu a olubet el tengetengel a Jesus Kristus. Me ngoeak a klaumerang er kid er tia el tenget, e ngdikea “de sibil a klengit,” me ngsebeched el mengebkall er a Jehovah. (Rom 5:19; 6:6; Johanes 3:16) A dolemolem el sechelil a Dios e ngmo omekngeltengat er kid er chelechang, e a uriul e ngmo meskid a cherrungel el klengar er kid me kede mo kiei el mo cherechar. Me alta ngdirkak bo demecherrungel, engdi ngklou el chetengakl e le Dios a mla meskid a techelled el mengebkall er Ngii!

MENGEBKALL ER A DIOS

7. Ngkired el mo ungil el medengei a ngerang me bo el sebeched el kobkellii a Dios?

⁷ A lsoad el mengebkall er a Dios, e ngkired el mo ungil el medengei el kmo kede di mlechell e ngar er a klengit. (2 Kronika 6:36) Me a derta er kid a kirel el mo medengei e oureor el mesmechokl aika el chelitechetud, me bo el sebeched el ungil el kobkellii a Dios. A lsekum kede mo er a klengit el omes a siasing er a remeau, e ngkired el mereched el mo olengit a ngeso er a remechuodel. (Jakobus 5:14, 15) Tiaikid a kot el tekoi el kired el meruul er ngii a lsekum e ngsoad el mo mengebkall er a Dios. Me ngkired el melemolem el merriter a blekerdelel a klengar er kid me bo el sebeched el kiei el oltirakl a soal a Jehovah. (Osisechakl 28:18; 1 Korinth 10:12) Me ngkired el melasem el mengikiid er kid er a ngii di el chelitechetud me bo el sebeched el mera el kobkellii a Dios.

8. Ngera kired el meruul, alta ngdiak demecherrungel?

⁸ Ngdi ta el Jesus a kiliei el meruul a tekoi el odeuir a rengul a Dios e mle cherrungel el mengebkall er Ngii. Alta ngdiak demecherrungel el ua Jesus, engdi ngkired el mo oukerebai er ngii. (1 Petrus 2:21) A Jehovah a medengei el kmo ngblak a rengud el melasem el mengebkall er ngii, me ngmo ngosukid el olengeriakl.

9. Ngmekerang a Biblia e ngosukid el mo mengebkall er a Dios?

⁹ A Biblia a ngosukid el mo medengei a rolel e ngsebeched el mo ungil el kobkellii a Dios. Me ngkired el mo blak a rengud el menguiu er a Biblia e melebedebek aike el tekoi er a chelsel. (Psalm 1:1-3) Sel donguiu er a bek el sils e kede mo medengei aike el tekoi el kired el melodech er a klengar er kid. (Monguiu er a Jakobus 1:22-25.) Aike el dosuub a melisiich a klaumerang er kid me sel urunguled el soad el odeuir a rengul a Jehovah. Ngdirrek el smisichid me diak demekesuseu el mo meruul a klengit.—Psalm 119:11, 47, 48.

10. Ngmekerang a nglunguuch e ngosukid el mo ungil el mesiou er a Jehovah?

¹⁰ A lsoad el mengebkall er a Dios, e ngkired el “diblechoel meluluuch.” (Rom 12:12) Ngkired el olengit er a Jehovah me lengesukid el mo ungil el mesiou er ngii. Ngsebeched el olengit er ngii el mo melisiich a klaumerang er kid e oltngakl a ongetikaik, e lebeskid sel oureor el klisichel, e olengit er ngii me lengesukid el mo “melemalt loleisech a tekoi ra klemerang.” (2 Timoteus 2:15; Matteus 6:13; Lukas 11:13; 17:5) Ngkired el ultuil er a ngeso er a Demad el Jehovah el di ua ngalek el oumerang er a demal. Sel dolengit me lengesukid el mo ungil el mesiou er ngii, e ngulterekokl el mo ngosukid. Ngdiak el kired el omdasu el kmo a nglunguched a mengesang er ngii. Ngbai kired el oldanges er ngii e mereng a sulel, e blechoel el osiik a ulekrael er ngii el ileakl sel dechelebangel a omelsemai, e dirrek el olengit me lengesukid el mo mengebkall er a chedaol el ngklel.—Psalm 86:12; Jakobus 1:5-7.

11. Ngmekerang a miting e ngosukid el mo mengebkall er a Dios?

¹¹ A Dios a mla msang a “blak a rengul e mellomes a rengul mesiou” a ngerachel el mo omekerreu er a delebechel el sib er ngii. (Matteus 24:45-47; Psalm 100:3) A blak a rengul el mesiou a kmal soal el ngosukid el mo mengebkall er a Jehovah. Me aika el miting er kid a meketmokl el ngosukid el mo ungil el Kristiano, el di ua chad er a omerasm el rosmii a biled el lmuut el mo ungil. (Hebru 10:24, 25) Me doutekangel el mechir a temel a miting, e le a lsekum kede mo meoud, e ngmo diak dengai a mui el ngeso el oltobed.

BO DOUKEREBAI ER A DIOS

12. Kede mekerang e oukerebai er a Dios?

¹² A lsoad el mengebkall er a Jehovah e ngkired el oukerebai me a lechub e kede “melasem el mo ua ingii.” (Efesus 5:1) Kede oukerebai er a Jehovah sel domes a tekoi el uai ngii. Sel doruul a tekoi el di oltirakl a uldesued el diak loltirakl er a uldesuel a Dios, e ngmo uchul a otuub el mo er Ngii e dirrek el melemall er kid. Kid a kiei er a beluulechad er a Satan a uchul me ngkired el meringel el oureor el mo ouketui aike el louketui a Jehovah e mo betik a rengud aike el tekoi el soal. (Psalm 97:10; 1 Johanes 5:19) Ngkired el mui el oumerang el kmo a di ta el rolel a dosiou er a Jehovah a sel doruul a rokui el tekoi el mo mengebkall er ngii.—Monguiu er a 1 Korinth 10:31.

13. Ngera uchul me ngkired el ouketui a mekngit? E tia ngrullid el mo mekerang?

¹³ Ngkired el mo ua Jehovah el ouketui a mekngit. A douketui a mekngit, e kede mengeroid er kid er a ngii di el tekoi el sebechel el mo uchul e kede mo er a klengit. El ua tiang, ngkired el mengeroid er kid er tirke el omtok er a mera el omengull, el tir a diak longebkall er a Dios. (Duteronomi 13:6-9) Ngkmal kired el mo cheroid er a reuaisei el chad me a tirke el melekoi el kmo te odam, engdi ngdiak longebkall er a Dios, el uldimukl er a rechedad el meruul a osisiu el tekoi. (1 Korinth 5:11) Ngdiak bo luchul a klungioled a dongaititekangel er tirke el omtok er a mera el omengull me tirke el oltuub er a cheldebechelel a Jehovah. Ngkmal diak el soad el mo medengei a tekingir el ngar er a babilengir me a internet, e le ngsebechel el tomellii a deleuill er kid me a Jehovah.—Monguiu er a Isaia 5:20; Matteus 7:6.

14. Ngera ta er a kot el ngarbab el rolel e kede oukerebai er a Jehovah? E ngera uchul?

¹⁴ A kot el ungil el rolel a doukerebai er a Jehovah a oeak sel bo deua ngii el olecholt er a bltikerreng. (1 Johanes 4:16-19) A bltikerreng er a delongeled a ochotii el kmo kede disaiplo er a Jesus e mesiungel a Jehovah. (Johanes 13:34, 35) Kid el diak demecherrungel a uchul me ngmo meringel er kid el olecholt er a bltikerreng, engdi ngkired el melasem el oubltikerreng er a bek el taem. Sel doubltikerreng e dolecholt a ungil el blekeradel, e kede mo meduch el mengikiid er kid er a mekngit el uldasu me a omeruul.—2 Petrus 1:5-7.

15. A bltkil a rengud el mo er a rechad ngrullid el mo mekerang?

¹⁵ A bltikerreng a rullid me ngsoad el meruul a ungil el mo er a rechad. (Rom 13:8-10) El ua tiang, a bltikerreng er a delongelir a rubekel a mo uchul e ngdiak lebo er a laokreng. A lsekum e ngbetik a rengud er a remechuodel e oba omereng el saul el kirel a urerir, e kede mo oltirakl a ulekrael el lomeskid. A rengalek el betik a rengrir er a redemerir me a rederrir a mengull e olengesenges er tir e diak lolekoi a mekngit el kirir. Me a bltikerreng er kid el mo er a rechad a rullid me ngdiak lemetengel a osenged er tir me a lechub e di demeterekakl el mengedecheduch er tir. (Jakobus 3:9) E a remechuodel el betik a rengrir er a delebechel el sib er a Dios a mo ungil el omekerreu er tir.—Rellir 20:28, 29.

16. Ngmekerang a bltikerreng a ngosukid el mo ungil el merkii a klumech?

¹⁶ A bltikerreng a dirrek el kirel el mocholt er a chelsel a omesiunged. A bltkil a rengud el mo er a Jehovah a uchul me kede melemolem el omerk er a ungil el chais, e kutmeklid me bo el sebeched el ungil el olisechakl a Tekingel a Dios. Ngdirrek el rullid me ngdiak bo lemechitechut a rengud a lsekum a rechad a diak el sorir el orrenges me a lechub e ngdiak lesemeriar. A lsekum e ngmera el betik a rengud er a Dios me a retonari er kid, e ngdiak domes er tia el urered el ua lengerachel me a lechub e ngureor. Ngbai kired el omes er ngii el mekreos el techall e oba deurreng el meruul er ngii.—Matteus 10:7.

MOLEMOLEM EL MENGEBKALL ER A JEHOVAH

17. Ngkired el mekerang me bo el sebeched el ungil el kobkellii a Dios?

¹⁷ A ruumesingd el chad a diak lodengelii a berredel a klengit. Engdi kid a medengelii a uchul me ngkired el oltngakl er sel blekerdeled el soad el meruul a klengit. Kede medengei el kmo ngkired el omeksau a ukltked el meruul a llemalt, me bo el sebechel el ngosukid er sel taem el bocha domdasu a mekngit. (Rom 7:22, 23) Me alta e kede mechitechut, engdi a Jehovah a sebechel el smisichid el mo meruul a llemalt er a chelsel a ngii di el meringel el blekeradel.—2 Korinth 12:10.

18, 19. (a) Ngera ngosukid el mo mesisiich er a Satan me a remekngit el anghel er ngii? (b) Ngera kede tibir el mo meruul er ngii?

¹⁸ Kid el soad el mengebkall er a Jehovah a uchul me ngkired el omtok er a Satan me a remekngit el anghel er ngii. Me ngsebeched el mo mesisiich er tir sel debilid er a “cherrungel klekedall ra mekemad” el lebeskid a Dios. (Efesus 6:11-13) A Satan a meruul aike el sebechel me bo luchul e lak lemukebkall a Jehovah. Ngdirrek el melasem el melemall er a deleuill er kid el obengkel a Jehovah. Engdi ngkmal klou el chelebulel a Satan sel lolemolem el blak a rengrir el mengebkall er a Dios a rebetok el miliol el diak lemecherrungel el sechal me a redil me a rengalek! Mada me dolemolem el oldanges er a Jehovah el ua rechanghel el melekoi el kmo: “Rubak e Dios er kemam, ikau a redemelel a nguu a klebkall, ma chomengull, ma klisiich, ele kau a mileob a rokuil tekoi, ma rokuil tekoi a ngarngii luleltirakl a uldesuel a rengum e ulebeob.”—Chocholt 4:11.

¹⁹ Me bo dolemolem el mengebkall er a Jehovah er a chelsel a ngii di el blekeradel. Ngkmal dmeu a rengul el meseterir a rebetok el blak a rengrir el chedal el melasem el oukerebai er ngii e dirrek el mengebkall er ngii. (Osisechakl 27:11) Ngkired el mo ua David el milengitakl el kmo: “Ak mereng a sulem e Rubak el Dios er ngak, el oba renguk el rokir, ak mo mengebkall er a ngklem el mo cherechar.” (Psalm 86:12) Me kede mera el mengiil er sel taem el mo sebeched el cherrungel el mengebkall er a Jehovah e oldanges er ngii el mo cherechar! A bekongesenges el klechad a mo chormii tia el deurreng. Me kau, ke mengebkall er a Jehovah el Dios er chelechang, e melatk el meruul er ngii el mo cherechar?

[Aike el Ker er a Suobel]

[Aike el siasing el ngar er a 31 el llel]

Kau ke meruul aika el tekoi el mengebkall er a Jehovah?

A ONGKERONGEL