Moba Tabesul Osengem er a Chelsel a Merengela el Chebechiil
Moba Tabesul Osengem er a Chelsel a Merengela el Chebechiil
“E tirkel kuk bechiil a kungelechel er tir er a tekoi el diak le tekingek, ng tekingel a Rubak.”—1 KORINTH 7:10.
NGSEBECHEM EL MESAOD?
Ngokiu a ngera el rolel e a Dios a omak a chebechiil?
Te mekerang a remechuodel e ngosuterir a rebechiil er a mondai er tir?
Ngkirel el mo ua ngerang a osenged el kirel a chebechiil?
1. Ngua ngera osengel a Kristiano el kirel a chebechiil? E ngera uchul?
SEL lebo lebechiil a Rekristiano, e te rullii a telbilir er medal a Dios. E tiang a kmal klou el ngerachel. (Olisechakl 5:4-6) A Jehovah a Ngike el kiltmeklii a chebechiil, me ngii a omak a chebechiil. (Markus 10:9) Me a chebechiil a ulak er a osengel a Jehovah el diak lultuil a siukang me a llach er a beluu. Me tirke el mlo bechiil er a uchei er a bo el mesiungel a Jehovah a dirrek el kirir el oba osengel a Dios el kirel a chebechiielir.
2. Ngera el ker a bo dosaod er tia el suobel?
2 A ungil el chebechiil a uchul a klou el deurreng. Engdi kede mekerang a lsekum e ngmo meringel a chebechiil? Ngsebechel el lmuut el mo mesisiich? Ngerang a sebechel el ngosuir a merengela el chebechiil?
NGMO UNGIL A CHEBECHIIL ME A LECHUB E NGDIAK?
3, 4. Ngera mo duubech a lsekum a chad a mekngit el melilt er a mo bechil?
3 A Rekristiano el ungil a chebechiielir a mo dmeu a rengrir e dirrek el mo uchul a odanges el mo er a Jehovah. E a bo el mekngit e ngmo uchul a klengiterreng. Me a Kristiano el melatk el mo bechiil a sebechel el lungil mechelii a chebechiielel sel loltirakl a ulekrael er a Dios. Engdi a mekngit el omelilt a sebechel el mo uchul a ringel me a chelebuul. El ua tiang, a rebebil el ngeasek a kasisiik, alta ngdirkak bo el kltmokl el mo bechiil. Me a rebebil a mereched el mo bechiil el okiu a Internet, engdi ngdiak a deurreng er a chebechiielir. A rekuk bebil a ruebet er a klengit sel lekasisiik e melilt el mo bechiil, engdi te omuchel er a chebechiielir el diak a omengull er a chelsel.
4 A Rekristiano el diak bo lebechiil el “ngara Rubak” a blechoel el mo chuarm e le rebecherir a diak losiou er a Jehovah. (1 Korinth 7:39) Me a lsekum e ke ngar er a chelsel tia el blekeradel, e moluluuch el mo er a Dios el olengit a klausubes me a ngeso. A Jehovah a diak lorrob a ringel el mei el mekngit el omelilt a uchul, engdi ngngosuterir tirke el mera el ouuchel a rengrir el mo outekangel. (Psalm 130:1-4) Bo er a tkurrebab el sebechem el oldeu er a rengul a Dios, me a ‘deurreng el le beskau a Jehovah a mo melisiich er kau.’—Nehemia 8:10.
SEL LEBO LEMEKNGIT A CHEBECHIIL
5. Ngera el tekoi a diak el kirel a bechiil el chad el melatk, alta ngmekngtei a chebechiielel?
5 Tirke el mocha mekngit a chebechiielir a locha mo melatk el kmo: ‘Ngsoak el melisiich er tia el chebechiielek? Ulekum ak bai mlo bechil a ta er a chad!’ Te locha melatk el mengoit er a rebecherir me te kmo: ‘Ngsoak el mo mededaes! Ngsebechek el dortii a chebechiielek? A lsekum ngdiak, e nglocha sebechel el mo dmeu a renguk a ki bo mchacheroid.’ Ngdiak lungil a lomdasu a Kristiano el uaisei, ngbai kirel el osiik a ulekrael er a Dios e oltirakl er ngii.
6. Ka msodii a tekingel a Jesus el ngar er a Matteus 19:9.
6 A lsekum a bechiil el Kristiano a dortii a chebechiielel e nglocha dikea el sebechel el mo bechiil el oltirakl er a bades. A Jesus a dilu el kmo: “Ngikel mengoit ra bechil el diak el laokerreng a uchul, e mo bechil a ngodech el redil, a mocha ra laokerreng.” (Matteus 19:9) A “laokerreng” el losaod er ngii tia el bades a uldimukl er ngii a ngii di el rolel a deleboes el omeruul. A Kristiano a kmal kirel el meluluuch el olengit er a ulekrael er a Dios a lsekum e ngmocha melatk el merort er a chebechiielel, el diak el deleboes el omeruul a uchul.
7. Ngera mo uldesuir a rechad el kirir a rubekel el Kristiano el metemall a chebechiielir?
7 A metemellang el chebechiil a sebechel el olechotel a kmo ngmechitechut a deleuill er a chad el obengkel a Dios. Me a apostol el Paulus a uleker el kmo: “A chad el metitur el dorderii a blil ngmekera e sebechel lokedmeklii a eklesia ra Dios?” (1 Timoteus 3:5) Me a lsekum a rubekel el Kristiano a metemall a chebechiielir e a rechad a sebechir el mo omdasu el kmo a omerellir a diak loltirakl a osisecheklir.—Rom 2:21-24.
8. Ngolechotel a ngerang a lsekum a rubekel el Kristiano a mo chacheroid?
8 Ngulterekokl el ngar er ngii a telemellel a deleuill er a rubekel el obengkel a Jehovah a lsekum te melatk el mo chacheroid me a lechub e te merort er a chebechiielir el diak a ungil el uchul el oltirakl er a bades. Me ngbleketakl el ta er tir me a lechub tir el terung a diak loltaut a omellach er a Biblia er a chelsel a klengar er tir. A lsekum te ‘moumeral ulsirs er a [Jehovah] el oba rengrir el rokir,’ e ngmo sebechir el sumecheklii a chebechiielir el mo ungil.—Monguiu er a Osisechakl 3:5, 6.
9. Ngera el omeksaul a lengilai a rebebil el Kristiano el uluutekangel e mesmechokl er a chebechiielir?
9 Betok el chebechiil el mle sebechel el metemall a liluut el mo ungil. A Rekristiano el outekangel er a meringel el chebechiielir a mo ngmai a omeksaul. Ka molatk a tekoi el sebechel el duubech er a delengchokl el kakerous a klechelid er ngii. A apostol el Petrus a milluches el kmo: “Me kemiu el bechiil el redil me ng kiriu el dirrek el uaisei, el mo orrenges a tekingir a re bechemiu, ma le ngar ngii er tir a diak loumerang a tekingel a Dios, e lak a ngeral molekoi, e bai di bo loeak a ungil el blekerdeliu el obult el mo oumerang, ele te mo omes el kmo kom meral mengull e ungil omerelliu.” (1 Petrus 3:1, 2) Me a ungil blekerdelel a chad a sebechel el rullii a diak loumerang el bechil el mo kongei er a klemerang! Me a Rekristiano el sumechokl a chebechiielir a mo mengebkall er a Dios, e dirrek el mo uchul a klou el klengeltengat el mo er tir el obekel me a rengalek.
10, 11. Ngera el mondai a sebechel el duubech er a chelsel a chebechiil? E a Kristiano ngmo ngmai a ngeso er ker?
10 A ruumesingd el Kristiano a melilt er a mla metecholb el Kristiano el mo becherir e le ngsorir el oldeu er a rengul a Jehovah. Engdi a mondai a dirrek el sebechel el duubech er a delongelir. Ngsebechel el mo er ngii a secherel a uldesuel a tang, me a lechub e ngmo diak loldingel a obliil. El ua tiang, a blak a rengul el Kristiano e ungil el chedil el Linda * a kmal mlo mekngit a rengul er a lesa bechil el mocha meruul a klengit e dimlak lobult me ngmilsuld a ngklel. Ngmo mekerang a Kristiano a lsekum a chebechiielel a dikea el sebechel el mesmechokl?
11 Ke locha mo melatk el kmo: ‘Ngak ak melasem el mesmechokl er a chebechiielek er a chelsel a ngii di el mondai?’ Ngdiak a chad el sebechel me a lechub e ngkirel el melilt a tekoi el kirem. Engdi ngar er ngii a ungil el uchul e ngkirem el outekangel el melisiich er a mechitechetong el chebechiielem. A Kristiano el outekangel er a meringel el chebechiil, el diak bo lecheroid er a bechil e melemolem el klikiid a ukltkel, a mekreos er a osengel a Dios. (Monguiu er a 1 Petrus 2:19, 20.) A Jehovah a ousbech er a Tekingel me a oureor el klisichel el melisiich er a Kristiano el melasem el mesmechokl er a meringel el chebechiielel.
TE KLTMOKL EL NGOSUKAU
12. Ngmo ua ngerang a uldesuir a remechuodel sel bo dolengit a ngeso er tir?
12 Sel lebo er ngii a mondai er a chebechiielem, e ngsebechem el olengit a ngeso er a remeklou el chad el Kristiano. A remechuodel el mesiou el ua mengkerengel a sib a mo dmeu a rengrir el meskau a ulekrael el ousbech a Biblia. (Rellir 20:28; Jakobus 5:14, 15) Lak momdasu el kmo ngmo diak a omengull er tir el bedul kau me a bechim a lsekum e ko mo olengit a ngeso el kirel a mondai er a chebechiieliu. A bltikerreng me a omengull er tir a bai mukeroul e le te omes er kemiu el mera el oltirakl a soal a Dios.
13. Ngera el ulekrael a medung er a 1 Korinth 7:10-16?
13 A remechuodel sel lolengeseu er a Rekristiano el kiei er a delengchokl el kakerous a klechelid er ngii, e ngsebechir el ousbech er a uleklatk er a Paulus el kmo: “E tirkel kuk bechiil a kungelechel er tir er a tekoi el diak le tekingek, ng tekingel a Rubak, el kmo a redil kele longoit ku er a bechil, (e ngdi le chitii, e ng kirel el melemolem el diak le bechiil, ma lechub e ng mo sumechii a delongelel ngii ma bechil e lmuut er ngii,) ma sechal me kele lorort er a chebechielel. . . . Ke mekera e mo medengei, kau el Kristiano el dil el kmo ke mo osebelii a bechim; me kau el Kristiano el sechal, ke mekera e mo medenge el kmo ke mo osebelii a bechim?” (1 Korinth 7:10-16) Ngkmal klou el klengeltengat a lsekum a diak loumerang el buch a mo mesiungel a Jehovah!
14, 15. Ngoingerang e a Kristiano el bechiil a melatk el mo cheroid er a bechil? Ngera uchul me ngkirel el meluluuch e mo ungil el merriter er a uldesuel?
14 Ngera sebechel el mo uchul me a bechiil el redil a mo cheroid er a bechil? A rebebil a melilt el mo cheroid er a rebecherir e le tir el dimlak losiou er a delengcheklir, e meringel el mengelebed e oldechelakl er tir, me ngmo diak a techellir el mesiou er a Dios.
15 A omelilt er a chad el mo cheroid er a bechil a di mo ultuil er ngii. Me nguaisei, engdi a Kristiano a kirel el meluluuch e mo ungil merriter er a uldesuel. El ua tiang, ngike el diak loumerang el buch, ngmerrob er a Kristiano el bechil me ngmo diak el sebechel mesiou er a Dios? Me a lechub e ngii el Kristiano a dimlak leblak a rengul el mesuub er a Biblia e dimlak lebo er a miting e dimlak loldingel a obliil?
16. Ngera uchul me a Kristiano a diak el kirel el mereched el merort er a chebechiielel?
16 A deleuill er kid el obengkel a Dios a kmal mekreos me kede oba omereng el saul el kirel a sengk el chebechiil a uchul, me ngdiak el kired el mereched el merort er a chebechiieled. Me kid el mesiungel a Jehovah a uchul me kede kerekikl a tekoi el doruul me lak bo el motuub a chedaol ngklel a Dios. Tiaikid a uchul me ngdiak dosiik a rolel e dongoit er a bechid me bo el sebeched el kuk mo bechil a ta er a chad.—Jeremia 17:9; Malakai 2:13-16.
17. Ngoingerang e ngsebeched el melekoi el kmo a Dios a omekedong er a rebechiil el Kristiano el mo er a budech?
17 A Kristiano, el bechil a diak loumerang a kirel el melasem el melisiich er a chebechiielel. Engdi ngdiak el kirel el mo mekngit a ukltkel a lsekum a diak loumerang el bechil a mla mo chetil el bechiil. A Paulus a dilu el kmo: A “lsekum ngikel diak le Kristiano a soal el mo cheroid, e bechere me bo le cheroid. E a bocha le ua isei, e ngikel sechal ma lechub e ngikel dil el Kristiano a mededesa er a chebechielel. Ele Dios a mla mekedongemiu el mo kiei el ngar a budech.”—1 Korinth 7:15. *
MOUMERANG ER A JEHOVAH
18. Ngera sebechel el meketmokl sel dolasem el melisiich er a chebechiieled, alta ngmo medort er a uriul?
18 Sel lebo er ngii a mondai er a chebechiieled, e ngkired el meluluuch el olengit a omelisiich e mo mui el oumerang er a Jehovah. (Monguiu er a Psalm 27:14.) Ka molatk er a Linda el dulsaod er ngii er a uchei. Ngmillasem el melisiich er a chebechiielel el betok el rak e a uriul e ngmildort. Me ngmlo omdasu el kmo ngdimlak a ultutelel a blakerreng er ngii? Ngdmu el kmo: “Ngmla er ngii, e le blakerreng er ngak a mle ungil el ocholt el mo er a rechad, me ngklikiid a ukltkek. E a ngaruchei el tekoi a mle sebechel a ngelekam el redil er sel taem el melemolem el ngar er a klemerang. Me ngmlukeroul el mo blak a rengul el mesiungel a Jehovah.”
19. Ngera sebechel el duubech a lsekum a chad a blak a rengul el melisiich er a chebechiielel?
19 A Kristiano el Marilyn a kmal ungil a rengul, e le nguluumerang er a Dios e mle blak a rengul el melisiich er a chebechiielel. Ngdmu el kmo: “Ngmla er ngii a taem el mlo soak el choitii a bechik, e le ngdimlak losiou er ngak, me ngmlo meringel er ngak el mesiou er a Jehovah. A uchei e a bechik a milsiou el ta er a remechuodel, engdi ngmlo mechesang er a tekoi er a siobai. Ngmlo diak lengar er a miting e mlo diak ki mchadecheduch. Ngmlo er ngii a odechelakl er a reterrorist er a belumam me ak kmal mlo medakt el omais. Ak mlo medengei el kmo ngdirrek el ngar er ngii a kngtik. Me aki ulemuchel el chadecheduch e liluut el mo dmak el mesuub e mo ngar er a miting. A remechuodel a kmal mle ungil a omerellir el ngilsukemam. Me a chebechiielam a liluut el meleketek, e a uriul e ngliluut el mo er ngii a ngerechelel a bechik er a ongdibel. Me a meringel el tekoi el dilubech a mlo uchul a klungiaol er a uriul.”
20, 21. Ngera kired el meruul el kirel a chebechiil?
20 A debechiil me a demesobil, me ngdi kirel el mo klou a rengud e oumerang er a Jehovah. Me a lsekum e kede mo chelebangel a mondai er a chebechiieled e ngkirel el mo blak a rengud el mesmechokl er ngii e diak dobes el kmo a rebechiil a “dikea le terung, e te bai mla mo tal chelechad.” (Matteus 19:6) Ngkmal mo ungil a rengud a lsekum kede outekangel a mondai el obengkel a bechid el diak loumerang e a uriul e ngmo mesiungel a Jehovah.
21 Me ngar er a chelsel a ngii di el blekeradel e a omerelled a kirel el ungil el ocholt el mo er a rechad el ngar er a ikrel a ongdibel. Me a lsekum ngmerengela chebechiieled me kede mocha melatk el mo cheroid er a bechid, e ngkired el ungil el merriter er a uldesued. Ngdirrek el kirel el mo blak a rengud el meluluuch, e melebedebek a Bades, e olengit a ngeso er a remechuodel. E sel kot el ngarbab er ngii el rokui, a kired el oldeu er a rengul a Jehovah el Dios e oba klou el omereng el saul el kirel tia el kmal ungil el sengk er ngii el chebechiil.
[Aike el Footnote]
^ A ngakl a mlengodech.
^ Momes er a 219-221 el llel a babier el “Keep Yourselves in God’s Love” me a 18-20 el llel er sel May 1989 el Ongkerongel.
[Aike el Ker er a Suobel]
[Blurb el ngar er a 20 el llel]
A Rekristiano el outekangel er a meringel el chebechiielir a mo ngmai a omeksaul
[Blurb el ngar er a 22 el llel]
Moluluuch el olengit a omelisiich e bo mui el oumerang er a Jehovah
[Siasing el ngar er a 19 el llel]
A Jehovah a omekngeltengat er a Rekristiano el melasem el melisiich er a chebechiielir
[Siasing el ngar er a 21 el llel]
A rechad er a ongdibel a sebechir el mengelaod e melisiich er kau